Read idege 1 IPITA 4 Bible Online

1 IPITA 4 - idege bible

1 IPITA 4

¹Jaabwọ ká ịKịrayịsị ayịdang yẹ akama nya ugbinyịrọ nyamwụ lẹ, anụ́-ụ juwa me irya dahịhile yẹkẹẹ, ịwa nyị tịtị ka yẹ akama nya ugbinyịrọ nyịwa lala ịKịrayịsị ịnyịnyị mẹ. Chajị, ọng myị́ ọng ọlẹ kọ yẹ akama nya ugbinyịrọ ịịwẹ lẹ aalẹ, ọngọọwa bala ọhọbịrị ọhọhọ á kaa bá ịngịngịhyẹ bá la kpong-kpong kaka.

²Chajị nya ọọwa, bwu alẹ ọlẹ kele kịlahị, anụ́-ụ juwa hịhị ba irya irya nya Ohe Oluhye jẹ kem mẹ. Anụ tụtụm ba imyi nya ịnyịrọ ọlẹ jẹ kpong-kpong kaka.

³Lụka nya ọhịhị ọkẹkpẹ nyanụ lẹ, anụ juwa kaa họ ụma nya ịhọbịrị ịlẹ kị kaa kpụ angị jẹ́ Ohe Oluhye-ka ịpyọ la ọhọhọ lụmẹ. Ọọwa, a nwa mẹ. Ụka onyogo ọọwa lẹ, anụ juwa kaa la ọhịhị nyanụ ẹ-ẹpwụ nya uhila ọlala ẹ-ẹpwụ nya ang inyibyi ịhọhọ wuu bala o-ri ọnyọhị nya imyi nya ịnyịrọ nyanụ bala o-ri ọnyọhị nya ere ọnwanwa juwa ya bala angị juwa la ọjịra-jịra nya ụya ọyaya onyobyi ọlẹ kanụ juwa kaa ri ang oriri okomba ịnyịnyịịnyị bala anụ o-juwa kaa wụrụ awụlẹ ẹpwa nya ere ọnwanwa kem. Ụka ọọwa, anụ juwa kaa bịrị ehile nya Ohe Oluhye bwula ijiga ịkpụ́kpụ nyanụ wuu.

⁴Ma, ọlẹẹlẹẹ lẹ, ọ la angị jẹ́ Ohe Oluhye ka ịwẹ ahịbwuu lụmẹ lụka kị yẹ jaabwọ kaanụ ayịdang á myị juwa ba abwẹla onyobyi ọhọhọ nyaa bala ọhịhị nya aruwoka ọlala nyaa ịwẹ jẹ kaka. Ịnyị a du kị kaa ya ala inyibyi rụ́ụnụ lẹ.

⁵Ma, ẹnụtụrụ ookpokpo juwa warị kịịwa ayịdang ka kpa ọnụ nya ịlaa wẹ ịtọ ị-ịlahị nya Ohe Oluhye Ọngọlẹ kọ ka la angịnyị ịhịhị bala angị gbugbu eje pyii wẹẹ.

⁶Ịnyị a du kị kpa ẹrụ ọnyịịla ọlẹ kele kaka ya je angịlẹ kị gbugbu lẹlẹ. Chajị, ẹ-ẹga ká ugbinyịrọ nya angịịwa ji lẹ, eje nya igu ogbugbu waa lala alodehe ịkịla wuu lẹ. Ma, ọ tị lịnyị chajị kị ka jẹ́-ẹ juwa hịhị ẹ-ẹpwụ nya olegu nyaa lala Ohe Oluhye ayịdang.

⁷Ụka nya ọmyịmyị nya odehe ọlẹ ju chwẹẹ lụmẹ lẹ! Lẹ, anụ cheri kanụ juwa kpa ẹla ọjẹ́jẹ họ ang myị́ ang nyanụ, kanụ juwa kpẹhị chịng nya ẹla yẹẹyẹẹ, chajị kanụ ka jẹ́-ẹ juwa raabwọ ha Ohe Oluhye kpụrụrụ mẹ.

⁸Ang ọgụgụ wuu ri yẹkẹẹ, anụ́-ụ la ọháha nya ịlẹhị-ịlẹhị ẹ-ẹga nya awụlẹ ụka wuu. Chajị, ọháha ọlala nya ịlẹhị-ịlẹhị ọlịnyị a kaa jẹ́-ẹ chịpyị ba ịhọbịrị ịhọhọ nya angịnyị ehe myị́ bwula ọhịnyọhi lẹ.

⁹Anụ cheri kanụ ri angị juwa kpa ọ-la yaya da awụlẹ ọwụraba wẹ ẹpwa nya ịlọnụ la ẹla ọmwọ ya kpong-kpong kaka mẹ.

¹⁰Ọng myị́ ọng lẹpwarịrị nyanụ a juwa kpa ọhaha ọnyị myị ọnyị ọlẹ ká Ohe Oluhye hu họọ, họ ụkụrwọ ọnyịịla ha angịkịla nyanụ wuu mẹ.

¹¹Chajị nya ọọwa lẹ, ọng myị́ ọng ọlẹ ká Ohe Oluhye á hu ọhaha nya ẹla oyaya myị́ ha aalẹ, ọngọọwa a cheri kọ juwa ya ang ọlẹ kọ ri irya nya Ohe Oluhye kem dodehe je angịnyị angịkịla mẹ. Ọ́ tị ri ẹrụ ọmyịmyị ká juwa ka myị lẹ aalẹ, aa juwa kpa ọngịrị ọlẹ ká Ohe Oluhye hu hang wuu lẹpwụ-lẹpwụ họ ụkụrwọ nyang ọọwa mẹ. Anụ́-ụ họ ịnyị chajị ká angịnyị wuu ka jẹ́-ẹ juwa gwogbo ha Ohe Oluhye u-uhye nya ang myị́ ang ọlẹ wuu kanụ ka juwa họ bwula iJisọsị ịKịrayịsị ọngọlẹ ká ogbo bala ọngịrị wuu juwa ha gbe oyi myị́ oyi mẹ. Amẹn.

¹²Anụ angị hám há, ụka ká ọmayẹ ọtụka á warị kaka da ọmyịmyị ọlala nyanụ uya aalẹ, ọ lanụ ahịbwuu lụmẹ ka, lala o-ri yẹkẹẹ, ang ọlẹ kọ la ụnụna nyaa họ wẹ ẹ-ẹga nyanụ ka.

¹³Ọkọkọ nya ọọwa lẹ, anụ́-ụ juwa chị ọkẹkẹnị yẹkẹẹ, ịwa nyị kiji juwa bá akama bá yẹ ta ịKịrayịsị lẹ mẹ. Chajị ká ọkẹkẹnị ọchịchị nyanụ ka lụmẹ nya ịlẹhị-ịlẹhị lẹnụtụrụ ohyẹẹkpẹ ọlẹ ká Ohe Oluhye ka chị ọngịrị ẹbyẹbyị nya ịKịrayịsị ehe mẹ.

¹⁴Ó ri ká angịnyị á juwa ya ala inyibyi baanụ ododu chajị nya ẹnyị nya ịKịrayịsị ọlẹ kanụ myị la lẹ aalẹ, anụ́-ụ jẹ́ mẹ. Anụ ri angịnyị nya ahị ọwawa lẹ. Ọọwa mẹjẹ yẹkẹẹ, Olegu Ịgọgọ ọlẹ kọ ri Ọngọ ẹbyẹbyị bala o-ri Olegu nya Ohe Oluhye ọlẹ kọ kaa ya ha ọngịnyị ehe lẹ, Ọ juwa tanụ ịnyịlẹhị lẹ.

¹⁵Ma, anụ myị ká akama ọyẹyẹ nya ọngọngọhẹ lẹpwarịrị nyanụ a ri chajị nya ọngịnyị ọnwụnwụ ka lee ịnya oyi oyiyi ka lee ịnya ọngọ gba-ju ka ẹpwụ nya ẹla nya angịkịla wurum ododu ka ịnyịnyị.

¹⁶Ma, ọ́ tị ri ká akama ọyẹyẹ nyanụ á ri chajị nya ẹnyị nya ịKịrayịsị ọlẹ kanụ myị la aalẹ, ọ lanụ oyoyi kpong-kpong ka. Ọkọkọ nya ọọwa lẹ, anụ́-ụ juwa ji Ohe Oluhye obe yẹkẹẹ, obobe lobe kịịwa nyị ri ịnya ịKịrayịsị ri lẹ mẹ!

¹⁷Chajị, ụka nya eje ọlala nya Ohe Oluhye pwụ eji lẹẹlẹẹ lẹ, angịnyị nya Ohe Oluhye kpangga, ị tị ka la eje ọọwa jene-jene lẹ. Ee lẹ, ó ri ká eje ọlala nya Ohe Oluhye ọọwa á ka dọmwụ bwu uhye nyahị ahị angịnyị nya Ohe Oluhye lẹ aalẹ, anyanyị, anụ tị́ me irya ká o-ya dodehe nya eje ọlala ọọwa ka la ẹ-ẹga nya angịlẹ wuu kị myị la ẹrụ ọnyịịla nya Ohe Oluhye kaka mẹ?

¹⁸Ọ la jaabwọ ká Ụpwụ Ịgọgọ ya ẹ-ẹgẹhẹ yẹkẹẹ, “Alabwẹla ọnyịịla ri alabwẹla ọnyịịla ayịdang lẹ, ọ ka la ujwo haa ene kị ka wu ọchịda nyaa ọyị myị́, lẹ, anyanyị, anụ tị́ me irya ká akama nya angị inyibyi ịlẹ kị jẹ́ Ohe Oluhye ka, tị tị ka lụmẹ kaka ba mẹ?”

¹⁹Chajị nya ọọwa lẹ, anụ angịlẹ wuu kanụ wẹẹ yẹ akama ẹ-ẹpwụ nya irya nya Ohe Oluhye ayịdang lẹ, anụ́-ụ juwa kpa ang ọnyịịla ọhọhọ mẹ ọkịlẹtụ o-hu ha Ohe Oluhye nyanụ jẹ mẹ. Kanụ hu ịlọnụ chụhị ha Ohe Oluhye lala ọwa ọngọ họnụ-ụ họ ọlẹ kọ kaa họ ọnụ ọmyịmyị nyamwụ jịra ụka wuu mẹ.