Read idege 1 IPITA 5 Bible Online

1 IPITA 5 - idege bible

1 IPITA 5

¹M jam gbile angịlẹ kị ri alegbeju ịkpẹhị rịrị ịchọọchị ịlẹpwụ nyanụ ụbwọ ụ-ụrụ nya ịlẹhị-ịlẹhị lala olegbeju ọ-lala ịwa-ịwa ọlẹ kam ri olibeenu nya akama ọyẹyẹ nya ịKịrayịsị lụka ọlẹ kọ jam odehe ọlẹ wẹẹ. M myịmyị ri ọngọ ka juwa ẹ-ẹpwụ nya ogu ọlẹ kọ ka bá ogbo ẹbyẹbyị nya ịKịrayịsị bá la tọọ lụka ọlẹ kọ ka chị ogbo ọọwa ehe ị-ịlahị.

²Anụ alegbeju angịgbikpịlọ nya Ohe Oluhye, anụ chuchuu kanụ juwa kpẹhị rịrị angịnyị nyanụ ịlẹ ká Ohe Oluhye ya jụnụ ụ-ụbwọ ya nyị kpẹhị rịrị ha ọwa yẹẹyẹẹ mẹ. Anụ juwa họ ụkụrwọ ọọwa la ọkịlẹtụ olilo ka. Ọkọkọ nya ọọwa lẹ, anụ́-ụ juwa họọ la irya ookpokpo jaabwọ ká Ohe Oluhye ayịdang tịtọ kanụ ka họọ mẹ. Anụ juwa họ ụkụrwọ nyanụ dahịhile ịkọbọ ịkọbọ ọlẹpwụ nyamwụ ka. Ma, anụ́-ụ juwa họ ụkụrwọ ọọwa ẹ-ẹpwụ nya ịpyọ ọ-kpụnụ kpụ nyamwụ mẹ.

³Anụ kpa ụbwọ ọnyọọngịrị kpa angịlẹ kanụ wẹẹ kpẹhị rịrị ha Ọngọlahị la ka. Ọkọkọ nya ọọwa lẹ, anụ́-ụ tụtụ juwa ri ụbajị o-me enyi ẹpwụ ha anyị ịkpịlọ nya Ohe Oluhye ẹ-ẹpwụ nya ang ọnyịịla ọhọhọ ụka wuu mẹ.

⁴Ó ri kanụ juwa họ ịnyị lẹ aalẹ, ẹnụtụrụ ọlẹ ká Olegbeju Ọgbahị Ọtụka nya angịgbikpịlọ nya Ohe Oluhye wuu ka warị, anụ ka la okpo ọkụrụ egbeju nya adịrahụ ọlẹ kọ kaa gbu enyi ẹnẹnẹhẹ kaka.

⁵Ịnyịnyị, ọ la hanụ anụ aluche lẹ, anụ angị ri anjwo a juwa kpa ịlọnụ keji ha angịgbahị nyanụ mẹ. Anụ myị ká olegu nya ịlọnụ ọ-kpa keji nya ịlẹhị-ịlẹhị a kụrụụnụ byịrịrị lala awụrụ ẹ-ẹpwụ nya ọhọhọ nyanụ wuu ẹ-ẹga nya awụlẹ mẹ. “Chajị, Ohe Oluhye kaa tụ alọbọọchẹ pyịpyị. Ma, Ohe Oluhye tị kaa họ angị dụmwọ ọnahị lụmẹ.” Ịnyị, Ụpwụ Ịgọgọ a ya lẹ.

⁶Chajị nya ọọwa lẹ, anụ́-ụ juwa kpa ịlọnụ keji ha Ohe Oluhye ọtụka ịnyịnyịịnyị mẹ, chajị ká Ohe Oluhye ayịdang tịtị ka jẹ́-ẹ huunu hwaa ka uhye lụka ọlẹ kọ pwoku mẹ.

⁷Anụ kpa imahị omeme nyanụ wuu kịla Ohe Oluhye mẹ. Chajị, Ọngọ họ ọbaba nyanụ wuu hanụ myị́, Ohe Oluhye ayịdang a ri lẹ.

⁸Anụ́-ụ juwa kpẹhị chịng nya ẹla, kanụ juwa kpẹhị ju ịlọnụ yẹẹyẹẹ ụka wuu mẹ. Ohe Onyobyi oluji nyanụ wẹẹ ga tụ ang-ang da lala ugẹbẹ ọlẹ kọ juwa da urwe nya ọngọlẹ kọ ka ye wu ri.

⁹Lẹ, anụ́-ụ juwa godayị rịrị giri-giri, kanụ juwa tụ Ohe Onyobyi ọọwa pyịpyị la ọngịrị-ọngịrị mẹ. Chajị, akama ọyẹyẹ ọọwa á ba ẹ-ẹga nyanụ anụ ụbwọọnụ kem ka. Ịnyịnyị-ịnyịnyị, angịnyị nya Ohe Oluhye ịkịla a wẹẹ yẹ akama ẹ-ẹga myị́ ẹga wuu lẹ.

¹⁰Ma, ụka kanụ tị yẹ akama ọọwa lụka o-kpii kpá, Ohe Oluhye Ọlọnahị ọtụka ọlẹ kọ be ẹkọ wụrụụnụ chị ịlọmwụ ọgụ, kanụ ka ri angị ka bá ogbo ẹbyẹbyị nya ịKịrayịsị bá la tọọ pyịyọọ pwụ ụka myị́ ụka lẹ, Ọwa ayịdang ka họ kanụ ka godayị giri-giri la ọngịrị kpọng-kpọng ụ-ụgbẹyị nya ọmyịmyị ọlala nyanụ wuu lẹ.

¹¹Ká ọngịrị nya eji ogbegbe [bala ogbo ogwogwo ha,] a juwa ha Ohe Oluhye nyahị ọọwa pyịyọọ pwụ ụka myị́ ụka. Amẹn.

¹²ISilivanọsị a lẹẹ da ụpwụ ochiche ọlẹ kam lẹẹ ya du wanụ ham lẹ. ISilivanọsị ọnyadam ọlẹ ri ọngịnyị nya Ohe Oluhye ọlẹ kam jẹ́ lala ọngọ chịla o-hu ọkịlẹtụ ha yẹẹyẹẹ. Am da ụpwụ ọlẹ warị kaka gbileenu ụbwọ ụ-ụrụ bala o-ya jenu gede-gede yẹkẹẹ, ala ịlẹ kam da wẹ u-uhye nya ọnahị nya Ohe Oluhye lẹ, ẹla nya ịlẹhị-ịlẹhị ịnyị. Lẹ, anụ́-ụ juwa godayị kpakpakpa ẹ-ẹpwụ nya ọnahị nya Ohe Oluhye ọọwa gogo mẹ.

¹³Ala ịchọọchị, angịnyị nya Ohe Oluhye ịlẹ kị jam ị-ịBabilọn, ịlẹ ká Ohe Oluhye chụchụ ha ịlọmwụ ịnyịnyị ya, am nyị da ọnụ chịnụ ha ịwa. ỊMakị ochiche nyam ya, am nyị da ọnụ chịnụ ha ọwa ịnyịnyị mẹ.

¹⁴Anụ́-ụ juwa wu awụlẹ bajẹ kanụ juwa ju awụlẹ ọnụ nya ọháha ọgẹnẹ-gẹnẹ nya angịnyị nya Ohe Oluhye mẹ. Ká okpunyi nya Ohe Oluhye a juwa tanụ, anụ angịnyị nya ịKịrayịsị wuu mẹ.