Read idege 2 IPITA 1 Bible Online

2 IPITA 1 - idege bible

2 IPITA 1

¹Am ịSayịmọn iPita ọlẹ kam ri ọnchẹ bala o-ri ọlẹrụ ọnyịịla nya iJisọsị ịKịrayịsị a lẹẹ da ụpwụ ọlẹ lẹ. M jam dọọ du wanụ anụ angịlẹ kanụ ye ọmyịmyị ọlẹ kọ la ịnya lụmẹ lala ịnyahị, bwula abwẹla ọnyịịla nya Ọngọlahị iJisọsị ịKịrayịsị ọlẹ kọ ri Ohe Oluhye nyahị bala Ọngọchịda nyahị.

²Ká ọnahị bala okpunyi nya Ohe Oluhye a juwa myịrị ka ịlahị-ịlahị ẹ-ẹpwụ nyanụ bwula ang ọjẹ́jẹ nyanụ chajị nya Ohe Oluhye bala ịnya iJisọsị ịKịrayịsị ka ịlahị-ịlahị nyanụ mẹ.

³Ohe Oluhye ayịdang kpa ọngịrị nyamwụ hu ang myị́ ang ọlẹ kọ ka dahị ụbwọ ẹ-ẹpwụ nya ọhịhị onyeewe nyahị ọlẹ bala jaabwọ kahị ka bwu ri ọngịnyị nya Ohe Oluhye yẹẹyẹẹ, bwula ang ọjẹ́jẹ chajị nyamwụ Ọwa Ohe Oluhye Ọngọlẹ kọ wụrụụhị kahị ka bá ogbo bala ụmụmẹ ọlala nyamwụ bá la tọọ lẹ.

⁴Ịnyị lẹ, Ohe Oluhye a hu ọ-họ jịra nya ọnụ ọmyịmyị ọlịnya ọtụka-ọtụka nyamwụ hahị jaabwọ kọ myị ọnụ ene-ene lẹlẹ. Chajị kanụ ka jẹ́-ẹ bwula ọọwa be hi ang inyibyi ịhọhọ ilodehe ịlẹ kị kaa nwụ angịnyị ehe imyi lụmẹ, chajị kanụ ka jẹ́-ẹ la abwụma nya Ohe Oluhye ayịdang myị́.

⁵Chajị nya ọọwa lẹ, anụ́-ụ cheri kanụ juwa ya abwẹla ọnyịịla ọhọhọ da ọmyịmyị ọlala nyanụ uhye mẹ. Kanụ juwa ya Ohe Oluhye ọjẹ́jẹ ka ịlahị-ịlahị da abwẹla ọnyịịla ọhọhọ uhye mẹ.

⁶Kanụ juwa ya ang ọ-họ ba o-oyi da Ohe Oluhye ọjẹ́jẹ nyanụ uhye mẹ. Kanụ juwa ya ugbodu ojuju ọlala ẹ-ẹpwụ nya akama da ịlọnụ o-wu kpa myị́ uhye mẹ. Kanụ juwa ya ọngịnyị nya Ohe Oluhye oriri kpẹẹkpẹẹ, da ugbodu ojuju ọlala nyanụ uhye mẹ.

⁷Kanụ juwa ya ọháha ọlala nya ịlẹhị-ịlẹhị ẹ-ẹga nya anyadanụ ịkịla, da ọngịnyị nya Ohe Oluhye oriri kpẹẹkpẹẹ uhye mẹ. Kanụ juwa ya ọgẹnẹ-gẹnẹ ọlala nya aanịna da ọháha ọlala nya ịlẹhị-ịlẹhị nyanụ uhye ịnyịnyị mẹ.

⁸Chajị, ó ri kanụ la ịngịịwẹ wuu, kanụ juwa kpaa họ ụkụrwọ kele ka ịlahị-ịlahị lẹ aalẹ, ị ka họ kanụ ka ri angị ta iri kpini-kpini kaka lee o-ri angị ju apyobwuna kpong-kpong kaka, lẹ ka, ẹ-ẹpwụ nya ang ọjẹ́jẹ chajị nya Ọngọlahị iJisọsị ịKịrayịsị pyịyọọ lẹ.

⁹Ma, ọng myị́ ọng ọlẹ kọ tị la ịngịịwẹ kaka lẹ aalẹ, ọ jẹ́ yọyị yẹẹyẹẹ kaka, lala olidu, ọngọọwa a ri lẹ. Aalẹ, ọngọọwa ayịdang deeri yẹkẹẹ, Ohe Oluhye nyị hụ́ ịhọbịrị inyogo nya ọọwa wuu hụrụ ene-ene lẹ.

¹⁰Chajị nya ọọwa lẹ, anụ anyadam ẹ-ẹpwụ nya ịKịrayịsị, anụ́-ụ cheri nya ịlẹhị-ịlẹhị kanụ juwa la ọhịhị ọlẹ kọ ka mẹjẹ yẹkẹẹ, Ohe Oluhye nyaa be ẹkọ wụrụụnụ bala ọ-chụnụ kaanụ nyị ka ri ịnyamwụ ịnyịlẹhị lẹlẹ mẹ. Chajị, ó ri kanụ juwa họ ịnyị lẹ aalẹ, ánụ tụtụm ka mileji hi ụgbẹyị nya ọmyịmyị ọlala nyanụ ọlẹ kaka.

¹¹Ọkọkọ nya ọọwa lẹ, anụ ka la iwe-ahụrụ ọ-pwọọ ọlẹ kọ ka kpanụ kaka jụ ka ẹpwụ nya ịpyị adịrahụ o-gbe oyi myị́ oyi nya iJisọsị ịKịrayịsị ọlẹ kọ ri Ọngọlahị la bala Ọngọchịda nyahị lẹ.

¹²Chajị nya ọọwa a du kam ka juwa kpụnụ ịtịya nya ala ịlẹ kam wẹẹ ya jenu ịnyịnyịịnyị ụka myị́ ụka lẹlẹ, ọ ri ịnyịlẹhị, ịnọ, anụ jáa jẹ́ kpá ene-ene lẹ. Anụ ayịdang tị godayị rịrị kpakpakpa ẹ-ẹpwụ nya ẹla nya ịlẹhị ọlẹ kanụ jéjé kpá ene-ene ịnyịnyị wuu lẹ.

¹³M jẹ́ kọ ri ang ọchịla-chịla ham kam ka juwa chịnụ ahị-une bwula ịtịya ọ-kpụnụ kpụ pyịyọọ u-uhye nya ala ịwẹ kele ka ịlahị-ịlahị jaabwọ myị́ abwọ kam ka ri ehe kaka ba odehe ọlẹ.

¹⁴Chajị, am ayịdang jẹ́ ká ụka nya ọrụrụ hi odehe ọlẹ nyam ju chwẹẹ lụmẹ, jaabwọ ká Ọngọlahị iJisọsị ịKịrayịsị ya jem ene-ene lẹ.

¹⁵Lẹ, am tịtọ kam ka jẹ́ myịmyị yẹkẹẹ, m ya ala ịlẹ danụ eji pyii lẹ. Chajị, ká ụka ọlẹ kam gbugbu kpá, kanụ ka jẹ́-ẹ juwa kpa ala ịịwa kpịtịya pyịyọọ myị́.

¹⁶Chajị ụka ọlẹ kahị juwa ya ang ọlẹ ká ọngịrị bala ọwẹwẹ ụka oheeye nya Ọngọlahị iJisọsị ịKịrayịsị ri lẹ, ujwo ojwojwo nya olijẹẹhị, ahị hụ chịng, juwa me ọnọọkịla nyamwụ junu ka. Chajị, ahị ayịdang kpangga a ri angị kpẹhị nyahị yẹ ogbo ọtụka-ọtụka nyamwụ ọọwa ịnyịlẹhị lẹlẹ.

¹⁷Chajị, ụka ọlẹ ká Ọngọlahị iJisọsị ịKịrayịsị juwa ye ihi ọlala bala ogbo ọtụka nyamwụ bwu ẹga nya Ohe Oluhye Adịda lụka ọlẹ ká omyi nya Ohe Oluhye Adịda nya Ogbo Ẹbyẹbyị Ọtụka, juwa ya ẹla tọọ lẹ, ahị juwa. Omyi ọọwa yẹkẹẹ, “Ọngọlẹ a ri Ọnyẹwẹ nyam ọlẹ ká ang myị́ ang nyamwụ wuu hám lụmẹ lẹ.”

¹⁸Ahị wo omyi ọọwa kọ juwa ya ẹla ta iJisọsị ịKịrayịsị bwu epwoohe la ụrụ nya ịlọhị ahị ayịdang, chajị, ahị juwa tọọ ọ-ọgbọdọ ọtụka ọlịgọgọ ọọwa.

¹⁹Ọmwụ ọyẹyẹ ọlẹ ká alọmwụ inyogo nya Ohe Oluhye yẹ ene-ene lẹ, ọ dọmwụ mẹjẹ gede-gede yẹkẹẹ, ang ịlẹ nyị lịnyị ịnyịlẹhị ịnyịnyị. Lẹ, anụ́-ụ juwa kpahị ju ẹla nya alọmwụ nya Ohe Oluhye ịịwa yẹẹyẹẹ, jaabwọ kị ka họ ẹ-ẹga nya otinika ọlẹ kọ juwa wuru ẹ-ẹpwụ nya ukpowu mẹ. Anụ́-ụ juwa họ ịnyị gbee pwụ ahị ọpyẹpyẹ nya Ọwẹwẹ nya Ọngọlahị la mẹ. Chajị ká ọdọchụ nya ewu-ụtụrụ nya Ohe Oluhye ọọwa ka jẹ́-ẹ hu ahịgboo ha ọkịlẹtụ nyanụ gede-gede mẹ.

²⁰Ang ọhọhẹ-ọhọhẹ ọlẹ kọ baba kanụ ka jẹ́ gụgụ wuu a lẹẹ lẹlẹ. Ọmwụ ọyẹyẹ ọlẹ kị da kpehe ụ-Ụpwụ Ịgọgọ wuu lẹ, ọhẹ-lọhẹ á juwa kọ bwula irya ọkụkụ bala ẹla ọjẹ́jẹ nya alọmwụ nya Ohe Oluhye ayịdang kpong-kpong ka.

²¹Chajị ọmwụ ọyẹyẹ nyaa ọhẹ-lọhẹ á bwula irya omeme nya alọmwụ ịịwa ayịdang la ịlaa kpong-kpong ka. Ma, ị yẹ ọmwụ ịịwa wuu dodehe, jaabwọ ká Olegu Ịgọgọ nya Ohe Oluhye juwa kpaa ya kem.