Read idege 2 IPITA 2 Bible Online

2 IPITA 2 - idege bible

2 IPITA 2

¹Lụka nya angịnyị nya Ohe Oluhye inyogo lẹ, alọmwụ ịnịịkịla ịhyẹ juwa ẹ-ẹpwarịrị nyaa. Ịnyịnyị-ịnyịnyị, ọ ka la lẹ, angịmẹjẹ ịnịịkịla ịhyẹ tịtị ka chị ịlaa ehe bwu ẹpwarịrị nyanụ ị-ịlahị. Ị ka juwa kpa ijẹẹhị mẹ ang ọjẹ́jẹ ụhwahị chajị nya Ohe Oluhye jẹ ọlẹ kọ ka ta ọmyịmyị ọlala nya angịkịla ayịreji. Ị dọmwụ ka juwa pwa Ọngọlahị iJisọsị ịKịrayịsị Ayịbaa ọlẹ kọ ra ihi nya ọchịda nyaa ene-ene rwarụ ịnyịnyị. Ọọwa lẹ, ị ka kpa ayịreji ọtata lụka ọ-mwaa wẹ uhye nya ịlaa bwula ọhọbịrị nyaa ọọwa lẹlẹ.

²Iru nya angịhyẹ ka juwa ba ọhịhị nya uhila nya ang onyobyi nyaa ọwẹ jẹ ịnyịnyị, gbee ká angịnyị ka juwa ya ẹla onyobyi rụ́ ụgbẹyị ọnyịịla nya Ohe Oluhye ọlẹ bwulaa.

³Bwula ẹhị ọ-chị nyanya lụmẹ nyaa, ị ka juwa me ịnịịkịla junu, chajị kị ka jẹ́-ẹ juwa ye ang bwu ẹpwụtụbwọ nyanụ ịnyịnyịịnyị. Ma, eje owuwu nyaa ịwa angịwẹ tị juwa kụ ịnya gbaa ene-ene lẹ. Ohe Oluhye á tị ka ya ẹla nya ayịreji ọtata nyaa ịwa angịlẹ nọ une pyịyọọ kpong-kpong ka ịnyịnyị.

⁴Chajị, ụka ọlẹ ká alegu-ẹrụ nya Ohe Oluhye ịhyẹ họ ang onyobyi bọọ lẹ, Ohe Oluhye á tụụbwọ hyaa chịng kpong-kpong ka. Ma, Ohe Oluhye wu iru nya alegu-ẹrụ ịịwa kpa kaka ju agba ẹ-ẹpwụ nya obwila ẹ-ẹga ọlẹ kị ka juwa ẹ-ẹpwụ nya ukpowu ọtụka pyịyọọ gbee pwụ ẹnụtụrụ nya eje ohyẹẹkpẹ-ẹkpẹ nya Ohe Oluhye.

⁵Ụka ọlẹ ká odehe nya angị inyogo ịlụka nya iNuwa pwa o-ju Ohe Oluhye ihi lẹ, Ohe Oluhye á tụụbwọ hyaa ododu kpong-kpong ka ịnyịnyị. Ma, Ohe Oluhye du ukpenyi ọtụka-ọtụka kaka ta odehe ọọwa bala angịnyị inyibyi ịlẹpwụ nyamwụ wuu ayịreji. Ụka ọọwa lẹ, iNuwa bala angịnyị angị irwiye ịkịla kẹnẹ-kẹnẹ, Ohe Oluhye a chịda kem lẹ. Ụka ọọwa lẹ, iNuwa ayịdang juwa ya ẹla nya Ohe Oluhye ju alodehe ọọwa ịnyịnyịịnyị rụ́ abwẹla ọnyịịla ọhọhọ nya Ohe Oluhye.

⁶Ụka ọlẹ ká ala ịSọdọm bala ala iGomora pwa o-ju Ohe Oluhye ihi lẹ, Ohe Oluhye ya eje waa. Ọ du ila kele kaka ta epweji nyaa ayịreji gbanggbang ịnyịnyị. Ọlẹ mẹjẹ yẹkẹẹ, ịnyịnyị, Ohe Oluhye a ka yẹ ọng myị́ ọng ọlẹ kọ myị juwa jwoo ihi kaka akama lẹlẹ.

⁷Ụka ọọwa lẹ, Ohe Oluhye chị ịLọtụ ọlẹ kọ ri ọlabwẹla ọnyịịla ụ-ụwa da. Ụka ọlẹ ká ịLọtụ juwa yẹ ọhịhị nya uhila nya onyobyi ọhọhọ nya angịwẹ lẹ, ọ chọọ ẹpwụ lụmẹ.

⁸Chajị, ụka ọlẹ ká ịLọtụ ọlabwẹla ọnyịịla ọwẹ juwa yẹ ọhịhị nya ehile nya Ohe Oluhye ọbịrịị-bịrị nya angị inyibyi lụka ká ịLọtụ kụ ụ-ụwa ẹ-ẹpwarịrị nyaa ẹnẹnẹẹnụ lẹ, ọ tọọ olujwo lụmẹ kaka kpoye.

⁹Ọlẹ mẹjẹẹhị jaabwọ ká Ohe Oluhye ayịdang kaa bwu gba angịlẹ kị ri angịnyị nya Ohe Oluhye kpehe bwu ẹpwụ nya ọmayẹ nyaa wuu. Ọlẹ ka myịmyị mẹjẹẹhị jaabwọ ká Ohe Oluhye ayịdang jẹ́ kaa bwu yẹ alabwẹla inyibyi akama ịnyịnyịịnyị kịnọọ gbee pwụ ẹnụtụrụ nya eje ohyẹẹkpẹ nyamwụ.

¹⁰Ọgụgụ wuu ri ẹ-ẹga nya angịlẹ kị ri ọnyọhị nya imyi nya imyi nya ịnyịrọ nyaa ọlẹ kọ kaa chị ọngịnyị ehe ịrị bala o-ri angịlẹ kị kaa yẹhị da ihi ojuju nya alegbeju ịkpẹhị rịraa bwee lụmẹ. Chajị, angịmẹjẹ ịnịịkịla ịwẹ kaa byẹjẹ ya ẹla onyobyi la uhi ojuju-ka. Ị kaa wu ẹhị nya ọngịnyị kpong-kpong ka. Ị ri angị hi ọbọọchẹ lụmẹ. Lẹ, ị́ kaa ju ihi nya o-juwa ya ẹla onyobyi rụ́ angị la ihi-ihi ịlẹ kị juwa e-epwoohe kpong-kpong ka.

¹¹Ma, alegu-ẹrụ nya Ohe Oluhye ịlẹ kị ri angị ịtụka riri gụ angịmẹjẹ ịnịịkịla ịwẹ ẹ-ẹpwụ nya iwe-ahụrụ bala ọngịrị ọlala wẹwẹ lẹ, alegu-ẹrụ ịịwa á kaa kele kaka wụrụ angịmẹjẹ ịnịịkịla ịwẹ eje ị-ịlahị nya Ohe Oluhye, juwa chị ala báa lido-lido kpong-kpong ka.

¹²Ma, angịmẹjẹ ịnịịkịla ịwẹ juwa kaa ya ala inyibyi rụ́ angịịlẹ kị jẹ́ ịngịngịhyẹ jéjé chajị nyaa kpong-kpong ka. I juwa họ abwẹla lala iyo ịlẹpwamẹ ịlẹ kị la irya ọhẹ-lọhẹ ka, kị juwa kaa họ ẹla ba imyi nya ịnyịrọ nyaa jẹ wurum-wurum ododu. Jaabwọ ká iyo ịlẹpwamẹ ịwẹ ri ang owuwu nwụ ododu wẹẹ, ịnyịnyị-ịnyịnyị, ayịreji ọtata a juwa kụ ọlọyị gbe angịmẹjẹ ịnịịkịla ịwẹ lẹlẹ.

¹³Lẹ, jaabwọ ká angịmẹjẹ ịnịịkịla ịwẹ juwa yẹ angịkịla akama lẹẹlẹẹ wẹẹ, ịnyịnyị-ịnyịnyị, Ohe Oluhye a tịtị ka yaa ịwa akama lụka ohyẹẹkpẹ kwiwa lẹlẹ. Ang ọlẹ kọ kaa kpụ angịmẹjẹ ịnịịkịla ịwẹ ịpyọ lụmẹ ri, o-juwa kaa la ọjịra-jịra nya ang ịnụ oriri bala ang ịkpịpyọ nya odehe oriri lụka nya ẹpwụ-ẹnụ. Lẹ, angịmẹjẹ ịnịịkịla ịwẹ juwa kaa kpa abyị ọkpụkpụ bala oyoyi warị wẹ ẹnyị ọnyịịla nyanụ anụ angịnyị nya Ohe Oluhye ịlam-ịlam. Chajị nyọlẹ kị juwa ri ang oriri tanụ e-epwedii nyanụ lụka ọlẹ kị tị juwa la ọhịhị nya ang ịkpịpyọ nya odehe oriri wẹẹ.

¹⁴Egbahị nya angịmẹjẹ ịnịịkịla ịwẹ myị la imyi nya ụya ọhọhọ kem. Chajị, ọhọbịrị ọhọhọ á kaa waa ẹpwụ myị́ kpong-kpong kaka. Ị juwa kaa kpa ijẹẹhị mwụ angịlẹ kị la gogo ẹ-ẹpwụ nya ẹla nya Ohe Oluhye ka ju, juwa kpaa kaka mileji hi ẹla nya ịlẹhị nya Ohe Oluhye. Ọkịlẹtụ nya angị mẹjẹ ịnịịkịla ịwẹ myị la ẹhị ọchịnyanya u-uhye nya ang nya angịkịla, chajị imajẹ ọlala ri ang ọ-báa ahị lẹ. Ịwa ayịdang ri angịlẹ ká ọlọ ọgaga nya Ohe Oluhye wuwu ene-ene lẹ.

¹⁵Angịmẹjẹ ịnịịkịla ịwẹ tụụbwọ hi ụgbẹyị ọnyịịla nya ọhịhị deeji, rụ hwahị ka obyibyi lẹ. Ị rụ ba ọgụ-ẹpẹtẹ onyobyi nya ịBẹlam ọlẹ kọ ri ọnyị nya ịBẹyọọ lẹ. ỊBẹlam ọwẹ ayịdang a ri ọngọlẹ ká okpoko oyeye kwiwa nya ang onyobyi ọhọhọ họ́ọ lụmẹ lẹ.

¹⁶Ịnyị lẹ, ụnyịrẹ nya ịBẹlam ọọwa a yalibyi lọọ u-uhye nyọlẹ ká ịBẹlam á myị ju Ohe Oluhye ihi kaka lẹlẹ. Ụnyịrẹ ọlẹ kọ la omyi nya ọngịnyị ehe la ka, a dachichi kpa omyi nya ọngịnyị ehe ya ẹla ẹnụ ọọwa, juwa hu ọlọmwụ ọwẹ abwọ hi ang ohideeji ọlẹ, ịnọ, kọ juwa ka họ lẹlẹ.

¹⁷Angịmẹjẹ ịnịịkịla ịwẹ juwa luhwo-luhwo lala ẹmwụ-enyi ọlẹ kọ kaa chị ọhụ kịra-kịra. Ịwa ayịdang myị la ụgbaa ọdada lala egbamwụ ịlẹ kị kaa kọ dọọ lala ohe nyaa juwa ka do enyi, ká igbachịwụ ọtụka tị kaa nyaa epepe wuu, du ká enyi á kaa do kaka. Ohe Oluhye ayịdang nwụla ẹga ọlẹ kọ chị owu kpem-kpem lala ẹkpẹlẹ nọ gbaa lẹ.

¹⁸Angịmẹjẹ ịnịịkịla ịwẹ juwa kaa kpa ogu ọchịchị o-gboo nya uchi ọchịchị nyaa bala ijẹẹhị nya uhila nya imyi nya ịnyịrọ ọlẹpwụ nyaa, pịrị angịnyị nya Ohe Oluhye inyeewe ịlẹ kị gba kpehe bwaaa bwu ẹpwụtụbwọ nya angịlẹ kị juwa hịhị ẹ-ẹpwụ nya ụhwahị, ju.

¹⁹Angịmẹjẹ ịnịịkịla ịwẹ juwa byi angị inyeewe ịịwa yẹkẹẹ, ẹ-ẹga nyịwa ịlọnụ ọlala nyaa ji lẹlẹ. Ma, angịmẹjẹ ịnịịkịla ịịwa ayịdang tị lẹ, anyịhị nya ang onyobyi ọhọhọ, ị ri lẹ. Chajị, ang myị ang ọlẹ kọ la ọngịrị kụrụ ọngịnyị ehe myị́ lẹ aalẹ, ọnyọhị nya ang ọọwa, ọngọọwa a ri lẹlẹ.

²⁰Chajị, ụka ọlẹ ká angịnyị ehe á be bwu ẹpwụ nya ang inyibyi ịhọhọ ilodehe ịlẹ kị kaa chị ọhịhị nya ọngịnyị ehe ịrị kpá, bwula ọlẹ kị kaka jẹ́ iJisọsị ịKịrayịsị lala Ọngọlahị la bala Ọngọchịda nyahị wuu, kọ ri ká angịịwa á myịmyị họ gbee kị kaka chị abwọ kpụ ẹpwụ nya ọmayẹ nya ang inyibyi ịịwa, ká ọngịrị nya ang inyibyi ịhọhọ ịịwa á kụrwaa myịmyị lẹ aalẹ, iwe-ahụrụ nya angịịwa tị tị tịpyọ ugbẹnyị gụ ụka nya ọgbanyẹ-ọgbanyẹ lẹ.

²¹Chajị, ịnọ, ọ dọmwụ ka hiigu haa ịwa angịịwa gụ, kọ ri kị jẹ́ ụgbẹyị nya abwẹla ọnyịịla jéjé kpong-kpong ka, gụ ọ-ka jọ́ọ jẹ́ kpá ene kị ka mwọọgịlẹ ji ẹkpẹ nyaa da ehile ịgọgọ nya Ohe Oluhye ọlẹ kị ya daa e-eji.

²²Ọọwa lẹ, ọ-họ jịra nya etu ọlẹ kị ya lẹẹ ẹ-ẹgẹlẹ, a chị ehe ẹ-ẹga nya angịịwa lẹlẹ. Etu ọọwa yẹkẹẹ, “Ebwu tịrẹkpẹ kele kaka go ịkọ ọkọkọ nyamwụ ọlẹ kọ kọ cheeji ri myịmyị lẹ. Okomba ọlẹ kị hyo enyi kpá, tị kpa ịlọmwụ kaka rị ịwa myịmyị lẹ.”