Read idege 2 IPITA 3 Bible Online

2 IPITA 3 - idege bible

2 IPITA 3

¹Anụ angị hám há, ụpwụ ọlẹ kam lẹẹ da lẹẹlẹẹ a ka ri ụpwụ oheeye ọlẹ kam da du wanụ lẹlẹ. M kpa ala ịlẹpwụ nya apwụ imimiiye ịwẹ, juwa kpụnụ ịtịya nya ẹla nya Ohe Oluhye ọlẹ kanụ jẹ́ ene-ene, chajị ká ọọwa ka wule irya ọkpẹẹkpẹẹ ọlẹpwụ nyanụ eji.

²Am jam maga kam ka kpụnụ ịtịya nya ọmwụ ọyẹyẹ ịlẹ ká alọmwụ ịgọgọ nya Ohe Oluhye yẹ neeji ene-ene, kanụ ka kpịtịya nya ehile ọlẹ ká Ọngọlahị iJisọsị ịKịrayịsị Ọngọchịda nyahị, ya danụ bwu ọnụ nya angị ya ẹrụ ọnyịịla ọlẹ pyẹ ịnyịnyị.

³Ẹla ọhọhẹ ọhọhẹ ri yẹkẹẹ, anụ jẹ́ myịmyị mẹ. Angị kpa angịnyị họ ka kpehe la ụkụrwọ nyaa lụka nya oyi ohyẹẹkpẹ nya odehe ọlẹ. Ịwa a ri angịlẹ kị juwa kaa họ ang myị́ ang onyobyi ọlẹ ká imyi nya ịnyịrọ nyaa a byaa ya, nyị họ mẹ lẹlẹ.

⁴Ị ka juwa kpa angịnyị nya Ohe Oluhye họ lahụ-lahụ, juwa yẹkẹẹ, “Wuuu! M me, anụ tị́ yẹkẹẹ, iJisọsị ịKịrayịsị nyịwa nyị myị ọnụ ha ịwa yẹkẹẹ, nyị juwa ka mwẹẹkpẹ warị myịmyị wẹẹ? Ale tị́ mẹ? Ang amalẹ kaka, ká adahị igogo anyị gbu chịpwụrụ kam wẹẹ? Lẹ, anụ yẹ ká ịngịngịhyẹ yẹ da hi jaabwọ kọ la ene-ene bwu ọmwụ ọdada nya odehe ọlẹ kpong-kpong? ỊKịrayịsị ọọwa tị́ warị lee mẹ?”

⁵Angịwẹ ayịdang la ịlaa, ịnọ, jẹ́ ang jẹ́ chajị nya ang myị́ ang ọlẹ ká Ohe Oluhye họhọ wuu ene! Ma, ị tị mama-chịng pwa ọmyịmyị ju ẹla ọọwa. Ị jẹ́ yẹkẹẹ, ẹla ọlọnụ oyaya ọlam-ọlam ọlẹ, Ohe Oluhye ayịdang nyaa kpa họ uhye-ọgba nya epwoohe bala odehe ọlẹ lụka nya ọgbanyẹ lẹ. Enyi, Ohe Oluhye a kpa họ odehe ọlẹ ene kọọ chị ọpyị olodehe ọlẹ ebwo godayị rịrị ẹ-ẹpwụ nya enyi myịmyị lẹ.

⁶Enyi, Ohe Oluhye a tị kpa ta odehe nya ọgbanyẹ-ọgbanyẹ ọọwa ayịreji lụka onyogo ọlẹ ká ukpenyi do bịrọọ ịnyịnyị lẹ.

⁷Ẹla ọlọnụ nya Ohe Oluhye ọlịnyịnyị, Ohe Oluhye a myịmyị ya neeji rụ́ uhye-ọgba nya epwoohe bala odehe ọlẹẹlẹẹ du ká Ohe Oluhye wẹẹ jwaa ịtọ gbe ila ọ-ka rwaa rụ pyii lẹlẹ. Chajị, Ohe Oluhye tụụbwọ hi uhye-ọgba nya epwoohe bala odehe ọlẹ nọ gbe ẹnụtụrụ ọlẹ kọ ka ya eje nyamwụ wu alọhọbịrị bala ọ-ka taa ayịreji gbanggbang.

⁸Ma, anụ yẹhị da ẹla ọlẹ bwee ka, anụ angị hám há. Ẹ-ẹga ká Ohe Oluhye ji lẹ, ẹka ụnọ imiiye da ẹka ohu iwo bala ẹnụtụrụ ookpokpo ọlam-ọlam ọlẹ, á lụrụ gụ awụlẹ kpong-kpong ka, chajị, ị mememe ị-ịlahị nyamwụ.

⁹Ọngọlahị Ohe Oluhye á ri Ọngọ họ atịmẹ ẹ-ẹga nya ọnụ ọmyịmyị nyamwụ ọ-họ jịra jaabwọ ká ọhọhọ nya Ohe Oluhye wẹẹ la angịhyẹ dẹwụ-dẹwụ kpong-kpong ka. Ọkẹnẹ-kẹnẹ ri yẹkẹẹ, Ohe Oluhye juwa ju ugbodu ẹ-ẹga nyanụ, juwa ya ẹga da hanụ, chajị kanụ ka jẹ́-ẹ yẹ irya da ịnyị. Chajị, Ohe Oluhye ayịdang á tịtọ ká ọngọngọhẹ ka ta ayịreji ẹ-ẹpwụ nya ọhọbịrị ọhọhọ kpong-kpong ka. Ma, ká ọng myị́ ọng wuu ka yẹ irya da ha Ohe Oluhye ịnyị!

¹⁰Ma, ẹnụtụrụ nya ọwẹwẹ nya Ọngọlahị la tị ka bwu ọng myị́ ọng wuu mwaa jaabwọ ká angịlẹ kị kaa ka oloyi oyiyi kaa jẹ lụka o-bwu ayịdẹpwa mwaa. Lẹnụtụrụ nya ọwẹwẹ nya Ọngọlahị ọọwa, uhye-ọgba nya epwoohe ka chịpwụrụ la iru ọtụka-ọtụka. Ụka ọọwa, ẹnụ bala ọya bala ịdịchụ wuu ka wulo hụrụ ịnyịnyị ị-ịlahị nya ila ọtụka-ọtụka. Ụka ọọwa, odehe ọlẹ ayịdang tụ ang myị́ ang ịlẹpwụ nyamwụ wuu ka rụ ila, ta ayịreji gbanggbang pyịyọọ.

¹¹Jaabwọ kọ la gbadaa wẹ yẹkẹẹ, ang ịwẹ wuu juwa ka chịpwụrụ ịnyịlẹhị bwula ayịreji ọtata nyaa lẹlẹ, anyanyị, anụ tị́ me irya kọ chịla kanụ ka juwa la ọhịhị nya ịgọgọ ọlala bala ịnya ọngịnyị nya Ohe Oluhye oriri nya ịlẹhị-ịlẹhị kaka ba?

¹²Lẹ, anụ́-ụ juwa kụ ọlọyị gbe ọwẹwẹ nya ẹnụtụrụ ọtụka nya Ohe Oluhye nyahị ọọwa giri-giri, kanụ juwa chị ọwẹwẹ nyamwụ ọọwa agaga bwula o-juwa họ ang myị́ ang ọlẹ kọ ya, anụ nyị họ mẹ. Ẹnụtụrụ ọọwa, uhye-ọgba nya epwoohe a ka rụ ila, ta ayịreji gbanggbang lẹlẹ.

¹³Ma, ẹ-ẹga kaahị ayịdang tị ji lẹ, ahị jam la ẹhị ọrịrịị-rịrị gbe ọnụ ọmyịmyị nya Ohe Oluhye u-uhye nya ọwẹwẹ nya epwoohe onyeewe bala odehe onyeewe ẹga ọlẹ kọ ka myị la abwẹla ọnyịịla nya Ohe Oluhye.

¹⁴Chajị nya ọọwa lẹ, anụ angị hám há, ụka ọlẹ kanụ wẹẹ godayị gbe ọwẹwẹ nya ang ịwẹ wuu wẹẹ lẹ, anụ cheri kanụ juwa la kpịra-kpịra ẹ-ẹpwụ nya ọngịnyị nya Ohe Oluhye oriri nyanụ, chajị kanụ ka la abyị ọkpụkpụ ọhẹ kaka lee ukpuru ọdada ị-ịlahị nya Ohe Oluhye kaka mẹ. Ọkọkọ nya ọọwa lẹ, ká okpunyi, anụ ka la ị-ịlahị nyamwụ mẹ.

¹⁵Anụ jẹ́ mẹ! Ugbodu ojuju ọtata nya Ọngọlahị Ohe Oluhye ri chajị ká angịnyị ehe ka jẹ́-ẹ wu ọchịda nyamwụ ọyị ịnyị! Ụka ká ịPọlụ ọnyadahị ọlẹ kọ háahị lụmẹ juwa da ụpwụ du wanụ lẹ, ọ kpa ẹla ọjẹ́jẹ ọlẹ ká Ohe Oluhye ya họọ, ya ẹla jenu rụ́ ala ịlẹ kaam ayịdang wẹẹ ya ịnyịnyị.

¹⁶Jaabwọ ká ịPọlụ ya ala ịwẹ jenu ụ-ụpwụ nyanụ wẹẹ, ịnyịnyị, ọ kaa ya dodehe ẹ-ẹpwụ nya apwụ nyamwụ ịkịla ịlẹ kọ da wuu lẹ. Ala ịhyẹ ịlẹpwụ nya apwụ nya ịPọlụ ri ụma nya ala ịlẹ ká etu nyaa lujwo la ọjẹ́jẹ lụmẹ. Angịhyẹ ịlẹ kị ri angị jẹ́ ẹla nya ịlẹhị nya Ohe Oluhye datị ka bala ogodayị kpakpakpa ha Ohe Oluhye ka, kaa juwa pyị ala nya ịPọlụ ịịwa anyoko, jaabwọ kị kaa họ ẹ-ẹga nya ala ịlẹpwụ nya Ụpwụ Ịgọgọ ịkịla, du kọ kaa kpa ayịreji ọtata kịlaa ịwa angịịwa.

¹⁷Chajị nya ọọwa lẹ, anụ angị hám há, jaabwọ kaanụ ayịdang jẹ́ ang ịwẹ jéjé ene-ene lẹlẹ, anụ kpahị ju ịlọnụ ọgwọgụ mẹ. Anụ myị kanụ juwa ba ang onyobyi ọhọhọ nya angị inyibyi ịlẹ kị kaa pwa o-ju ihi nya Ohe Oluhye jẹ kokoo! Ó ri ịnyị kaka lẹ aalẹ, anụ ka mwọọgịlẹ mileji hi ụgbẹyị ọkpakpakpa nya ẹla nya Ohe Oluhye ọlẹ kanụ wẹẹ bajẹ lẹlẹ.

¹⁸Ma, ọkọkọ nya ọọwa lẹ, anụ́-ụ tụtụ juwa nwa kịlahị-ịlahị ẹ-ẹpwụ nya ọnahị nya Ohe Oluhye bala ẹ-ẹpwụ nya ang ọjẹ́jẹ chajị nya Ọngọlahị la bala Ọngọchịda nyahị iJisọsị ịKịrayịsị yẹẹyẹẹ mẹ. Ká ogbo a juwa ha Ọngọlahị iJisọsị ịKịrayịsị ọọwa bwu ọlẹẹlẹẹ pyịyọọ gbee pwụ ụka myị́ ụka. Amẹn.