Read idege 1 ỊJỌN 1 Bible Online

1 ỊJỌN 1 - idege bible

1 ỊJỌN 1

¹Ahị jam da ụpwụ ọlẹ du wanụ u-uhye nya iJisọsị ịKịrayịsị Ọngọ ri Ẹla nya ọhịhị ọlẹ kọ juwa hịhị ta Ohe Oluhye bwu ọmwụ ọdada. Ahị kpa ụrụ nya ịlọhị wo omyi ẹla nya Ẹla nya ọhịhị ọọwa. Ahị kpẹhị nyahị mwụụrụ yẹ Ẹla nya ọhịhị ọọwa la ịlọhị ịnyịnyị. Ahị dọmwụ yụbwọ nya ịlọhị gu Ẹla nya ọhịhị ọọwa jẹ́ lẹ.

²Ụka ká Ẹla nya ọhịhị ọọwa warị la abwụma nya ọngịnyị ehe lẹ, ahị yọọ la ẹhị nya ịlọhị. Ọọwa, ahị lẹẹ ri ibeenu, ya dodehe jenu yẹkẹẹ, Ẹla ọọwa kpakpakpa a ri ọhịhị ọmyịmyị-ka ọlẹ kọ juwa hịhị ta Ohe Oluhye Adịda, ene-ene kịị chọọ ehe hahị ụka ọlẹ kọ hireji warị wẹ odehe ọlẹ lẹ.

³Ẹla nya ọhịhị ọọwa, ọlẹ kahị yẹyẹ la ẹhị nyahị bala owowo la ụrụ nyahị, ahị wẹẹ kpa kaka ya jenu, chajị kanụ ka jẹ́-ẹ bá ọtụchawụlẹ ọlẹ kahị lẹẹ la, bá la tahị lẹlẹ. Ọtụchawụlẹ nyahị ọọwa juwa ẹ-ẹga nya Ohe Oluhye Adịda bala Ọnyẹwẹ nyamwụ iJisọsị ịKịrayịsị.

⁴Ahị jam da ala ịlẹ du wanụ chajị ká ọkẹkẹnị ọchịchị okpori-kpori nyahị ka jẹ́-ẹ jịra myị́.

⁵Ẹrụ ọnyịịla ọlẹ kahị wo bwu ọnụ nya Ọnyẹwẹ nya Ohe Oluhye ọwa, ahị lẹẹ ya jenu lẹ. Ẹla ọọwa ri yẹkẹẹ, Ohe Oluhye ayịdang kpakpakpa a ri ahịgboo lẹ. Ukpowu ọhẹ-lọhẹ á juwa ẹ-ẹga nyamwụ kpong-kpong ka.

⁶Chajị nya ọọwa lẹ, ó ri kahị juwa yẹkẹẹ, ahị ri angị la ọtụchawụlẹ bala Ohe Oluhye lẹ, kahị tị myịmyị juwa hịhị ẹ-ẹpwụ nya ukpowu wẹẹ aalẹ, ahị juwa me ọnọọkịla. Aalẹ, áhị́ tị tị juwa hịhị ba ẹla nya ịlẹhị jẹ kpong-kpong lẹka.

⁷Ma, ọ́ tị ri kahị juwa hịhị ẹ-ẹpwụ nya ahịgboo jaabwọ ká Ohe Oluhye ayịdang juwa ẹ-ẹpwụ nya ahịgboo lẹ aalẹ, ahị la ọtụchawụlẹ bala Ohe Oluhye ịnyịlẹhị lẹ. Aalẹ, ịwọ nya iJisọsị Ọnyẹwẹ nya Ohe Oluhye ka juwa hụ́ ọhọbịrị nyahị ọnyị myị ọnyị wuu cheri-cheri hiihi lẹ.

⁸Ó ri kahị yẹkẹẹ, áhị́ la ọhọbịrị ọhẹ-lọhẹ ka aalẹ, ahị juwa pịrị ịlọhị ju ododu. Aalẹ, ẹla nya ịlẹhị á juwa ẹ-ẹpwụ nyahị kpong-kpong ka.

⁹Ma, ó ri kahị tị myị ya ịhọbịrị nyahị ịlẹ kahị họ wuu dodehe je Ohe Oluhye aalẹ, Ohe Oluhye ri Ọngọ chịla ọ-hụ ọkịlẹtụ ha bala ọ-la kpẹẹkpẹẹ lẹ, Ọ ka hịnyọhi ịhọbịrị nyahị ịịwa wuu hahị bala ọ-ka hụ́ụhị cheri-cheri bwu ẹpwụ nya ang myị́ ang inyibyi ịlẹ wuu kahị họ ịnyịnyị.

¹⁰Ó ri kahị pwa rwarụ yẹkẹẹ, áhị́ la ọhọbịrị ọhẹ-lọhẹ ka aalẹ, ahị juwa ju Ohe Oluhye ọlọnọọkịla. Aalẹ, ẹla nya Ohe Oluhye á tị tị juwa ẹ-ẹpwụ nyahị kpong-kpong ka ịnyịnyị.