Read idege 1 ỊJỌN 2 Bible Online

1 ỊJỌN 2 - idege bible

1 ỊJỌN 2

¹Anụ anyị ichiche nyam, m jam da ụpwụ ọlẹ du wanụ chajị kanụ ka hu abwọ la ọhọbịrị ọhọhọ. Ọ́ tị ri ká ọngọhẹ nyanụ a chabwọ kpụ ẹpwụ nya ọhọbịrị ọhọhọ aalẹ, ahị la iJisọsị ịKịrayịsị ọlabwẹla ọnyịịla ọlẹ kọ juwa i-ijata nya Ohe Oluhye Adahị juwa bịlọọ wọnụ nyahị ju, ụka wuu.

²ỊKịrayịsị a hu ịlọmwụ ga ha igu wọnụ nyahị ju du ká Ohe Oluhye bwu lọọ hịnyọhi ịhọbịrị nyahị wuu hahị lẹ. Ịịhọbịrị nyahị ụbwọọhị kem ka, ma, ịhọbịrị nya alodehe wuu ịnyị.

³Ó ri kahị ri angị juwa kpa ehile nya Ohe Oluhye lẹ aalẹ, ahị jẹ́ yẹkẹẹ, ahị ri angị jẹ́ Ohe Oluhye ịnyịlẹhị lẹ.

⁴Ó ri ká ọngọhẹ á juwa yẹkẹẹ, ọwa nyị jẹ́ Ohe Oluhye lẹ, kọ tị juwa kpa ehile nya Ohe Oluhye họ ụkụrwọ ka aalẹ, ọngọọwa juwa pịrị ịlọmwụ ju, la ọnọọkịla omeme. Aalẹ, ẹla nya ịlẹhị á juwa ẹ-ẹpwụ nyamwụ kpong-kpong ka.

⁵Ma, ọng myị́ ọng ọlẹ kọ tị juwa ju ihi nya ẹla myị́ ẹla ọlẹ ká Ohe Oluhye á ya lẹ aalẹ, ọngọọwa a ri ọngọ la ọháha ọkpẹẹkpẹẹ ẹ-ẹga nya Ohe Oluhye ịnyịlẹhị lẹ. Ụma nya ọháha ọlịnyị a ri ang ọlẹ kahị kaa kpa jẹ́ myịmyị yẹkẹẹ, ahị juwa hịhị ẹ-ẹpwụ nya Ohe Oluhye ayịdang lẹlẹ.

⁶Ọng myị́ ọng ọlẹ kọ juwa yẹkẹẹ, ọwa nyị juwa hịhị ẹ-ẹpwụ nya Ohe Oluhye lẹ aalẹ, ọngọọwa a tị tị juwa họ abwẹla ọnyịịla jaabwọ ká iJisọsị ịKịrayịsị ayịdang họ ẹ-ẹpwụ nya odehe ọlẹ ịnyịnyị pyii mẹ.

⁷Anụ angị hám há, ehile ọlẹ kam lẹẹ da du wanụ lẹ, ó ri ehile onyeewe kaka. Ehile onyogo-onyogo, ọlẹ kanụ wo bwu ọmwụ ọdada ene-ene ịnyị. Ehile onyogo ọọwa, a ri ẹla nya Ohe Oluhye ọlẹ kanụ wowo ene-ene lẹlẹ.

⁸Ma, m tị myịmyị jam da ehile onyeewe du wanụ. Ọ-họ jịra nya ẹla nya ịlẹhị ọlẹpwụ nya ehile ọọwa chị ehe ẹ-ẹpwụ nya ọhịhị nya iJisọsị ịKịrayịsị bala ọhịhị nyanụ anụ ayịdang ịnyịnyị lẹ. Chajị ụka nya ukpowu ọchịchị nya ọhọbịrị ọhọhọ juwa chịpwụrụ kam lẹ, ahịgboo nya abwẹla ọnyịịla nya Ohe Oluhye a wẹẹ wuru lẹlẹ.

⁹Ọng myị́ ọng ọlẹ kọ yẹkẹẹ, ọwa nyị juwa ẹ-ẹpwụ nya ahịgboo nya Ohe Oluhye lẹ, ká ọngịnyị ọọnamwụ á tị juwa wọọ ẹjẹ wẹẹ aalẹ, ọngọọwa juwa hịhị ẹ-ẹpwụ nya ukpowu nya ọhọbịrị pyịyọọ da ọlẹẹlẹẹ wẹẹ.

¹⁰Ọng myị́ ọng ọlẹ kọ juwa la ọháha ẹ-ẹga nya ọngịnyị ọọnamwụ lẹ aalẹ, ọngọọwa juwa hịhị ẹ-ẹpwụ nya ahịgboo nya abwẹla ọnyịịla nya Ohe Oluhye lẹ. Aalẹ, ịngịngịhyẹ ọlẹ kọ kaa họ ká ọngịnyị ehe ka wu ori myị́, á juwa ẹ-ẹpwụ nya ọngọọwa kpong-kpong kaka.

¹¹Ma, ọng myị́ ọng ọlẹ ká ọngịnyị ọọnamwụ á tị juwa wọọ ẹjẹ wẹẹ aalẹ, ọngọọwa juwa hịhị ẹ-ẹpwụ nya ukpowu nya ọhọbịrị pyịyọọ daalẹ ọlẹ wẹẹ. Aalẹ, ọngọọwa juwa ma kpokpokpo ẹ-ẹpwụ nya ukpowu ọọwa lẹ, ọ́ jẹ́ ẹga ọlẹ kọ juwa jẹ ka datị kpong-kpong kaka. Chajị ukpowu nya ọhọbịrị ọọwa kpọọ idu chwiichwii lẹ.

¹²Anụ anyị anjwo ichiche nyam, m jam da ụpwụ ọlẹ du wanụ, chajị, Ohe Oluhye hịnyọhi ịhọbịrị nyanụ wuu hanụ kpá ene-ene, bwula ẹnyị nya ịKịrayịsị lẹ.

¹³Anụ adịda anyị, m jam da ụpwụ ọlẹ du wanụ, chajị anụ jẹ́ Ọngọlahị ọlẹ kọ juwa hịhị bwu ọmwụ ọdada ene-ene lẹ. Anụ ikolobya, m jam da ụpwụ ọlẹ du wanụ ịnyịnyị, chajị, anụ kụrụ Ohe Onyobyi ọwẹ ene-ene lẹ. Anụ anyị anjwo ichiche nyam, m jam da ụpwụ ọlẹ du wanụ, chajị anụ ayịdang jẹ́ Ohe Oluhye Adịda ene-ene lẹ.

¹⁴Anụ adịda anyị, m da ụpwụ ọlẹ du wanụ, chajị, anụ jẹ́ Ọngọlahị ọlẹ kọ juwa hịhị bwu ọmwụ ọdada ene-ene lẹ. Anụ ikolobya, m jam da ụpwụ ọlẹ du wanụ, chajị, anụ la gogo ẹ-ẹpwụ nya olegu nyanụ lẹ. Ẹla nya Ohe Oluhye tị juwa hịhị ẹ-ẹpwụ nyanụ ịnyịnyị lẹ. Chajị, anụ kụrụ Ohe Onyobyi ọwẹ ene-ene lẹ.

¹⁵Anụ myị ká odehe ọlẹ a háanụ lụmẹ ka lee ang myị́ ang ịlẹpwụ nyamwụ kpong-kpong ka. Chajị, ọngọlẹ ká odehe ọlẹ á juwa há lụmẹ lẹ aalẹ, ọháha ọlala nya ịlẹhị-ịlẹhị ẹ-ẹga nya Ohe Oluhye Adịda á juwa ẹ-ẹpwụ nya ọngọọwa kpong-kpong kaka.

¹⁶Chajị, ụma nya ang ịlẹ kị jam ẹ-ẹpwụ nya odehe ri ang ịlẹ ká imyi nya ịnyịrọ nya ọngịnyị ehe kaa mama bala ang ịlẹ ká ẹhị nya ọngịnyị ehe kaa mama bala ang ịlẹ kị kaa hu ọbọọchẹ nya ọhịhị ha ọngịnyị ehe. Ọhẹ-lọhẹ lẹpwụ nya ang ịwẹ wuu á bwu ẹga nya Ohe Oluhye Adịda kpong-kpong ka. Ma, ịwa wuu ri ịnya odehe ọlẹ kem.

¹⁷Odehe ọlẹ bala imyi nya ang ị-ma ọngịnyị ehe ma ịlẹpwụ n yamwụ ịwẹ wuu, ri ang ịlẹ kị juwa ka chịpwụrụ wẹẹ. Ma, ọng myị́ ọng ọlẹ kọ tị juwa họ irya nya Ohe Oluhye Adịda, tị ka juwa hịhị pyịyọọ pwụ ụka myị́ ụka.

¹⁸Anụ anyị anjwo ichiche nyam, ụka ohyẹẹkpẹ nya odehe ọlẹ ji chwẹẹ lẹ. Anụ tị́ wo kị ya ene yẹkẹẹ, Oluji nya ịKịrayịsị nyị juwa ka warị ị-ịlahị. Anụ wo mẹ, aluji nya ịKịrayịsị dọmwụ lụmẹ jam odehe ene-ene lẹ. Ọọwa a du kahị jẹ́ yẹkẹẹ, ụka ohyẹẹkpẹ nya odehe ji chwẹẹ ịnyịlẹhị lẹlẹ.

¹⁹Ọ ri nya ịlẹhị, angị tụ ịKịrayịsị pyịpyị ịịwa gba kpehe bwu ẹpwụ nya ogu nyahị, ahị angịnyị nya Ohe Oluhye odu ịnyị, angịịwa á ri alẹpwụ nyahị kpangga ẹnẹnẹhẹ ene kpong-kpong ka. Chajị, ó ri kị ri alẹpwụ nyahị ene ịnyịlẹhị lẹ, ịnọ, ị ka juwa tahị pyịyọọ lẹ. Ọlẹ kị gba kpehe hiihi ịnyị họ ká ọ-la gbadaa yẹkẹẹ, angịịwa á ri alẹpwụ nyahị ene-ene ka ịnyịlẹhị.

²⁰Ma, anụ tị lẹ, ịKịrayịsị ya Olegu Ịgọgọ nyamwụ yẹ hụnụ wuu lẹlẹ, anụ jẹ́ ẹla nya ịlẹhị datị lẹ.

²¹Ang odudu kam lẹẹ da ụpwụ ọlẹ du wanụ á ri chajị nyanụ ọ-jẹ́ ẹla nya ịlẹhị ene lẹka lẹ ka. Ma, m jam dọọ du wanụ chajị nyọlẹ kanụ jẹ́ ẹla nya ịlẹhị ọọwa kpá ene-ene lẹ. Anụ tị jẹ́ ịnyịnyị yẹkẹẹ, ọnọọkịla omeme nyị́ kaa juwa ẹ-ẹpwụ nya ẹla nya ịlẹhị tụtụm kaka lẹ.

²²Oowo a tị́ ri ọlọnọọkịla? Ọng myị́ ọng ọlẹ kọ pwa yẹkẹẹ, i-iJisọsị nyaa ri ịKịrayịsị Ọngọchịda ọlẹ ká Ohe Oluhye nyị du warị ka aalẹ, ọngọọwa a ri ọlọnọọkịla ọọwa lẹlẹ. Aalẹ ọngọọwa kpangga a ri ọngọ tụ ịKịrayịsị pyịpyị lẹlẹ. Ọ juwa pwa Ohe Oluhye Adịda bala Ọnyẹwẹ nyamwụ rwarụ ịnyịnyị lẹ.

²³Chajị, ọng myị́ ọng ọlẹ kọ pwa Ọnyẹwẹ nya Ohe Oluhye rwarụ aalẹ, Ohe Oluhye ayịdang a wẹ kọ pwa rwarụ ịnyịnyị lẹlẹ. Ọng myị́ ọng ọlẹ kọ ya Ọnyẹwẹ nya Ohe Oluhye dodehe lala Ọngọchịda nyamwụ aalẹ, ọngọọwa la Ohe Oluhye Adịda ịnyịnyị lẹ.

²⁴Chajị nya ọọwa lẹ, anụ́-ụ myị ká ẹla nya Ohe Oluhye ọlẹ kanụ wo bwu ọmwụ ọdada a juwa ẹ-ẹpwụ nyanụ pyịyọọ mẹ. Chajị, ó ri ká ẹla ọọwa á juwa ẹ-ẹpwụ nyanụ ịnyị pyịyọọ lẹ aalẹ, anụ la ịlọnụ tịtị ka juwa hịhị ẹ-ẹpwụ nya Ọnyẹwẹ nya Ohe Oluhye bala ọhịhị ẹ-ẹpwụ nya Ohe Oluhye Adịda ayịdang pyịyọọ ịnyịnyị lẹ.

²⁵Ang ọlẹ ká ịKịrayịsị ayịdang myị ọnụ hahị, ahị angị ịlịnyị wuu ri, ọhịhị ọmyịmyị-ka.

²⁶M jam da ala ịlẹ du wanụ chajị nya angịlẹ kịị wẹẹ tịtọ kị ka hụnụ ahị, hi ẹla nya Ohe Oluhye.

²⁷Ma, jaabwọ ká Olegu Ịgọgọ ọlẹ ká ịKịrayịsị ya hanụ, juwa ẹ-ẹpwụ nyanụ pyịyọọ lẹlẹ, ọ́ baba ká ọngọngọhẹ ọkịla ka juwa mẹ ịngịngịhyẹ jẹẹnụ kaka. Chajị, Olegu Ịgọgọ nyamwụ ọọwa a wẹẹ mẹ ang jẹẹnụ u-uhye nya ang myị́ ang wuu lẹ. Ẹla nya ịlẹhị kem, Olegu Ịgọgọ a tị kaa mẹjẹ lẹ. Ọ́ kaa me ọnọọkịla kpong-kpong ka. Lẹ, anụ́-ụ juwa hịhị ẹ-ẹpwụ nya ịKịrayịsị pyịyọọ mẹ.

²⁸Chajị nya ọọwa lẹ, anụ anyị anjwo ichiche nyam, anụ cheri kanụ juwa hịhị ẹ-ẹpwụ nya ịKịrayịsị pyịyọọ mẹ. Chajị kahị ka jẹ́-ẹ la ẹla o-ya myị́, ụka ọlẹ ká ịKịrayịsị ka tịrẹkpẹ warị wẹ odehe ọlẹ, ọkọkọ kahị ka juwa tịrẹkpẹ kẹkpẹ ẹ-ẹpwụ nya oyoyi ojuju ị-ịlahị nya ịKịrayịsị mẹ.

²⁹Jaabwọ ká ịKịrayịsị ayịdang ri ọlabwẹla ọnyịịla lẹ, anụ jẹ́ mẹ, ọng myị́ ọng ọlẹ kọ ri ọngọ họ abwẹla ọnyịịla ụbwọọmwụ a ri ọnyị nya Ohe Oluhye nya ịlẹhị lẹ.