Read idege 1 ỊJỌN 3 Bible Online

1 ỊJỌN 3 - idege bible

1 ỊJỌN 3

¹Anụ yẹ ụma nya ọháha ọtụka ọlẹ ká Ohe Oluhye la ẹ-ẹga nyahị, ahị angị myịmyị du kọ wụrụụhị anyị nya ịlọmwụ wẹẹ. Ịnyị a du kahị ri anyị nyamwụ ịnyịlẹhị wẹ lẹlẹ. Ma, jaabwọ ká alodehe ịkịla á jẹ́ Ohe Oluhye Adahị ka lẹ, ị jẹẹhị lala anyị nya Ohe Oluhye ka ịnyịnyị.

²Anụ angị hám há, lẹẹlẹẹ lẹ, ahị ri anyị nya Ohe Oluhye ịnyịlẹhị lẹ. Ma, jaabwọ kahị ka la lụka ọọwa kpangga lẹ, ị chọọ ehe mẹjẹẹhị lẹka. Ang ọlẹ kahị jẹ́ ri yẹkẹẹ, jaabwọ ká ịKịrayịsị ayịdang la kpangga, ahị tịtị ka la ịnyịnyị lụka ọlẹ ká ịKịrayịsị ka mwọọgịlẹ warị lẹlẹ. Chajị, ụka ọọwa, ahị ka juwa kpẹhị nyahị yẹ jaabwọ ká ịKịrayịsị la kpangga lẹ.

³Chajị nya ọọwa lẹ, ọng myị́ ọng ọlẹ kọ juwa la ẹhị ọrịrịị-rịrị gbe ọwẹwẹ nya ịKịrayịsị ọọwa, ka juwa la ọhịhị ocheri-cheri jaabwọ ká ịKịrayịsị la ịlọmwụ ri Ọngọ la ọhịhị ocheri-cheri ịnyịnyị pyii lẹ.

⁴Ọng myị́ ọng ọlẹ kọ họ ang onyobyi lẹ aalẹ, ọngọọwa bịrị ehile nya Ohe Oluhye lẹ. Chajị, ehile nya Ohe Oluhye ọbịrịị-bịrị, a ri ọhọbịrị ọhọhọ lẹ.

⁵Anụ tị́ jẹ́ yẹkẹẹ, ịKịrayịsị warị wẹ odehe ọlẹ, chajị kọ ka gbahị ahị angịnyị ehe kpehe bwu ẹpwụtụbwọ nya ịhọbịrị ịhọhọ. Anụ tị jẹ́ ịnyịnyị yẹkẹẹ, ịKịrayịsị la ịlọmwụ á họ ang onyobyi ọhẹ-lọhẹ kpong-kpong ka.

⁶Chajị nya ọọwa lẹ, ọng myị́ ọng ọlẹ kọ juwa hịhị ẹ-ẹpwụ nya ịKịrayịsị lẹ aalẹ, ọngọọwa á tụtụm kaa hịhị ẹ-ẹpwụ nya ọhọbịrị ọhọhọ kịlahị-ịlahị myịmyị kaka. Ma, ọng myị́-ọng ọlẹ kọ tị juwa hịhị ẹ-ẹpwụ nya ọhọbịrị ọhọhọ kele kịlahị-ịlahị wẹẹ aalẹ, ọngọọwa á kpẹhị nya olegu yẹ ịKịrayịsị lẹka lee ọ-jẹ́ ịKịrayịsị jẹ́ kpong-kpong lẹka ịnyịnyị.

⁷Anụ anyị anjwo nyam, anụ myị ká ọngọngọhẹ a pịrịịnụ ju koo! Ọng myị́ ọng ọlẹ kọ juwa họ abwẹla ọnyịịla aalẹ, ọngọọwa a ri ọlabwẹla ọnyịịla jaabwọ ká ịKịrayịsị ayịdang ri ọlabwẹla ọnyịịla lẹ.

⁸Ọng myị́ ọng ọlẹ kọ juwa hịhị kịlahị-ịlahị ẹ-ẹpwụ nya ọhọbịrị ọhọhọ wẹẹ aalẹ, ọnyị nya Ohe Onyobyi ayịdang, ọngọọwa a ri lẹ. Chajị ọhọbịrị ọhọhọ a ri ụkụrwọ nya Ohe Onyobyi bwu ọmwụ ọdada lẹ. Ang odudu ká ịKịrayịsị Ọnyẹwẹ nya Ohe Oluhye warị wẹ odehe ọlẹ ri, chajị kọ ka ta ụkụrwọ nya Ohe Onyobyi ọọwa ayịreji gbanggbang.

⁹Ọngọngọhẹ ọlẹ ká Ohe Oluhye á nwọọ ma onyeewe lẹ aalẹ, ọngọọwa á ka juwa hịhị kịlahị-ịlahị ẹ-ẹpwụ nya ọhọbịrị ọhọhọ kaka, chajị abwụma nya Ohe Oluhye ayịdang juwa ẹ-ẹpwụ nya ọngọọwa lẹ. Ọngọ ọlịnyị á ka jẹ́-ẹ juwa hịhị kịlahị-ịlahị ẹ-ẹpwụ nya ọhọbịrị ọhọhọ myịmyị kaka, chajị Ohe Oluhye nwụ ọngọọwa ma onyeewe lẹ.

¹⁰Anụ wo mẹ! Ang ọlẹ kị ka kpa jẹ́ angịlẹ kị ri anyị nya Ohe Oluhye datị hi anyị nya Ohe Onyobyi a lẹẹ lẹlẹ. Ọng myị́ ọng ọlẹ kọ juwa họ abwẹla ọnyịịla ka lee o-juwa la ọháha ẹ-ẹga nya ọngịnyị ọọnamwụ kaka lẹ aalẹ, ọngọọwa á ri ọnyị nya Ohe Oluhye kpong-kpong kaka.

¹¹Ọlẹ a ri ẹrụ ọnyịịla ọlẹ kanụ wo bwu ọmwụ-ọmwụ ọdada lẹ. Ẹla ọọwa ri yẹkẹẹ, ahị nyị la ọháha ẹ-ẹga nya awụlẹ hiigu-hiigu.

¹²Lẹ, anụ myị kahị họ abwẹla onyobyi lala iKeen ka. Chajị iKeen ọwẹ ri ọnyị nya Ohe Onyobyi. IKeen nwụ ọnyịnamwụ ọlẹng daarụ. Ịịyẹ a tị́ dọmwụ du ká iKeen nwụ ọnyịnamwụ ọọwa ịnyị ene? Ang odudu ri yẹkẹẹ, abwẹla nya iKeen ayịdang tịpyọ. Ma, abwẹla ọhọhọ nya Ebẹlụ ọnyịnamwụ ọọwa hiigu gụ ịnya iKeen a du lẹ.

¹³Anụ anyadam ẹ-ẹpwụ nya ịKịrayịsị, ụka kanụ juwa wụ alodehe ọlẹ ẹjẹ, ọ lanụ ahịbwuu ka.

¹⁴Ahị ayịdang jẹ́ yẹkẹẹ, ahị gba kpehe bwu ẹpwụ nya igu kaka ju ka ẹpwụ nya ọhịhị lẹ. Ahị jẹ́ ịnyị, chajị nyọlẹ kahị jam la ọháha u-uhye nya angịnyị ehe aanahị. Ma, ọng myị́ ọng ọlẹ kọ tị la ọháha ẹ-ẹga nya ọngịnyị ehe ọọnamwụ ka aalẹ, ugbodu okpukpuru nya ọngọọwa juwa ẹ-ẹpwụ ọnụ nya igu pyịyọọ wẹẹ.

¹⁵Ọng myị́ ọng ọlẹ ká ọngịnyị ehe ọọnamwụ á kaa wọọ ẹjẹ aalẹ, ọngọ nwụ ọngịnyị, ọngọ ọlịnyị a ri lẹ. Anụ tị jẹ́ yẹkẹẹ, ọngọngọhẹ ọlẹ kọ ri ọngọ nwụ ọngịnyị aalẹ, ọhịhị ọmyịmyị-ka nya Ohe Oluhye á juwa ẹ-ẹpwụ nya ọngọ ọlịnyị kpong-kpong kaka.

¹⁶Ang ọlẹ kahị kpa jẹ́ ọháha nya ịlẹhị-ịlẹhị ọlala ri bwula jaabwọ ká ịKịrayịsị byẹjẹ hu, ọhịhị nyamwụ kịla iya wọnụ nyahị wuu ju. Lẹ, ọ chịla kaahị ayịdang tịtị ka hu ọhịhị nyahị deeji ha angịnyị ehe aanahị ịkịla ịnyịnyị.

¹⁷Ó ri ká ọngọngọhẹ á ri ọlụdụ nya ang-abwọ nya odehe ọlẹ, kọ tị yẹ ọnyadamwụ ọkịla ọlẹ kọ ri okpehika ẹ-ẹpwụ nya ọbaba ọhẹ, kọ ri ká ọlụdụ ọọwa á myị yẹ okpehika ọọwa ahyẹẹrwẹrwa ọ-dọọ ụbwọ ka aalẹ, ịịyẹ a tị́ ka mẹjẹ yẹkẹẹ, ọháha nya Ohe Oluhye nyị juwa ẹ-ẹpwụ nya ọlụdụ ọọwa?

¹⁸Anụ anyị ichiche nyam, anụ myị ká ọháha ọlala nyahị a ri ọháha olugbọnụ kem lee ịnya ẹla oyaya ka. Ọkọkọ nya ọọwa lẹ, kahị mẹ ọháha ọlala nyahị jẹ bwula abwẹla ọnyịịla bala ẹla nya ịlẹhị ọhọhọ kem mẹ.

¹⁹Bwula ọháha ọlala ọlịịwẹ, ahị kpa jẹ́ yẹkẹẹ, ahị juwa hịhị ẹ-ẹpwụ nya ẹla nya ịlẹhị ọhọhọ lẹ. Ọháha ọlala ọọwa a myịmyị kaa hu ọ-jẹ́ myịmyị ha ọkịlẹtụ nyahị jahị da Ohe Oluhye myị́ ịnyịnyị lẹ,

²⁰kọ riri ká ọkịlẹtụ nyahị á juwa maga nya ọ-ya eje wu hi wuwu la ụgbẹyị ọkịla, aalẹ. Chajị, Ohe Oluhye a lụmẹ gụ ọkịlẹtụ nyahị lẹ. Ohe Oluhye a tị ri Ọngọ jẹ́ ang myị́ ang wuu ịnyịnyị lẹ.

²¹Anụ angị hám há, ó ri ká ọkịlẹtụ nyahị a ya eje wuhi kaka lẹ aalẹ, ahị jẹ́ yẹkẹẹ, ahị la ẹla o-ya myị́ i-ijata nya Ohe Oluhye myị́ lẹ.

²²Aalẹ, ahị ka ye ang myị́ ang ọlẹ wuu kahị bịlẹ bwu ẹpwụtụbwọ nya Ohe Oluhye ịnyịlẹhị myị́, chajị, ahị kaa ju ihi nya ehile nyamwụ jịra bala ọ-kaa họ ang ọlẹ kọ kaa kpụ Ohe Oluhye ịpyọ ụka wuu ịnyịnyị.

²³Ọlẹ a ri ehile ọlẹ ká Ohe Oluhye dahị lẹ. Ọ yẹkẹẹ, ahị nyị kpa ọkịlẹtụ nyahị lẹpwụ-lẹpwụ myị la iJisọsị ịKịrayịsị Ọnyẹwẹ nya Ọwa, kahị nyị la ọháha ẹ-ẹga nya awụlẹ jaabwọ ká ịKịrayịsị ayịdang nyị dahị ehile ya, ahị nyị họ ene-ene mẹ.

²⁴Ọng myị́ ọng ọlẹ kọ juwa kpa ehile nya Ohe Oluhye họ ụkụrwọ aalẹ, ọngọọwa a juwa hịhị ẹpwụ nya Ohe Oluhye lẹ. Ang ọlẹ kahị kpa jẹ́ yẹkẹẹ, Ohe Oluhye ayịdang tịtị kụ ẹ-ẹpwụ nyahị ịnyịnyị ri, Olegu Ịgọgọ nyamwụ ọlẹ kọ ya kụ ẹ-ẹpwụ ọkịlẹtụ nyahị.