Read idege 1 ỊJỌN 4 Bible Online

1 ỊJỌN 4 - idege bible

1 ỊJỌN 4

¹Anụ angị hám há, anụ myị ju ọng myị́ ọng ọlẹ kọ juwa byinu yẹkẹẹ, ọwa nyị la Olegu Ịgọgọ nya Ohe Oluhye lẹ, ododoodu ka. Ma, anụ́-ụ juwa ma olegu ọlẹpwụ nya angịịwa yẹ chajị kanụ ka jẹ́, ó ri ká olegu ọọwa á ri Olegu Ịgọgọ nya Ohe Oluhye ịnyịlẹhị. Chajị, iru nya alọmwụ ịlịnịịkịla bene myị odehe lụmẹ lẹẹlẹẹ lẹ.

²Ang ọlẹ kanụ ka kpa jẹ́ Olegu nya Ohe Oluhye datị ri yẹkẹẹ, Olegu o-bwu ẹga nya Ohe Oluhye a kaa kpa ọngịnyị ya dodehe yẹkẹẹ, nyị ma iJisọsị ịKịrayịsị warị wẹ odehe ọlẹ lala ọngịnyị ehe lẹ.

³Ma, olegu ọnyị myị ọnyị ọlẹ kọ kpa ọngịnyị ya dodehe yẹkẹẹ, nyị́ ma iJisọsị ịKịrayịsị warị wẹ odehe ọlẹ lala ọngịnyị ehe kpong-kpong ka aalẹ, olegu ọọwa á bwu ẹga nya Ohe Oluhye ka. Aalẹ, olegu ọlịnyị ri olegu nya oluji nya ịKịrayịsị ọlẹ kanụ wo oja yẹkẹẹ, nyị juwa ka warị wẹ odehe ọlẹ. Chajị, olegu nya oluji nya ịKịrayịsị ọọwa jam odehe ọlẹ ene-ene lẹ.

⁴Anụ anyị ichiche nyam, angịnyị nya Ohe Oluhye, anụ ri lẹ. Anụ kụrụ alọmwụ ịlịnịịkịla kpá ene-ene lẹ. Chajị Olegu Ịgọgọ nya Ohe Oluhye ọlẹpwụ nyanụ a la ọngịrị gụ olegu ọlẹ kọ juwa ẹ-ẹpwụ nya alodehe ịlẹ kị jẹ́ Ohe Oluhye ka lẹ.

⁵Jaabwọ ká alọmwụ ịnịịkịla ịịwa ri angịnyị nya odehe ọlẹ lẹ, ẹla chajị nya ọhọhọ nya alodehe ị-jẹ́ Ohe Oluhye-ka kem, ị kaa ya lẹ. Ịnyị a du ká alodehe aanaa tịtị kaa ke ụrụ la ẹla oyaya nyaa ọọwa ịnyịnyị lẹ.

⁶Ma, ahị lẹ, angịnyị nya Ohe Oluhye, ahị ri lẹ. Ọng myị́ ọng ọlẹ kọ jẹ́ Ohe Oluhye a kaa ke ụrụ la ẹla oyaya nyahị lẹ. Ma, ọngọlẹ kọ ri ọngịnyị nya Ohe Oluhye ka, á kaa ke ụrụ la ẹla oyaya nyahị kpong-kpong ka. Ang ọwẹ a ri ang ọlẹ kahị kaa kpa jẹ́ Olegu ọlẹ kọ kaa kpa ọngịnyị ya ẹla nya ịlẹhị datị hi olegu ọlẹ kọ ri olegu nya ụhwahị lẹlẹ.

⁷Anụ angị hám há, anụ cheri kahị a juwa la ọháha ẹ-ẹga nya awụlẹ. Chajị, ẹ-ẹga nya Ohe Oluhye, ọháha ọlala nya ịlẹhị a kaa bwu lẹ. Ọng myị́ ọng ọlẹ kọ la ọháha ọlịnyị ẹ-ẹga nya angịkịla a ri ọnyị ọlam-ọlam nya Ohe Oluhye bala o-ri ọngọ jẹ́ Ọngọlẹ ká Ohe Oluhye ri ịnyịnyị lẹ.

⁸Ọng myị́ ọng ọlẹ kọ la ọháha ọlịịwẹ kaka lẹ aalẹ, ọngọọwa á jẹ́ Ọngọlẹ ká Ohe Oluhye ri kpong-kpong ka. Chajị, ọháha ọlala nya ịlẹhị kpangga, Ohe Oluhye a ri lẹ.

⁹Ang ọlẹ ká Ohe Oluhye kpa chị ọháha ọlala nyamwụ ehe hahị ri ọlẹ ká Ohe Oluhye hu Ọnyẹwẹ nyamwụ olookpokpo du warị wẹ odehe ọlẹ, chajị kahị ka bwu lọọ, la ọhịhị nya Ohe Oluhye ẹ-ẹpwụ nyahị.

¹⁰Etu nya ọháha ọlala nya ịlẹhị a lẹẹ lẹ: A-ahị a la ọháha ẹ-ẹga nya Ohe Oluhye ene ka. Ma, Ohe Oluhye la ịlọmwụ a la ọháha ẹ-ẹga nyahị gbee kọ hu Ọnyẹwẹ nyamwụ du warị kaka kịla iya chajị nyahị, chajị ká Ohe Oluhye ka jẹ́-ẹ hịnyọhi ịhọbịrị nyahị wuu hahị lẹ.

¹¹Anụ angị hám há, jaabwọ ká Ohe Oluhye la ọháha ọtụka ọlịịwẹ ẹ-ẹga nyahị lẹ, ọ chịla kahị tịtị ka la ọháha ẹ-ẹga nya awụlẹ ịnyịnyị.

¹²Ọngịnyị ehe ọhẹ-lọhẹ á kpẹhị ọlam-ọlam nya ịlọmwụ yẹ Ohe Oluhye ẹnẹnẹhẹ kpong-kpong lẹka. Lẹ, ó ri kahị juwa la ọháha nya ịlẹhị ẹ-ẹga nya awụlẹ lẹ aalẹ, Ohe Oluhye juwa hịhị ẹ-ẹpwụ nyahị lẹ. Aalẹ, ọháha ọlala nya Ohe Oluhye tị tị juwa họ ụkụrwọ jịra ẹ-ẹpwụ nya ọhịhị nyahị ịnyịnyị lẹ.

¹³Ang ọlẹ kahị kpa jẹ́ yẹkẹẹ, ahị juwa hịhị ẹ-ẹpwụ nya Ohe Oluhye bala Ohe Oluhye ayịdang ọ-tịtị juwa hịhị ẹ-ẹpwụ nyahị ri, Olegu Ịgọgọ nyamwụ ọlẹ kọ ya hahị.

¹⁴Ang ọlẹ kahị yẹyẹ la ẹhị nyahị, kahị jam ri ibeenu nyamwụ dodehe ri yẹkẹẹ, Ohe Oluhye Adịda du Ọnyẹwẹ nyamwụ warị wẹ odehe ọlẹ lala Ọngọchịda ha alodehe wuu ịnyịlẹhị.

¹⁵Ọng myị́ ọng ọlẹ kọ ya dodehe yẹkẹẹ, iJisọsị nyaa ri Ọnyẹwẹ nya Ohe Oluhye ịnyịlẹhị lẹ aalẹ, Ohe Oluhye juwa hịhị ẹ-ẹpwụ nya ọngọọwa lẹ. Aalẹ, ọngọọwa ayịdang tịtị juwa hịhị ẹ-ẹpwụ nya Ohe Oluhye ịnyịnyị lẹ.

¹⁶Ahị jẹ́ ụma nya ọháha ọlẹ ká Ohe Oluhye la ẹ-ẹga nyahị, ahị tị kpa ọkịlẹtụ nyahị lẹpwụ-lẹpwụ myị la ọháha ọọwa ịnyịnyị. Ohe Oluhye a ri ọháha ọlala nya ịlẹhị lẹ. Ọng myị́ ọng ọlẹ kọ juwa la ọháha nya ịlẹhị aalẹ, ọngọọwa juwa hịhị ẹ-ẹpwụ nya Ohe Oluhye lẹ. Aalẹ, Ohe Oluhye tịtị juwa hịhị ẹ-ẹpwụ nya ọngọọwa ịnyịnyị lẹ.

¹⁷Ang ọlẹ kọ ri ụkụrwọ ọhọhọ jịra cheju nya ọháha ọlala nya ịlẹhị ọlẹpwụ nyahị ri yẹkẹẹ, ọháha ọọwa ka hu ẹla o-ya myị́ la ẹnụtụrụ nya eje nya Ọngọlahị la, hahị pyii lẹ. Chajị, jaabwọ ká ọhịhị nya ịKịrayịsị la kpangga, ọhịhị nyahị ahị, a tịtị jam la odehe ọlẹ ẹ-ẹpwụ nya ọháha ọlala lẹ.

¹⁸Uhi ojuju á kaa juwa ẹ-ẹpwụ nya ọngọ la ọháha nya ịlẹhị-ịlẹhị ka. Chajị, ọháha ọlala ọkpẹẹkpẹẹ kaa ku uhi ojuju rụ kpehe hi ẹpwụ nya ọngịnyị. Chajị, uhi ojuju ri ang ọ-kaa ji ẹpwụ nya angịlẹ ká eje nya akama ọyẹyẹ wu. Lẹ, ọngọlẹ ká uhi ojuju á juwa ẹ-ẹpwụ nyamwụ aalẹ, ọngọọwa á la ọháha ọkpẹẹkpẹẹ lẹka.

¹⁹Chajị nyọlẹ ká Ohe Oluhye chị ọháha ọlala nya ịlẹhị-ịlẹhị ehe ẹ-ẹga nyahị jene, a du kahị tịtị jam la ọháha ọlịnyịnyị lẹ.

²⁰Ó ri ká ọngọngọhẹ á juwa yẹkẹẹ, “Ohe Oluhye hám lụmẹ,” ká ọngịnyị ehe ọọnamwụ á tị juwa wọọ ẹjẹ aalẹ, ọlọnọọkịla, ọngọ ọlịnyị a ri lẹ. Chajị, ó ri ká ọngịnyị á la ọháha ẹ-ẹga nya ọngịnyị ehe ọọnamwụ ọlẹ kọ wẹẹ yẹ ẹ-ẹhị ka aalẹ, ọngọọwa á tịtị ka jẹ́-ẹ la ọháha ẹ-ẹga nya Ohe Oluhye Ọngọlẹ kọ jẹ́ juwa yẹ ẹ-ẹhị kpong-kpong ka lẹ ka.

²¹Ọlẹ a ri ehile ọlẹ ká Ọngọlahị la dahị lẹ. Ọ yẹkẹẹ, ọng myị́ ọng ọlẹ kịị nyị́ la ọháha nya ịlẹhị-ịlẹhị ẹ-ẹga nya Ohe Oluhye aalẹ, ọngọọwa nyị tịtị juwa la ọháha ẹ-ẹga nya ọngịnyị ọọnamwụ ịnyịnyị mẹ.