Read idege 1 ỊJỌN 5 Bible Online

1 ỊJỌN 5 - idege bible

1 ỊJỌN 5

¹Ọng myị́ ọng ọlẹ kọ myị yẹkẹẹ, iJisọsị kpakpakpa nyaa ri ịKịrayịsị Ọngọchịda aalẹ, ọngọọwa a ri ọnyị nya Ohe Oluhye ịnyịlẹhị lẹ. Ọng myị́ ọng ọlẹ kọ la ọháha ẹ-ẹga nya Ohe Oluhye Adịda lẹ aalẹ, ọngọọwa tịtị ka la ọháha ẹ-ẹga nya ọnyị nya Ohe Oluhye ịnyịnyị pyii lẹ.

²Ang ọlẹ kahị ka kpa jẹ́ yẹkẹẹ, ahị la ọháha ẹ-ẹga nya anyị nya Ohe Oluhye ri jaabwọ kahị juwa la ọháha ẹ-ẹga nya Ohe Oluhye bala o-juwa kpa ehile nyamwụ jịra kaka ba.

³Chajị, ang ọlẹ kọ kaa chị ọháha ọlala nya ịlẹhị ẹ-ẹga nya Ohe Oluhye ehe ri, ehile nya Ohe Oluhye ọkpakpa jịra nyahị. Ehile nyamwụ ọkpakpa ịịwa á tị la ọngịrị kịlaahị kịla la ọhọhọ jịra ka.

⁴Chajị, ọng myị́ ọng ọlẹ kọ ri ọnyị nya Ohe Oluhye nya ịlẹhị-ịlẹhị lẹ aalẹ, ọ ka la ọngịrị ọ-kpa kụrụ ang onyobyi nya odehe ọlẹ myị́ lẹ. Ang ọlẹ kahị kaa kpa kụrụ odehe ịnyị myị́ ri ọmyịmyị ọlala nyahị ẹ-ẹga nya Ohe Oluhye.

⁵Ọngọngọhẹ á ka jẹ́-ẹ kụrụ odehe onyobyi ọlẹ myị́ kaka, kẹnẹ-kẹnẹ, ọngọlẹ kọ kpa ọkịlẹtụ nyamwụ wuu myị yẹkẹẹ, iJisọsị nyaa ri Ọnyẹwẹ nya Ohe Oluhye ịnyịlẹhị lẹ, mẹ ịnyị.

⁶IJisọsị ịKịrayịsị a ri ọngọlẹ kọ warị kaka chị ịlọmwụ ehe odehe ọlẹ bwula enyi bala ịwọ lẹ. E-enyi kem a ri ang ọlẹ kọ kpa chị ịlọmwụ ehe ka, ma, enyi bala ịwọ ịnyị. Olegu Ịgọgọ nya Ohe Oluhye a ri ibeenu nya ẹlẹwẹ lẹ. Chajị, Olegu Ịgọgọ kpangga a ri ẹla nya ịlẹhị ayịdang lẹlẹ. [

⁷Alibeenu la angị ịta ụ-ụwa e-epwoohe. Angịịwa ri Ohe Oluhye Adịda bala Ẹla nya Ohe Oluhye ọlẹ kọ juwa hịhị bala Olegu Ịgọgọ. Ịwa angị ịta ịwẹ ri Ọngịnyị ọngọ ookpokpo.]

⁸Alibeenu ịlẹ kị jam myị ẹla ju awụlẹ [odehe ọlẹ] la ịta ịnyịnyị. Alibeenu ịịwa ri Olegu Ịgọgọ bala enyi bala ịwọ. Ịwa wuu ịta-ịta myị ju awụlẹ ẹ-ẹpwụ nya ibeenu oriri nyaa ịnyịnyị.

⁹Ọngịnyị ehe á ri ibeenu nya ẹla, ahị kaa myị yẹkẹẹ, ẹla ọọwa lịnyị ịnyịlẹhị. Lẹ, ibeenu oriri nya Ohe Oluhye a tị lụmẹ gụ ịnya ọngịnyị ehe wẹẹ lẹ. Chajị, Ohe Oluhye la ịlọmwụ ri ibeenu yẹkẹẹ, iJisọsị nyaa ri Ọnyẹwẹ nya ọọwa ịnyịlẹhị lẹ.

¹⁰Ọng myị́ ọng ọlẹ kọ kpa ọkịlẹtụ nyamwụ wuu myị la Ọnyẹwẹ nya Ohe Oluhye ọọwa la ọ-jẹ́ myịmyị nya ibeenu oriri ọọwa ẹ-ẹpwụ nyamwụ pyii lẹ. Ma, ọng myị́ ọng ọlẹ kọ tị kpa ọkịlẹtụ nyamwụ wuu myị la Ohe Oluhye kaka lẹ aalẹ, ọngọọwa wụrụ Ohe Oluhye ọlọnọọkịla lẹ. Chajị, ọngọọwa á myị ju ibeenu oriri nya Ohe Oluhye ọlẹ kọ ri u-uhye nya Ọnyẹwẹ nyamwụ kaka.

¹¹Ibeenu oriri nya Ohe Oluhye ọọwa ri yẹkẹẹ, Ohe Oluhye hu ọhịhị ọmyịmyị-ka nyamwụ hahị lẹ. Ẹ-ẹpwụ nya Ọnyẹwẹ nya Ohe Oluhye kpangga, ọhịhị ọmyịmyị-ka ọọwa a tị ji lẹ.

¹²Ọng myị́ ọng ọlẹ kọ la Ọnyẹwẹ nya Ohe Oluhye ẹ-ẹpwụ nyamwụ lẹ aalẹ, ọngọọwa la ọhịhị ọmyịmyị-ka ọọwa lẹ. Ọngọlẹ kọ tị la Ọnyẹwẹ nya Ohe Oluhye ẹ-ẹpwụ nyamwụ kaka lẹ aalẹ, ọngọọwa a la ọhịhị ọmyịmyị-ka ọọwa kaka ịnyịnyị.

¹³M jam da ala ịlẹ du wanụ, anụ angịlẹ kanụ kpa ọkịlẹtụ nyanụ wuu myị la ẹnyị nya ịKịrayịsị, Ọnyẹwẹ nya Ohe Oluhye. Chajị kanụ ka jẹ́ yẹkẹẹ, ịwa nyị la ọhịhị ọmyịmyị-ka ẹ-ẹpwụ nyịwa lẹ.

¹⁴Ang ọlẹ kọ ri ẹhị ọ-da hile nyahị ẹ-ẹga nya Ohe Oluhye ri yẹkẹẹ, ang myị́ ang ọlẹ kahị bịlẹ Ohe Oluhye pwoku irya nyamwụ ẹ-ẹpwụ nya abwọ ọrịrị, Ohe Oluhye kaa wo abwọ ọrịrị nyahị ọọwa.

¹⁵Jaabwọ kahị jẹ́ myịmyị yẹkẹẹ, Ohe Oluhye kaa wo omyi nya abwọ ọrịrị nyahị u-uhye nya ang myị́ ang ọlẹ kahị kaa bịlọọ lẹ, ahị tịtị kaa dahịhile yẹkẹẹ, ahị dọmwụ ye ang ọọwa ene-ene bwu ẹga nya Ohe Oluhye ịnyịlẹhị lẹ.

¹⁶Ó ri ká ọngọngọhẹ nyanụ á yẹ ọngịnyị nya Ohe Oluhye ọọnamwụ kọ juwa họ ang onyobyi ọlẹ kọ ka kpụ igu ogbugbu ka aalẹ, anụ́-ụ raabwọ ha Ohe Oluhye chajị nya ọlọhọbịrị ọọwa chajị ká Ohe Oluhye ka chọọ da mẹ. Aalẹ, Ohe Oluhye ka hu ọhịhị ha ọlọhọbịrị ọọwa ịnyịlẹhị, ó ri ká ọhọbịrị nyamwụ á ri ọhọbịrị ọ-kpụ igu ogbugbu ka. Ọhọbịrị ọ-kpụ igu ogbugbu lẹ, ọ ji. Ụ-ụma nya ọhọbịrị ọ-kpụ igu ọlịnyị, m tị wẹẹ byinu yẹkẹẹ, anụ raabwọ ju ọngịnyị u-uhye nyamwụ koo.

¹⁷Ang myị́ ang onyobyi ọhọhọ wuu ri ọhọbịrị ị-ịlahị nya Ohe Oluhye. Ma, ọhọbịrị ọ-kpụ igu ogbugbu ka tị juwa ịnyịnyị.

¹⁸Ahị jẹ́ yẹkẹẹ, ọng myị́ ọng ọlẹ ká Ohe Oluhye á nwụ ma onyeewe lẹ, ọ́ kaa họ ang onyobyi myịmyị kịlahị-ịlahị kaka. Chajị Ọnyẹwẹ nya Ohe Oluhye ayịdang kaa ke ọngọọwa lẹ. Ohe onyobyi á kaa yụbwọ nyamwụ gu ọngọọwa myị́ kpong-kpong kaka.

¹⁹Ahị jẹ́ yẹkẹẹ, ahị ayịdang ri angịnyị nya Ohe Oluhye lẹ. Ahị tị jẹ́ ká odehe lẹpwụ-lẹpwụ juwa e-ekpeleji nya ọngịrị nya Ohe Onyobyi ịnyịnyị.

²⁰Ahị myịmyị jẹ́ ká Ọnyẹwẹ nya Ohe Oluhye warị wẹ odehe ọlẹ lẹ. Ọwa-à hu ọ-jẹ́ myịmyị hahị du kahị jẹ́ yẹkẹẹ, Ohe Oluhye Adịda a ri Ohe Oluhye ịnyịlẹhị lẹ. Ịnyị a du kahị jam hịhị ẹ-ẹpwụ nya Ohe Oluhye nya ịlẹhị ọọwa bala ọhịhị ẹ-ẹpwụ nya iJisọsị ịKịrayịsị Ọnyẹwẹ nyamwụ lẹlẹ. Ọwa ayịdang a ri Ohe Oluhye nya ịlẹhị bala ọ-ri ọhịhị ọmyịmyị-ka lẹ.

²¹Anụ anyị ichiche nyam, anụ́-ụ juwa cheji ba ihye ijiga ịlala wuu mẹ.