Read idege Angịleje 1 Bible Online

Angịleje 1 - idege bible

Angịleje 1

¹Ụka ká iJochuwa gbu kpá, ala Isirẹlụ tọ Amkpaa wo yẹkẹẹ, “Imwawụ oyina ẹ-ẹpwụ nyahị a tí ka jene kele ka dẹwụ ta ala iKenan?”

²Amkpaa waa yẹkẹẹ, “Ala iJuda à ka kele lẹ. M jam ya ọpyị ọwẹ haa lẹ.”

³Ụka ọọwa, ala iJuda byi ala iSimyọn aanaa yẹkẹẹ, “Anụ baahị wẹ ọpyị ọlẹ kị ga hahị kahị dẹwụ ta ala iKenan lawụlẹ mẹ. Aalẹ, ahị tịtị ka wẹ ka danụ ụbwọ dẹwụ ye ọpyị ọlẹ kị ga hanụ ịnyịnyị.” Ọọwa, alimwawụ nya iSimyọn

⁴bala alimwawụ nya iJuda a dẹwụ lawụlẹ lẹlẹ. Amkpaa họ ị kụrụ ala iKenan bala ala ịPẹrisi. Ị kụrụ angị ụnọ iwo (10,000) e-epweji nya ịBẹsẹkị.

⁵Ị yẹ Adonibẹsẹkị Adịrahụ nya alụwa. Ị dẹwụ tọọ.

⁶Adonibẹsẹkị rụnyẹ rụ, ị tị kwoo ka wu. Ọọwa, ị chọọ akachụ ịdụdụgba bala achụụ ịdụdụgba eku lẹlẹ.

⁷Ọọwa Adonibẹsẹkị a yẹkẹẹ, “Ẹbyị họm alẹ lẹ! Idịrịhụ iwo irwiye (70) ịlẹ kam chị akachụ ịdụdụgba bala achụụ ịdụdụgba nyaa eku kaa yile egbawẹ e-ekpeleji nya iteburu nyam ri. Uri nya ang ọlẹ kam họ ịdịrịhụ ịwẹ Ohe Oluhye a ya wum lẹẹ lẹlẹ.” Ọọwa, ala iJuda a kpọọ ka iJerusalẹm lẹ, ọ gbu ụ-ụwa lẹlẹ.

⁸Ọọwa, ala iJuda a dẹwụ kụrụ ala iJerusalẹm lẹ, ị nwụ iru nya alụwa lẹ, ị chị epweji nyaa ila lẹlẹ.

⁹Ụka kị kụrụ angịwẹ kpá, ị hu ang kaka dẹwụ ta ala iKenan ịlẹ kị kụ i-ikiti bala ụteeji bala ọpyị ọkanggba oledii.

¹⁰Ala iJuda kele ka dẹwụ ta ala iKenan ịlẹ kị kụ i-iHebirọn ọlẹ ká ẹnyị olene nyamwụ ri iKiriyatị-aba. Ị kụrụ ala iChechayị bala ala Ahiman bala ala ịTalimayị.

¹¹Ị rụ bwu ụwa kele ka dẹwụ ta ala ịDẹbi. Ẹnyị olene nya ịDẹbi ọwẹ a ri iKiriyatị-ịsẹfa lẹ.

¹²Ụka ọọwa, ịKalẹbụ yẹkẹẹ, “Ọngọngọhẹ ọlẹ kọ be ala iKiriyatị-ịsẹfa ẹpwa kpụ kọ ye epweji nyaa myị aalẹ, m ka hu Akịsa ọnyị nyam họọ ye.”

¹³Ọọwa, Ọtịnẹlụ ọnyị ọlẹng nya ịKẹnasị a dẹwụ kụrụ epweji nya iKiriyatị-ịsẹfa lẹlẹ. ỊKẹnasị ayịdang ri ọnyịnịna ọlẹng ochiche nya ịKalẹbụ. Ọọwa, ịKalẹbụ a hu ọnyị Akịsa ọnyị ọnyang nyamwụ họọ ye nya ahụ nyamwụ lẹlẹ.

¹⁴Ụka kị ye awụlẹ lẹ, Ọtịnẹlụ a tụ ẹla rịrị Akịsa[1] ahụ nyamwụ yẹkẹẹ, “Kele ká bịlẹ adang ọpyị mẹ.” Ịnyị, ọ ka ẹga nya ịKalẹbụ adamwụ lẹlẹ. Ụka ká Akịsa hireji bwu obyiyó nyamwụ lẹ, ịKalẹbụ a tọọ wo yẹkẹẹ, “Ẹla-ịyẹ tị́?”

¹⁵Akịsa a byoo yẹkẹẹ, “Gam ang-ahị mẹ. Ọpyị ọlẹ ká gam wẹẹ ji ẹga ọkanggba. Lẹẹlẹ, gam ẹmwụ-enyi ịhyẹ mẹ.” Ọọwa, ịKalẹbụ a ya ẹmwụ-enyi ịlẹ kị ji oye oluhye bala oye oleji họọ lẹlẹ.

¹⁶Ọọwa, anyị ịtụma nya ọlẹng ọla ịKayin ọhẹ kọ ri adịdẹpwa nya iMosisi a hu ang bwu iJeriko epweji ọlịrị ba ala iJuda kele ka ugbileji oledii nya Aradị i-iJuda lẹlẹ. Lẹ, ị kụ ẹpwa ta ala iJuda ụ-ụwa lẹlẹ.

¹⁷Ụka ọọwa, ala iJuda kpa ala iSimyọn aanaa ba ịlaa kele ka dẹwụ ta ala iKenan ịlẹ kị kụ ịSẹfatị, ta epweji nyaa ayịreji wuu gbanggbang lẹlẹ. Ọọwa, ị ju epweji ọọwa ẹnyị ịHọma lẹlẹ.

¹⁸Amkpaa da ala iJuda ụbwọ kụrụ du kị nu epweji ilikiti. Ị́ kụrụ epweji nya ịGasa bala Achịkẹlọn bala Ẹkịrọn ka. Angịlẹ kị kụ ụteeji wuu la ang ịrụnyẹ ịlẹ ká anyịrẹ kaa gbile. Lẹẹlẹ, ala iJuda-á kụrwaa kpụ ị kwaa kpehe myị ka.

²⁰Jaabwọ ká iMosisi ya neeji ene lẹ, ị chụ epweji nya iHebirọn ha ịKalẹbụ lẹlẹ. ỊKalẹbụ mwụ ogang ịta nya anyị ịtụma nya Anakị rụ hi epweji ọọwa.

²¹Ma, imwawụ nya iBenjamịn á tị ku ala iJebusi ịlẹ kị kụ iJerusalẹm rụ ka. Chajị nya ọọwa lẹ, ala iJebusi kịnyaa la ọ-kụ ụ-ụwa ta ala iBenjamịn i-iJerusalẹm daalẹ.

²²Alimwawụ nya Ifurem bala alimwawụ nya ịManasẹ wuleji kele ka dẹwụ tụ ịBẹtẹlụ pyịpyị. Amkpaa daa ụbwọ.

²³Ị du alịbaje ka wụla epweji nya ịBẹtẹlụ yẹ. Ẹnyị olene nya ịBẹtẹlụ a ri iLusi lẹ.

²⁴Alịbaje ịịwa tọ ọlẹng ọhẹ kọ juwa kpehe bwu epweji warị. Ọọwa, ị chị rịrọọ yẹkẹẹ, “À ka mẹ ụgbẹyị o-bwu ka epweji ọwẹ jẹẹhị pyií, aalẹ áhị ka họng ịngịngịhyẹ ka.”

²⁵Ọọwa, ọlẹng ọwẹ a mẹ ụgbẹyị jaa lẹlẹ. Ọọwa, ala Ifurem bala ala ịManasẹ a nwụ ala ịBẹtẹlụ wuu kẹnẹ-kẹnẹ ka hi ọlẹng ọwẹ bala alẹpwa nyamwụ lẹlẹ.

²⁶Ọọwa, ọlẹng ọwẹ a kele ka ọpyị nya ala iHiiti lẹ, ọ nwụ epweji ọhẹ ụ-ụwa lẹlẹ. Ọ wụrụ ẹnyụ nya epweji ọọwa iLusi. Ịnyị ị tịị wụrwọọ pyịyọọ daalẹ lẹ.

²⁷Ala ịManasẹ-ẹ́ ku angịlẹ kị kụ ị-ịBẹtịchan bala ịTanakị bala ịDọọ bala Ibiliyam bala iMegido bala epweji ichiche ịkịla ịdagaga jwaa rụ ka. Lẹẹlẹ, ala iKenan ịwẹ kịnyaa nyọka kụ ọ-ọpyị ọwẹ kịlahị.

²⁸Ụka ká ala Isirẹlụ la ọngịrị gụ olene, ị yẹ ala iKenan ịwẹ la anyịhị, juwa kpaa họ ụkụrwọ ha ịlaa. Ma, ị́ tị kwaa rụ gbanggbang ka.

²⁹Ala Ifurem-ḿ ku ala iKenan ịlẹ kị kụ epweji nya ịGẹsẹ rụ ka. Lẹẹlẹ, ala iKenan ịịwa kịnyaa la ọ-kụ ụwa taa.

³⁰Ala iSebulọn-ń ku angịlẹ kị kụ epweji nya iKitirọn bala ịNahalọlụ rụ ka. Lẹẹlẹ, ala iKenan ịịwa kịnyaa la ọ-kụ taa. Ala iSebulọn kpaa họ ụkụrwọ nya igwabwọ ha ịlaa lala anyịhị.

³¹Ala Achẹẹ-ẹ́ ku angịlẹ kị kụ epweji nya Akọ bala ala ịSayịdọn bala ala Ahịlabụ bala ala Akisibu bala ala iHeliba bala ala Afẹkị bala iRehọbụ rụ ka.

³²Ọọ-la ọlẹ ká ala Achẹẹ-ẹ́ ku ala iKenan ịlẹ rụ ka lẹ, ị kụ lawụlẹ bala ala iKenan ịwẹ ụ-ụwa.

³³Ala ịNafụtali-í ku ala iKenan ịlẹ kị kụ ị-ịBịtị-ịchẹmẹchị bala ịBẹtị-anatị rụ ka. Lẹẹlẹ, ịwa ala ịNafụtali kụ ụwa ta ala iKenan ịlọpyị ọọwa. Ị tị yẹ ala iKenan ịịwa la anyịhị juwa kpaa họ ụkụrwọ nya igwabwọ ha ịlaa.

³⁴Ala ịDan tị lẹ, ala Amọ kwaa tịrẹkpẹ ka ikiti la ọ-myị haa ị hireji wẹ ụteeji ka.

³⁵Ala Amọ kịnyaa la ọ-kụ ụ-ụwa Ayịjalọn bala ịChalibyim bala ọ-ọgbọdọ nya ịHẹrẹsị. Ala Ifurem bala ala ịManasẹ tị yẹ ala Amọ la anyịhị, kpaa họ ụkụrwọ nya igwabwọ ha ịlaa.

³⁶Oyi nya ọpyị nya ala Amọ bwu ẹga nya owulee-wule nya Ọgbọdọ nya Akịrabim lalaala ka ju ka ẹtẹ nya ịSẹla kele kịlahị nya ụwa.