Read idege Angịleje 10 Bible Online

Angịleje 10 - idege bible

Angịleje 10

¹Ụka ká Abimẹlẹkị gbu kpá, ọngọleje ọkịla wẹ ka chị ala Isirẹlụ da. Ẹnyị nyamwụ ri iTola ọnyị nya iPuwa. Adamwụ ọgbahị a ri iDodo lẹ. ITola bwu imwawụ nya Isakaa. E-epweji nya ịChamẹẹ i-ikiti ịlọpyị nya Ifurem ọ kụ lẹ.

²Ọ kpẹhị rịrị ala Isirẹlụ jịra ẹ-ẹka iwo imiiye da ẹka ịta lẹpwụ-lẹpwụ. Ọọwa, ọ gbu lẹ, ị jwoo eji ị-ịChamẹẹ lẹlẹ.

³Ụka ká iTola gbu kpá, ịJayii ọlẹ kọ bwu iGiliyadị ri ọngọleje nya ala Isirẹlụ ẹ-ẹpwụ nya ẹka iwo imiiye da imiiye gbẹgbịlẹ.

⁴ỊJayii ma anyị alẹng angị iwo ịta. Ị kaa kụ ibyiyó iwo ịta ịnyịnyị. Anyị alẹng iwo ịta ịwẹ kpẹhị rịrị epweji iwo ịta i-iGiliyadị. Ị kaa wụrụ epweji ịịwa epweji nya ịJayii.

⁵ỊJayii gbu, ị jwoo eji e-epweji nya ịKamọn.

⁶Ala Isirẹlụ myịmyị họ ang onyobyi ba Amkpaa. Ị kpụ eteji ha ịBaalụ bala Achịtorẹtị bala ihye nya ala iSiriya bala ala ịSayịdọn bala ala iMowabụ bala ala Amọn bala ala iFilisitiya. Ị nyẹẹkpẹ da Amkpaa, hịnyọ la ọ-gbịgba họọ gbanggbang.

⁷Ọọwa, Amkpaa a wụ ẹjẹ taa lẹ, ọ ya iwe da lẹ, ala iFilisitiya bala ala Amọn a wẹ kaka kụrwaa lẹlẹ.

⁸Ị yẹ ala Isirẹlụ ịlẹ wuu kị kụ ka ọmwẹnụ-ụtụrụ nya Ihu ịJọdan i-iGiliyadị e-egeji nya ala Amọn ụhị onyobyi-obyi ẹ-ẹpwụ nya ẹka iwo kụrụ ineku.

⁹Ala Amọn dọmwụ kaa kpoye nya Ihu ịJọdan kaka mwẹla ta ala iJuda bala ala iBenjamịn bala Ifurem ịnyịnyị. Ụka ọwẹ, ala Isirẹlụ ji ẹpwụ nya uhila nya akama.

¹⁰Ọọwa, ala Isirẹlụ a jida ju Amkpaa byoo yẹkẹẹ, “Ahị họ ang onyobyi bang lẹ, chajị ahị nyẹẹkpẹ dang ahụ Ohe Oluhye nyahị, mwọọgịlẹ kele ka gbịgba ha ihye ịBaalụ.”

¹¹Amkpaa wẹ byaa yẹkẹẹ, “Ụka ká ala Ijipiti bala ala Amọ bala ala Amọn bala ala iFilisitiya bala

¹²ala ịSayịdọn bala ala Amalẹkị bala ala ịMayọn tụụnụ pyịpyị ugbeene, anụ cheko wụrụm. Am kpakpaakpa a tị́ chịnụ da.

¹³Ee lẹ, ịyẹ tị́ tị̀ tị du kanụ nyẹẹkpẹ dam kaka gbịgba ha ihye ịkịla mẹ? Ḿ ka chịnụ da ugbẹnyị kaka.

¹⁴Anụ kele ka wụrụ ihye ịlẹ kanụ chụ, kị chịnụ da ụka nya akama nyanụ mẹ.”

¹⁵Ala Isirẹlụ tị byi Amkpaa yẹkẹẹ, “Ahị họ tịpyọ lẹ. Yẹhị akama jaabwọ kọ hang mẹ. Ọkẹnẹ-kẹnẹ ri, chuchuu ká chịhị da alẹ mẹ.”

¹⁶Ọọwa, ị go ijiga nyaa wuu chịịrụ lẹ, ị gbịgba ha Amkpaa lẹlẹ. Ụka ọọwa, ị lọọ ahyẹẹrwẹrwa chajị nya akama ọyẹyẹ nyaa ọwẹ.

¹⁷Ọọwa, ala Amọn a nwụlanọ nya ẹwụ ọdada lẹ, ị chịkụ i-iGiliyadị lẹlẹ. Ala Isirẹlụ nwụlanọ ịnyịnyị. Ịwa chịkụ i-iMisipa ụ-ụwa i-iGiliyadị.

¹⁸Alụwa bala alegbeju nya ala Isirẹlụ juwa tọ awụlẹ wo yẹkẹẹ, “Oowo tị́ ka kụ ịlahị kpahị dẹwụ ta ala Amọn lẹẹ mẹ? Ọngọ họ ịnyị myị ka ri olegbeju nya angị kụ iGiliyadị wuu.”