Read idege Angịleje 12 Bible Online

Angịleje 12 - idege bible

Angịleje 12

¹Ala Ifurem tụ angịdẹwụ nyaa guru lẹ, ị kpoye nya Ihu nya ịJọdan kele ka ịSafọn lẹlẹ. Ọọwa, ị byi iJefuta yẹkẹẹ, “Ịyẹ tị́ du ká kpoye kaka dẹwụ ta ala Amọn la ọ-wụrụụhị ka dang ụbwọ dẹwụ taa pyịpyị ka-à? Ahị ka chị ẹpwa nyang ila langlang.”

²Ma, iJefuta wẹ byaa yẹkẹẹ, “Am bala angịnyị nyam mwẹla ọtụka-ọtụka ta ala Amọn. M̀ du ẹrụ tọnụ, ánụ tị myị wẹ ka dam ụbwọ ka.

³Ụka kam yẹ kanụ myị wẹ kaka lẹ, m ya egbeju ju o-odo kele ka dẹwụ ta ala Amọn lẹlẹ. Amkpaa tị họ m kụrwaa. Lẹẹlẹ, ịyẹ tị́ du kanụ juwa wẹ ka mwẹla tam mẹ?”

⁴Ọọwa, iJefuta a tụ ala iGiliyadị guru lẹ, ị dẹwụ ta ala Ifurem lẹlẹ. Ala iGiliyadị kụrwaa chẹẹchẹẹ. Ala Ifurem kaa kpa ya ene yẹkẹẹ, “Ala iGiliyadị ị-kụ Ifurem bala ịManasẹ ịwẹ lee! Meme angịnyị i-hi cheeji nyahị ahị ala Ifurem ị tị́ ri.”

⁵Ala iGiliyadị kele ka hịla ẹ̀ga ẹ-ẹga o-bwu kpoye nya Ihu ịJọdan wuu chajị ká ala Ifurem-ḿ ka kpoye be rụ ka. Ụka ká ọla Ifurem ọhẹ-ẹ́ tịtọ kọ ka kpoye, ọ kaa bịlẹ kị ka hi iwe họọ. Ma, ala iGiliyadị kaa tọ ọngọọwa wo yẹkẹẹ, “A ri ọla Ifurem-ḿ?” Ó-ri kọ ya nyị ehe,

⁶ị kaa byoo yẹkẹẹ, “Wụrụ ‘iChiboleti’ wẹẹ.” Ala Ifurem-ḿ tị jẹ-ẹ́ wụrwọọ yẹẹyẹẹ ka. Lẹẹlẹ, ó-ri ká ọngọọwa-á wụrwọọ “iSiboleti” lẹ, aalẹ ala iGiliyadị a kaa woo pyẹẹ nwụ ẹ-ẹga o-bwu kpoye nya ịJọdan lẹlẹ. Ị nwụ ala Ifurem angị ụnọ iwo ine da ụnọ imiiye (42,000) ụka ọọwa.

⁷IJefuta ri ọngọleje nya ala Isirẹlụ ẹka ịrwọnyẹ gbẹgbịlẹ. Ọọwa, ọ gbu lẹ, ị jwoo eji e-epweji ọhẹ i-iGiliyadị lẹlẹ.

⁸Ụka ká iJefuta gbu kpá, Ibisan ọla ị Bẹtịlẹhẹm ri ọngọleje.

⁹Ọ ma anyị anyang angị iwo ịta bala anyị alẹng angị iwo ịta. Ọ ya anyị anyang nyamwụ da ọrụ kpehe hi ogang nyamwụ. Ọ tịtị ye ịhụ bwu odehe ha anyị nyamwụ angị iwo ịta ịnyịnyị. Ibisan ri ọngọleje Isirẹlụ ẹka irwiye.

¹⁰Ọọwa, ọ gbu lẹ, ị jwoo eji ị-ịBẹtịlẹhẹm lẹlẹ.

¹¹Ụka ká Ibisan gbu kpá, Elọn ọlẹ kọ bwu iSebulọn ri ọngọleje. Ọ ri ọngọleje nya Isirẹlụ ẹka iwo chiriri.

¹²Ọọwa, ọ gbu lẹ, ị jwoo eje e-epweji nya Ayịjalọn ọ-ọpyị nya iSebulọn lẹlẹ.

¹³Ụka ká Elọn gbu kpa, Abudọn ọnyị nya iHilẹlụ o-bwu epweji nya iPiratọn ri ọngọleje nya ala Isirẹlụ.

¹⁴Ọ ma anyị alẹng angị iwo ine bala anyị alẹng ịtụma angị iwo ịta. Ịwa wuu kaa kụ ibyiyó irwiye. Abudọn kpẹhị rịrị ala Isirẹlụ ẹka ineku gbẹgbịlẹ.

¹⁵Ọọwa, ọ gbu lẹ, ị jwoo eji e-epweji nya iPiratọn ọ-ọpyị nya Ifurem i-ikiti ịla egeji nya ala Amalẹkị lẹlẹ.