Read idege Angịleje 13 Bible Online

Angịleje 13 - idege bible

Angịleje 13

¹Ala Isirẹlụ myịmyị họ ang onyobyi ba Amkpaa. Ọọwa, ọ yaa ji ekpeleji nya ala iFilisitiya ẹka iwo ine lẹpwụ-lẹpwụ lẹlẹ.

²Ọlẹng ọhẹ juwa ụka ọọwa ká ẹnyị nyamwụ ri ịManowa kọ kụ e-epweji nya iSora. Ọ bwu imwawụ nya ịDan. Ahụ nyamwụ-ụ́ ye ọnyị ma ka.

³Olegu-ẹrụ nya Amkpaa chị ịlọmwụ ehe mẹjẹ ahụ nya ịManowa lẹ, ọ byoo yẹkẹẹ, “O ri nya ịlẹhị, á ye ọnyị ma ka. Ma, a juwa ka jẹ ẹnyị, ká ka ya ma ọnyị ọlẹng.

⁴Aa kpẹhị chịng mẹ. Á ka nwa ere nya alakọnụ lee ere ọnyọọngịrị ụma ọkịla ọhẹ-lọhẹ ka. Á ka ri ang oriri ọlẹ kọ la charị-charị ka lẹ ka.

⁵Ụka ká jẹ ẹnyị ma ọnyị ọọwa kpá, á ka pwọọ inyi ẹnẹnẹhẹ ka, chajị ọwa ayịdang ka ri ịnasịrayịtị[6] ọlẹ kị hu ha Ohe Oluhye bwu ụka-ụka nya ọmama nyamwụ. Ọ ka chị ala Isirẹlụ da bwu ẹpwụ nya ọngịrị nya ala iFilisitiya.”

⁶Ọọwa, ahụ nya ị Manowa a kele ka tịrọnụ nya ẹlẹwẹ ya je ọrụmwụ yẹkẹẹ, “Ọlẹng ọhẹ bwu ẹga nya Ohe Oluhye wẹ ẹga nyam. Ọwa ayịdang la uhi-uhi me olegu-ẹrụ nya Ohe Oluhye. Ḿ tọọ wo nya ẹga kọ bwu warị ka, ọ́ tị bwuru ẹnyị nyamwụ jem ka.

⁷Ọ tị byim am nyị juwa ka jẹ ẹnyị ma ọnyị ọlẹng. Ọ byim am nyị nwa ere nya alakọnụ lee ụma nya ere ọnyọọngịrị ọkịla ọhẹ-lọhẹ ka. Ọ ya ang ọ-la charị-charị kem am nyaa ka ri lẹ, chajị ọnyị ọọwa nyị ka ri ịnasịrayịtị ẹ-ẹpwụ nya ọhịhị nyamwụ wuu.”

⁸Ọọwa, ịManowa a raabwọ bịlẹ Amkpaa yẹkẹẹ, “Amkpaa ee, myị ká ọngịnyị nya Ohe Oluhye ọọwa à mwẹẹkpẹ wẹ ẹga nyahị chajị kọ mẹjẹẹhị ang ọlẹ kahị ka họ ụka kị ma ọnyị ọọwa kpá mẹ.”

⁹Ohe Oluhye wo ọbịlẹ-bịlẹ nya ịManowa. Ọọwa, olegu-ẹrụ nya Ohe Oluhye a kele ka ẹga nya ahụ nyamwụ myịmyị ụka kọ hụhụ ụ-ụwa ẹ-ẹrụ lẹlẹ. Ọrụmwụ-ụ́ tị juwa tọọ ka.

¹⁰Ọọwa, ọ rụnyẹ lagaga ka byoo yẹkẹẹ, “Ayịbam ee, ọ wẹ lẹ! Ọlẹng ọlẹ kọ mẹ ịlọmwụ jẹm ẹnụmwụ ọhẹ lẹẹ wẹ myịmyị lẹ!”

¹¹ỊManowa wuleji ba ahụ nyamwụ kele. Ụka kọ pwụ ẹga nya ọlẹng ọọwa lẹ, ọ tọọ wo yẹkẹẹ, “Ahụ a ri ọngọlẹ kọ ya ẹla ta ahụ nyam lẹ-ẹ́?” Ọlẹng ọọwa wẹ byoo yẹkẹẹ, “Ee, am ịnyị.”

¹²Lẹ, ịManowa a tọọ wo yẹkẹẹ, “Ụka ká ẹla ọlọnụ nyang-ńg họ jịra kpá, ịịyẹ ọnyị ọọwa a tị ka họ? Ụma nya ọhịhị ọlanyị ọnyị ọọwa a tị ka la-à?”

¹³Olegu-ẹrụ nya Amkpaa wẹ byoo yẹkẹẹ, “Ang myị ang ịlẹ kam byi ahụ nyang kọ ka họ-ọ̀ wẹ lẹ, ọ kpẹhị chịng kọ haa jịra mẹ.

¹⁴Ọ́ ka ri ịngịngịhyẹ ọlẹ kị kpa alakọnụ họ ka. Ọ́ ka nwa ere nyamwụ lee ere ọnyọọngịrị ụma ọkịla ka. Ọ́ ka ri ang ọ-la charị-charị ka lẹ ka. Ọ ka họ ang ịlẹ kam ya joo wẹ wuu.”

¹⁵Ọọwa, ịManowa a byi olegu-ẹrụ nya Amkpaa yẹkẹẹ, “Dayị pyịnyẹng wẹẹ, kahị ya ụgba nya embiri ọhẹ kpụ hang ene mẹ.”

¹⁶Ma, olegu-ẹrụ nya Amkpaa wẹ byoo yẹkẹẹ, “Ḿ godayị wẹwẹ wẹẹ, ḿ ka ri ang nyang ka. Ọ́ tị ri ká ka kpụ ang lẹ aalẹ, a tị tị ya kịla iyaju ila ha Amkpaa mẹ.” ỊManowa ayịdang-ńg jẹ ọngọwẹ nyị ri olegu-ẹrụ nya Amkpaa ka.

¹⁷Ọ byi olegu-ẹrụ ọwẹ yẹkẹẹ, “Bwuru ẹnyị nyang jehi, chajị kahị ka chị ihi jung ụka ká ẹla ọlọnụ nyang-ńg họ jịra kpá mẹ.”

¹⁸Olegu-ẹrụ tọọ wo yẹkẹẹ, “Ịyẹ tị́ du ká juwa tịtọ nya ẹnyị nyam-m̀? Ẹnyị ọlẹbyẹbyị ọ ri lẹ.”

¹⁹Ọọwa, ịManowa a kpa ụgba nya embiri bala ajẹ nya ang-ẹrụ kele lẹ, ọ yaa kịla iya u-uhye nya ẹjwọ ọlẹ kọ ri ogidi ha Amkpaa ọlẹ kọọ họ ụkụrwọ ẹbyẹbyị lẹlẹ.

²⁰Ẹlẹlẹ nya ila o-bwu uhye nya ogidi juwa rụ ka uhye-ọgba tileleele. Ụka ọọwa, olegu-ẹrụ juwa tụ ẹlẹlẹ nya ila da rụ ka uhye. Lẹ. ịManowa a jẹ ká ọlẹng ọwe ri olegu-ẹrụ nya Amkpaa lẹlẹ. Ọọwa, ọwa bala ahụ nyamwụ a dahị kụrụ eji lẹlẹ. Í yẹ olegu-ẹrụ nya Amkpaa gụ ọọwa kaka.

²²ỊManowa a byi ahụ nyamwụ yẹkẹẹ, “Ahị gbu alẹ lẹ, chajị ahị yẹ Ohe Oluhye lẹhị-lẹhị lẹ!”

²³Ma, ahụ nyamwụ byoo yẹkẹẹ, “Ó-ri ká Amkpaa-á tịtọ nyọka nwụhị nwụ ịnọ, ọ́ tụtụm ka myị-ị̀ ye iya ọkịlaakịla nyahị bala ọhaha nya ajẹ nya ang-ẹrụ nyahị kaka. Ọ́ tị ka myị-ị̀ mẹ ang ịlẹ wuu jẹẹhị lee o-ya ala ịlịịlẹ jehi wuu kaka ịnyịnyị.”

²⁴Ọnyang ọwẹ ma ọnyị ọlẹng. Ọ wụrụ ẹnyị nyamwụ ịSamsịn. Ọ nwa ka ri adam ọlẹng. Amkpaa wahị kụrwọọ.

²⁵Olegu nya nya Amkpaa dọmwụ nyọka jwoo ọngịrị bwu ụka-ụka kọ juwa e-epweji nya ịMahane-dan ọlẹ kọ kụ apewa nya epweji nya iSora bala Ẹchịtawolu.