Read idege Angịleje 14 Bible Online

Angịleje 14 - idege bible

Angịleje 14

¹Ẹnẹhẹ, ịSamsịn kele ka epweji nya iTimna. Ọ yẹ ọnyang nya ala iFilisitiya ọhẹ ụ-ụwa.

²Ụka kọ nya tịrẹkpẹ ka ẹpwa, ọ byi adamwụ bala ịnamwụ yẹkẹẹ, “Ọnyang nya ala iFilisitiya ọhẹ lalẹẹ i-iTimna kam yẹ. M tịtọ kanụ ka yoo ham.”

³Ma, adamwụ bala ịnamwụ wẹ byoo yẹkẹẹ, “Ịyẹ tị́ du ká ka doyi kpataka kele ka ye ahụ bwu ẹpwụ nya ala iFilisitiya ị-jẹ Ohe-ka ịwẹ-ẹ̀? A ka ye ọnyang ọhẹ ye bwu ẹpwụ nya imwawụ-imwawụ nyahị am ị-ịnyahị myị.” ỊSamsịn tị byi adamwụ yẹkẹẹ, “Anụ ye ọnyang ọwẹ ham mẹ, ọwa a ri ọngọlẹ kam titọ lẹ.”

⁴Adịda bala ịnịna nya ịSamsịn á tị jẹ ká Amkpaa a wẹẹ kpa ịSamsịn jẹdịyẹ ọwẹ ka. Amkpaa juwa tịtọ nya ụgbẹyị ọlẹ kọ ka bwu da ala iFilisitiya uya. Ụka ọwẹ, ala Isirẹlụ ji ekpeleji nya ọngịri nya ala iFilisitiya.

⁵Ọọwa, ịSamsịn a hu ang kele ka iTimna bala adamwụ bala ịnamwụ lẹlẹ. Ụka kị jẹ pwụ ẹrụ nya alakọnụ nya alụwa, ụgba nya ugẹbẹ ọhẹ kpehe kpiloko jahị da ịSamsịn.

⁶I-ijata ijata, olegu nya Amkpaa jụ ka ẹpwụ nya ịSamsịn, ya ọngịrị ọtụka-ọtụka họọ. Ọọwa, ọ kpa ụbwọ-ụbwọ hụla ugẹbẹ ọọwa hwẹẹhwẹẹ lala ọnyị-ẹmwụ lẹlẹ. Ọ́ tị ya ẹlẹwẹ je adamwụ anyị ka.

⁷Ọọwa, ịSamsịn a jẹ ka pwụ epweji ọwẹ lẹ, ọ ya ẹla ta ọnyang ọọwa lẹlẹ. Ọnyang ọọwa há ịSamsịn lụmẹ.

⁸Ụka kọ nọ chẹẹ, ọ tịrẹkpẹ kele kọ ka yẹ ọnyang ọwẹ. Ụka kọ jẹ pwụ ụgbẹyị, ọ pẹ ka ẹpwụmẹ kọ ka yẹ akịrakpa nya ugẹbẹ ọlẹ kọ nwụ. Ọọwa, ọ tị yẹ ká inwa me nụwa ẹ-ẹpwụ nya akịrakpa nya ugẹbẹ ọọwa lẹlẹ.

⁹Ọ ru ẹbẹ nya inwa ọọwa kpa a-abwọ juwa kpa nẹ jẹ rụ. Ụka kọ jẹ pwụ ẹga nya adamwụ anyị, ọ bwu inwa ọọwa haa, ị nẹ ịnyịnyị. Ọ́ tị ya jaa ọwa nyị ru inwa ọwẹ bwu ẹpwụ nya ogu nya ugẹbẹ ka.

¹⁰Adịda nya ịSamsịn kele ka ẹpwa nya ọnyang ọla iFilisitiya ọwẹ. ỊSamsịn wụrụ ọhụhụ nya ang oriri ụ-ụwa jaabwọ ká ọhọhọ nya ikolobya ịlụka ọwẹ ri.

¹¹Ụka ká ala iFilisitiya yẹ ịSamsịn, ị chụ ikolobya angị iwo ịta du ka hụ tọọ.

¹²Ọọwa, ịSamsịn a byaa yẹkẹẹ, “M̀ ka danụ ogbibyi ọhẹ. Ó-ri kanụ jẹ etu nyamwụ bwuru jem ene ká ẹnụtụrụ irwiye nya ọhụhụ nya ang oriri ọlẹ ka che jwaalẹ, m ka ya ịpwụ ịnyịịla-ịnyịịla iwo ịta bala ịwụrụ iwo ịta hanụ.

¹³Ọ́ tị ri kanụ jọọ bwuru jem ka aalẹ, anụ ka ya ịpwụ ịnyịịla-ịnyịịla iwo ịta bala ịwụrụ iwo ịta ham.” Ọọwa, ịwa wuu a myị lawụlẹ yẹkẹẹ, “O hiigu. Ahị wo ogbibyi nyang ọọwa mẹ.”

¹⁴ỊSamsịn daa ogbibyi ọọwa yẹkẹẹ, “Ẹ-ẹpwụ nya ang o-wu ang ri, ang ọlẹ kị ka ri a kpehe bwu lẹ. Ẹ-ẹpwụ nya ogburujwo, ang ọlịpyọ gẹnẹ-gẹnẹ a kpehe bwu lẹ.” Ị maga jịra ẹ-ẹnụtụrụ ịta, ị́ tị jẹ etu nyamwụ bwuru ka.

¹⁵Ẹnụtụrụ ohene[7] lẹ, ị byi ahụ nya ịSamsịn yẹkẹẹ, “Pịrị ọrụng, kọ ya etu nya ogbibyi ọlẹ jehi mẹ. Ó-ri ịnyị ka aalẹ, ahị ka chịng bala alẹpwa[8] nya adang ila. Kpakpaakpa lẹẹ, anụ diroohi ẹpwa nyọka nuhi ang lagbụrụ kahị ka kpụ ẹbyahị-ị́?”

¹⁶Ọọwa, ahụ nya ịSamsịn a ka ẹga nya ọrụmwụ lida-lida ka byoo yẹkẹẹ, “M̀ jẹ ḿ hang ka! M̀ chakpa wụng ẹjẹ! A da angịnyị nyam ogbibyi, á tị myị bwuru etu nyamwụ jem ka.” ỊSamsịn wẹ byoo yẹkẹẹ, “Yẹ wẹẹ, ḿ dọmwụ ya ẹlẹwẹ je adam bala ịnam anyị lẹka. Lẹẹlẹ, anyị m tị́ ka jẹ-ẹ̀ ya jeng ahụ mẹ?”

¹⁷Ahụ nya ịSamsịn jida jwoo ẹnụ myị ẹnụ ẹ-ẹpwụ nya ẹnụtụrụ irwiye ịlẹ ka ọhụhụ nyaa ọwẹ ji wuu kọ ka bwuru ya joo. Ụka ohyẹẹkpẹ, ẹnụtụrụ ọharwiye lẹ, ọ ya joo ọọ-la ajị nyọka ẹlẹwẹ tọọ tutu lụmẹ-lụmẹ lẹlẹ. Ọọwa, ahụ nyamwụ a hwoo kpa ka ya je ala iFilisitiya nyaa lẹlẹ.

¹⁸Ene ká ẹnụ ka ka ube ẹnụtụrụ ọharwiye lẹ, alepweji ọwẹ a byi ịSamsịn yẹkẹẹ, “Ịịyẹ a tị́ lịpyọ gụ inwa wẹẹ? Ịịyẹ a tị́ ri ogburujwo gụ ugẹbẹ gụ-ụ̀?” Ọọwa ịSamsịn a byaa yẹkẹẹ, “Ó-ri ahụm kọ wu ẹrụ ọlẹ hanụ ka ịnọ, anụ họ anyanyị kanụ-ụ̀ jẹ ogbibyi nyam jẹ?”

¹⁹Ahyaahị, olegu nya Amkpaa jụ ka ẹpwụ nya ịSamsịn, jwoo ọngịrị ọtụka-ọtụka. Ọ hu ang ka ju ka epweji nya Achị elọn. Ọ nwụ alẹng angị iwo ịta ụ-ụwa. Ọ go ang nya angịịwa wuu lẹ, ọ kpa ịwụrụ nyaa kịla alẹng ịlẹ kị bwuru etu nya ogbibyi nyamwụ lẹlẹ. Ọọwa, ọ rụ tịrẹkpẹ ka ẹpwa lagbama-agbama chajị nya ẹlẹwẹ lẹlẹ.

²⁰Le, ị hu ahụ nya ịSamsịn ha ọngọkịla ye lẹlẹ. Ọngọọwa a ri oligu ọgụgụ nya ịSamsịn lụka ká ịSamsịn ye ọnyang ọwẹ lẹ.