Read idege Angịleje 15 Bible Online

Angịleje 15 - idege bible

Angịleje 15

¹Ụka kọ nọ chẹẹ, ká ụka nya ịrayịsị iwiiti ọchịchị pwụ, ịSamsịn kele ka wụla ahụ nyamwụ yẹ. Ọ kpa ẹmwụ ba ịlọmwụ kọ ka ya họọ. Ọọwa, ọ byi adamwụ-ẹpwa yẹkẹẹ, “M ka nọ u-ube nya ahụm.” Adamwụ-ẹpwa-á tị myị họọ ọ kele ka.

²Ọ byi ịSamsịn yẹkẹẹ, “M me ká ahụ nyang-ńg hang kaka lẹ, m hwoo ha oligu nyang ye lẹ. Ọnyịnamwụ ochiche tị dọmwụ há ụhị gwọọ wẹẹ. Yọọ ọwa ku ọmwakpa nya ahụ nyang ọwẹ mẹ.”

³Ọọwa, ịSamsịn a yẹkẹẹ, “Ugbẹnyị lẹ, ọngọngọhẹ-ẹ́ ka kpụm abyị nya ang myị ang kam họ ẹ-ẹga nya ala iFilisitiya ịlẹ kokoo!”

⁴ỊSamsịn kele ka wu itenyi-igbo ohu ịta (300). Ọ jwaa ori wu awụlẹ imimimiiye i-itọọgbẹ. Ọ ya ukunggo dụrụ ọ-chị do nya ori ọlapewa nya itọọgbẹ nyaa.

⁵Ọ ya ila gu ekinggo ịịwa. Ọọwa, ọ yi itenyi-igbo ịwẹ ori da ka ẹpwụ nya ẹrụ nya ala iFilisitiya lẹlẹ. Ị rụnyẹ tụ ẹrụ da la ẹrụ rụ ila wuu. Ịrayịsị iwiiti ịlẹ kị chị guru e-eji wuu tụ ịlẹ kị hi dayị kọkọ bala ẹrụ nya olivu nyaa wuu rụ ila.

⁶Ụka ọọwa, ala iFilisitiya juwa kpa tọ awụlẹ wo nya ọngọ họ ẹlẹwẹ. Ọọwa, ị wo ya ịSamsin nyaa họ ẹlẹwẹ lẹ lẹlẹ. ỊSamịn họ ịnyị chajị adamwụ-ẹpwa ọla iTimna hu ahụ nyamwụ ha oligu nya ịSamsịn ye. Ọọwa, ala iFilisitiya a kele ka wu ọnyang ọọwa lẹ, ị chọọ bala adamwụ[9] ila lẹlẹ.

⁷ỊSamsịn byi ala iFilisitiya yẹkẹẹ, “Ọ-ọla ajị nya ang ọlẹ kanụ họ-ọ̀ wẹ lẹ, ḿ ka mwụ ịnyọ hiinu kaka. M̀ ka họnụ kwiwa nwam-nwam ene pyii lẹ.”

⁸Ọ jahị mịlanya daa lọngịrị-ọngịrị, nwụ iru nyaa lụmẹ-lụmẹ. Ọọwa, ọ rụ ka hụ ụwa ụgbụ ọlọka nya ẹjwọ ọla Etam lẹlẹ.

⁹Ala iFilisitiya kele ka chịkụ i-iJuda. Ị mwẹla ta epweji nya iLehi.

¹⁰Ala iJuda taa wo yẹkẹẹ, “Anyị tị́ kanụ-ụ̀ warị ka mwẹla tahị-ị̀?” Ị wẹ yẹkẹẹ, “Ahị wẹ kahị ka wu ịSamsịn kpa rụ. Ahị ka họọ kwiwa nya ang ọlẹ kọ họhị.”

¹¹Ọọwa, alẹng nya ala iJuda angị ụnọ ịta (3,000) a kele ka ụgbụ ọlọka nya ẹjwọ ọla Etam lẹ, ị byi ịSamsịn yẹkẹẹ, “Ẹla ọlanyị a tị́ họhị ịnyị? Á jẹ kahị ji ekpeleji nya ala iFilisitiya ka-á?” Ọ wẹ byaa yẹkẹẹ, “Ang ọlẹ kị họm, ọwa m nwaa uri tịrẹkpẹ-ẹ̀ wẹ ịnyịnyị lẹ.”

¹²Ọọwa, ị byoo yẹkẹẹ, “Ahị warị kahị ka chịng ori mẹnẹ-mẹnẹ, hung kpa ka ju ala iFilisitiya ụ-ụbwọ lẹ.” ỊSamsịn wẹ byaa yẹkẹẹ, “Anụ myị ọnụ ham ya anụ lịlọnụ ka họm ịngịngịhyẹ kaka mẹ.”

¹³Ọọwa, alẹng ịịwa a byoo yẹkẹẹ, “Ee, ahị myị. Ahị ka chịng ori, kpang kịlaa kem ịnyị. Áhị ka nwụng ka.” Ịnyị, ị chọọ ori la iri inyeewe imiiye lẹ, ị kpọọ rụ kele bwu ụgbụ ọọwa lẹlẹ.

¹⁴Ụka ká ịSamsịn pwụ iLehi, ala iFilisitiya kpehe kaka tọọ lụkwa dọọọ. Ma, olegu nya Amkpaa jụ ka ẹpwụ nyamwụ, jwoo ọngịrị ọtụka-ọtụka. Ụka ọọwa, iri ilegbirabwọ wuu hya arụ bwẹbwẹẹbwẹ, wo pịla-pịla hyoo a-abwọ lala ila nyaa rụ iri ịịwa.

¹⁵ỊSamsịn kpẹhị pileji, ọ ye ukpunogu ọlụbaa nya obyiyó ọhẹ ọlẹ kọ ri onyeewe chẹẹ wẹẹ lẹ, ọ hwoo lẹlẹ. Ọ kpa ukpunogu ọọwa nwụ alẹng angị ụnọ ookpokpo (1,000).

¹⁶Ọọwa, ịSamsịn a mwu eje yẹkẹẹ, “M̀ kpa ukpunogu ọlụbaa nya obyiyó amamadiroko nwụ alẹng angị ụnọ, M̀ kpa ukpunogu ọlụbaa nya obyiyó amamadiroko kụ egu ogu gbudum.”

¹⁷Ụka kọ kpụba leje kọ ya ukpunogu ọlụbaa ọọwa daarụ lẹ, ị wụrụ ẹnyị nya ẹgẹwẹ ịRamatị-ilehi[10] lẹlẹ.

¹⁸Ụka ọọwa, imyi-enyi nwụ ịSamsịn lụmẹ-lụmẹ. Ọọwa, ọ be ẹkọ ya ẹla ta Amkpaa yẹkẹẹ, “Ahụ a ya ọkụrụ-kụrụ ọtụka ọlẹ ham lẹ. Ee lẹ, a ka myị m̀ gbu imyi-enyi, ala iFilisitiya ị-jẹ Ohe-ka ịwẹ-ẹ̀ warị kaka wum pyẹẹ-ẹ́?”

¹⁹Ọọwa, Ohe Oluhye a wụrụ ụjẹ ọhẹ da ẹ-ẹga kị wụrụ iLehi lẹ, enyi a kpehe bwu ụwa lẹlẹ. Ụka ká ịSamsịn nwa ọọwa, ịnyịrọ pwọọ kpuru, ọ la gogo. ỊSamsịn wụrụ ẹnyị nya ụjẹ nya enyi ọwẹ ịHakọrẹ ọlẹ ká etu nyamwụ ri “obe ẹkọ.” Ụjẹ nya enyi ọọwa juwa i-iLehi wẹẹ.

²⁰ỊSamsịn ri ọngọleje nya ala Isirẹlụ ẹka iwo imiiye gbẹgbịlẹ lụka kị ji ekpeleji nya ala iFilisitiya.