Read idege Angịleje 16 Bible Online

Angịleje 16 - idege bible

Angịleje 16

¹Ẹnẹhẹ juwa ká ịSamsịn kele ka epweji nya ịGasa. Ọ yẹ ọlakpara ọhẹ ụ-ụwa. Ọọwa, ọ kele ka hyehe tọọ lẹlẹ.

²Ụka ká alepweji nya ịGasa jẹ ịSamsịn nya wẹ ụwa, ị tụ gbiriri ka dagaga ju ẹga kọ ji lẹ, ị kụ ịnya gbọọ ju ogirigba nya epweji chwẹẹ lodu ọọwa wuu lẹlẹ. Lodu ọọwa wuu, ị hu ujiji taa, juwa byi ịlaa i-irya yẹkẹẹ, “Ahị ba gbee ká ahị pyẹ pwirim lẹ, ahị ka nwụ ịSamsịn lẹlẹ.”

³ỊSamsịn tị nọ ẹ-ẹga nya ọlakpara ọọwa gbee da ka epwodu o-gwene kem. Ụka kọ wuleji bwu ụwa, ọ kele ka yụbwọ chị ogirigba nya epweji kirikpa. Ọọwa, ọ gba ukpileku nya ogirigba la ekeji i-wu eji bala ịgbọgọlọ nyamwụ tụ ang ịlẹ kị wọọ kpa wuu lẹlẹ. Ọ gyaa guru ụmwụchwọ lẹ, ọ kpaa kele lalaala ka chị ụ-ụwa a-achinege nya ikiti ọlẹ kọ jahị da koye nya iHebirọn lẹlẹ.

⁴Ụka ká ẹlẹwẹ họ kpá, ịSamsịn la ọháha ẹ-ẹga nya ọnyang ọlẹ ká ẹnyị nyamwụ ri iDilayịla. Ọ kụ ụteeji nya ịSọrẹkị.

⁵Ụka ọọwa, ịdịrịhụ nya ala iFilisitiya kele ka byi iDilayịla yẹkẹẹ, “Kpa ijẹẹhị họ ká ịSamsịn a ya jeng jaabwọ kọ bwu ye ọngịrị ọtụka ọlịịwẹ bala jaabwọ kahị ka bwu kụrwọọ, chọọ ori mẹnẹ-mẹnẹ myị mẹ. Ó-ri ká họ ịnyị, ọngọngọọng nyahị ka ya okpoko onyoowuru ụnọ ookpokpo da ohu ookpokpo hang.”

⁶Ọọwa, iDilayịla a byi ịSamsịn yẹkẹẹ, “Ya jem wẹẹ, a tị́ họ anyị ká la ogogo lụmẹ ịnyị-ị̀? Ụgbẹyị oyina ọngịnyị a tị́ ka bwu chịng ori mẹnẹ-mẹnẹ, ká ka du myịị̀ myị ka.”

⁷ỊSamsịn wẹ byoo yẹkẹẹ, “Ị ka kpa ẹdụrụ inyeewe irwiye ịlẹ kị chọhụ lẹka chịm ori mẹnẹ-mẹnẹ. Aalẹ, m ka la dẹwụ-dẹwụ lala angịkịla lẹlẹ.”

⁸Ịnyị, ịdịrịhụ nya ala iFilisitiya a kpa eduru inyeewe irwiye ịlẹ kị chọhụ lẹka wẹ iDilayịla lẹ, ọ ya chị ịSamsịn ori lẹlẹ.

⁹Ụka ọọwa, ọ ya alẹng ịhyẹ kpịbaa ẹ-ẹpwụ nya ube ọkịla. Lẹ, ọ cheko wụrụ ịSamsịn yẹkẹẹ, “ỊSamsịn ee! Ala iFilisitiya wẹẹ wẹ lẹ-ẹ!” Ma, ịSamsịn chị eduru ịwẹ eku hi ịlọmwụ pịla-pịla jaabwọ ká ori ọ-rụ ila kaa chị eku. Lẹẹlẹ, ala iFilisitiya-á jẹ ẹla-ịbaa chajị nya ogogo ọlala nyamwụ ka.

¹⁰Ịnyị, iDilayịla a byi ịSamsin yẹkẹẹ, “Ịyẹ tị́ du kaa kpam hu ẹmwa me ọnọọkịla jem-m̀? Ya jem mẹ, anyị ị tị́ ka bwu chịng ori giri-giri kpa ụ-ụwa myị?”

¹¹ỊSamsịn wẹ byoo yẹkẹẹ, “Ó-ri kị ya iri inyeewe-inyeewe ịlẹ kị ya chị ang ẹnẹnẹhẹ lẹka chịm lẹ aalẹ, m ka la dẹwụ-dẹwụ lala angịkịla lẹlẹ.”

¹²IDilayịla go iri inyeewe ịhyẹ lẹ, ọ yaa daba rị ịSamsịn mẹnẹ-mẹnẹ lẹ, ọ cheko wụrwọọ yẹkẹẹ, “ỊSamsịn ee! Ala iFilisitiya wẹẹ wẹ lẹ-ẹ!” Alẹng ịịwa kpịbaa ẹ-ẹpwụ nya ube ọkịla lụka ọọwa. ỊSamsịn tị chị iri ịwẹ eku hi ịlọmwụ pịla-pịla lala owu iri ịwẹ nyaa ri.

¹³Ọọwa, iDilayịla a byoo yẹkẹẹ, “Á hu abwọ la ọ-kpam hu ẹmwa kpa ọnọọkịla me jem lẹka. Ya jem wẹẹ, anyị ị tị ka bwu chịng ori kpa ụ-ụwa mẹ?” ỊSamsịn wẹ byoo yẹkẹẹ, “Aa nụ inyi igugu irwiye nyam ịwẹ a-ang ọ-kpa nụ apwụ, ká ya ọtẹkpẹ jaa ojiji mẹ. Aalẹ, m ka la dẹwụ-dẹwụ lala angịkịla lẹlẹ.”

¹⁴Ụka ká ịSamsịn juwa nune, iDilayịla nụ igugu irwiye nya inyi nyamwụ la ang ọ-nụ apwụ. Ọ ya ọtẹkpẹ jaa ojiji giri-giri. Ọọwa, ọ cheko wụrụ ịSamsịn yẹkẹẹ, “ỊSamsịn ee! Ala iFilisitiya wẹẹ wẹ lẹ-ẹ!” Ma, ọ chahị une, yi inyi nyamwụ hi ang ọ-nụ apwụ bala ojiji ọlẹ kị jwoo.

¹⁵Ọọwa, iDilayịla a byoo yẹkẹẹ, “A ya am nyị họọwa ododu. A dam lụgbaa ugbabwọ ịta lẹ. Á tị myị ya iwe-ịbaa nya ọngịrị nyang jem lẹka.”

¹⁶Ẹnụ myị ẹnụ, ọ juwa kpa ẹlẹwẹ tụ ịSamsịn tutu. Ọ kpa ẹlẹwẹ rịrị ịSamsịn gbee kọ chị ịSamsịn aga pwẹẹpwẹẹ.

¹⁷Ụka ohyẹẹkpẹ lẹ, ọ ya ẹla nya ịlẹhị je iDilayịla yẹkẹẹ, “Ị́ pwọm inyi ẹnẹnẹhẹ lẹka, chajị ị chịm ịgọ lala ịnasịrayịtị ha Ohe Oluhye bwu ụka-ụka kị mam. Ó-ri kị pwọm inyi lẹ aalẹ, ọngịrị ọlala nyam a ka myị lẹ, m ka la dẹwụ-dẹwụ lala angịkịla lẹlẹ.”

¹⁸Ụka ká iDilayịla jẹ ịSamsịn nyị ya ẹla nya ịlẹhị, ọ du ẹrụ ka byi ịdịrịhụ nya ala iFilisitiya yẹkẹẹ, “Anụ mwẹẹkpẹ warị myịmyị ụka ookpokpo mẹ. Ọ ya ẹla myị ẹla wuu jem lẹ.” Ọọwa, ị tịrẹkpẹ wẹ ẹga nyamwụ lẹ, ị kpa okpoko ọlẹ kị myị ọnụ họọ ba ịlaa lẹlẹ.

¹⁹IDilayịla pịrị ịSamsịn nune nịrọ ịlọmwụ egbata. Ọọwa, ọ wụrụ ọlẹng ọhẹ kaka pwọ inyi igugu irwiye nya ịSamsịn lẹlẹ. Ọ dọmwụ nyọka wu ịSamsịn lẹhyọ chajị ọngịrị ọlala nyamwụ gbu iri lẹ.

²⁰Ọ cheko wụrwọọ yẹkẹẹ, “ỊSamsịn ee! Ala iFilisitiya wẹẹ wẹ lẹ-ẹ!” Ụka kọ wuleji, ọ me kọ ka nyi gburu, kọ ka rụ gịlala jaabwọ kọọ họ ene-ene. Ọ́ jẹ ká Amkpaa nyẹẹkpẹ dọọ lẹka.

²¹Ala iFilisitiya woo pyẹẹ lẹ, ị gbọọ egbahị lẹlẹ. Ị kpọọ rụ ka epweji nya ịGasa. Ị ya agba nya oje ọnyọmịla jwoo ụ-ụwa lẹ, ị juwa kpọọ họ ụkụrwọ nya ang ogògo u-ube nya agba lẹlẹ.

²²Ọ́ tata abwọhẹ ene kaka, inyi nyamwụ a dọmwụ nyọka nwa myịmyị lẹlẹ.

²³Ịdịrịhụ ịrụ nya ala iFilisitiya wẹ kaka tọ awụlẹ kị ka ya ụya bala ọ-ka kịla iya ọtụka ha ojiga ịDagọn nyaa. Ịwa ayịdang yẹkẹẹ, “Ohe nyahị ya ịSamsịn oluji nyahị ju uhi ẹ-ẹpwụtụbwọ lẹ.”

²⁴Ụka kị juwa ya ụya ọ-ọhụhụ ọwẹ lẹ, ị yẹkẹẹ, “Anụ gba ịSamsịn kpehe wẹ ụda nyahị kahị yẹ ayịlọ ọkọkọ nyamwụ wẹẹ.” Ụka kị gbọọ kpehe, ị kpọọ kọ ayịlọ ha ịlaa. Ị yọọ godayị rịrị apewa nya ịtachị imeme imiiye ịlẹ kị wu ube ọwẹ kpa. Ụka kị yọọ, ị juwa gwogbo ha ohe nyaa yẹkẹẹ, “Ohe nyahị ya oluji nyahị juhi ẹ-ẹpwụtụbwọ. Ọngọ ta ọpyị nyahị ayịreji bala ọ-nwụ iru nya angịnyị nyahị, ụbwọ bọọ lẹ.”

²⁶Ọọwa, ịSamsịn a byi ọnyị ọlẹng ọlẹ kọ yụbwọ chọọ wẹẹ kpọọ ụgbẹyị yẹkẹẹ, “Kpam jẹ ka yụbwọ gu ịtachị i-wu ube ọlẹ kpa kam kpụ nịraa wẹẹ.”

²⁷Anyang bala alẹng myị ube ọọwa pwẹẹpwẹẹ. Ịdịrịhụ ịrụ nya ala iFilisitiya juwa ịnyịnyị. Iru nya anyang bala alẹng lala angị ụnọ ịta (3,000) kụ ẹpwayịrẹtẹ ọpapịla nya ube ọwẹ juwa yẹ ayịlọ nya ịSamsịn.

²⁸Ọọwa, ịSamsịn a raabwọ bịlẹ Amkpaa yẹkẹẹ, “Ọngọlahị Amkpaa ee! Chuchuu kpịtịya nyam chẹẹ mẹ-ẹ̀. Ohe Oluhye ee! Chuchuu ya ọngịrị ham ụka ookpokpo ọlẹ chẹẹ chajị kam họ ala iFilisitiya ịlẹ ang kwiwa nyọlẹ kị gbam egbahị mẹ.”

²⁹Ọọwa, ịSamsịn a ya abwọ ba ịtachị imiiye i-wu ube ọwẹ kpa lẹlẹ. Ọ myẹ chii gwaa gbaa lẹlẹ.

³⁰Ọọwa lẹ, ọ ya ẹla gboo yẹkẹẹ, “Igu a nwụm ta ala iFilisitiya ịlẹ jẹ mẹ!” Jaabwọ kọ myẹ ịtachị ịwẹ chii lọngịrị nyamwụ wuu lẹ, ube a tụrụ gbẹdẹm ba ịdịrịhụ ịrụ nya ala iFilisitiya bala angịlẹ kị juwa wuu lẹlẹ. ỊSamsịn nwụ ala iFilisitiya ju iru lụka nya igu nyamwụ gụ ụka nya ọhịhị nyamwụ.

³¹Anyịnamwụ bala alugbiyegu nyamwụ wuu kele ka hu ogu nyamwụ kpa rụ. Ị kpa nya lẹ, ị jwoo eji i-iworu nya ịManowa adamwụ lẹlẹ. Ẹga ọọwa ji apewa nya epweji nya iSora bala Ẹchịtawolu. ỊSamsịn kpẹhị rịrị ala Isirẹlụ lala ọngọleje ẹ-ẹpwụ nya ẹka iwo imiiye gbẹgbịlẹ.