Read idege Angịleje 17 Bible Online

Angịleje 17 - idege bible

Angịleje 17

¹Ọlẹng ọhẹ juwa ká ẹnyị nyamwụ ri ịMayịka. Ọ kụ i-ikiti ịlọpyị nya Ifurem.

²Ẹnẹhẹ lẹ, ọ byi ịnamwụ yẹkẹẹ, “M wo ká lẹẹ gọlọ oloyi ọlẹ kọ go okpoko onyoowuru ụnọ ookpokpo da ohu (1,100) nyang yi oyi. Yẹ mẹ, okpoko ọọwa jam ẹ-ẹga nyam. Am a hwoo lẹ.” Ọọwa, ịnamwụ a họ pyẹẹ họọ yẹkẹẹ, “Amkpaa ā wahị kụrụng mẹ, ọnyị nyam!”

³ỊMayịka tịrị okpoko ọọwa ẹkpẹ ha ịnamwụ. Lẹ, ịnamwụ a yẹkẹẹ, “M̀ ya okpoko ọwẹ wọnụ ọpyẹẹ ha ọnyị nyam bwula o-hwoo ha Amkpaa lẹ. Ị ka ya họ ukpeku ọlẹ kị ka kpụ okpoko onyoowuru kụrụ. Lẹẹlẹ, m jam tịrị okpoko onyoowuru ịịwa ẹkpẹ hang lẹ.”

⁴Ụka kọ tịrị okpoko ọọwa ẹkpẹ ha ịnamwụ, ịnamwụ gba okpoko ohu imiiye (200) bwu ụwa ha ọngọ hya ụwa ọhẹ. Ọngọ hya ụwa ọọwa a kọ ukpeku lẹ, ọ kpụ okpoko onyoowuru kụrwọọ lẹlẹ. Ị ya ukpeku ọọwa rịrị ẹ-ẹpwa nya ịMayịka.

⁵ỊMayịka ọwẹ la ẹga ọgbịgba ọhẹ. Ọ họ ekpeku ịhyẹ bala ẹfọdụ[11] ọlịgọgọ ịnyịnyị. Ọọwa, ọ hu ọnyị ọlẹng nyamwụ ọhẹ ri ọngọkiliya lẹlẹ.

⁶Lụka nya oyi ọọwa, ala Isirẹlụ-ụ́ la adịrahụ ka. Ọng myị ọng kaa họ ang ọlẹ kọ họ́ọ i-irya nya ịlọmwụ.

⁷Lụka-ụka ọọwa, ọla iLivayị okiliya ọhẹ juwa kọ kụ ị-ịBẹtịlẹhẹm ọ-ọpyị nya iJuda.

⁸Ọ rụ bwu ịBẹtịlẹhẹm juwa tịtọ nya ẹga ọkịla ọlẹ kọ ka kụ. Ẹ-ẹpwụ nya ẹdịyẹ nyamwụ ọọwa, ọ jẹ ka pwụ ẹpwa nya ịMayịka i-ikiti ịlọpyị nya Ifurem.

⁹ỊMayịka tọọ wo yẹkẹẹ, “Ale a tị́ bwu-ù?” Ọ wẹ yẹkẹẹ, “Ọla iLivayị okiliya m ri lẹ. M̀ bwu ịBẹtịlẹhẹm i-iJuda. M̀ tị jam tịtọ nya ẹgẹhẹ kam ka kụ.”

¹⁰Ọọwa, ịMayịka a byoo yẹkẹẹ, “Kụ ẹgẹlẹ tam ká ri ọngọ jum irya ri, ri ọngọkiliya nyam ri ịnyịnyị mẹ. M̀ ka nwụng uri lokpoko onyoowuru iwo ẹ-ẹpwụ nya ẹka. M̀ ka kpang la ang ịkụrụ-kụrụ bala ang oriri ịnyịnyị.”

¹¹Ọla iLivayị ọwẹ myị ọnụ lẹ, ọ hụ ta ịMayịka lala ọngọhẹ nya anyị nyamwụ lẹlẹ.

¹²ỊMayịka hwoo ri ọngọkiliya nyamwụ. Ọ kụ ẹ-ẹpwa nya ịMayịka.

¹³Ọọwa, ịMayịka a yẹkẹẹ, “M̀ jẹ ká Amkpaa ka wahị kụrụm ugbẹnyị lẹ, chajị ọla iLivayị ayịdang kpangga m hu ri ọngọkiliya nyam wẹ lẹlẹ.”