Read idege Angịleje 18 Bible Online

Angịleje 18 - idege bible

Angịleje 18

¹Lụka nya oyi ọọwa, ala Isirẹlụ-ụ́ la adịrahụ ka. Lụka-ụka ọwẹ, ala imwawụ nya ịDan juwa tịtọ nya ọpyị nya ụbwọ nya ịlaa ọlẹ kị ka ye kụ. Ị́ gaa ịwa ọpyị ọhẹ nya ụbwọ nya ịlaa ẹ-ẹpwụ nya alimwawụ ịkịla nya Isirẹlụ lẹka.

²Ọọwa, ala ịDan a yụbwọ gu angịdẹwụ angị ịrụ ịhyẹ bwu ebwebweebwo nya ugbiyegu nyaa ịlẹ kị kụ epweji nya iSora bala Ẹchịtawolu lẹlẹ. Ị du angịịwa ẹrụ lala alịbaje kaka dẹhị wụla ọpyị yẹ. Ụka ká alịbaje ịwẹ jẹ pwụ ikiti ịlọpyị nya Ifurem, ị hyehe ẹ-ẹpwa nya ịMayịka.

³Ụka kị juwa ẹ-ẹpwa nya ịMayịka, ị wo ọ̀kọ nya ọla iLivayị ọlụwa. Ị jọọ ogu bwula ụgbẹyị ọlẹ kọọ ya ọnụ nọ kpa ya ẹla. Ọọwa, ị hwoo ẹkpẹ lẹ, ị tọọ wo yẹkẹẹ, “Oowo tị́ kpang wẹ ẹgẹlẹ? Ịyẹ a tị họ ám̀? Anyị tị́ ká jam ẹgẹlẹ ene-è?”

⁴Ọ wẹ byaa yẹkẹẹ, “ỊMayịka dirom-diro ka ri ọngọkiliya nyamwụ ịnyị. Ọ kaa nwụm uri.”

⁵Ọọwa, ị byoo yẹkẹẹ, “Chuchuu to wo bwu ẹga nya Ohe Oluhye wẹẹ, kahị jẹ ó-ri ka ẹdịyẹ nyahị ọlẹ-ẹ́ ka ka ju okpunyi.”

⁶Ọngọkiliya wẹ byaa yẹkẹẹ, “Anụ chuko kaka. Amkpaa ka juwa tanụ ẹ-ẹpwụ nya ẹdịyẹ ọwẹ.”

⁷Ọọwa, angị ịrụ ịwẹ a yegiri bwu ụwa lẹlẹ. Ụka kị jẹ ka pwụ epweji nya ịLayichi, ị yẹ jaabwọ ká alụwa kụ lokpunyi lala ala ịSayịdọn. Ịwa ayịdang ri angị la wụlẹlẹ. Ị́ la ẹla la ọngịnyị ka. Ịngịngịhye-ẹ́ kwaa amwụ ka. Ị kụ hwẹẹẹ hi ala ịSayịdọn. Í ri igu ta alụma ọkila ọhẹ-lọhẹ ka.

⁸Ụka ká alẹng angị ịrụ ịwẹ nya tịrẹkpẹ pwụ iSora bala Ẹchịtawolu, alịnyaa taa wo yẹkẹẹ, “Ẹdịyẹ tị́ la anyị me?”

⁹Ị wẹ byaa yẹkẹẹ, “Anụ wuleji páaa, kahị kpẹwụ ta ala ịLayichi mẹ! Ahị yẹ ọpyị ọọwa lẹ! Ọpyị o-ju eyo ịnyị. Anụ họ atịmẹ kaka. Anụ kịnyaa kahị chị agaga ka ye ọpyị ọwẹ la mẹ!

¹⁰Ánụ pwụ ụwa, anụ ka yẹ jaabwọ ká alụwa-á kpahị ju ọngọngọhẹ nyị ka be ịwa ẹpwa ka. Ọpyị nyaa la gbamgbam. Ịngịngịhyẹ-ẹ́ gamụ ụ-ụwa ka. Ohe Oluhye tị hwoo hahị[12] lẹ.”

¹¹Ọọwa, angịdẹwụ angị ohu ịrwọnyẹ (600) nya ala ịDan a go ang-abwọ nya ẹwụ nyaa lẹ, ị yegiri bwu epweji nya iSora bala Ẹchịtawolu lẹlẹ.

¹²Ẹ-ẹpwụ nya ẹdịyẹ nyaa ọọwa, ị jẹ ka chịkụ ọ-ọmwẹnụ-ụtụrụ nya iKiriyati-ijarim i-iJuda. Ịnyị a du kịị wụrụ oye nya ọmwẹnụ-ụtụrụ nya iKiriyati-ijarim ọwẹ ịMahane-ịdan pyịyọọ lẹ. Etu nya ẹnyị ọwẹ ri ịkampụ ọ-chịkụ nya ala ịDan.

¹³Ị yegiri bwu ẹgẹwẹ lẹ, ị jẹ ka pwụ ẹpwa nya ịMayịka i-ikiti ịlọpyị nya Ifurem lẹlẹ.

¹⁴Ọọwa, alịbaje angị ịrụ ịlẹ kị du ka wụla ọpyị nya ịLayichi yẹ a byi aanaa yẹkẹẹ, “Ánụ jẹ ka aalẹ, ukpeku ọhẹ kị kpụ okpoko onyoowuru kụrụ bala ekpeku ịkịla bala ẹfọdụ ọlịgọgọ jam ẹ-ẹpwa ọhẹ ọdọda ọlẹ. Anụ tị́ jẹ jaabwọ kahị ka họ lẹ.”

¹⁵Ọọwa, ị kele ka ẹpwang ọlẹ ká ọla iLivayị okiliya kụ ụ-ụwa ẹ-ẹpwa nya ịMayịka lẹ, ị dọnụ chọọ lẹlẹ.

¹⁶Ụka ọwẹ, angịdẹwụ angị ohu ịrwọnyẹ godayị giri-giri la ang-abwọ nya ẹwụ nyaa ọ-ọnụ ogirigba.

¹⁷Ọọwa, alịbaje angị ịrụ ịịwa a jẹ kpụrụrụụrụ ka ya ẹtẹ chị ẹpwang lẹ, ị go ukpeku ọlẹ kị kpụ okpoko onyoowuru kụrụ bala ekpeku ịkịla bala ẹfọdụ ọlịgọgọ kpa kpehe lẹlẹ. Ụka ọwẹ, ọla iLivayị okiliya godayị bala angịdẹwụ angị ohu ịrwọnyẹ ọ-ọnụ ogirigba.

¹⁸Ụka ká ọngọkiliya ọwẹ yẹ alịbaje ịịwa la ang ịgọgọ ịwẹ, ọ taa wo yẹkẹẹ, “Ẹla ọlanyị anụ tị́ wẹẹ họ ịnyị-ị̀?”

¹⁹Ị tị wẹ byoo yẹkẹẹ, “Ba táaa! A họ pyịm koo! Baahị rụ, ká ri ọngọ juhi irya bala ọngọkiliya nyahị mẹ. Ọ-ka ri ọngọkiliya ha imwawụ ọlẹpwụ-lẹpwụ nya ala Isirẹlụ-ụ́ hang gụ ọ-ri ọngọkiliya nya ugbiyegu ookpokpo ịịwẹ kem ka-á?”

²⁰Ẹlẹwẹ kpụ ọngọkiliya ọwẹ ugbodu nyii. Ọọwa, ọ ye ekpeku bala ẹfọdụ ịwẹ lẹ, ọ baa rụ lẹlẹ.

²¹Ị ji kpata bwu ẹpwa nya ịMayịka lẹ, ị yegiri nya ọrụrụ lẹlẹ. Ị ya anjwo nyaa bala iyo ileji nyaa bala ang ịlẹ kị la wuu ji ịlahị nya ịlaa.

²²Ụka ká ala ịDan ịwẹ jẹ hwẹẹẹ hi ẹpwa nya ịMayịka, ịMayịka wụrụ aloye-ẹpwa nyamwụ kpehe. Ị ku ala ịDan gbee kị waa ọyị.

²³Lẹ, ị juwa kpụ ala ịDan ịkata kele lẹlẹ. Ọọwa, ala ịDan a jahị kpata lẹ, ị tọ ịMayịka wo yẹkẹẹ, “Ẹẹla ịyẹ tị́? Ịyẹ tị́ ká diro iru nya angịlẹ warị kaka kuhi-ì?”

²⁴ỊMayịka wẹ byaa yẹkẹẹ, “Etu nya ọ-tọm wo nya ẹẹla-ịyẹ tị́ tị́ ri ịyẹ kpong-kpong ene? Anụ go ekpeku ịlẹ kam họhọ lịlọm kpa rụ, anụ wu ọngọkiliya nyam wu kpa rụ ịnyịnyị. Ee lẹ, ịịyẹ m̄ tị́ ka la mẹ?”

²⁵Ala ịDan wẹ byi ịMayịka yẹkẹẹ, “A bá ẹla tahị koo! Ó-ri ịnyị ka agbama nya alịnyahị-ị wuleji mịlanya jahị dang lẹ, ị ka nwụng tụ alugbiyegu nyang wuu lẹlẹ.”

²⁶Ọọwa, ala ịDan a jahị kpata juwa rụ kịlahị-ịlahị lẹlẹ. ỊMayịka yẹ ká ọngịrị nya ala ịDan ịwẹ kpa gụ ịnyamwụ lẹ, ọ yegiri rụ tịrẹkpẹ ka ẹpwa lẹlẹ.

²⁷Ala ịDan jẹ kịnyaa la ekpeku ịlẹ ká ịMayịka họ bala ọngọkiliya nyamwụ ọlẹ kị wu gbee ka ju ka ịLayichi. Ọọwa, ị nwụ ala ịLayichi ịwụlẹlẹ, ị-la ẹla lọngịnyị ka ịwẹ wuu lẹlẹ. Ị chị epweji nyaa ila.

²⁸Ala ịLayichi-í ye olewe ka, chajị ị kụ ụtẹẹji ọlẹ-ọlẹ ká ịBẹtị-irehọbụ ji. Ụwa tị ji hwẹẹẹ hi ala ịSayịdọn. Ị́ tị ri igu ta alụma ọkịla ọhẹ-lọhẹ ka. Ala ịDan ma epweji ọwẹ nwụ lẹ, ị kụ ụwa lẹlẹ.

²⁹Ị ya ẹnyị nya ịLayichi da. Ị yọọ wụrụ adaa ogogo ịDan ọlẹ kọ ri ọnyị nya iJekọbụ.

³⁰Ala ịDan ya ukpeku yi eji ụ-ụwa kị ka gbịgba họọ lẹ, ị hu iJonatan ọnyị nya ịGẹẹchọm ri ọngọkiliya nyaa lẹlẹ. ỊGẹẹchọm ri ọnyị ọtụ́ma nya iMosisi. Anyị-anyị ịtụ́ma nya iJonatan a ri angịkiliya nyaa gbee da ka ụka ká aluji wẹ ka waa kpa rụ ka ri anyịhị lẹ.

³¹Ukpeku nya ịMayịka juwa ị-ịDan lụka ọlẹ wuu ká ọdụ ọlịgọgọ ẹga kịị gbịgba ha Ohe Oluhye juwa i-iChilo.