Read idege Angịleje 19 Bible Online

Angịleje 19 - idege bible

Angịleje 19

¹Lụka ọhẹ ene-ene ká ala Isirẹlụ la adịrahụ, ọla iLivayị ọlẹng ọhẹ juwa kọ kụ i-ikiti ịlọpyị nya Ifurem. Ọ nọ ẹpwa nyamwụ hwẹẹẹ hi ẹpwarịrị nya ụwa. Ọ ye ọyẹẹnọ ọhẹ bwu ịBẹtịlẹhẹm i-iJuda nya ahụ-ọnchẹ nyamwụ.

²Ahụ-ọnchẹ nyamwụ ọọwa wụ ẹjẹ tọọ chajị nya ẹla ọhẹ. Lẹẹlẹ, ọ rụ ka ẹpwa nya adamwụ ị-ịBẹtịlẹhẹm kaka hụ ụwa ọya ine lẹpwụ-lẹpwụ.

³Ụka ọọwa, ọlẹng ọwẹ cheje, hu ang nyọka bọọ kele kọ ka bịlọọ kọ ka kpọọ nya. Ọ kpa ọnchẹ nyamwụ bala ibyiyó ikpolo imiiye dịrẹ ịlọmwụ. Ọnyang ọwẹ kaka tọ ọla iLivayị ọwẹ ụ-ụgbẹyị. Ụka ká adịda nya ọnyang ọwẹ yọọ, ọ dọọ ọwụraba lọkẹkẹnị.

⁴Adịda nya ọnyang ọọwa tụ ọla iLivayị ọwẹ tutu kọ ka hụ taa. Ọọwa, ọ hụ taa ẹnụtụrụ ịta lẹlẹ. Ọwa bala ahụ nyamwụ bá ri ang bala o-hi ehe ta awụlẹ ụ-ụwa.

⁵Ẹnụtụrụ ohene, ị chị ahị lụtụrụ pwirim, nwụlanọ nyọka rụrụ. Adịda nya ọnyang ọwẹ tị byi ọla iLivayị ọwẹ yẹkẹẹ, “Kpa ang ka ọnụ, ká ịnyịrọ a ying da ene ká ka rụ mẹ.”

⁶Ịnyị, alẹng imiiye ịwẹ a hụhụ lẹ, ị ri ang bala ọ-nwa ere lawụlẹ lẹlẹ. Ọọwa lẹ, adịdẹpwa nya ọlẹng ọwẹ a byọọ yẹkẹẹ, “Chuchuu, hyehe nya alẹ, ká họ ịlọng há ịlọng mẹ.”

⁷Ọla iLivayị ọwẹ wuleji nya ọrụrụ, ma adamwụ-ẹpwa yẹ rịrọọ ya nyị hyehe mẹ. Ọọwa, ọ hyehe ẹnụtụrụ ọkịla myịmyị lẹlẹ.

⁸Lụtụrụ gbegbegbe nya ahị ọpyẹpyẹ ọharụ, ọlẹng ọwẹ wuleji juwa yegiri nya ọrụrụ. Ma, adamwụ-ẹpwa myịmyị byoo yẹkẹẹ, “Da ọhụ pịlẹ ká kpa ịngịhyẹ ka ọnụ, ká ẹnụ a hụ̀ ene mẹ.” Ọọwa, ọ godayị lẹ, ị bá ri ang lawụlẹ lẹlẹ.

⁹Ụka ká ọlẹng ọwẹ bala ahụ-ọnchẹ nyamwụ bala ọnchẹ nyamwụ anyị wuleji kị ka rụ, adamwụ-ẹpwa byoo yẹkẹẹ, “Yẹ wẹẹ, obyi hihi wuu lẹ. Ụka kám̀ nya alẹ lẹ. Hi ehe ká la ụka ọmwịịnyọ ọnyịịla mẹ. Ijuju lẹ, a chị ahị pwirim wuleji ẹdịyẹ nya ọ-rụ ka ẹpwa lẹlẹ.”

¹⁰Ugbẹnyị lẹ, ọla iLivayị ọwẹ-ẹ́ myị ọnụ nyọka hyehe ụ-ụwa myịmyị kaka. Ọọwa, ọwa bala ahụ-ọnchẹ nyamwụ a yegiri rụ bala ọnchẹ nyamwụ tụ ibyiyó imiiye ịlẹ kị ju olo chụ lẹlẹ. Ị jẹ yahị da ka epweji nya iJebusi ọlẹ ká ẹnyị ọkịla nyamwụ ri iJerusalẹm.

¹¹Ẹnụ chabwọ lụmẹ ene kịị jẹ pwụ ọnụ nya iJebusi. Ọọwa, ọnchẹ nyamwụ a byoo yẹkẹẹ, “Ayịbam ee, āhị pẹ ka epweji nya ala iJebusi ọwẹ ka hyehe mẹ.”

¹²Ayịbamwụ tị wẹ byoo yẹkẹẹ, “Eheehe. Áhị ka ka epweji ọlẹ ká alụwa-á ri ala Isirẹlụ nyahị ka lẹ koo. Ahị ka kpoye kịlahị ka epweji nya iGibiya.

¹³Lẹẹlẹ, ahị cheri kahị jẹ pwụ iGibiya lee ịRama ene kahị ka hyehe mẹ.”

¹⁴Ọọwa, ị jẹ kpoye nya ẹgẹwẹ kịlahị lẹlẹ. Ẹnụ ya ẹtẹ dụrụ ugba ụka kị pwụ epweji nya iGibiya e-egeji nya alimwawụ nya iBenjamịn.

¹⁵Ọọwa, ị pẹ ka ụwa nyọka hyehe lẹlẹ. Ị kele kaka hụhụ ojiya nya epweji ọwe. Ọngọhẹ-ẹ́ tị myị wụrwaa kpaa ka hyehe ta ịlọmwụ ka.

¹⁶Lewu-obyi ọọwa, okwirichi ọlẹng ọhẹ juwa jẹ nya bwu ẹrụ. Ọwa ayịdang bwu ikiti ịlọpyị nya Ifurem. Ọ tị kụ i-iGibiya ụka ọwẹ. Angị ri ala iGibiya ọlam-ọlam ri alimwawụ nya iBenjamịn.

¹⁷Ụka ká okwirichi ọwẹ chẹhị ka yẹ ọlẹdịyẹ ọwẹ ojiya, ọ tọọ wo yẹkẹẹ, “Ale a tị́ wẹẹ bwu? Ale a tị́-ị jẹ ka?”

¹⁸Ọla iLivayị ọwẹ wẹ byoo yẹkẹẹ, “Ahị kam̀ ka ịBẹtịlẹhẹm i-iJuda. Ahị tị jam nyà ka ẹpwa nyahị[13] ẹ-ẹgẹhẹ hwẹẹẹ i-ikiti ịlọpyị nya Ifurem. Ọngọhẹ-ẹ́ tị wụrụụhị kpahị kaka nọ une ẹ-ẹpwa nyamwụ ka,

¹⁹ịnọ ahị tị la amẹ bala ang oriri nya ibyiyó nyahị. Ahị kpa ịkaa bala ere chajị nya ịlọm bala ahụ-ọnchẹ nyam bala ọnchẹ nyam jam ịnyịnyị. Ahị la ang ịlẹ kị baba hahị wuu lẹ.”

²⁰Ọọwa, okwirichi ọwẹ a byoo yẹkẹẹ, “Anụ wụraba wẹ ẹpwa nyam. M̀ ka họ ang myị ang ọlẹ kọ baanụ ba hanụ lẹ. Ánụ ka jẹ-ẹ hyehe ojiya ịịwẹ ka.”

²¹Ọọwa, okwirichi ọwẹ a kpaa ba ịlọmwụ rụ ka ẹpwa lẹ, ọ ya ang ha ibyiyó nyaa ri lẹlẹ. Ụka ká angga ịwẹ hụ́ ata kpá, ị ri ang lẹlẹ.

²²Ụka kị juwa ya ụya wẹẹ lẹ, alachị ịhyẹ a tụ gbiriri kaka dagaga ju ẹpwang nya okwirichi ọwẹ, juwa kpa ang mịla ukpileku nyamwụ kpukpuukpu lẹlẹ. Ị kpụ okwirichi ọwẹ ịkata ka ẹpwang juwa byọọ yẹkẹẹ, “Ọlẹng ọlẹ kọ bang nya wẹ ẹpwa lẹẹ bẹẹ? Gbọọ kpehe hahị kahị nọ tọọ.”

²³Ọọwa, okwirichi ọwẹ a kpehe kaka taa odehe lẹ, ọ byaa yẹkẹẹ, “Eheehe, ẹnwa nyam anyị. Anụ họ ang onyobyi ọlịnyị koo. Ọlẹng ọlẹ ayịdang ri ọngga nyam. Anụ họ ẹla ibyi ọlịịwẹ ẹ-ẹga nyamwụ koo.

²⁴Anụ yẹ mẹẹ, onjwo ịyang ọnyị nyam bala ahụ-ọnchẹ nya ọlẹng ọlẹ jam. M gbaa kpehe warị wanụ lẹẹlẹẹ, kanụ haa ang myị ang ọlẹ kanụ tịtọ mẹ. Ịnya ọlẹng ọlẹ tị lẹ, ānụ họọ ukpilo nya ẹla ọlịịwẹ koo!”

²⁵Alẹng ịwẹ-ẹ́ tị myị ke ụrụ la okwirichi ọwẹ ka. Ọọwa, ọla iLivayị a yụbwọ chị ahụ-ọnchẹ nyamwụ gbọọ kpehe haa lẹlẹ. Alẹng ịwẹ chị ọnyang ọwẹ beji lodu-odu gbee ká ahị-ị̀ pyẹ. Lụka nya ewu-ụtụrụ lẹ, ị pẹ hyoo rụ lẹlẹ.

²⁶Ọnyang ọwẹ pá hụla-hụla nya warị kaka da mileji ọ-ọnang nya ẹpwang ọlẹ ká ọrụmwụ ji. Ọ da ụ-ụwa gbee ká ahị pyẹ gede-gede.

²⁷Lụka nya ụtụrụ ọọwa, ọrụmwụ wuleji, ọ wụrụ ụgbẹyị kọ ka gbe gu ẹdịyẹ nyamwụ kịnyaa kịlahị. Ọọwa, ọ yẹ ahụ-ọnchẹ nyamwụ dụwa ụ-ụgbẹyị pátaa ya abwọ guru ọnang lẹlẹ.

²⁸Ọọwa, ọ byoo yẹkẹẹ, “Wuleji, kahị rụ mẹ.” Ọ́ tị wẹ ẹlẹlẹhẹ ka. Lẹ, ọlẹng ọwẹ a hwoo nịrọ obiyo nyamwụ u-uhye lẹ, ọ yegiri nya ọrụrụ ka ẹpwa lẹlẹ.

²⁹Ụka ká ọla iLivayị ọwẹ pwụ ẹpwa, ọ hu ẹma lẹ, ọ wọ ahụ-ọnchẹ nyamwụ ọwẹ jịra ẹ̀ga iwo kụrụ imiiye lẹlẹ. Ọ ya ẹga nyamwụ ookpokpo du ka ọnyọnyọọnyị nya imwawụ iwo kụrụ imiiye nya ala Isirẹlụ.

³⁰Ọng myị ọng kọ yẹ ẹlẹwẹ yẹkẹẹ, “Ahyu! Áhị wo ẹla ọlịịwẹ ẹnẹnẹhẹ lẹka. Ịngịngịhyẹ o-me ọlẹ-ẹ́ họ ẹnẹhẹ mwiji nyọlẹ ká ala Isirẹlụ rụ bwu ọpyị nya Ijipiti lẹka. Ahị wụla ẹla ọlẹ yẹ wẹẹ. Àhị tị́ ka họ anyị kpá lẹẹ mẹ?”