Read idege Angịleje 2 Bible Online

Angịleje 2 - idege bible

Angịleje 2

¹Ụka ọọwa, olegu-ẹrụ nya Amkpaa a bwu iGiligalụ kele ka iBokim lẹ, ọ byi ala Isirẹlụ yẹkẹẹ, “M̀ gbanụ kpehe bwu ọpyị nya Ijipiti warị wẹ ọpyị ọlẹ kám myị ọnụ ha adanụ igogo anyị. M myị hanụ neeji ya, ‘ị́Ḿ ka bịrị iro ọlẹ kam nwa tanụ kpá ẹnẹnẹhẹ kaka.

²Ánụ ka nwa iro ta angịlẹ kị kụ am ọ-ọpyị ọlẹ kpong-kpong ka. Anụ ka be ogidi ikịla iya nya ijiga nyaa ene.’ Ma, ánụ tị myị họ jaabwọ kam byinu ka. Ịyẹ tị́ du kanụ myị họ ịnyị ka?

³Ọọ-la ọhọhọ nyanụ lẹ, ḿ ka ku angị kụ ọpyị ọlẹ rụ hiinu kaka. Ị ka yẹ ri aluji nyanụ. Ihye ijiga nyaa ka ri eri owuwu hanụ.”

⁴Ụka ká olegu-ẹrụ nya Amkpaa ya ala ịwẹ ta ala Isirẹlụ wuu kpá lẹ, ịwa wuu a jida lomyi gboo lẹlẹ.

⁵Ịnyị, ị wụrụ ẹnyị nya ẹga ọọwa iBokim[2] lẹ, ị kịla iya ha Amkpaa ụ-ụwa lẹlẹ.

⁶Ụka ká iJochuwa ya angịnyị nyị rụ mẹ lẹ, ọng myị ọng nya ala Isirẹlụ a rụ ka ebwo nya ọpyị ọlẹ ká Amkpaa ga họọ lẹlẹ.

⁷Lụka nya ọhịhị nya iJochuwa wuu, ala Isirẹlụ myị ẹrụ ha Amkpaa. Ị kịnyaa juwa myị ẹrụ họọ lụka nya ọhịhị nya ịgabwọ ịlẹ kị hi ku ẹkpẹ nya iJochuwa kị kpẹhị nya ịlaa yẹ ụkụrwọ ịtụka ịlẹ ká Amkpaa họ ha ala Isirẹlụ.

⁸IJochuwa ọnyị nya iNun, ọnchẹ nya Amkpaa, gbu ụka kọ gu ẹka ohu da iwo (110) chiriri.

⁹Ọọwa, ị jwoo eji ọ-ọpyị ọlẹ ká Amkpaa ga họọ ụ-ụwa i-iTiminatị-ịhẹrẹsị ọlẹ kọ ji ikiti ịlọpyị nya Ifurem lẹlẹ. Ẹga ọọwa ji koye nya ẹtẹ nya ikiti nya ịGaachị.

¹⁰Ụka ká aloyi ọọwa gbu kpá wuu, aloyi ọkịla ye iwe ku. Aloyi ọkịla ọọwa-á tị myị jẹ Amkpaa lee ọ-kpịtịya nya ụkụrwọ ịtụka ịlẹ kọ họ ha ala Isirẹlụ ka.

¹¹Ọọwa lẹ, ala Isirẹlụ ahọ ang onyobyi ba Amkpaa bwula ọ-gbịgba ha ojiga ịBaalụ lẹlẹ.

¹²Ị hịnyọ la ọ-gbịgba ha Amkpaa, Ohe Oluhye nya adaa igogo anyị ọlẹ kọ gbaa kpehe bwu ọpyị nya Ijipiti. Ị dọmwụ nyọka gbịgba ha ihye ịkịla ịlẹ kị ri ihye nya angị kụ dagaga jwaa. Ị hirikpẹẹ juwa gbịgba haa. Ị họ ká Amkpaa ju agbama.

¹³Ị nyẹẹkpẹ da Amkpaa juwa myị ẹrụ ha ihye ịBaalụ bala Achịtarọtụ.

¹⁴Ọọ-la ajị nya ọọwa, Amkpaa ju agbama ta ala Isirẹlụ lụmẹ-lụmẹ. Ọ ya ẹga da ha alagbụrụ, ị wẹ kaka waa ang wụ̀. Ọ yaa ju aluji nyaa ụ-ụbwọ. Ị́ la ọngịrị jụ aluji nyaa kụrụ myị kaka.

¹⁵Ụka myị ụka ká ala Isirẹlụ-ụ́ ka ọgbẹwụ, Amkpaa kaa nyẹẹkpẹ daa jaabwọ kọ ya neeji. Ị ji ẹpwụ nya akama ọtụka.

¹⁶Ọọwa lẹ, Amkpaa a chụ alegbeju ịle kị wụrụ angịleje ha ala Isirẹlụ kị ka chaa da bwu ẹpwụtụbwọ nya alagbụrụ lẹlẹ.

¹⁷Ma, ị́ tị myị ke ụrụ la alegbeju nyaa ka. Ị dachichi ri igu ta ihye ịkịla juwa gbịgba haa. Ịnọ adaa igogo anyị ju ihi nya ehile nya Amkpaa. Ma, ịwa tị ji kpata hi ụgbẹyị nya ihi ojujwọọwa.

¹⁸Ụka myị ụka ká aluji-í yẹ ala Isirẹlụ ụhị, ịị chị eru ju Amkpaa. Amkpaa kaa yaa ahyẹẹrwẹrwa. Ọọ chụ ọngọleje onyeewe haa kọ ka chaa da bwu ẹpwụtụbwọ nya aluji nyaa. Ọ kaa juwa ta angịleje lụka nya ọhịhị nyaa wuu.

¹⁹Ma, ụka ká ọngọleje-é gbu kpá ị kaa tịrẹkpẹ kaka họ ịhọbịrị inyogo juwa họ ang ịlẹ kị tịpyọ gụ ịnya adaa anyị. Ị ka juwa myị ẹrụ bala ọgbịgba ha ihye ịkịla. Ịịwẹ ị tị ka kịnyaa ẹ-ẹpwụ nya egbeju ọnyọọngịrị ọlala nyaa lẹlẹ.

²⁰Ụka ọọwa, Amkpaa ka wụ agbama ta ala Isirẹlụ yẹkẹẹ, “Alụma ọlẹ wuu bịrị iro ọlẹ kam nwa ta adaa igogo lẹ. Ị́ myị jum ihi kaka.

²¹Lẹẹlẹ, alụma ịkịla ịlẹ kị hi kụ am ọ-ọpyị ọlẹ ụka ká iJochuwa gbu lẹ, ḿ ka kwaa rụ hi ẹga ha angịnyị nyam kaka.

²²M ka kpa alụma ịwẹ ma ala Isirẹlụ yẹ ó-ri kị ka myị-ị dịrẹ ụgbẹyị nyam Amkpaa jaabwọ ká adaa igogo anyị họ lee ị́ ka myị-ị họ ịnyị ka.”

²³Ọọ-la ajị nya ọọwa lẹ, Amkpaa pẹhi alụma ịịwa kụ ụ-ụwa. Ọ́ ya ọngịrị nya ọkụrwaa-kụrụ ha angịnyị nya iJochuwa ka. Ọ́ tị kwaa rụ ahyaahị ka.