Read idege Angịleje 20 Bible Online

Angịleje 20 - idege bible

Angịleje 20

¹Ọọwa, ị wụrụ ọjịra-jịra nya ala Isirẹlụ wuu i-bwu ịDan ẹ-ẹtẹ lalaala ka ju ka iBiyẹchẹba e-edii tụ angị bwu ọpyị nya iGiliyadị ọ-ọmwẹnụ-ụtụrụ lẹlẹ. Ịwa wuu wẹ kaka jịra i-ijata nya Amkpaa i-iMisipa.

²Alegbeju nya imwawụ ọnyị myị ọnyị nya ala Isirẹlụ wuu juwa ọ-ọjịra jịra nya angịnyị nya Ohe Oluhye ọọwa. Iru ojuju nya angịdẹwụ ileji nyaa wuu ri angị ụnọ ohu ine (400,000).

³Ụka ọwẹ, ala iBenjamịn wo ya ala Isirẹlụ ịkịla wuu nyị tụguru i-iMisipa lẹ. Ọọwa, ala Isirẹlụ a tịtọ wo yẹkẹẹ, “Anụ ya jehi wẹẹ, anyị kpakpaakpa ẹbyị ọlẹ a tị́ bwu họ-ọ̀?”

⁴Ọọwa, ọla iLivayị ọlẹ kị nwụ ahụ-ọnchẹ nyamwụ a wẹ yẹkẹẹ, “Am bala ahụ-ọnchẹ nya ka iGibiya nyọka hi ehe.

⁵Ọọwa, alẹng nya ala iGibiya a wuleji jahị dam lụka nya alodu ọọwa lẹlẹ. Ị wẹ kaka dagaga ju ẹpwang ọlẹ kahị nọ juwa tịtọ nyọka nwụm. Lẹ, ị wu ahụ-ọnchẹ nyam chị beji gbee kọ gbu lẹlẹ.

⁶Ọọwa, m hu ogu nyamwụ, wọọ kpiki-kpiki lẹ, m ya ẹ̀ga ookpokpo du kịla imwawụ ọnyọnyọọnyị nya ala Isirẹlụ lẹlẹ. Ẹ-ẹpwụ nyahị ahị ala Isirẹlụ angịlẹ a họ ang onyobyi bala ẹla ọ-la oyoyi ọlẹ-ẹ wẹ lẹ.

⁷Lẹẹlẹ, anụ ala Isirẹlụ ee, anụ gba irya nyanụ kpehe mẹ, anyị ahị tị́ ka họ?”

⁸Ọọwa, angịnyị wuu a wuleji gbirim lawụlẹ lẹ, ị yẹkẹẹ, “Ọngọngọhẹ nyahị-ị́ ka rụ ka ẹpwa ka. Ọngọngọhẹ-ẹ́ ka rụ ka ẹpwa nya ịlọmwụ kpong-kpong ka.

⁹Jaabwọ kahị ka họ epweji nya iGibiya ọwẹ a lẹẹ lẹlẹ. Ahị ka da iwo kahị ka jẹ jaabwọ kahị ka bwu mwẹla ta alụwa.

¹⁰Ahị ka chụ ọlẹng ookpokpo bwu ẹpwụ nya alẹng angị iwo ọnyị myị ọnyị bwu imwawụ myị imwawụ nya Isirẹlụ wuu. Angịlẹ kahị chụ ịnyị ka tịtọ nya ang oriri kpa wẹ angịdẹwụ. Ọọwa, angịdẹwụ a ka kele ka epweji nya iGibiya i-iBenjamịn kaka gwaa ụbwọ chajị nya ang onyobyi ọlẹ ká alụwa họ am Isirẹlụ lẹlẹ.”

¹¹Ọọwa, ala Isirẹlụ a yẹ julawụlẹ jahị da epweji ọwẹ nyọka mwẹla tọọ lẹlẹ.

¹²Alimwawụ ịkịla nya Isirẹlụ du alẹrụ tụ ẹga myị ẹga nya imwawụ nya iBenjamịn da kaka tọ alụwa wo yẹkẹẹ, “Ụma nya ang onyobyi ọlanyị a tị́ lẹẹ kanụ họ ịnyị?

¹³Anụ gba alimajẹ i-bwu iGibiya ịwẹ kpehe hahị kahị nwaa, chajị ká ibyi ọlẹ ka tụ kịnyaa hi ọpyị nyahị mẹ.” Ala iBenjamịn á tị myị hu ẹla nya ala Isirẹlụ aanaa ịkịla ịwẹ họ kpong-kpong ka.

¹⁴Ọọwa, ị mwọọgịlẹ rụ ẹwụ bwu epweji ọnyị myị ọnyị i-imwawụ nya iBenjamịn kaka tọ awụlẹ i-iGibiya kị ka dẹwụ ta ala Isirẹlụ lẹlẹ.

¹⁵Ẹnụ ọọwa, ala iBenjamịn wụrụ angịdẹwụ ị-jẹ kpa oge dẹwụ angị ụnọ iwo imiiye da ịrwọnyẹ (26,000) dalawụlẹ. Datị hi angịwẹ, angịdẹwụ ịlahịchịng-ịlahịchịng i-bwu iGibiya la angị ohu irwiye (700) kị yẹ ju laa.

¹⁶Angị ohu irwiye (700) lẹpwụ nya angịdẹwụ ịwẹ wuu ri angị họ ụpịla ịlẹ kị jẹ-ẹ da ọmẹ yẹẹyẹẹ. Ó-ri uke-inyi ri kị ka da ọmẹ, ị́ ka da lọọ ka.

¹⁷Ala Isirẹlụ ihihi ịkịla tị lẹ, angịdẹwụ ị-jẹ ẹwụ ịlẹ kị wụrụ dalawụlẹ wuu la angị ụnọ ohu ine (400,000).

¹⁸Ọọwa, ala Isirẹlụ a ka ẹga ọgbịgba ị-ịịBẹtẹlụụ lẹ, ị tọ Ohe Oluhye wo yẹkẹẹ, “Imwawụ oyina lẹpwụ nyahị a tị ka jene mwẹla ta ala iBenjamịn?” Amkpaa wẹ byaa yẹkẹẹ, “Ala iJuda a kele jene mẹ.”

¹⁹Lụtụrụ nya ahị ọpyẹpyẹ ọọnamwụ lẹ, ala Isirẹlụ a wuleji lẹ, ị jẹ kaka chịkụ ọ-ọnụ nya epweji nya iGibiya lẹlẹ.

²⁰Ala Isirẹlụ hu ang kele kị ka dẹwụ ta angịdẹwụ nya ala iBenjamịn. Ị chụ angịdẹwụ nyaa kụ gagaaga i-iGibiya yahị da ala iBenjamịn.

²¹Ọọwa, angịdẹwụ nya ala iBenjamịn a kpehe bwu iGibiya yahị da ala Isirẹlụ lẹlẹ. Ị nwụ ala Isirẹlụ angị ụnọ iwo imiiye da ụnọ imiiye (22,000) ẹnụ ọọwa.

²²Ọọwa, ala Isirẹlụ a kele ka ẹga nya Amkpaa lẹ, ị bida ị-ịlahị nyamwụ gbee da ka alobyi lẹlẹ. Ị tọọ wo yẹkẹẹ, “Àhị ka myịmyị-ị̀ kele ka dẹwụ ta ala iBenjamịn aanahị ịwẹ wẹẹ-ẹ́?” Amkpaa wẹ byaa yẹkẹẹ, “Ee, anụ kele ka dẹwụ taa.” Ọọwa, angịdẹwụ nya ala Isirẹlụ a ju awụlẹ ọhụ lẹ, ị chịkụ nyọka dẹwụ ẹ-ẹga kị kụ dẹwụ ẹnụ nya ọgbanyẹ lẹlẹ.

²³

²⁴Ọọwa, ị wuleji jahị da angịdẹwụ nya ala iBenjamịn ụka oheeye lẹlẹ.

²⁵Ụka oheeye ọwẹ, ala iBenjamịn gba kpehe bwu epweji nya iGibiya ịnyịnyị. Ugbẹnyị lẹ, ị nwụ ala Isirẹlụ angị ụnọ iwo kụrụ ineku. Angịịwa wuu ri ang kpa oge dẹwụ.

²⁶Ọọwa, ala Isirẹlụ wuu hu ang kele ka ịBẹtẹlụ lẹlẹ. Ị hụhụ i-ijata nya Amkpaa juwa bida. Ị́ kpa ịngịngịhyẹ ka ọnụ ka gbee da ka alobyi. Ị kịla iya nya okpunyi ọhọhọ bala iya ọ-rụ ila i-ijata nya Amkpaa.

²⁷Lụka nya oyi ọọwa, Akpa nya Iro nya Ohe Oluhye juwa ị-ịịBẹtẹlụụ. IFinihasị ọnyị nya Eliyesa ọlẹ ká adamwụ ri Erọn a kaa kpẹhị rịrọọ lẹ. Ọọwa, ala Isirẹlụ a tọ Amkpaa wo yẹkẹẹ, “Àhị ka myịmyị-ị̀ kele ka dẹwụ ta ala iBenjamịn aanahị ịwẹ wẹẹ lẹẹ āhị tị́ ba mẹ?” Amkpaa wẹ byaa yẹkẹẹ, “Anụ myịmyị kele mẹ. M̀ ka yaa junu ụ-ụbwọ ijuju.”

²⁸

²⁹Ọọwa, ala Isirẹlụ a chụ angịdẹwụ ịhyẹ kụ ịnya dagaga ju iGibiya lẹlẹ.

³⁰Ị chẹwụ yahị da angịdẹwụ nya ala iBenjamịn ẹnụtụrụ ọhata. Ị ya angịdẹwụ nya hị ọgba yahị da epweji nya iGibiya jaabwọ kị họ lụka ịkịla kam kẹkpẹ.

³¹Ala iBenjamịn kpehe bwu epweji yahị da ala Isirẹlụ ịkịla. Ị kpaa jẹ hwẹẹẹ hi epweji. Ị dọmwụ nyọka nwụ ala Isirẹlụ jaabwọ kịị họ ene-ene. Ị nwụ angịhyẹ ẹ-ẹpwamẹ. Ị nwụ angịkịla ụ-ụgbẹyị o-bwu ka ịBẹtẹlụ bala ọ-ka iGibiya. Ị nwụ angịnyị lala angị iwo ịta nya ala Isirẹlụ.

³²Ọọwa, ala iBenjamịn a yẹkẹẹ, “Ẹ̀hẹẹ, ahị jam kụrwaa lala olene lẹ.” Ma, ala Isirẹlụ tị mamachịng rụnyẹ rụ nyaa ihwirihwa chajị kị ka kpa ala iBenjamịn jẹ hwẹẹẹ hi epweji kele ka ụgbẹyị.

³³Ụka ká angịdẹwụ nya ala Isirẹlụ tụ kẹkpẹ kị kele kaka nwụ̀ ịlaa kụ ịBaalịtama lẹ, angịkịla nyaa ịlẹ kị ya kụ ịnya dagaga ju iGibiya a gba kpehe lagaga bwu oye nya ọmwẹnụ-obyi nya iGibiya lẹlẹ.

³⁴angịdẹwụ ịlahịchịng-ịlahịchịng angị ụnọ iwo (10,000) nya ala Isirẹlụ gba mịla epweji nya iGibiya. Upe yẹ ere ụ-ụwa. Ala iBenjamịn-ń tị jẹ ịwa nyị juwa ka ta ayịreji lẹka.

³⁵Ọọwa, Amkpaa a họ ala Isirẹlụ a kụrụ ala iBenjamịn lẹlẹ. Ala Isirẹlụ nwụ angịdẹwụ nya aluji nyaa angị ụnọ iwo imiiye da angị ụnọ ịrụ kụrụ angị ohu ookpokpo (25,100) ẹnẹwẹ.

³⁶Ọọwa, ala iBenjamịn a jẹ ya nyị kụrụ ịwa lẹlẹ. Angịdẹwụ nya ala Isirẹlụ rụnyẹ tịrẹkpẹ hi ala iBenjamịn chajị ị dahịhile ká angịdẹwụ ịkịla ịlẹ kị ya kụ ịnya ka gba mịla epweji nya iGibiya lọmwaaa.

³⁷Ọọwa, angịịwa a gba kpehe ju ka iGibiya lagaga lẹlẹ. Ị pyẹ yịrị epweji wuu lẹ, ị nwụ ọng myị ọng ụ-ụwa lẹlẹ.

³⁸Angịdẹwụ nya ala Isirẹlụ bala angịdẹwụ nyaa ịkịla ịlẹ kị chụ kụ ịnya lẹẹ-ẹ̀ hu ang-ẹjẹẹ nọ ha awụlẹ. Ụka ká angị dẹwụ-ụ́ yẹ ịmwụ ọtụka-ọtụka ọlẹ ká angị kụ ịnya ka jụ e-epweji lẹ,

³⁹angịdẹwụ nya ala Isirẹlụ a ka jahị kpata da ala iBenjamịn nyọka mwẹla taa lẹlẹ. Ụka ọọwa, ala iBenjamịn lẹẹ-ẹ̀ nwụ angị iwo ịta nya ala Isirẹlụ ene lẹ. Ịwa ayịdang juwa byi ịlaa yẹkẹẹ, “Ẹ̀hẹẹ, ahị jam kụrwaa lala olene lẹ.”

⁴⁰Ọọwa lẹ, ịmwụ ọtụka-ọtụka a kpehe nmunuu bwu epweji yahị da ka uhye lẹlẹ. Ala iBenjamịn chẹhị kẹkpẹ lẹ, ị yẹ ká epweji nyaa juwa rụ ila lẹlẹ.

⁴¹Ọọwa, ala Isirẹlụ a jahị kpata da ala iBenjamịn juwa mwẹla taa lẹlẹ. Ala iBenjamịn ju uhi ọtụka-ọtụka chajị ị jẹ kị juwa ka taa ayịreji lẹ.

⁴²Ọọwa, ị rụnyẹ rụ hi ala Isirẹlụ yahị da ka ugbileji lẹlẹ. Ị́ tị be myị ka. Angịdẹwụ nya ala Isirẹlụ ịlẹ kị juwa kpehe bwu epweji báa bẹẹ, taa ayịreji.

⁴³Ị ya ala iBenjamịn ịwẹ juju[14], kwaa juwa kpaa nwụ gbee ka pwụ ẹgẹhẹ ọ-ọmwẹnụ-ụtụrụ nya iGibiya.

⁴⁴Ị nwụ angịdẹwụ ịlahịchịng-ịlahịchịng nya ala iBenjamịn angị ụnọ iwo kụrụ ineku (18,000).

⁴⁵Ala iBenjamịn ịhyẹ ji kpata juwa rụnyẹ yahị da koye nya ẹjwọ nya iRimọn u-ugbileji. Ala Isirẹlụ tị nwụ angị ụnọ ịrụ (5,000) nya angịịwa ụ-ụgbẹyị. Ị ku angị ihihi nyaa lalaala ka ju ka iGidọm lẹ, ị nwụ angị ụnọ imiiye (2,000) nyaa myịmyị lẹlẹ.

⁴⁶Ọ-tụ julawụlẹ nya ala iBenjamịn ịlẹ ká ala Isirẹlụ nwụ wuu la angị ụnọ iwo imiiye da angị ụnọ ịrụ (25,000) lẹpwụ-lẹpwụ. Angịlẹ kị nwụ wuu tị ri angịdẹwụ i-ju ugbodu.

⁴⁷Ala iBenjamịn angị ohu ịrwọnyẹ tị (600) tị be rụ ka ẹjwọ nya iRimọn u-ugbileji. Angịịwa kụ ụ-ụwa ịya ine gbẹgbịlẹ.

⁴⁸Ọọwa, ala Isirẹlụ a tịrẹkpẹ jahị da ala iBenjamịn ihihi lẹ, ị nwụ ọng myị ọng nyaa wuu tụ iyo ịlẹpwa nyaa bala ang ọlahị-lahị nyaa wuu lẹlẹ. Ị ch epweji ịlụwa wuu ila.