Read idege Angịleje 21 Bible Online

Angịleje 21 - idege bible

Angịleje 21

¹Ụka ká ala Isirẹlụ kele ka tọ awụlẹ i-iMisipa, ị lẹẹ-ẹ̀ myị ọnụ ọlịgọgọ ha Amkpaa yẹkẹẹ, “Áhị ka ya anyị nyahị ha ala iBenjamịn ye kaka.”

²Ọọwa, ala Isirẹlụ a rụ ka ịBẹtẹlụ kaka hụhụ i-ijata nya Ohe Oluhye gbee da ka alobyi lẹlẹ. Ị jida gbokiri ẹ-ẹpwụ nya ọjụjụ ju Ohe Oluhye yẹkẹẹ,

³“Amkpaa Ohe Oluhye nya ala Isirẹlụ ee, ịyẹ tị́ du ká myị ká imwawụ nya iBenjamịn wẹẹ̀ ka myị́ gbanggbang hi ụma nya Isirẹlụ ịnyị-ị̀?”

⁴Alụtụrụ gbegbeegbe nya ahị ọpyẹpyẹ ọọnamwụ kị chị ahị lẹ, ị me ogidi ụ-ụwa lẹlẹ. Ị kịla iya ọ-rụ ila bala iya nya okpunyi ọhọhọ ha Ohe Oluhye.

⁵Ọọwa, ị tọ awụlẹ wo yẹkẹẹ, “Angịhyẹ jam lẹẹ ẹ-ẹpwụ nya imwawụ ọhẹ-lọhẹ nya ala Isirẹlụ kị wẹ ọjịra-jịra ọlịlahị nya Amkpaa i-iMisipa ka-á?” (Ịwa wuu lẹẹ̀ nwa iro ha awụlẹ ya ịwa nyị ka nwụ ọngọ chị ọjịra-jịra ọọwa da la ọ-kàka.)

⁶Ụka ọọwa, ala Isirẹlụ tọ olujwo nya ala iBenjamịn aanaa. Ọọwa, ị yẹkẹẹ, “Imwawụ ọhẹ à gba hi ẹ-ẹpwụ nya imwawụ ịla Isirẹlụ wẹ alẹ ọlẹ lẹlẹ.

⁷Ányị ahị tị́ ka họ kahị ka tịtọ nya ịhụ ha angị ihihi nya ala iBenjamịn yẹ lẹẹ mẹ? Ahị tị kpa ẹnyị nya Amkpaa myị ọnụ ya áhị ka ya anyị nyahị haa ye kaka.”

⁸Ụka kị tọ wo ó-ri ká angịhyẹ bwu imwawụ ọhẹ-ẹ́ juwa kị ka ọjịra-jịra ọla iMisipa ka, ị jẹ ká ala ịJabẹchị-igiliyadị nyị́ kà ka.

⁹Ụka kị wa angịdẹwụ wuu, ị yẹ ká ọngọngọhẹ nya ala ịJabẹchị-igiliyadị á juwa ka.

¹⁰Ọọwa, alọjịra-jịra a chụ angịdẹwụ i-ju ugbodu angị ụnọ iwo kụrụ imiiye (12,000) du kele lẹlẹ. Ị byaa yẹkẹẹ, “Anụ kele kanụ nwụ ọng myị ọng nya ala ịJabẹchị-igiliyadị wuu, tụ anyang tụ anjwo ịnyịnyị.

¹¹Anụ nwụ alẹng wuu bala ọnyang ọnyị myị ọnyị wuu kọ jẹ ọlẹng ẹnẹhẹ lẹ.”

¹²Ị ye anjwo ịyang angị ohu ine (400) bwu ẹpwụ nya ala ịJabẹchị-igiliyadị. Ọọwa, ị kpaa wẹ ịkampụ nya ala Isirẹlụ i-iChilo ọ-ọpyị nya iKenan lẹlẹ.

¹³Ọọwa, ala Isirẹlụ wuu a du ẹrụ nya okpunyi ọhọhọ tọ angị ihihi nya alimwawụ nya iBenjamịn ịlẹ kị juwa ẹ-ẹjwọ nya iRimọn lẹlẹ.

¹⁴Ụka ọọwa, ala iBenjamịn nyà tịrẹkpẹ wẹ ẹpwa. Ọọwa, ala Isirẹlụ ịkịla a ya anyang nya ala ịJabẹchị-igiliyadị ịlẹ kị hi la ọnwụnwụ ha ala iBenjamịn ye lẹlẹ. Anyang ịịwa-á tị chaa ọgba kpụ ọngọngọọng nyaa la ịnya ịlọmwụ myị ka.

¹⁵Ala Isirẹlụ tọ olujwo nya ala iBenjamịn, chajị nyọlẹ ká Amkpaa họ ká iwe nyaa da wururu ụ-ụwa Isirẹlụ.

¹⁶Ọọwa, ịgabwọ nya ala Isirẹlụ a yẹkẹẹ, “Ị nwụ anyang nya ala iBenjamịn wuu lẹ̀. Ale āhị tị́ ka ye ịhụ bwu ha angị ihihi nya ala iBenjamịn ye kpá lẹẹ mẹ?

¹⁷Ọ chịla ká ala iBenjamịn ka la angị ka wo ẹnyị-ehe nya ịlaa, chajị ká imwawụ nyaa-á ka ta ayịreji gbanggbang ka.

¹⁸Áhị tị ka jẹ-ẹ ya anyị nyahị haa ye kaka ọọ-la ọlẹ kahị kpa ẹnyị nya Amkpaa myị ọnụ ya áhị ka ya anyị nyahị ha ala iBenjamịn ye kaka. Àhị tị ya ọnụ deeji ha ọngọ ka bịrị ọnụ ọmyịmyị ọọwa lẹ.”

¹⁹Ọọwa, irya ọhẹ a wẹ ẹpwụ nyaa lẹ, ị yẹkẹẹ, “Ọhụhụ nya ụya ọyaya ha Amkpaa ọlẹ kahị kaa la ẹka ọnyị myị ọnyị i-iChilo ju chwẹẹ lẹ.” (IChilo ayịdang kụ ka ẹtẹ nya ịBẹtẹlụ e-edii nya iLebona koye nya ọmwẹnụ-ụtụrụ nya ụgbẹyị o-bwụ ịBẹtẹlụ ka iChekem.)

²⁰Ọọwa, ị byi ala iBenjamịn yẹkẹẹ, “Anụ kele kaka kpịbaa ẹ-ẹrụ nya alakọnụ ọ-ọnụ nya ẹga nya ọhụhụ

²¹kanụ ya ẹhị reeji mẹ. Ịyẹẹnọ nya ala iChilo juwa ka kpehe warị ka chewo. Ánụ yaa lẹ, anụ kpehe warị ká ọngọngọọng nyanụ a wu ọnyang pyẹé-pyẹ̀ẹ-pyẹẹ́ lagbụrụ kpa bala ịlọmwụ rụ ka ọpyị nya iBenjamịn mẹ.

²²Ó-ri ká adaa lee anyịnaa alẹng anyị-ị́ wẹ kị ka wụ ẹjẹ tanụ, anụ-ụ̀ byaa yẹkẹẹ, ‘Anụ gbokẹkẹ. Anụ bahyaa hahị mẹ, chajị áhị waa bwu ẹga nyanụ ọ-ọgbẹwụ ka. Aanụ à tị me lodu lajẹ yaa hahị ye ka. Lẹẹlẹ, ọnụ ọlẹ kanụ ya deeji-í ka wunu ka.’ ”

²³Ọọwa, ala iBenjamịn a họ ịnyị lẹlẹ. Ọngọngọọng nyaa chụ ahụ nya ịlọmwụ bwu ẹpwụ nya anyang ịlẹ kị chewo i-iChilo. Lẹ, ị kpaa ba ịlaa rụ ka ọpyị nyaa lẹlẹ. Ị ma epweji nyaa nwụ lẹ, ị kụ ụwa lẹlẹ.

²⁴Ọọwa, ala Isirẹlụ ihihi a tịtị rụ ụka ọọwa ịnyịnyị lẹlẹ. Ọngọngọọng nyaa nyà tịrẹkpẹ ka ịmwawụ bala ugbiyegu nyamwụ ka ọpyị nya ịlọmwụ-ịlọmwụ.

²⁵Lụka nya oyi ọọwa, ala Isirẹlụ-ụ́ la adịrahụ ka. Ọng myị ọng kaa họ ang ọlẹ kọ họ́ọ i-irya nya ịlọmwụ.