Read idege Angịleje 3 Bible Online

Angịleje 3 - idege bible

Angịleje 3

¹Ẹpwụma ịhyẹ juwa ká Amkpaa tụụbwọ hi kọ kwaa rụ bwu iKenan ka. Ọ pẹ hyaa kọ ka kpaa ma ala Isirẹlụ ịlẹ kị dẹwụ i-iKenan ẹnẹhẹ lẹka yẹ.

²Amkpaa họ ịnyị chajị kọ ka kpa ẹpwụma ịịwa mẹ ẹwụ ọdada jẹ aloyi nya ala Isirẹlụ ịlẹ kị dẹwụ ẹnẹhẹ lẹka.

³Ẹpwụma ịlẹ kị hi kụ ụ-ụwa ọ-ọpyị ọwẹ a lẹẹ lẹ. Ala iFilisitiya ịlẹ wuu kị kụ ị-ịpyị nya ịdịrịhụ ịrụ nya alụwa bala ala iKenan wuu bala ala ịSayịdọn bala ala iHivi ịlẹ kị kụ ị-ịgbọdọ nya iLibanọn bwu Ọgbọdọ nya ịBaalụ-hẹẹmọn lalaaala ka pwụ ẹga Ọchịpwụrụ bwu ọla ịHamatị.

⁴Ẹpwụma ịwẹ hi kụ ọ-ọpyị ọọwa nyọka ma ala Isirẹlụ yẹ óo-ri kị ka myị-ị ju ihi nya ehile ịlẹ ká Amkpaa ya du iMosisi kịla adaa igogo anyị.

⁵Lẹẹlẹ, ala Isirẹlụ kụ bala ala iKenan bala ala iHiiti bala ala Amọ bala ala ịPẹrisi bala ala iHivi bala ala iJebusi ọ-ọ-ọpyị ọọwa.

⁶Ụka ọọwa, ala Isirẹlụ juwa ye anyị anyang nya alẹpwụma ịwẹ nya ịhụ nya ịlaa. Ị juwa go anyị anyang nyaa ha anyị alẹng nya alụwa ye nya ịhụ ịnyịnyị. Ala Isirẹlụ gbịgba ha ihye nya alụwa.

⁷Ala Isirẹlụ deeri nya Amkpaa Ohe Oluhye nyaa, juwa họ ang ịtịpyọ bọọ. Ị gbịgba ha ekpeku nya ihye ịBaalụ bala Achẹra.

⁸Ọọ-la ajị nya ọọwa lẹ, ikẹjẹ-awụrụ nya Amkpaa wuru pwuu jahị da ala Isirẹlụ. Ọ ya ẹga da iKuchan-richatayim Adịrahụ nya ala iMesopotemiya wẹ kaka kụrwaa. Ị ji ekpeleji nya ọngịrị nya adịrahụ ọwẹ ẹka ineku gbẹgbịlẹ.

⁹Ma, ụka ká ala Isirẹlụ jida ju Amkpaa bịlẹ ụbwọ ọdada bwu ẹga nyamwụ, ọ chụ ọngọlẹ kọ ka gbaa kpehe. Ọngọọwa ri Ọtịnẹlụ ọnyị nya iKenasị ọlẹ kọ ri ọnyịnịna ọlẹng ochiche nya ịKalẹbụ.

¹⁰Olegu nya Amkpaa warị wẹ uhye nya Ọtịnẹlụ lẹ, ọ ri ọngọleje nya ala Isirẹlụ lẹlẹ. Ọ kele ka dẹwụ ta iKuchan-richatayim Adịrahụ nya ala iMesopotemiya. Amkpaa họ Ọtịnẹlụ kụrụ bwu ẹwụ ọọwa.

¹¹Ụka ọọwa, okpunyi juwa ọ-ọpyị ọọwa lala ẹka iwo ine gbẹgbịlẹ. Ọọwa lẹ, Ọtịnẹlụ ọnyị nya iKenasị a gbu lẹlẹ.

¹²Ala Isirẹlụ myịmyị họ ang onyobyi ba Amkpaa. Ọọ-la ọọwa lẹ, Amkpaa họ ká Ẹgịlọn Adịrahụ nya ala iMowabụ la ọngịrị gụ ala Isirẹlụ.

¹³Adịrahụ Ẹgịlọn bala ala Amọn bala ala Amalẹkị dụgba wule awụlẹ lẹ, ị wẹ kaka dẹwụ ta ala Isirẹlụ lẹlẹ. Ị kụrụ ala Isirẹlụ lẹ, ị naa epweji nya iJeriko ọlẹ kị wụrụ epweji nya ịrị lẹlẹ.

¹⁴Ụka ọọwa, ala Isirẹlụ ji ekpeleji nya Ẹgịlọn Adịrahụ nya ala iMowabụ juwa myị ẹrụ họọ ẹ-ẹpwụ nya ẹka iwo kụrụ ineku gbẹgbịlẹ.

¹⁵Ma, ụka ká ala Isirẹlụ jida ju Amkpaa bịlẹ ụbwọ ọdada bwu ẹga nyamwụ, ọ chụ ọngọlẹ kọ ka gbaa kpehe. Ọngọọwa a ri Ehudu ọnyị nya ịGẹra ọlẹ kọ bwu imwawụ nya iBenjamịn lẹ. Ọwa ayịdang ri ọngọ họ ụpịla. Ehudu a kaa kpa okpoko nya ẹpwa ọnyẹnyẹ nya ala Isirẹlụ kịla Ẹgịlọn Adịrahụ nya iMowabụ lẹ.

¹⁶Ehudu hya oge ọlahị imiiye ha ịlọmwụ ọlẹ ká udiyo ọlala nyamwụ lala ẹpẹtẹ ookpokpo ba ẹhya. Ọ ya ba ụkụ nya upwuriri e-ekpeleji nya ịwụrụ nyamwụ.

¹⁷Ọọwa, ọ kpa okpoko nya ẹpwa ọnyẹnyẹ kele kịla Ẹgịlọn Adịrahụ nya ala iMowabụ lẹlẹ. Ẹgịlọn ayịdang ri ọngọlẹ kọ hye lụmẹ.

¹⁸Ụka ká Ehudu ya okpoko nya ẹpwa ọnyẹnyẹ ha Ẹgịlọn kpá lẹ, ọ byi angịlẹ kị kpa olo tọọ nyị rụ ka ẹpwa mẹ lẹlẹ.

¹⁹Ma, ụka kọọwa ayịdang jẹ ka pwụ ẹga nya ajwọ ịlẹ kị kọ rịrị ọ-ọnụ nya iGiligalụ lẹ, ọ jahị kpata tịrẹkpẹ wẹ ẹga nya Ẹgịlọn kaka byoo yẹkẹẹ, “Agaba Idu, m la ẹla-ịbaa ọhẹ kam ka ya jeng.” Ọọwa, adịrahụ a byi angịmyị ẹrụ họọ yẹkẹẹ, “Anụ ba taaa wẹẹ.” Ọọwa, anchẹ nyamwụ wuu a kpehe hi ẹga haa lẹlẹ.

²⁰Ọọwa, Ehudu a warị wẹ ẹga nya adịrahụ ẹ-ẹga kọ hụ ụbwọọmwụ ẹ-ẹpwayịrẹtẹ nya ube nyamwụ lẹlẹ. Lẹ, ọ byoo yẹkẹẹ, “Ohe Oluhye a dum ẹrụ lẹẹ tọng lẹ.” Ụka ká adịrahụ juwa wuleji bwu ẹga ọhụhụ nyamwụ lẹ,

²¹Ehudu a nịra ụbwọ ụpụpịla nyamwụ kaka gba oge bwu ụkụ nya upwuriri nyamwụ pịlala lẹ, ọ ya gu Ẹgịlọn ẹ-ẹpwụ hurum lẹlẹ.

²²Oge ọọwa bala iji nyamwụ byi ta ẹpwụ nya adịrahụ. Eyo nya adịrahụ tụ mịla oge ọọwa. Ebwu[3] nyamwụ gba kpehe bwọọọ. Ehudu-ú gba oge hi adịrahụ ẹ-ẹpwụ kaka.

²³Ụka ọọwa, Ehudu a gba kpehe da wẹ odehe bwu ube ọlẹpwụ,[4] tụ ụgbẹyị kwoo lẹ, ọ chị ụgbẹyị oji lẹlẹ.

²⁴Ụka ká Ehudu rụ kpá, ká anchẹ warị ka yẹ ká ụgbẹyị nya ube-oluhye-ọgba dachị, ị me irya ká adịrahụ juwa ẹ-ẹpwụ nya ohuku juwa kpata.

²⁵Anchẹ ịwẹ godayị gbe adịrahụ tata jaabwọ kọ chịla kị ka dayị. Ụka kọ wụrụ ụgbẹyị kaka lẹ, ị hu ẹlẹlẹ nya ịgbọgọlọ lẹ, ị wụrwọọ lẹlẹ. Ụka ọọwa, ị yẹ jaabwọ ká ayịbaa gbu dụwa ị-ịpyị.

²⁶Ụka ká anchẹ ịwẹ wẹẹ godayị gbe ayịbaa, Ehudu a rụ lẹ. Ọ jẹ kpoye nya ajwọ ịlẹ kị kọ lẹ, ọ be rụ kele ka iSeyira lẹlẹ.

²⁷Ụka kọ jẹ pwụ ikiti ịlẹ ká ọpyị nya Ifurem kụ, ọ chị opyike nya ẹwụ wụrụ ala Isirẹlụ wuu. Ọọwa, ọ kpaa hireji bwu ikiti lẹlẹ.

²⁸Lẹ, ọ byaa yẹkẹẹ, “Anụ bam jẹ warị mẹ! Amkpaa ya ọkụrụ-kụrụ hanụ u-uhye nya ala iMowabụ aluji nyanụ ịwẹ lẹ.” Ọọwa, ị dịrẹ Ehudu kele ka hịla ẹ̀ẹga ụ-ụwa Ihu ịJọdan ẹga ká ala iMowabụ wẹẹ ka bwu kpoye lẹlẹ. Ala Isirẹlụ-ụ́ myị ọngọngọhẹ nyaa kpoye be rụ ka.

²⁹Ẹnụ ọọwa, ị nwụ angịdẹwụ ịkpọnchị-kpọnchị nya ala iMowabụ angị ụnọ iwo (10,000) chiriri. Ọngọngọhẹ nyaa-á be myị kpong-kpong ka.

³⁰Ẹnẹwẹ, ala Isirẹlụ kụrụ ala iMowabụ chẹẹchẹẹ. Ọọwa, okpunyi a ji lụka ọwẹ jịra ẹ-ẹka iwo ineku (80) gbẹgbịlẹ lẹlẹ.

³¹Olegbeju ọkịla ọlẹ kọ ku ẹkpẹ nya Ehudu a ri ịChamga ọnyị nya Anatị lẹ. Ọwa ayịdang gba ala Isirẹlụ kpehe bwu ọtụpyịpyị ịnyịnyị bwula ọlẹ kọ nwụ ala iFilisitiya angị ohu ịrwọnyẹ (600) la ọgọdọ ọ-kpa gbe ịna.