Read idege Angịleje 4 Bible Online

Angịleje 4 - idege bible

Angịleje 4

¹Ụka ká Ehudu gbu kpá, ala Isirẹlụ myịmyị họ ang onyobyi ba Amkpaa.

²Ọọ-la ajị nya ọọwa lẹ, Amkpaa ya iwe da ịJabin ọlẹ kọ ri adịrahụ ọhẹ nya ala iKenan ọ kụrụ ala Isirẹlụ. E-epweji nya ịHasọ ịJabin à hụ ri adịrahụ lẹ. ISisẹra ọlẹ kọ kụ ẹpwa ị-ịHarochẹtị-ịhagoyim a ri ọgẹwụ nya angịdẹwụ nya ịJabin lẹ.

³ỊJabin ọọwa la ang ịrụnyẹ iloje-oje ị-kpa dẹwụ ohu ihikichu (900). Ọ yẹ ala Isirẹlụ ụhị onyobyi-obyi ẹ-ẹpwụ nya ẹka iwo imiiye lẹpwụ-lẹpwụ. Ọọwa ala Isirẹlụ a jida ju Amkpaa bịlẹ ụbwọ ọdada bwu ẹga nyamwụ lẹlẹ.

⁴Ọlọmwụ iDibora ahụ nya ịLapidotu a ri ọngọleje nya ala Isirẹlụ lụka ọọwa lẹ.

⁵Ọ kaa ya ẹchị da hụ ọ-ọmwụ nya ọrị ọhẹ kọ ji apewa nya epweji nya ịRama bala ịBẹtẹlụ ụ-ụwa i-ikiti ịlọpyị nya Ifurem kụ. Ọọwa, ala Isirẹlụ a kaa bọọ kele kọ ka ru ala ịlẹ kị ya ju awụlẹ ori haa lẹlẹ.

⁶Ẹnẹhẹ juwa ká iDibora du ẹrụ kaka wụrụ ịBarakị ọnyị nya Abinowam o-bwu epweji nya ịKadẹchị ọlọpyị nya ịNafụtali. Ọọwa, ọ byi ịBarakị yẹkẹẹ, “Amkpaa Ohe Oluhye nya ala Isirẹlụ jam dang ehile ya, ‘Yile angịdẹwụ angị ụnọ iwo (10,000) chiriri bwu imwawụ nya ịNafụtali bala imwawụ nya iSebulọn, ká kpaa kele ka Ọgbọdọ nya ịTabọ mẹ.

⁷M ka pịrị iSisẹra ọgẹwụ nya angịdẹwụ nya adịrahụ ịJabin warị ka tọng ọ-ọkpọọ nya Ihu iKichọn la ang-abwọ nya ẹwụ bala angịdẹwụ nyamwụ wuu. M tị ka yaa jung ẹ-ẹpwụtụbwọ ká ka kụrwaa chẹẹchẹẹ ụ-ụwa.’ ”

⁸Ọọwa, ịBarakị a wẹ byi iDibora yẹkẹẹ, “M ka kele ó-ri ká ka kpam chị ka ụwa. Ọ́ tị ri ká kà bam ka aalẹ, ḿ tị̀tị ka ịnyịnyị.”

⁹IDibora wẹ byoo yẹkẹẹ, “Ẹla-á juwa koo, m ka bang kele lẹ. Ma, ogu ọhọhọ nya ọkụrụ-kụrụ ọlẹ-ẹ́ ka ri nyang kaka, chajị Amkpaa ka ya iSisẹra ju ọnyang ọhẹ ụ-ụbwọ lẹ.” Ọọwa, iDibora a wuleji ẹdịyẹ bala ịBarakị kele ka ịKadẹchị lẹlẹ.

¹⁰ỊBarakị wụrụ alimwawụ nya iSebulọn bala ịNafụtali kele ka ịKadẹchị. Ọọwa, angịdẹwụ angị ụnọ iwo chiriri a kpehe bọọ lẹlẹ. IDibora bọọ kele ịnyịnyị.

¹¹Ụka ọwẹ, ịHẹbẹẹ ọla ịKayin lẹẹ mwụ hi aanamwụ ala ịKayin ịkịla ịlẹ kị ri anyị ịtụma nya iHobabụ ọnyịnịna ọlẹng nya ahụ nya iMosisi lẹ. Ọ kele ka ka kụ ẹpwa ju ọnụ nya ùgboji nya ooku ị-ịSaananim ịKadẹchị chwẹẹ.

¹²Ụka ká iSisẹra jẹ ịBarakị nyị hu ang kele ka Ọgbọdọ nya ịTabọ lẹ,

¹³ọ tụ ang ịrụnyẹ iloje-oje ohu ihikichu (900) ị-kpa dẹwụ nyamwụ bala angịdẹwụ nyamwụ wuu guru lẹ, ị chẹwụ bwu ịHarochẹtị-hagoyim yahị da ka ọkpọọ nya Ihu nya iKichọn lẹlẹ.

¹⁴Ọọwa, iDibora a byi ịBarakị yẹkẹẹ, “Kịnyaa mẹ, Amkpaa ka ya ọkụrụ-kụrụ hang u-uhye nya iSisẹra alẹ lẹ! Amkpaa ayịdang juwa kpa ịlahị nya ẹwụ hang lẹ.” Ọọwa, ịBarakị a hireji bwu Ọgbọdọ nya ịTabọ la angịdẹwụ angị ụnọ iwo nyamwụ lẹlẹ.

¹⁵Ụka ká ịBarakị anyị gba mịla aluji, Amkpaa chị uhi onyobyi-obyi ju iSisẹra bala angịdẹwụ nyamwụ tụ angị kpa ang ịrụnyẹ nyamwụ wuu. Ọọwa, iSisẹra a gbajị chị eji bwu ang ọrụnyẹ nyamwụ lẹ, ọ rụnyẹ rụ lẹpẹtẹ lẹlẹ.

¹⁶ỊBarakị bala angịdẹwụ nyamwụ ku iSisẹra bala angịdẹwụ nyamwụ gbee ka pwụ ịHarochẹtị-hagoyim. Ị nwụ angịdẹwụ nya iSisẹra wuu gbanggbang. Ọngọngọhẹ nyaa-á hi rụ lọhịhị ka.

¹⁷Ụka ọwẹ, iSisẹra rụnyẹ yahị da ẹpwang nya ịJayẹlụ ahụ nya ịHẹbẹẹ ọla ịKẹn. Ọ jẹ ịnyị chajị ịJabin Adịrahụ nya ịHasọ bala alugbiyegu nya ịHẹbẹẹ ri aligu.

¹⁸ỊJayẹlụ kpehe ka tọ iSisẹra lẹ, ọ byoo yẹkẹẹ, “Kẹwẹ mẹ, ayịbam. Jụ wẹ ẹpwang nyam mẹ, a chuko ka.” Ọọwa, iSisẹra a rụnyẹ ka ju ka ube nya ọdụ ọwẹ lẹ, ịJayẹlụ a ya apwụ ọchụka ọhẹ koo lẹlẹ.

¹⁹Ọọwa, iSisẹra a byi ịJayẹlụ yẹkẹẹ, “Chuchuu, chị enyi ham kam nwa mẹ. Imyi-enyi jam nwụm.” Ọ wụrụ ugba nya enyi-ẹmẹ nya ẹna lẹ, ọ chị họọ nwa kpá lẹ, ọ da apwụ kụrwọọ myịmyị lẹlẹ.

²⁰Ọọwa lẹ, iSisẹra a byoo yẹkẹẹ, “Godayị ọ-ọnang nya ẹpwang mẹ. Ó-ri ká ọngọngọhẹ-ẹ́ warị ka tọng wo ya ọngọhẹ nyị jam ẹgẹlẹ-ẹ́, aa byoo nyị ehe.”

²¹Ịnyịrọ chị iSisẹra pyẹpyẹ lụmẹ lẹ, ọ nọ une pyịị ahyaahị. Ọọwa, ịJayẹlụ a hu iloo nya ọdụ bala ọjị ọ-hya ụwa lẹ, ọ kele hyẹẹẹ ka ẹga nyamwụ lẹ, ọ ya gwoo bwu ụbaa pyịị ka wu eji lẹlẹ. Ịnyị, iSisẹra a gbu lẹelẹ.

²²Ụka ọwẹ, ịBarakị juwa rụnyẹ warị ka pịlahị nya iSisẹra. Ọọwa, ịJayẹlụ a kpehe kaka tọọ lẹ, ọ byoo yẹkẹẹ, “Kẹwẹ wẹ ẹgẹlẹ kam mẹ ọlẹng ọlẹ ká wẹẹ pịlahị jẹng mẹ.” Ọọwa, ọ bọọ ka ẹpwang lẹ, ọ yẹ iSisẹra gbu nụwa gbịlọgọdọ la iloo nya ọdụ dụrwọọ ụbaa pyịị lẹlẹ.

²³Lẹẹlẹ, Ohe Oluhye họ ala Isirẹlụ kụrụ ịJabin adịrahụ ọla iKenan ẹnụ ọọwa.

²⁴Bwu ụka ọwẹ kịlahị, ala Isirẹlụ kpa ụbwọ ọnyọọngịrị tụ adịrahụ ịJabin pyị ụka gụ olene-ene gbee kị tọọ ayịreji gbanggbang.