Read idege Angịleje 5 Bible Online

Angịleje 5 - idege bible

Angịleje 5

¹Ẹnụtụrụ ọọwa, iDibora bala ịBarakị ọnyị nya Abinowam mwu eje ọlẹ:

²Anụ gwogbo ha Amkpaa! Alegbeju kpa ala Isirẹlụ kụ ịlahị, Alụma chụ ịlaa nyọka dẹwụ.

³Wo mẹ, anụ ịdịrịhụ! Ke ụrụ, anụ alegbeju! M ka mwu eje ha Amkpaa, M ka du ang ọkpịpyọ ha Amkpaa Ohe Oluhye nya ala Isirẹlụ.

⁴Amkpaa ee! Ụka ká rụ bwu Ọgbọdọ nya ịSẹyii, ká bwu oye nya ọpyị nya Ẹdọm, ịpyị hụ jigi-jigi, enyi do bwu uhye-ọgba, Ee, enyi do bwu egbamwụ.

⁵Ịgbọdọ hụ jigi-jigi i-ijata nya Amkpaa nya Ọgbọdọ nya ịSayịnayị, ị-ịlahị nya Amkpaa Ohe Oluhye nya ala Isirẹlụ.

⁶Lụka nya ọpyị ọkpakpa nya ịChamga ọnyị nya Anatị, Lụka nya ịJayẹlụ, ụgbẹyị-uche wuu da chochoocho, Alẹdịyẹ wuu kaa cheji ba bwu ichuwa.

⁷Alepweji nya ala Isirẹlụ hi wure-wure, epweji kpụ egwawụ-egwawụ gbee ká am iDibora wẹ kaka ri ịnịna nya ala Isirẹlụ.

⁸Ala Isirẹlụ chụ ihye inyeewe ha ịlaa du ká ẹwụ ọdada ji ọpyị. Ẹ-ẹpwụ nya ụnọ iwo ine (40,000) nya alẹng nya ala Isirẹlụ, ọngọ myị kpehe la ọkụmada lee ọkpachị nyamwụ a tị́ le-e?

⁹Ọkịlẹtụ nyam juwa ta angị ri ọgẹwụ nya Isirẹlụ, tụ alụma i-chụ ịlaa ha nyọka dẹwụ. Anụ gwogbo ha Amkpaa!

¹⁰Anụ ya ẹlẹwẹ, anụ angị kụ anyịrẹ inyiiwuru kanụ hụhụ u-uhye nya igbagiri ịnyịịla, tụ angị jẹdịyẹ lẹpẹtẹ ka ẹga myị ẹga kanụ ka ka.

¹¹Anụ ke ụrụ la iru ọ-táta nya angịnyị o-oye nya ẹmwụ-enyi wẹẹ, ị juwa ya jaabwọ ká Amkpaa kụrụ ụka lụmẹ-lụmẹ, ọkụrụ-kụrụ ịlẹ ká ala Isirẹlụ kụrụ. Ọọwa, angịnyị nya Amkpaa a chẹwụ kele ka igirigba nya epweji nyaa lẹlẹ.

¹²Wuleji, iDibora, wuleji mẹ! Wuleji, wuleji ká mwu eje! Kịnyaa mẹ, ịBarakị ọnyị nya Abinowam! kpa angịlẹ ká wu bwu ẹwụ rụ mẹ!

¹³Ọọwa, angị myịmyị ihihi a rụ wẹ ẹga nya alegbeju nyaa lẹlẹ. Angịnyị nya Amkpaa wẹ ẹga nyamwụ nyọka mwẹla.

¹⁴Ị bwu Ifurem wẹ ọkpọọ, Alimwawụ nya iBenjamịn dịrẹng ẹ-ẹkpẹ-ẹkpẹ, angị ri ọgẹwụ chẹwụ hireji bwu ịMakii, alegbeju nya ẹwụ hireji bwu ọpyị nya imwawụ nya iSebulọn.

¹⁵Alegbeju ilimwawụ nya Isakaa ba iDibora warị, ịlẹhị ịnyị, ala Isakaa myị dịrẹ ịBarakị, ị bọọ lalaala ka ju ka ọkpọọ. Alimwawụ nya iRubẹn tị chị ọkịlẹtụ agiye, la ọ-jẹ ang ọlẹ kị ka họ datị ka.

¹⁶Ịyẹ tị́ du kị hi hụhụ ẹ-ẹga nya ịkpịlọ mẹ? Ajị nyọka wo uhule odudu nya angịgbikpịlọ wụrụ ịkpịlọ nyaa ịnyị-ị́? Alimwawụ nya iRubẹn tị chị ọkịlẹtụ agiye, la ọ-jẹ ang ọlẹ kị ka họ datị ka.

¹⁷Ala iGiliyadị kụ ka ọmwẹnụ-ụtụrụ nya ịJọdan. Ala ịDan hi ji ẹga nya agbọ nya enyi. Alimwawụ nya Achẹẹ tị hụ ọ-ọnụ nya ihu, ị kụ ọ-ọnụụka nya enyi.

¹⁸Ala iSebulọn tị ya ọhịhị nyaa ga ha igu, ịwa bala ala ịNafụtali ya egbeju ju o-odo ọ-ọgbẹwụ.

¹⁹Ị-ịTanakị ẹ-ẹga nya ọ̀ba nya iMegido, ịdịrịhụ wẹ kaka dẹwụ. Ịdịrịhụ ịla iKenan dẹwụ, ị́ tị hu ụpịlẹ nya okpoko onyoowuru kpa rụ ka.

²⁰Ịdịchụ dẹwụ bwu uhye-ọgba, bwu ụgbẹyị nyaa ị dẹwụ ta iSisẹra.

²¹Ọhụ́ụ nya Ihu iKichọn mwaa rụ, iKichọn ọ-yẹ ọhụ́ụ ọwẹ. M ka chẹwụ, chẹwụ kịnyaa lọngịrị.

²²Anyịrẹ kam kutu-kutu, kpa achụ chị ikwata kutu-kutu ị-ịpyị.

²³Olegu-ẹrụ nya Amkpaa yẹkẹẹ, “Gọlọ ju epweji nya iMerosi, ọlọ ọọwa ri nya alụwa wuu. ị́ myị wẹ ka da Amkpaa ụbwọ ka, ị́ myị wẹ ka da ẹwọ họọ ka.”

²⁴Ịnyịrọ a kpụ ịJayẹlụ hyẹhyẹ, ahụ nya ịHẹbẹẹ ọla ịKayin, ịnyịrọ a kpọọ hyẹhyẹ gụ anyang ịkịla wuu ịlẹ kị kụ e-ebe nya ọdụ.

²⁵ISisẹra tịtọ nya enyi ọnwanwa, ỊJayẹlụ hu enyi-ẹmẹ nya ẹna họọ nwa, ẹ-ẹpwụ nya ẹja ọchịla-chịla ọ ya enyi-ẹmẹ nya ẹna ọ-chị ụka ju họọ.

²⁶Ọ ya ụpụpịla hu iloo nya ọdụ, ọ ya upwuriri hu ọjị ọ-hya ụwa, ọ mịla iSisẹra ang, ya iloo dụrwọọ pyịị, boo ogo nya egbeju ene bwụram.

²⁷Ọ pwọ pwọ̀ọọ da ka eji, ọ mileji kpịlagada ẹ-ẹga nya ata nya ịJayẹlụ, ẹ-ẹga nya ata nyamwụ iSisẹra a pwọ pwọọọ mileji lẹ, ụ-ụwa ogbu da dẹyị-dẹyị lẹ.

²⁸Ịnịna nya iSisẹra yọyị kpehe bwu iwindo, ọ yọyị kpoye nya ịpwụ ikeke, juwa tọ yẹkẹẹ, “Ịyẹ tị́ du ká ang ọrụnyẹ nyamwụ tata la ọnyanya ịnyị alẹ mẹ? Anyị tị́ ká anyịrẹ nyamwụ-ụ́ nya hyaa kaka mẹ?”

²⁹Aligu nyamwụ ị-jẹ ẹla gụ wuu wẹ ịtọ nyamwụ, ọọwa, ọ ya ẹla ta ịlọmwụ ma ya yẹkẹẹ,

³⁰“Ang nya aluji ị lalẹẹ nu kị ka ya gịla awụlẹ lẹ, ị ka ya ọnyang ookpokpo lee imiiye ha ọngọ dẹwụ ọnyọnyọọnyị, ịpwụ ịlahịchịng ka ri nya iSisẹra, ịpwụ ịlịnya-lịnya ịlẹ kị nụ ọmwụ ju ịnyịịla-ịnyịịla ka ri ịnyam am ịnamwụ.”

³¹Amkpaa Ee! Họ ká aluji nyang wuu ā gbu ịịwẹ, ká aligu nyang ā hụ́ lala ẹnụ! Ụka ọọwa, okpunyi ji ọpyị ọwẹ ẹ-ẹpwụ nya ẹka iwo ine gbẹgbịlẹ.