Read idege Angịleje 6 Bible Online

Angịleje 6 - idege bible

Angịleje 6

¹Ala Isirẹlụ myịmyị họ ang onyobyi ba Amkpaa. Lẹẹlẹ, ẹ-ẹpwụ nya ẹka irwiye lẹpwụ-lẹpwụ Amkpaa yaa ji ekpeleji nya ala iMidiyan.

²Ala iMidiyan la ọngịrị gụ ala Isirẹlụ. Ị kpa ala Isirẹlụ nmaanmaa, du ká ala Isirẹlụ kaa kpa ịlaa kaka kpù ịbaa uku nya ịgbọdọ bala ẹga ị-kpụ ịbaa ịkịla.

³Ụka myị ụka ká ala Isirẹlụ-ụ́ kà ya ang-ẹrụ nyaa wu, ala iMidiyan kaa kpa ala Amalẹkị bala alọmwẹnụ-ụtụrụ ịlẹ kị kụ ugbileji kaa wẹ kaka dẹwụ taa.

⁴Ị kaa chịkụ ụ-ụwa, juwa bịraa ang-ẹrụ bwu ụwa lalaala ka ju koye nya ịGasa. Ị kaa go ịkpịlọ bala ịna bala ibyiyó ikpolo nya ala Isirẹlụ wuu kpa rụ la ọ-pẹhi ụpịlẹ nya ịngịngịhyẹ ha ị ka ye ri ka.

⁵Aluji ịwẹ kaa mwụ tọọọ la iyo ịlẹpwa bala ebe nya ọdụ nyaa lala iru nya ịyịrị kaka kụ ẹ-ẹga nya ala Isirẹlụ. Ịwa ayịdang bala anyịrẹ ịkamẹlụ nya ju iru gbee kịla ọwawa kịla. Ọọwa, ị kaa kụ ụwa gbee kị ka ma ọpyị iyo ri gbanggbang lẹlẹ.

⁶Ọọwa ala Isirẹlụ a kpụ ẹbyahị-ẹbyahị wuu ọọ-la ajị nya ala iMidiyan ịwẹ lẹ, ị jida ju Amkpaa bịịlẹ ụbwọ ọdada bwu ẹga nyamwụ lẹlẹ.

⁷Ụka ká ala Isirẹlụ jida ju Amkpaa bịlọọ kọ ka chaa da bwu ụbwọ nya ala iMidiyan,

⁸ọ du ọlọmwụ ọhẹ ẹrụ kaka byaa yẹkẹẹ, “Ịịlẹ Amkpaa Ohe Oluhye nya ala Isirẹlụ a ya lẹ: ‘M gbanụ kpehe bwu ẹpwụ nya ọnyọhị oriri ọ-ọpyị nya ala Ijipiti.

⁹M gbanụ kpehe bwu ẹpwụtụbwọ nya ala Ijipiti bala angịlẹ wuu kị dẹwụ tanụ ọ-ọpyị ọlẹ. M kwaa rụ hi ẹga hanụ jaabwọ kanụ juwa jẹ warị, du kam ye ọpyị nyaa hanụ.

¹⁰M̀ tị́ byinu lẹẹ yẹkẹẹ, am a ri Amkpaa Ohe Oluhye nyanụ lẹ. Anụ gbịgba ha ihye nya ala Amọ ịlẹ kanụ kụ ọ-ọpyị nyaa lẹẹlẹẹ wẹ ka. Ma, anụ tị myị ju ẹla nyam ọọwa ihi ka.”

¹¹Ọọwa, olegu-ẹrụ nya Amkpaa a wẹ Ọfụra lẹ, ọ hụhụ ọ-ọmwụ nya okoji ooku ọlẹ kọ ri nya iJowachị ologang nya Abiyesa lẹlẹ. Ụka ọọwa, iGidiyọn ọnyị ọlẹng nya iJowachị kpịbaa ẹ-ẹpwụ nya ụjẹ ọlẹ kịị họ ere juwa ru ịrayịsị iwiiti chajị ká ala iMidiyan á ka yọ ka.

¹²Olegu-ẹrụ nya Amkpaa ọọwa chị ịlọmwụ ehe mẹjọo ụ-ụwa lẹ, ọ byoo yẹkẹẹ, “Ọgẹwụ ọtụka! Amkpaa juwa tang lẹ.”

¹³Ọọwa iGidiyọn a wẹ byoo yẹkẹẹ, “Ayịbahị ee, ó-ri ká Amkpaa-á jam tahị ịlẹhị, ịyẹ tí tị tị kahị jam ẹ-ẹpwụ nya uhila nya akama ịlịịlẹ-ẹ̀? Ụkụrwọ ẹbyẹbyị ịlẹ ká adahị igogo anyị tịrọnụ jehi jaabwọ kọ gbaa kpehe bwu ọpyị nya Ijipiti tị́ lee loyi nyahị mẹ? Ọlẹẹlẹẹ lẹ, Amkpaa nyẹẹkpẹ dahị, pẹhiihi ju ala iMidiyan ụ-ụbwọ lẹ.”

¹⁴Ọọwa, Amkpaa a jahị kpata dọọ lẹ, ọ byoo yẹkẹẹ, “Hu ang kele la ọngịrị ọtụka nyang ká chị ala Isirẹlụ da bwu ẹpwụtụbwọ nya ala iMidiyan mẹ. Am lịlọm kpangga a wẹẹ dung ẹrụ ọwẹ lẹ.”

¹⁵Ma, iGidiyọn wẹ yẹkẹẹ, “Ọngọlahị ee, anyị m tị́ ka họ kam ka chị ala Isirẹlụ da myị? Yẹ wẹẹ, ogang nyam a la dẹwụ-dẹwụ gụ wuu i-imwawụ nya ịManasẹ lẹ. Am a tị jula ọhẹ-lọhẹ kaka nya alugbiyegu nyam wuu lẹlẹ.”

¹⁶Amkpaa wẹ byoo yẹkẹẹ, “M ka juwa tang. A ka du ala iMidiyan ịwẹ abwọ pwụrẹ-pwụrẹ lala ọngịnyị ookpokpo ahụ nyaa wẹẹ dẹwụ ta kem.”

¹⁷Ọọwa, iGidiyọn a wọọ yẹkẹẹ, “Ó-ri ká ẹla nyam-ḿ hang aalẹ, ya ang-ẹjẹẹ ọhẹ ham kam jẹ kaahụ Amkpaa a wẹẹ ya ẹla tam ịlẹhị mẹ.

¹⁸Chuchuu, aa godayị am ẹgẹlẹ gbee kam ka mwẹẹkpẹ kaka tọng. M ka kpa ọhaha warị wang.” Ọọwa, ọ wẹ yẹkẹẹ, “M̀ ka hụ am gbee ká ka tịrẹkpẹ warị.”

¹⁹Ọọwa lẹ, iGidiyọn a jụ ka ẹpwang nyamwụ lẹ, ọ ya ụgba nya ẹmwụ kpú lẹlẹ. Ọ ya ịrụ nya ịrayịsị iwiiti lala abang ookpokpo họ ịkaa ọmịrịị mịrị-ka. Ọọwa, ọ hu iyo ju u-udo lẹ, ọ ya enyi-ọ̀má nyamwụ ju ẹ-ẹchụ lẹ, ọ kpa ang ịwẹ wuu wẹ ẹga nya olegu-ẹrụ nya Amkpaa ọ-ọmwụ nya ùgboji nya ooku lẹ, ọ ya họọ lẹlẹ.

²⁰Ọọwa, olegu-ẹrụ nya Amkpaa a byi iGidiyọn yẹkẹẹ, “Ya iyo bala ịkaa ịwẹ guru u-uhye nya ẹjwọ ọlẹ, ká ya enyi-ọ̀má yẹ hwaa mẹ.” Lẹ, iGidiyọn a họ ịnyị lẹlẹ.

²¹Ụka ọọwa, olegu-ẹrụ nya Amkpaa nịra ụbwọ kpaaa ya ọgọdọ ọlụbwọ nyamwụ gu iyo bala ịkaa ịịwa. Ọọwa, ila a kpehe bwu ẹpwụ nya ẹjwọ kaka rụ iyo bala ịkaa lẹlẹ. Ọọwa, olegu-ẹrụ a byi yịra-yịra lẹlẹ.

²²Ụka ká iGidiyọn jẹ ká olegu-ẹrụ nya Amkpaa a wẹ kọ yẹ lẹ, ọ cheko yẹkẹẹ, “Chaaahoho! Ọngọlahị Amkpaa, m̀ yẹ olegu-ẹrụ nyang lẹhị-lẹhị nya ịlọm lẹ.”

²³Ma, Amkpaa byoo yẹkẹẹ, “A kà pyẹẹẹ, a chuko ka. Á juwa gbu ka.”

²⁴Ọọwa lẹ, iGidiyọn a me ogidi okiliya ha Amkpaa ụ-ụwa lẹ, ọ wụrụ ẹnyị nyamwụ “Amkpaa ri Okpunyi” lẹlẹ. Ogidi ọọwa juwa Ọfụra daalẹ ẹga ká alogang nya Abiyesa kụ wẹẹ.

²⁵Lodu nya ẹnẹwẹ, Amkpaa byi iGidiyọn yẹkẹẹ, “Wu ẹna ọlẹng nya adang bala ẹna oheeye ọlẹ kọ gu ẹka irwiye, ẹna ọlẹng nya adang ọlẹ kọ gu ẹka irwiye, ká tụrụ ogidi nya adang ọlẹ kọ me ha ojiga ịBaalụ. Aa chị ùgboji nya Achẹra ojiga ọnyang ọlịkịka nyamwụ ọwẹ ịnyịnyị deeji mẹ.

²⁶Ọọwa lẹ, ká me ogidi kpẹẹkpẹẹ rịrị ẹ-ẹga ogede ọọwa ha Amkpaa Ohe Oluhye nyang mẹ. Aa ya ẹna oheeye kịla ọ-rụ ila kpụ obyi. Ịwụ i-bwu ùgboji nya Achẹra ojiga ọlẹ ká chị deeji wẹ a ka kpa kịla iya ọọwa lẹ.”

²⁷Ọọwa, iGidiyọn a chụ anchẹ nyamwụ angị iwo chiriri lẹ, ọ họ jaabwọ ká Amkpaa byoo nyị họ lẹlẹ. Ma, ọọ-la ajị nyọlẹ kọ ju uhi nya alugbiyegu bala alepweji nyamwụ lụmẹ lẹ, ụka nya odu ohihi ọ họ ịnyị lẹ.

²⁸Lụtụrụ gbegbegbe nya ahị ọpyẹpyẹ ọọnamwụ, ká alepweji ọwẹ chahị kpehe, ị ye jaabwọ ká ogidi nya ojiga ịBaalụ tụrụ ju eji. Ị yẹ ùgboji nya ojiga Achẹra kọ tụrụ deeji. Ọ́ ba ọọwẹ ka, ị yẹ jaabwọ kị ya ẹna oheeye kịla iya u-uhye nya ogidi ọkịla ọlẹ kị me rịrị ụ-ụwa ịnyịnyị.

²⁹Ọọwa, ị juwa tọ awụlẹ wo yẹkẹẹ, “Oowo kpakpakpa a tị́ họ ẹla ọlẹ kpong-kpong?” Ụka kị dịrẹ gbee lẹ, ọngọhẹ a ya jaa ya iGidiyọn ọnyị nya iJowachị nyaa họ ẹlẹwẹ lẹ lẹlẹ.

³⁰Ọọwa, ị byi iJowachị yẹkẹẹ, “Gba ọnyị nyang kpehe hahị mẹ. Ọ tụrụ ogidi nya ịBaalụ. Ọ tị chị ùgboji nya Achẹra ọlịkịka nyamwụ deeji. Lẹẹlẹ, ahị ka nwọọ.”

³¹Ma, iJowachị byi iru nya angị wẹẹ jahị dọọ yẹkẹẹ, “Anụ juwa chẹkpẹ ju ịBaalụ-ụ́? Ịyẹ tị́ kanụ-ụ̀ ye uya nyamwụ ma ene-è? Ọng myị ọng kọ chẹkpẹ jwoo aalẹ, ị ka nwụ ọngọọwa lụtụrụ. Ó-ri ká ịBaalụ-ụ́ ri ohe aalẹ, ọ ka ma uya ha ịlọmwụ myị. Ogidi nyamwụ ị tị́ tụrụ beji-i wẹ.”

³²Bwu ẹnẹwẹ kịlahị, ị dọmwụ nyọka wụrụ iGidiyọn iJerubaalụ ọlẹ ká etu nyamwụ ri “Ba ká ịBaalụ a ma uya ha ịlọmwụ.” Ang odudu ri ogidi nyamwụ iGidiyọn a tụrụ ju eji lẹ.

³³Ọọwa lẹ, ala iMidiyan bala ala Amalẹkị bala alọmwẹnụ-ụtụrụ a dụgba wule awụlẹ jahị da ala Isirẹlụ lẹ, ị pá tuuu kpoye nya Ihu ịJọdan kaka chịkụ ọ-ọkpọọ nya iJesiryẹlụ lẹlẹ.

³⁴Ụka ọọwa, olegu nya Amkpaa hwo kụ iGidiyọn. Ọọwa, ọ chị opyike wụrụ alẹng ịlogang nya Abiyesa kị ka bọọ jẹ lẹlẹ.

³⁵Ụka ọọwa, ọ du ẹrụ tụ imwawụ nya ịManasẹ da wuu kaka wụrwaa kị ka bọọ jẹ. Ọ du tọ alimwawụ nya Achẹẹ bala alimwawụ nya iSebulọn bala ala ịNafụtali ịnyịnyị. Ọọwa, ị wẹ kaka jula iGidiyọn anyị ịnyịnyị lẹlẹ.

³⁶Ọọwa, iGidiyọn a byi Ohe Oluhye yẹkẹẹ, “Ó-ri am ká ka kpa chị ala Isirẹlụ da jaabwọ ká ya aalẹ,

³⁷họ kam jẹ bwula ang-ẹjẹẹ ọlẹ. M̀ ka ya owu olewu-lewu neeji lobyi alẹ ẹ-ẹga kahị kaa ru ịrayịsị iwiiti lẹ. Ụka nya alụtụrụ ó-ri ká owu ọwẹ-ẹ́ nyiri dẹyị ọọ-la amwụ, ká ọpyị ọlụwa-á tị nyiri ka aalẹ, m̀ ka jẹ ká ka kpam chị ala Isirẹlụ da.”

³⁸Ịịwẹ ọ tị la kpangga ịlẹhị lẹ. Ụka ká iGidiyọn chahị lụtụrụ gbegbegbe nya ahị ọpyẹpyẹ ọọnamwụ kọ pyị owu ọọwa kwẹẹẹ, enyi ọlụwa myị ẹja.

³⁹Ọọwa iGidiyọn a byi Ohe Oluhye yẹkẹẹ, “Chuchuu, a wụ ẹjẹ tam ka. Hi iwe ham kam bịlẹ ang ookpokpo wẹẹ. Ugbẹnyị lẹ, họ ká owu ọlẹ a chọhụ chịka-chịka, ká ọpyị ọlụwa a nyiri mẹ.”

⁴⁰Lodu ọọwa, Ohe Oluhye họ jaabwọ ká iGidiyọn bịlẹ. Ụka nya alụtụrụ ọọnamwụ, owu ọọwa chọhụ chịka-chịka. Ma, amwụ tị họ ká ọpyị ọlụwa nyiri dẹyị.