Read idege Angịleje 7 Bible Online

Angịleje 7 - idege bible

Angịleje 7

¹Ụka ọọwa, iGidiyọn bala angịdẹwụ nyamwụ wuleji lụtụrụ gbegbegbe lẹ, ị jẹ lalaala ka chịkụ ịkịka nya ụgbụ nya enyi ị-ịHarọdụ lẹlẹ. Ala iMidiyan tị chịkụ koye nya ẹtẹ nyaa ọ-ọkpọọ ba Ọgbọdọ nya iMore ba.

²Ọọwa, Amkpaa a byi iGidiyọn yẹkẹẹ, “Angịdẹwụ nyang ịwẹ ju iru lụmẹ. Ó-ri kam kpaa dẹwụ kụrụ ala iMidiyan, ị ka me irya ọngịrị-ọngịrị nya ịlịwa ịwa nyaa kpa kụrụ lẹ. Ị ka chị ọgọm jahị dam.

³Lẹẹlẹ, byi angịnyị nyang ịwẹ yẹkẹẹ, ‘Ọng myị ọng ọlẹ kọ ju uhi a rụ tịrẹkpẹ ka ẹpwa bwu Ọgbọdọ nya iGiliyadị mẹ.’ ” Ọọwa angị ụnọ iwo imiiye da ụnọ imiiye (22,000) nyaa a rụ lẹlẹ. Ma, angị ụnọ iwo (10,000) nyaa tị hi nyọka dẹwụ.

⁴Ọọwa, Amkpaa a byi iGidiyọn yẹkẹẹ, “Angịnyị nyang ịwẹ myịmyị ju iru lụmẹ wẹẹ. Kpaa kịnyaa ka ẹga nya enyi mẹ. Ụ-ụwa m ka yile angịlẹ kị ka bang hang lẹlẹ. Ọng myị ọng kam ya ma ọ bang mẹ, ọngọọwa à ka ka lẹ. Ọng myị ọng kam ya ma ó ka bang ka aalẹ, ọngọọwa-á ka ka ẹwụ koo.”

⁵Ọọwa, iGidiyọn a kpa angịdẹwụ nyamwụ kele ka ẹmwụ nya enyi lẹ, Amkpaa a byoo yẹkẹẹ, “Chị angị chị enyi ju ụ-ụbwọ kpa ẹlẹlẹ dọọ nwa lala ebwu ebwo hi angị ya ụrụụ kụ eji juwa kpa ọnụ nwa enyi.”

⁶Iru ojuju nya angị chị enyi ju ụ-ụbwọ kpa ẹlẹlẹ dọọ nwa wuu la angị ohu ịta (300). Angị ihihi ịkịla wuu ya arụụ kụ eji kpa enyi nwa.

⁷Ọọwa, Amkpaa a byi iGidiyọn yẹkẹẹ, “Angị ohu ịta ịwẹ kị chị enyi ju ụ-ụbwọ kpa ẹlẹlẹ dọọ nwa wẹ m ka kpa chịng da ya ọkụrụ-kụrụ hang u-uhye nya ala iMidiyan lẹlẹ. Byi angị ihihi wuu kị rụ ka ẹpwa mẹ.”

⁸Ọọwa, iGidiyọn a ye ang-abwọ bala ẹkụrwẹ nya angị ihihi nya ala Isirẹlụ wuu lẹ, Ọ kwaa tịrẹkpẹ rụ ka ẹpwa nyaa lẹlẹ. Angịdẹwụ ịlẹ kị hi tọọ ụ-ụwa kẹnẹ-kẹnẹ a ri angị ohu ịta (300) ịịwa lẹlẹ. Ẹga ká angịdẹwụ nya ala iMidiyan anyị chịkụ ayịdang ji ọkpọọ pwọ kpuru hi ẹga ká ala Isirẹlụ kụ.

⁹Lodu nya ẹnụ ọọwa, Amkpaa byi iGidiyọn yẹkẹẹ, “Wuleji kele ká be ala iMidiyan ẹpwa mẹ, chajị m ka họ ká ka kụrwaa chẹẹchẹẹ lẹ.

¹⁰Ọ́ tị ri ká ju hiaalẹ, aa kpa iPura ọnchẹ nyang ba ịlọng kele ka ịkampụ nyaa mẹ.

¹¹A ka wo jaabwọ ká ala iMidiyan juwa ya. Ụka ọọwa, á tụtụm ka ju uhi nyọka baa ẹpwa kaka.” Ọọwa, iGidiyọn bala ọnchẹ nyamwụ a bajẹ kele ka ju ka ọnụ nya ịkampụ nya ala iMidiyan lẹlẹ.

¹²Ụka ọọwa, ala iMidiyan bala ala Amalẹkị bala aloja ịlọmwẹnụ-ụtụrụ pyẹ yịrị ọkpọọ ọwẹ kpanggbaa lala iru nya ịyịrị. Anyịrẹ ịkamẹlụ nyaa ju iru lala apwụ bala amẹ.

¹³Ụka ká iGidiyọn pwụ ịkampụ nya ala iMidiyan, ọ wo ká ọlẹng ọhẹ juwa wa ụlaa je oligu nyamwụ. Ọ wa ụlaa ọọwa yẹkẹẹ, “M̀ la ụlaa ká ẹbẹ nya ịkaa ọlẹ kị kpa ịbali họ rị nmuru-nmuru ju wẹ ịkampụ nyahị kaka mịla ẹpwang nya ọdụ ọhẹ nmoo. Ọọwa, ẹpwang ọọwa a yurwo kotoo yahị kụrụ eji birikiti dụwa ị-ịpyị lẹlẹ.”

¹⁴Ọọwa oligu nyamwụ a wẹ yẹkẹẹ, “Ụlaa nya ẹma nya ẹwụ nya iGidiyọn ọnyị nya iJowachị a la-à wẹ lẹ. Ịngịngịhyẹ ọkịla dala ọwa kaka. Ohe Oluhye ya ọkụrụ-kụrụ họọ u-uhye nya ala iMidiyan tụ angịdẹwụ nyahị wuu lẹ!”

¹⁵Ụka ká iGidiyọn wo ẹla nya ụlaa nya ọlẹng ọwẹ bala etu nyamwụ, ọ hirikpẹẹ gbịgba ha Amkpaa. Ọọwa, ọ nya tịrẹkpẹ wẹ ịkampụ nya ala Isirẹlụ lẹ, ọ be ẹkọ wụrwaa byaa yẹkẹẹ, “Anụ wuleji mẹ oo! Amkpaa ya ọkụrụ-kụrụ hanụ u-uhye nya ala iMidiyan lẹ!”

¹⁶IGidiyọn chị angịdẹwụ angị ohu ịta (300) nyamwụ ịwẹ ebwo ịta. Ọ ya ẹkụrwẹ bala ọta la ila ọ-kpa yọyị ẹ-ẹpwụ nyamwụ nya ọngọngọọng nyaa.

¹⁷Ọọwa, ọ byaa yẹkẹẹ, “Anụ kpẹhị bam mẹ. Ụka kam jẹ pwụ oyi olodehe nya ịkampụ nyahị lẹ, anụ họ gbịlam jaabwọ kanụ yẹ kam juwa họ mẹ.

¹⁸Ụka kám bala alebwo nyamḿ chị ẹkụrwẹ lẹ, anụ wuu a chị ịnyanụ dagaga ju ịkampụ nyaa wuu kanụ chị ụkwa yẹkẹẹ, ‘Ọlẹ ri nya Amkpaa bala ịnya iGidiyọn!’ ”

¹⁹IGidiyọn bala angọ ohu (100) jẹ ka pwụ oyi olodehe nya ịkampụ nyaa ụka ká epwodu gwene kpá angịgbeji ịhyẹ ye ụkụrwọ bwu ẹga nya angịkịla. Ọọwa, ị chị ẹkụrwẹ lẹ, ị ya ịta ịlẹ kị kpa a-abwọ bene lẹlẹ.

²⁰Ọọwa, alebwo imiiye ịkịla a chị ẹkụrwẹ lẹ, ị ya ịta nya bene ịnyịnyị lẹlẹ. Ị kpa ila ụ-ụbwọ ụpụpịla, ị kpa ila u-upwuriri, juwa chị ụkwa yẹkẹẹ, “Ẹma nya ẹwụ ri nya Amkpaa bala ịnya iGidiyọn!”

²¹Ọng myị ọng nyaa godayị rịrị ẹ-ẹga nyamwụ giri-giri dagaga ju ịkampụ nya ala iMidiyan. Ọọwa ala iMidiyan wuu a ya ẹta kpụnyẹ juwa rụ leko-leko lẹlẹ.

²²Ụka ká angịnyị nya iGidiyọn juwa chị ẹkụrwẹ, Amkpaa họ ká aluji jahị dawụlẹ juwa mwẹla tọ awụlẹ la ẹma nya ẹwụ nyaa. Ị rụnyẹ rụ yahị da ka iSerera lalaala ka pwụ ịBẹtị-chita gbee ka ju ka oyi nya epweji nya Ebẹlụ-imehola kọ ba epweji nya ịTabatị ba.

²³Ọọwa, ị wụrụ alẹng bwu imwawị nya ịNafụtali bala bwu Acha bala bwu oyiye-oyiye nya imwawụ nya ịManasẹ kpehe ka ku ala iMidiyan lẹlẹ.

²⁴Ọọwa, iGidiyọn a du ẹrụ tọ angị kụ ikiti ịlọpyị nya Ifurem wuu lẹ ọ byaa yẹkẹẹ, “Anụ hireji warị ka dẹwụ ta ala iMidiyan mẹ. Anụ hịla ẹ̀ga ụ-ụwa Ihu ịJọdan lalaala ka ju ka ịBẹtịbara, kanụ kwaa iwe la o-kpoye kpụ mẹ.” Ọọwa, ị wụrụ ala Ifurem wuu ka jịra lẹ, ị kụ giri-giri i-ihu ịJọdan kele ka ju ka ịBẹtịbara lẹlẹ.

²⁵Ị wu Ọrẹbụ bala iSiibu iịdịrịhụ imiiye nya ala iMidiyan. Ị nwụ Ọrẹbị ẹ-ẹga nya ẹjwọ nya Ọrẹbụ. Ị nwụ iSiibu ẹ-ẹga ọ-pyị ere nya iSiibu. Ị kịnyaa juwa ku ala iMidiyan. Ọọwa, ị kpa egbeju nya Ọrẹbụ bala iSiibu kịla iGidiyọn koye nya ọmwẹnụ-ụtụrụ nya ịJọdan lẹlẹ.