Read idege Angịleje 8 Bible Online

Angịleje 8 - idege bible

Angịleje 8

¹Ọọwa, alẹng nya ala Ifurem a tọ iGidiyọn wo yẹkẹẹ, “Anyị tị́ ka họhị ịnyị, ká wụrụụhị ụka ká juwa ka dẹwụ ta ala iMidiyan ka-à?” Ị rwarụ tọọ u-uhye nya ọọwa.

²Ọ wẹ byaa yẹkẹẹ, “Ang ọlẹ kam họ wẹ-ẹ́ kpụ ọchụ pwoku ịnyanụ ka. Ọpyịnyẹng ọlẹ kaanụ ala Ifurem họ-ọ́ lụmẹ gụ ọlẹpwụ-lẹpwụ ọlẹ ká alogang nya Abiyesẹẹ nyahị wuu họ ka-á?

³Yẹ wẹẹ, Ohe Oluhye họ anụ kụrụ Ọrẹbụ bala iSiibu ịdịrịhụ imiiye nya ala iMidiyan. Oyina m tị́ jụ họ pwụ ọlịịwẹ?” Ụka kọ waa ẹla ịịwẹ lẹ, agbama nyaa a kpụba lẹlẹ.

⁴Ụka ká iGidiyọn bala angịdẹwụ nyamwụ angị ohu ịta (300) jẹ ka pwụ Ihu ịJọdan, ị kpoye nyamwụ. Ịnyịrọ chaa pyẹpyẹ ma, ị tị kịnyaa juwa ku aluji.

⁵Ụka kị jẹ pwụ epweji nya iSukotu, iGidiyọn byi alụwa yẹkẹẹ, “M bịlẹnụ, anụ ya ang oriri ha angịdẹwụ nyam chẹẹ mẹ-ẹ̀. Ịnyịrọ chaa pyẹpyẹ lẹ, m tị jam ku ịSẹba bala ịSalumuna ịdịrịhụ ịla iMidiyan wẹẹ.”

⁶Ma alegbeju nya iSukotu wẹ byoo yẹkẹẹ, “Ahị tị́ ka ya ang oriri ha angịnyị nyang tu ịyẹ? Ánụ wu ịSẹba bala ịSalumuna wu myị lẹka.”

⁷Ọọwa, iGidiyọn a byaa yẹkẹẹ, “Ẹla-á juwa ka. Ụka ká Amkpaa-á họ kam kụrụ ịSẹba bala ịSalumuna kpá, m ka nyiinu la ụpaa bala ujwo-owuru ịlẹpwamẹ.”

⁸IGidiyọn rụ bwu ẹgẹwẹ ka ịPẹnụwẹlụ. Ọ tọ alụwa ịtọ nya ang oriri ịnyịnyị. Ị tị wẹ iGidiyọn lala ala iSukotu ịnyịnyị.

⁹Ọọwa, ọ byaa yẹkẹẹ, “Ụka kam kụrụ kpá kam nya lokpunyi, m ka tụrụ ube-oluhye nyanụ ọlẹ beji kpalị-kpalị.”

¹⁰Ụka ọọwa, ịSẹba bala ịSalumuna juwa ị-ịKakọ la angị dẹwụ nyaa. Angịnyị lala angị ụnọ iwo kụrụ ịrụ (15,000) kẹnẹ-kẹnẹ a hi bwu ẹpwụ nya iru nya ang dẹwụ nyaa wuu lẹ. Ị nwụ angị ụnọ ohu da ụnọ imiiye (120,000) lẹpwụ-lẹpwụ.

¹¹IGidiyọn tụ ụgbẹyị da bwu ọnụmẹ nya ugbileji koye nya ọmwẹnụ-ụtụrụ nya iNoba bala ịJọgbẹha. Ọọwa, ị gba mịla aluji lọmwaaa lẹlẹ.

¹²ỊSẹba bala ịSalumuna ịdịrịhụ imiiye nya ala iMidiyan rụnyẹ rụ. Ma, iGidiyọn tị kwaa ka wu lẹ, ọ chị uhi ọtụka-ọtụka ju angịdẹwụ nyaa wuu lẹlẹ.

¹³Ụka ká iGidiyọn juwa nya bwu ẹwụ, ọ tụ ụgbẹyị ọchịpwụrụ bwu nya ala ịHẹrẹsị da.

¹⁴Ọ wu okolobya ọhẹ pyẹẹ bwu iSukotu lẹ, ọ tọọ ịtọ ala ịhyẹ lẹlẹ. Ọọwa, okolobya ọọwa a da ẹnyị nya alegbeju iwo irwiye kụrụ irwiye ị-kụ ịlahị nya ala iSukotu ju kpẹẹkpẹẹ ha iGidiyọn lẹlẹ.

¹⁵IGidiyọn wẹ ẹga nya ala iSukotu lẹ, obyaa yẹkẹẹ, “Anụ kpịtịya jaabwọ kanụ pwa ọ-ya ang oriri ha angịdẹwụ nyam ụka kị lẹẹ ka kpụ ịbwọ wẹẹ-ẹ́? Anụ kpam họ byim am nyị wu ịSẹba bala ịSalumuna ene mẹ. Anụ yẹ mẹ, ịdịrịhụ ịịwa a lẹẹ lẹlẹ.”

¹⁶Ọọwa, iGidiyọn a hụla ejwo bwu ẹpwamẹ lẹ, ọ kpa yẹ alegbeju ịla iSukotu akama lẹlẹ.

¹⁷Ọ tụrụ ube-oluhye ọla ịPẹnụwẹlụ ju eji bala ọ-nwụ alụwa ịnyịnyị.

¹⁸Ọọwa, iGidiyọn a tọ ịSẹba bala ịSalumuna wo yẹkẹẹ, “Alẹng ịlẹ kanụ nwụ ọ-ọgbọdọ nya ịTabọ lẹẹ, anyị angịịwa a tị́ la-à?” Ị wẹ byoo yẹkẹẹ, “Angịịwa meng. Ọngọngọọng nya me ọnyị nya adịrahụ.”

¹⁹IGidiyọn byaa yẹkẹẹ, “Anyịnam alẹng ká ịnam kpangga ma a wẹ lẹ. Ohe jẹ, ḿ ka nwụnụ ka, ó-ri kanụ chị ọhịhị nyaa da lẹẹ ịnọ.”

²⁰Ọọwa, ọ byi ịJẹta ọnyị ọlẹng ọgbahị nyamwụ yẹkẹẹ, “Wuleji, ká nwaa mẹ!” Ọ́ tị myị gba oge nyamwụ jahị daa ka. Ọ ju uhi chajị ọwa ayịdang ri onjwo wẹẹ.

²¹Ọọwa, ịSẹba bala ịSalumuna a byi iGidiyọn yẹkẹẹ, “Wuleji, ká nwụhị lịlọng mẹ. Ụkụrwọ opwoku ọngọgbahị, ọwa ọngọgbahị a kaa họ lẹ.” Ọọwa, iGidiyọn a nwaa lẹ, ọ pwọ ịjang ịlẹ kị ya da anyịrẹ ịkamẹlụ nyaa o-omyi lẹlẹ.

²²Ụka ọọwa lẹ, ala Isirẹlụ a byi iGidiyọn yẹkẹẹ, “Ri olegbeju nyahị mẹ. Aa ri olegbeju nyahị hi tọ ọnyị nyang bala anyị ịtụma nyang kịlahị-ịlahị mẹ, chajị ahụ a chịhị da bwu ẹpwụtụbwọ nya ala iMidiyan lẹẹ lẹ.”

²³IGidiyọn tị wẹ byaa yẹkẹẹ, “Am lee ọnyị nyam-ḿ ka ri olegbeju nyanụ ka. Amkpaa a ka ri olegbeju nyanụ lẹ.”

²⁴Ọ tị mwọọgịlẹ byaa yẹkẹẹ, “Ang ookpokpo ọlẹ kam tịtọ bwu ẹga nyanụ lẹẹ ri: ọngọngọọng nyanụ a ya ang i-gu arụ nya okpoko ịgọm ham bwu ẹpwụ nya ang ịlẹ kanụ go bwu ọgbẹwụ mẹ.” (Ala iMidiyan aluji nyaa ịwẹ ri ala iChimẹlụ lẹ ị kaa gu ang i-gu arụ.)

²⁵Ọọwa, aluche wuu a wẹ byoo yẹkẹẹ, “Ahị myị ọnụ nyọka ya hang.” Ọọwa, ị pyẹ apwụ ọhẹ maa deeji lẹ ọngọngọọng a ya ang i-gu arụ ịlẹ kọ go juwa lẹlẹ.

²⁶Ilo ọlala nya ang i-gu arụ ịịwa wuu lala okolo iwo imiiye. Ọlẹ tị datị hi ilo ọlala nya ịjang bala ang idoomyi bala ịwụrụ ịnyịịla ịlẹ ká ịdịrịhụ nya ala iMidiyan kaa kụrụ bala agba ị-da anyịrẹ ịkamẹlụ nyaa o-omyi.

²⁷IGidiyọn ya okpoko ịgọm ọọwa me ukpeku ọhẹ lẹ, ọ hwoo rịrị Ọfụra epweji nyamwụ lẹlẹ. Ala Isirẹlụ wuu mwọọgịlẹ nyẹẹkpẹ da Ohe Oluhye juwa gbịgba ha ukpeku ọwẹ. Ọọwa, ọhọhọ ọwẹ a ri eri owuwu ha alugbiyegu nya iGidiyọn lẹlẹ.

²⁸Lẹẹlẹ, ala Isirẹlụ kụrụ ala iMidiyan. Ị́ tụtụm hu akama ha ala Isirẹlụ kaka. Okpunyi ji ẹ-ẹpwụ nya ẹka iwo ine lẹpwụ-lẹpwụ gbee da ka ụka ká iGidiyọn gbu kpá.

²⁹IGidiyọn nya tịrẹkpẹ ka kụ ẹpwa nya ịlọmwụ.

³⁰Ọ ma anyị alẹng angị iwo irwiye chajị, ọ ye iru nya ịhụ.

³¹Ọ ye ahụ-ọnchẹ ọhẹ ọlẹ kọ kụ ịChekem. Ọ ma ọnyị ọlẹng ha iGidiyọn ịnyịnyị. Ọ wụrụ ẹnyị nyamwụ Abimẹlẹkị.

³²IGidiyọn ọnyị nya iJowachị gbu ụka kọ chị okwirichi kụnyẹ-kụnyẹ. Ị jwoo eji i-iworu nya iJowachị adamwụ ụ-ụwa Ọfụra epweji ọlẹ ká alogang nya Abiyesa kụ.

³³Ụka ká iGidiyọn gbu kpá, ala Isirẹlụ nyẹẹkpẹ da Ohe Oluhye juwa gbịgba ha ịBaalụ. Ị hu ịBaalụ-iberiti ri ohe nyaa.

³⁴Ị́ tụtụm myị ẹrụ ha Amkpaa Ohe Oluhye nyaa ọlẹ kọ chaa da bwu ụbwọ nya aluji ịlẹ kị dagaga jwaa wuu kaka.

³⁵Ị́ kpa ịlaa keji la obe ojiji ẹ-ẹga nya alugbiyegu nya iGidiyọn ka, ịnọ ị họ iru nya ang ịnyịịla ha ala Isirẹlụ.