Read idege Angịleje 9 Bible Online

Angịleje 9 - idege bible

Angịleje 9

¹Ọọwa, Abimẹlẹkị ọnyị nya iGidiyọn a kele ka iChekem ẹga ká aanịna nya ịnamwụ anyị kụ lẹlẹ. Ọ byaa yẹkẹẹ,

²“Anụ tọ ala iChekem wo ó-ri kọ haa ká anyị alẹng angị iwo irwiye nya iGidiyọn lee ọlẹng ookpokpo ọ-ka ri adịrahụ nyaa. Anụ tị kpịtịya mẹ, am Abimẹlẹkị ri ọọnanụ-ọọnanụ.”

³Ọọwa, aanịna nya ịnamwụ a tọ ịtọ nya ẹlẹwẹ wo wọnụ nyamwụ ju ẹ-ẹga nya ala iChekem lẹlẹ. Ụka ọọwa, ala iChekem chị nyọka ba Abimẹlẹkị jẹ, chajị ị ya ọwa ayịdang nyị ri ọọnịnịwa.

⁴Ị ya okpoko onyoowuru iwo irwiye họọ bwu ube nya ojiga ịBaalụ-iberiti. Ọ ya okpoko ọọwa diro alekpilo bala alachị nya alẹng ịhyẹ kpa dịrẹ ịlọmwụ.

⁵Ọ rụ kele ka ẹpwa nya adamwụ ụ-ụwa Ọfụra lẹ, ọ go aanamwụ alẹng anyị nya iGidiyọn angị iwo irwiye nwụ wuu lẹlẹ. Ọ nwaa wuu u-uhye nya ẹjwọ ookpokpo. Ma, iJotam ọlẹ kọ ri onjwo nyaa wuu rụ kpịbaa hi Abimẹlẹkị lẹ, ị́ nwọọ ka.

⁶Ọọwa, ala iChekem bala ịBẹtị-imilo a ka ọjịra-jịra ka ọmwụ nya ùgboji nya ooku i-iChekem lẹ, ị hu Abimẹlẹkị adịrahụ ụ-ụwa lẹlẹ.

⁷Ụka ká iJotam wo ẹlẹwẹ, ọ kele ka uhye nya Ọgbọdọ nya iGesirim lẹ, ọ be ẹkọ ya ẹla gboo ta alụma yẹkẹẹ, “Anụ ala iChekem ee, anụ wo lam, chajị ká Ohe Oluhye ka ke ụrẹ lanụ mẹ!

⁸Ụka ọhẹ juwa ká ekeji tịtọ kị ka hu adịrahụ nya ịlaa. Ọọwa, ị byi okoji nya olivu yẹkẹẹ, ‘Kẹwẹ ká ri adịrahụ nyahị mẹ.’

⁹Ma, olivu tị wẹ byaa yẹkẹẹ, ‘Ida ọlẹ kam-m̀ rụ ị kaa kpa chị ihi ju ihye bala angịnyị ehe lẹ. Ḿ ka jẹ-ẹ̀ hu abwọ la ida ọrụrụ wẹ ka ri adịrahụ nya ekeji ịkịla ka!’

¹⁰Ọọwa, ekeji a byi okiledu yẹkẹẹ, ‘Kẹwẹ ká ri adịrahụ nyahị mẹ.’

¹¹Ma, okiledu wẹ byaa yẹkẹẹ, ‘Ḿ ka jẹ-ẹ̀ hu abwọ la ọ-nwụ egbe ịnyịịla ịlịpyọ-lịpyọ nyam, wẹ ka ri adịrahụ nya ekeji ịkịla ka.’

¹²Ịnyị, ekeji a byi alakọnụ yẹkẹẹ, ‘Kẹwẹ ká ri adịrahụ nyahị mẹ.’

¹³Alakọnụ tị wẹ byaa yẹkẹẹ, ‘Ḿ ka jẹ-ẹ̀ hu abwọ la ọ-rụ ere ọlẹ kọọ kpa ọkẹkẹnị ọchịchị wẹ ihye bala angịnyị ehe, m̀ wẹ ka ri adịrahụ nyanụ koo.’

¹⁴Ọọwa, ekeji wuu a byi ujwo-owuru yẹkẹẹ, ‘Kẹwẹ ká ri adịrahụ nyahị mẹ.’

¹⁵Ujwo-owuru byaa yẹkẹẹ, ‘Ánụ tịtọ kanụ ka hum adịrahụ ịnyịlẹhị aalẹ, anụ kẹwẹ ka kụ e-ekpeleji nya ụrụrụ nyam mẹ. Ó-ri ịnyị ka aalẹ, ila a kpehe bwu ẹpwụ nyam ka rụ ekeji nya isida ịla iLibanọn.’

¹⁶“Lẹẹlẹ, anụ họ lihi bala lẹla nya ịlẹhị lụmẹ nyọlẹ kanụ hu Abimẹlẹkị nya adịrahụ-ụ́? Ọhọhọ nyanụ pwoku ihi ọlala nya iGidiyọn bala ugbiyegu nyamwụ jaabwọ ká ọhọhọ nyamwụ o-bwu ẹkpẹ chịla ka ba-á?

¹⁷Anụ kpịtịya wẹẹ, adam dẹwụ yẹẹnụ dada, ya egbeju ju o-odo nyọka chịnụ da bwu ọngịrị nya ala iMidiyan.

¹⁸Alẹ ọlẹ anụ tị mwọọgịlẹ nyẹẹkpẹ da ugbiyegu nyamwụ. Anụ nwụ anyị alẹng nyamwụ angị iwo irwiye u-uhye nya ẹjwọ ookpokpo. Ọọwa ānụ hu Abimẹlẹkị ọnyị nya ahụ-ọnchẹ nyamwụ adịrahụ ọọ-la ajị nyọlẹ kọ ri ọọnanụ ka lé?

¹⁹Lẹẹlẹ, ó-ri ká ẹlẹwẹ kanụ họ-ọ̀ wẹ alẹ ẹ-ẹga nya iGidiyọn bala ugbiyegu nyamwụ-ụ́ la ihi bala ọ-chịla aalẹ, anụ chị ọkẹkẹnị ju Abimẹlẹkị adịrahụ nyanụ, kọọwa a tịtị chị ọkẹkẹnị tanụ ịnyịnyị mẹ.

²⁰Ọ́ tị ri kọ la ihi bala ọ-chịla ka aalẹ, ila a kpehe bwu ẹga nya Abimẹlẹkị kaka rụnụ anụ ala iChekem bala ala ịBẹtịmilo wuu gbanggbang. Ila a kpehe bwu iChekem bala ịBẹtịmilo kaka rụ Abimẹlẹkị gbanggbang ịnyịnyịnyị mẹ.”

²¹Ọọwa, iJotam a rụnyẹ rụ kaka kụ i-iBiyẹ lẹlẹ. Ọ kụ ụ-ụwa chajị, ọ ju uhi nya Abimẹlẹkị ọnyịnamwụ.

²²Abimẹlẹkị ri adịrahụ nya Isirẹlụ ẹ-ẹpwụ nya ẹka ịta.

²³Ohe Oluhye họ ká ala Isirẹlụ bala Abimẹlẹkị-ị́ wo lawụlẹ ka. Ị nyẹẹkpẹ da Abimẹlẹkị.

²⁴Ohe Oluhye họ ịnyị nyọka yẹ Abimẹlẹkị bala ala iChekem akama chajị nya ang onyobyi ọlẹ kị họ. Abimẹlẹkị nwụ anyị alẹng nya iGidiyọn. Ala iChekem a tị jwoo ọngịrị du kọ họ ịnyị lẹ.

²⁵Ala iChekem chụ alẹng ịhyẹ kụ ịnya u-uhye nya ịgbọdọ gbe Abimẹlẹkị. Ị nu ọng myị ọng ọlẹ kọ chịpwụrụ bwu ụwa ang lagbụrụ. Oja nya ẹlẹwẹ pwụ ụrụ nya Abimẹlẹkị.

²⁶Ụka ọọwa, ọlẹng ọhẹ ká ẹnyị ri ịGaalụ, ọnyị nya Ebẹdị mwụ wẹ iChekem bala anyịnamwụ alẹng. Ọọwa, ala iChekem a hu irya nyaa wuu dahị hilọọ lẹlẹ.

²⁷Ịwa wuu hu ang ka ẹrụ ka hya alakọnụ. Ị ya họ ere lẹ, ị la ọhụhụ nya ang oriri u-ube nya ojiga nyaa lẹlẹ. Ị ri ang bala ọ-nwa ere bala ọ-kpa Abimẹlẹkị hu utungguru ụ-ụwa.

²⁸Ọọwa, ịGaalụ a ya ụ-ụwa yẹkẹẹ, “Oowo Abimẹlẹkị a tị́ ri kpong-kpong ene-è? Ịyẹ tị́ du kaahị ala iChekem kpakpaakpa ka myị ẹrụ họọ-ọ̀? Ọọ-la ajị nyori ọnyị nya iGidiyọn, ká iSebulu ri olegbeju ọ-kpa du ẹrụ nyamwụ-ụ́? Anụ myị ẹrụ ha anyị nya ịHamọ ọlẹ kọ ri adịda ogogo nya ala iChekem mẹ.

²⁹Ang pyíì kam a ka kpa alụma nyanụ kụ ịlahị. Ịnọ m̀ ka tụ Abimẹlẹkị kịnyaa. M ka byoo[5] yẹkẹẹ, ‘Nwụla angịdẹwụ nyang nọ, ká kpehe wẹ ka dẹwụ mẹ.’ ”

³⁰Ụka ká iSebulu olegbeju nya epweji wo ẹlẹwẹ, ọ jwoo agbama lụmẹ.

³¹Ọ du ẹrụ ka byi Abimẹlẹkị a-Arụma yẹkẹẹ, “ỊGaalụ ọnyị nya Ebẹdị bala anyịnamwụ warị jam i-iChekem. Ị jam du alụma jung.

³²Lẹẹlẹ, ahụ bala angịnyị nyang, anụ-ụ wẹ kaka kpịbaa ẹ-ẹpwamẹ ju epweji chwẹẹ lodu mẹ.

³³Ahị pyẹ bwaaa lụka nya ẹnụ o-kpehe kpụ lẹ, anụ gba mịla epweji gbịram mẹ. Ó-ri ká ịGaalụ bala angịnyị nyamwụ-ụ́ kpehe jahị danụ lẹ, anụ haa ang myị ang kanụ ka jwaa họ mẹ!”

³⁴Ọọwa, Abimẹlẹkị bala angịnyị nyamwụ a hu ang lepwodu ka kpịbaa chahị ju iChekem lẹlẹ. Ị chụ awụlẹ kụ ebwo ine.

³⁵Ụka ká Abimẹlẹkị yẹ ịGaalụ kọ kpehe ka godayị rịrị ogirigba nya epweji, ị gba kpehe bwu ẹga kị kpụ ịbaa.

³⁶ỊGaalụ yẹ angịdẹwụ ịwẹ lẹ, ọ byi iSebulu yẹkẹẹ, “Yẹ, angịnyị wẹẹ hireji bwu achinege nya ịgbọdọ yahị danụ lẹ!” Ma, iSebulu wẹ byoo yẹkẹẹ, “Arụrụ nya ịgbọdọ a wẹẹ yẹ lẹ. Ị meng angịnyị ododu.”

³⁷ỊGaalụ tị myịmyị byoo yẹkẹẹ, “Yẹ mẹ, angịnyị lalẹẹ wẹ bwu ẹpwarịrị nya epweji. Ebwo nya angịnyị ọhẹ lalẹẹ bwu oye nya ùgboji nya ooku nya alegino warị!”

³⁸Ọọwa, iSebulu a byoo yẹkẹẹ, “Ọgọm ọchịchị nyang tị́ lee mẹ? Ahụ ká lẹẹ ya oowo nyaa tị́ ri Abimẹlẹkị ri kịịwa nyị ka myị ẹrụ họọ-ọ̀. Alẹng ịlẹ ká ju ẹpẹ, kpa hu utungguru a lẹẹ lẹlẹ. Kpehe kam ká mwẹla taa wẹ myị-ị̀ wẹ mẹ-ẹ̀!

³⁹Ọọwa, ịGaalụ a kpa ala iChekem kpehe kaka dẹwụ ta Abimẹlẹkị lẹlẹ.”

⁴⁰Abimẹlẹkị bala angịnyị nyamwụ ku ịGaalụ anyị. Ị họ iru nyaa lụmẹ-lụmẹ ang gbee ka ju ka ogirigba nya epweji.

⁴¹Abimẹlẹkị kụ a-Arụma. ISebulu ku ịGaalụ bala anyịnamwụ rụ bwu epweji nya iChekem, chajị kị ka kụ ụwa kịlahị kaka.

⁴²Ahị ọpyẹpyẹ ọọnamwụ, ala iChekem kpehe kị ka kele ka kụ ẹpwamẹ. Ụka ká Abimẹlẹkị wo ẹla ọọwa,

⁴³ọ chị angịnyị nyamwụ ebwo ịta yaa kpịbaa ẹ-ẹpwamẹ gbaa. Ọ yẹ angịnyị kị juwa kpehe bwu epweji lẹ, ọ gba mịlaa kọ ka nwaa lẹlẹ.

⁴⁴Abimẹlẹkị bala alebwo nyamwụ chị agaga kele ka kụ ogirigba o-bwu ka epweji. Alebwo imiiye ịkịla kele ka mwẹla ta angịlẹ kị kpịbaa ẹ-ẹpwamẹ, nwaa wuu.

⁴⁵Abimẹlẹkị bala angịnyị nyamwụ da alepweji ọwẹ ẹwụ ẹnụ ọọwa gbee da ka alobyi. Ọ nu epweji ọwẹ, nwụ alụwa lẹ, ọ nyi ịma hule-hule hụ ịpyị ẹga myị ẹga nya ụwa lẹlẹ.

⁴⁶Ụka ká alegbeju ị-kụ ịlahị ịlẹ kị juwa u-ube-oluhye nya iChekem wo ẹlẹwẹ, ị tụ ịlaa ka ju ẹ-ẹpwụ ogiri-giri ọhẹ nya ube nya ojiga ịBaalụ-iberiti.

⁴⁷Abimẹlẹkị wo ya alegbeju ilube-oluhye nya iChekem nyị tụguru ẹ-ẹgẹwẹ.

⁴⁸Ọọwa, ọ kele ka uhye nya Ọgbọdọ nya ịSalụmọn bala angịnyị nyamwụ lẹlẹ. Ọ hu eje o-be ọwụ lẹ, ọ chị ábwọ nya okoji, gyaa guru ịlọmwụ ụmwụchwọ lẹ, ọ byi angịnyị nyamwụ yẹkẹẹ, “Anụ chị agaga kanụ họ jaabwọ kam họ-ọ̀ wẹ ịnyịnyị mẹ.”

⁴⁹Ịnyị, ịwa wuu a chị ekeji kpa tụ Abimẹlẹkị da kele ka ba ube nya ohe ọọ rẹẹrẹẹrẹẹ lẹlẹ. Ị jụ ube-oluhye nya iChekem ọọwa ila la angịlẹ kị juwa ẹ-ẹpwụ nyamwụ wuu gbu. Alẹpwụ nyamwụ ịịwa wuu lala anyang bala alẹng angị ụnọ ookpokpo (1,000) lẹpwụ-lẹpwụ.

⁵⁰Ọọwa, Abimẹlẹkị a kele ka epweji nya ịTẹbẹsị lẹlẹ. Ọwa bala angịnyị nyamwụ dagaga ju epweji ọwẹ, dẹwụ kụrwọọ.

⁵¹Ube oluhye ọ-la giri-giri ọhẹ tị juwa e-epweji ọwẹ. Anyang bala alẹng, tụ alegbeju ịlụwa wuu rụnyẹ ka kpịbaa ụ-ụwa. Ị da ụgbẹyị chị ịlaa lẹ, ị kpụ uhye kele ka kụ ẹpwayịrẹtẹ nyamwụ lẹlẹ.

⁵²Abimẹlẹkị dịraa ka pwụ ube-oluhye ọwẹ kọ ka mwẹla taa. Ọ kele ka ọnang nya ube ọwẹ kọ ka jụ ube ila lẹ,

⁵³ọnyang ọhẹ a pẹhi igo o-go ang bwu uhye kaka mịlọọ e-egbeju, boo ogo nya egbeju ene bwòóo lẹlẹ.

⁵⁴Ọọwa, ọ wụrụ ọngọ dẹwụ ọlẹ kọ kpa ang-abwọ nya ẹwụ nyamwụ lẹ, ọ byoo yẹkẹẹ, “Gba oge nyang ká nwụm kpẹẹ mẹ. Ḿ tịtọ ká angịnyị ka kpa ya ọnyang-ọnyang nyaa nwụm am Abimẹlẹkị lẹ ka.” Lẹ, ọlẹng ọọwa a gwoo ẹma hurúm lẹ, ọ gbu lẹlẹ.

⁵⁵Ụka ká ala Isirẹlụ yẹ ká Abimẹlẹkị gbu lẹ, ọng myị ọng a rụ ka ẹpwa nya ịlọmwụ lẹlẹ.

⁵⁶Jaabwọ ká Ohe Oluhye wu Abimẹlẹkị uri chajị nya ang ọtịpyọ ọlẹ kọ họ ba adamwụ nyọlẹ kọ nwụ anyịnamwụ alẹng angị iwo irwiye a wẹ lẹlẹ.

⁵⁷Ọ́ ba ọọwẹ ka, Ohe Oluhye yẹ ala iChekem akama chajị nya ang onyobyi ọhọhọ nyaa ịnyịnyị. Ọwẹ ri ọ-họ jịra nya ọlọ ọlẹ ká iJotam ọnyị nya iGidiyọn ga jwaa.