Read idege 2 ỊJỌN 1 Bible Online

2 ỊJỌN 1 - idege bible

2 ỊJỌN 1

¹Am ịJọn olegbeju ọgbahị nya ịchọọchị a lẹẹ da ụpwụ ọlẹ du wang bala anyị nyang ahụ ịnanyị olihi ọlẹ ká Ohe Oluhye chụchụ lẹ. Anụ hám lụmẹ ẹ-ẹpwụ nya ẹla nya ịlẹhị. Ám ụbwọm kem, anụ há lụmẹ ịnyị ka. Ma, anụ há angị jẹ́ ẹla nya ịlẹhị ịkịla wuu ịnyịnyị.

²Anụ háahị ịnyị, chajị ẹla nya ịlẹhị ọlẹ kọ ji ẹpwụ nyahị lẹ, ẹla nya ịlẹhị ọọwa ka jam tahị pịyọọ gbee pwụ ụka myị́ ụka.

³Ká Ohe Oluhye Adịda bala iJisọsị ịKịrayịsị Ọnyẹwẹ nyamwụ a hu ọnahị bala ahyẹẹrwẹrwa bala okpunyi nyaa hụ tahị ẹ-ẹpwụ nya ẹla nya ịlẹhị bala ọháha ọlala nya Ohe Oluhye mẹ.

⁴M chị ọkẹkẹnị ọtụka lụmẹ ụka ọlẹ kam wo yẹkẹẹ, iru nya anyị nyang ịhyẹ nyị juwa hịhị ẹ-ẹpwụ nya ẹla nya ịlẹhị ọhọhọ, jaabwọ ká Ohe Oluhye Adịda dahị ehile ya, ahị nyị họ.

⁵Ayaya olihi nyam wo mẹ, e-ehile onyeewe, m lẹẹ da du wang ka. Ma, ehile ọlẹ ká Ohe Oluhye dahị bwu ọmwụ-ọmwụ ọdada ịnyị! Lẹ, aa chuchuu kahị juwa la ọháha ẹ-ẹga nya awụlẹ ịnyịnyịịnyị mẹ.

⁶Ang ọ-chị ọháha ọlala nyahị ẹ-ẹga nya Ohe Oluhye ehe ri ehile nyamwụ ọkpakpa jịra kpẹẹkpẹẹ. Chajị, ehile ọlẹ ká Ohe Oluhye danụ bwu ọmwụ ọdada ri yẹkẹẹ, anụ nyị juwa la ọháha ẹ-ẹpwụ nya ọhịhị nyanụ.

⁷M jam ya ala ịlẹ chajị iru nya angị hụ angịnyị ahị lụmẹ jam odehe lẹ. Angịịwa la ịlaa á myị kpong-kpong yẹkẹẹ, nyị ma iJisọsị ịKịrayịsị lala ọngịnyị ehe warị wẹ odehe ọlẹ ka. Ọngọ ya ịnyị aalẹ, ọngọ hụ angịnyị ahị bala oluji nya ịKịrayịsị ọngọọwa a ri lẹ.

⁸Anụ kpahị ju ịlọnụ yẹẹyẹẹ chajị ká uri nya ụkụrwọ oyeye nya ọngọngọhẹ nyahị ka gwọọ byi kaka mẹ. Ma, ọkọkọ nya ọọwa, ká ọng myị́ ọng ka ye uri nya ụkụrwọ nyamwụ jịra mẹ.

⁹Ọng myị́ ọng ọlẹ kọ juwa họ ang kpoye nya oyi nya ang ọmẹjẹ nya ịKịrayịsị, ọkọkọ nyọka juwa họ ba ọmẹjẹ nya ịKịrayịsị jẹ yẹẹyẹẹ aalẹ, ọngọọwa á la Ohe Oluhye ẹ-ẹpwụ nyamwụ kpong-kpong ka. Ma, ọng myị́ ọng ọlẹ kọ tị juwa ba ọmẹjẹ nya ịKịrayịsị jẹ aalẹ, ọngọọwa la Ohe Oluhye Adịda bala Ọnyẹwẹ nyamwụ lẹ.

¹⁰Ó ri ká ọngọngọhẹ á kpa ọmẹjẹ ọkịla warị wẹ ẹpwarịrị nyanụ dala ụma nya ọmẹjẹ nya ịKịrayịsị ayịdang aalẹ, anụ ye ọngọ ọlịnyị wẹ ẹpwa nyanụ ka lee ọ-da ọnụ chọọ kpong kpong ka.

¹¹Chajị, ọngọ da ọnụ chị ọngọ ọlịnyị ri ọngọ da ọlabwẹla onyobyi ọọwa ụbwọ ẹ-ẹpwụ nya ang onyobyi ọhọhọ nyamwụ lẹ.

¹²Ịnọ, m la ala lụmẹ ka ya jenu gụ ọlẹ wẹẹ, ma, ḿ tị ka daa da ju ụ-ụpwụ kaka. Chajị, m la ẹhị ọrịrịị-rịrị kam ka warị la ẹta nya ịlọm kaka ya ala ihihi tanụ la ọnụ nya ịlọm. Chajị ká ọkẹkẹnị ọchịchị nyahị ka jẹ́-ẹ jịra.

¹³Anyị nya ayahị ọọnang ọlẹgẹlẹ, ọlẹ ká Ohe Oluhye chụchụ, ya nyị da ọnụ chịng ha ịwa wuu mẹ. Amẹn.