Read idege 3 ỊJỌN 1 Bible Online

3 ỊJỌN 1 - idege bible

3 ỊJỌN 1

¹Am ịJọn olegbeju ọgbahị nya ịchọọchị a lẹẹ da ụpwụ ọlẹ du wang, ahụ ịGayọsị oligu nyam ọlẹ ká hám lụmẹ ẹ-ẹpwụ nya ẹla nya ịlẹhị lẹ.

²Ọngọ hám há, ịGayọsị, m jam raabwọ ká Ohe Oluhye ka họ ká ka kịlahị ẹ-ẹpwụ nya ang myị́ ang ọlẹ wuu ká juwa họ bala ọ-họ ká ka la ịnyịrọ ogogo ịnyịnyị. Chajị, m jẹ́ ká ugbodu okpukpuru ọlẹpwụ nyang há ene-ene lẹ.

³M chị ọkẹkẹnị ọtụka lụmẹ lụka ọlẹ ká angịnyị nya Ohe Oluhye aanahị ịhyẹ warị kaka ri ibeenu jehi nya ọchịla o-hu ọkịlẹtụ ha nyang ẹ-ẹpwụ nya ẹla nya ịlẹhị ọhọhọ bala jaabwọ ká juwa hịhị ba ẹla nya ịlẹhị kem jẹ ịnyịnyị.

⁴Ịngịngịhyẹ-ẹ́ẹ̀ kpụm ịpyọ gụ ọ-ka wo oja ya anyị nyam nyị juwa hịhị ba ẹla nya ịlẹhị jẹ kaka.

⁵ỊGayọsị, ọngọ hám há, ọ ri ang ọchịla o-hu ọkịlẹtụ ha ọhọhọ lụka ọlẹ ká juwa da angịnyị nya Ohe Oluhye aanang ịkịla ụbwọ. Ọgụgụ wuu ri, ụka ọlẹ ká angị ịlịnyị á ri angga ẹ-ẹpwarịrị nyanụ.

⁶Chajị angịhyẹ ịlẹ ká da ụbwọ ọlịnyị, dọmwụ warị kaka ri ibeenu je ala ịchọọchị ọlẹgẹlẹ chajị nya ọháha ọlala lụmẹ nyang. Lẹ, a ka ri ọngọ họ ang ọnyịịla kọ ri ká juwa da angị ịlịnyị ụbwọ ẹ-ẹpwụ nya ẹdịyẹ nyaa ịnyịnyịịnyị, jaabwọ kọ ka kpụ Ohe Oluhye ịpyọ kaka ba myi.

⁷Chajị, ị wẹẹ jẹdịyẹ nya ẹrụ ọnyịịla nya ịKịrayịsị lẹ, ị́ kaa ye ịngịngịhyẹ bwu ẹpwụtụbwọ nya angị jẹ́ Ohe Oluhye-ka lẹ ka.

⁸Chajị nya ọọwa lẹ, ọ chịla kaahị angị myịmyị ka juwa kpa ang ọlala nyahị da angịnyị ịlịnyị ụbwọ ịnyịnyịịnyị, chajị kahị tịtị ka ri alụkụrwọ taa ẹ-ẹpwụ nya ẹla nya ịlẹhị nya ẹrụ ọnyịịla ọ-kpa ya pyẹ ịnyịnyị.

⁹M da ụpwụ ọhẹ du wẹ ala ịchọọchị nyanụ lụka ọhẹ lẹ. Ma, jaabwọ ká ịDayọtirifisi ọwẹ kaa tịtọ kọ ka hu ịlọmwụ kụ ịlahị lụmẹ lẹ, ọ́ tịtọ kọ ka ye ẹla nyam ọọwa lala olegbeju nyamwụ kpong-kpong ka.

¹⁰Lẹ, ó ri kam warị myị́ aalẹ, m ka bwuru ang onyobyi ọhọhọ nyamwụ apwụ dodehe. Ọ́ ba ọọwẹ kem ka. Ọ́ myị ye anyadahị ẹ-ẹpwụ nya ịKịrayịsị ịlẹ kị ri angga yeye ka. Ọ tụtụm myịmyị juwa hu ala ịchọọchị ịkịla abwọ yẹkẹẹ, nyị ye angga ịlịnyị kpong-kpong ka ịnyịnyị. Ọ myịmyị juwa ku ala ịchọọchị ịlẹ wuu kị ye angga ịlịnyị rụ kpehe hi ịchọọchị ọọ-la ọọwa.

¹¹ỊGayọsị ọngọ hám há, a juwa gbịla ang onyobyi ọhọhọ ka. Abwẹla ọnyịịla ọhọhọ kem, a ka bajẹ lẹ. Ọngọlẹ kọ juwa họ abwẹla ọnyịịla a ri ọnyị nya Ohe Oluhye nya ịlẹhị lẹ. Ọngọlẹ kọ tị juwa họ abwẹla onyobyi aalẹ, ọngọọwa á kpẹhị nya olegu yẹ Ohe Oluhye lẹka gbanggbang.

¹²IDemitiriyọsị lẹ, ọng myị́ ọng kaa ya ẹla ọnyịịla nyamwụ lụmẹ. Ẹla nya ịlẹhị ayịdang dọmwụ ri ibeenu yẹkẹẹ, iDemitiriyọsị nyị la ọhịhị ọnyịịla ịnyịlẹhị. Ahị la ịlọhị ri ibeenu nyamwụ u-uhye nya ọọwa ịnyịnyị. Ahụ ayịdang tị jẹ́ ká ibeenu oriri nyahị ọọwa ri ẹla nya ịlẹhị.

¹³Ịnọ, m la ala lụmẹ ka ya gụ ọlẹ wẹẹ, ma, ḿ tị ka daa da ju ụ-ụpwụ kaka.

¹⁴Chajị, m la ẹhị ọrịrịị-rịrị kam ka warị la ẹta nya ịlọm ahyaahị kaka ya ala ihihi tang la ọnụ nyam ịGayọsị.

¹⁵Ká okpunyi nya Ohe Oluhye a juwa tang mẹ. Angịnyị nya Ohe Oluhye aligu nyang, ịlẹgẹlẹ wuu ya, nyị da ọnụ chịng ha ịwa. Aa da ọnụ chị angịnyị nya Ohe Oluhye aligu nyahị ịlịnyanụ ọngọhẹ ọngọhẹ hahị mẹ.