Read idege IJUDU 1 Bible Online

IJUDU 1 - idege bible

IJUDU 1

¹Am iJudu ọnchẹ nya iJisọsị ịKịrayịsị bala ọnyịnịna ọlẹng nya iJemsi a lẹẹ da ụpwụ ọlẹ lẹ. Am jam dọọ du wanụ anụ angịlẹ kanụ há Ohe Oluhye Adịda lụmẹ, kọ chụnụ ha ịlọmwụ, juwa kpanụ la ọngịrị nya iJisọsị ịKịrayịsị.

²Ká ahyẹẹrwẹrwa nya Ohe Oluhye bala okpunyi bala ọháha nyamwụ a juwa tanụ chọba-lọba mẹ.

³Anụ angịlẹ kanụ hám lụmẹ, ụka kam juwa me irya nya ịlẹhị-ịlẹhị jaabwọ kam ka bwu da ụpwụ du wanụ chajị nya ọchịda nya Ohe Oluhye ọlẹ kọ ya ha angịnyị ehe wuu lẹ, irya nyam byim yẹkẹẹ, am nyị da ụpwụ ọlẹ kaka junu ọhụ jaabwọ kanụ ka kpa ọmyịmyị ọlala nyanụ ma uya nya ọchịda ọọwa mẹ. Chajị Ohe Oluhye ayịdang chị ụgbẹyị nya ọmyịmyị ọlala ọọwa wuu ehe mẹjẹ angịnyị nyamwụ ụka ookpokpo jaabwọ kọ chịla kọ ka la pyịyọọ lẹ.

⁴Ma, angịhyẹ juwa kị juhi nya Ohe Oluhye ka, kị tị bawụlẹlẹ wẹ ẹpwụ nya ịchọọchị nya Ohe Oluhye kwiikwii. Ọọwa lẹ, angịịwa a wẹẹ pyị ẹrụ ọnyịịla nya ọnahị nya Ohe Oluhye anyoko chajị kị ka hi iwe ha ịlaa ẹ-ẹpwụ nya ịhọbịrị ịhọhọ nyaa lẹlẹ. Ịnyị, ị juwa pwa iJisọsị ịKịrayịsị ọmẹ kọọwa ụbwọọmwụ a ri Ayịbaba nyahị bala Ọngọlahị la kem rwarụ lẹlẹ. Ma, ị da ụ-Ụpwụ Ịgọgọ ene-ene nọ yẹkẹẹ, Ohe Oluhye nyị́ ka dayi la ọ-ya eje wu angị ịlịnyị pyii kaka.

⁵M jẹ́ kanụ jẹ́ oja ọlẹ yẹẹyẹẹ ene-ene lẹ. Ma, m tị jam kpụnụ ịtịya myịmyị lẹ. Ịnọ, Ọngọlahị Ohe Oluhye ayịdang a gba ala Isirẹlụ kpehe, kpaa rụ hi ọpyị nya Ijipiti lẹ. Ma, Ọngọlahị Ohe Oluhye ta angịhyẹ nyaa ayịreji u-ugbileji chajị nya ọmyịmyị ọlala-ka nyaa.

⁶Anụ kpịtịya mẹ, ụka ọlẹ ká alegu-ẹrụ nya Ohe Oluhye ịhyẹ pwa ihi ojuju, kị rụ hi iwe-ahụrụ ọlẹ ká Ohe Oluhye ya haa lẹ, Ohe Oluhye kpa alegu-ẹrụ ịịwa kaka ju agba e-ekpeleji nya ukpowu okpẹm-kpẹm gbee pwụ ẹnụtụrụ nya eje ọtụka nya Ohe Oluhye.

⁷Anụ kpịtịya nya oja nya ala ịSọdọm bala ala iGomora bala alepweji ịkịla ịlụwa wuu ịnyịnyị wẹẹ. Ohe Oluhye kpa ila taa ayịreji pyịyọọ chajị nya ụya ọhọhọ nyaa, tụ ọlẹ ká alẹng nyaa kaa họ ụya ta alẹng nyaa. Ọlịnyị, kọ ka ri ang o-ju ẹjẹẹ ha angịlẹ ká Ohe Oluhye ka kpa ila o-gbe oyi myị́ oyi nyamwụ yaa akama.

⁸Ịnyịnyị-ịnyịnyị, angịmẹjẹ ịnịịkịla ịwẹ a kaa chị ịnyịrọ nya ịlaa ịrị bwula ụya ọhọhọ lẹ, ị kaa yẹkẹẹ, nyị jaabwọ ká ụlaa ọlala nyịwa nyị byi ịwa, ya, ịwa nyị họ mẹ, nyaa wẹ lẹlẹ. Ị kaa pwa o-ji ekpeleji nya ọngịrị nya angị gwaa gụ. Ị kaa ya ala inyibyi rụ́ alegu-ẹrụ ilepwoohe ịnyịnyị.

⁹Ma, ụka ọlẹ ká olegbeju nya alegu-ẹrụ nya Ohe Oluhye ọlẹ kị wụrụ ịMayịkẹlụ bala Ohe Onyobyi juwa ju ogu nya iMosisi ju lẹ, ịMayịkẹlụ ọọwa á hu ịlọmwụ ka uhye, juwa ya eje wu Ohe Onyobyi kpong-kpong ka. Ọkọkọ nya ọọwa lẹ, ịMayịkẹlụ byoo yẹkẹẹ, Ohe Oluhye ayịdang nyaa ka yalibyi lang lẹ.

¹⁰Ma, angịmẹjẹ ịnịịkịla ịwẹ kaa ya ala inyibyi rụ́ ang myị́ ang ọlẹ kị jẹ́ myịmyị kpong-kpong ka. Ang ọlẹ kị jẹ́ ụbwọọmwụ ri ẹla ọ-họ wurum lala iyo ịlẹpwamẹ, jaabwọ ká irya nyaa á byaa ya nyị họ mẹ. Ma, ang ịịwa ịlẹ kị kaa họ wurum a ka kpa ayịreji ọtata wẹ uhye egbeju nyaa lẹ.

¹¹Angịwẹ ka ri enyi gu obyi, chajị nyọlẹ kị juwa ba ọgụ-ẹpẹtẹ onyobyi nya iKeen jẹ. Chajị angịwẹ juwa ba ọgụ-ẹpẹtẹ nya ang onyobyi ọhọhọ jẹ chajị kị ka la okpoko jaabwọ ká ịBẹlam họ lụka nyamwụ ịnyịnyị. I juwa la egbeju-ọngịrị ta alegbeju nyaa jaabwọ ká iKora họ lụka nyamwụ ịnyịnyị. Ịwa ayịdang ka ta ayịreji jaabwọ ká iKora ta ayịreji pyii ịnyịnyị.

¹²Ụka ká angịwẹ á juwa ri ang oriri tanụ e-epwedii nya ọjịra-jịra nyanụ anụ ala ịchọọchị, ị kaa kpa oyoyi wanụ bwula ụya ọyaya onyobyi ẹ-ẹpwụ nya uhi nya Ohe Oluhye ojuju-ka nyaa. Ang nya ịlaa kem a kaa háa lẹ. Ịwa ayịdang á ju apyobwuna ka, lala egbamwụ nya enyi onyinyi ọlẹ ká igbachịwụ kaa nyi epepe, du ká enyi kaa do kaka. Í ju apyobwuna ka, lala ekeji ị-nwụ́ egbe ọlẹ kị kaa pwa egbe ọnwụnwụ lụka nyaa. Ịwa ayịdang á ju apyobwuna ka, lala okoji ọlẹ kọ gbugbu, ma gbu, kọ hu latẹ-latẹ daarụ lẹ.

¹³Ọhịhị nyaa ịwa ayịdang á la kpakpa ka, jaabwọ ká igbachịwụ ọtụka kaa gu ihu ọtụka gbaagbaagbaa. Ang onyobyi ọhọhọ nyaa kaa chị ehe ị-ịlahị nya aluche jaabwọ ká angịnyị kaa jẹ́-ẹ yẹ awụụ nya enyi ọlẹ kọ myị lụmẹ. Ịwa ayịdang lala ịdịchụ ịlẹ kị juwa gagaga, kị la iwe-ahụrụ ọhẹ-lọhẹ datị kaka. Ẹpwa nyaa ọlẹ ká Ohe Oluhye nwụlanọ gbaa ri ukpowu okpem-kpem o-gbe oyi myị́ oyi.

¹⁴U-uhye nya angị ịlịịwẹ kpangga, Ịnọkụ ọlẹ kọ ri ọngọhẹ lẹpwụ nya alogu ọharwiye bwu ụka nya Adam, a yẹ ọmwụ neeji ene-ene lẹẹ lẹ. Ịnọkụ yẹkẹẹ, “Anụ yẹ mẹ! Ọngọlahị juwa ka warị bala ụnọ ukuku nya angị ịgọgọ nyamwụ.

¹⁵Ọ juwa warị kaka la ọng myị́ ọng wuu eje. Chajị kọ ka ya eje wu angị inyibyi u-uhye nya ang inyibyi ịhọhọ nyaa wuu, ịlẹ kị họ la ụgbẹyị onyobyi nyaa bala u-uhye nya ala inyibyi nyaa ịlẹ wuu ká alọhọbịrị ịịwa kpa ọnụ nyaa ya rụ́ Ohe Oluhye wuu.”

¹⁶Angị inyibyi ịwẹ ri angị mwọ ala ya. I ri angị kpụ angị ịkịla abyị nya ẹla lụmẹ. I ri ọnyọhị nya ang myị́ ang ọlẹ ká imyi nya ugbinyịrọ nyaa a byaa ya, nyị họ mẹ. I ri alọbọọchẹ ịlẹ kị kaa chị ogu lụmẹ ụka wuu. Ị kaa kpa ẹlẹlẹ ọgẹnẹ-gẹnẹ pịrị angịkịla ju chajị kị ka jẹ́-ẹ ri angịịwa apyobwuna.

¹⁷Anụ aligu nyam ịlẹ kanụ hám, anụ kpịtịya nya ẹla ọlẹ ká angị myị ẹrụ nya Ọngọlahị iJisọsị ịKịrayịsị ya jenu mẹ.

¹⁸Ụka juwa warị ị-ịlahị ká angị inyibyi ka juwa kpanụ anụ angịnyị nya Ohe Oluhye họ. Jaabwọ kị ri angịnyị nya Ohe Oluhye ka lẹ, ị kaa ba imyi nya ịnyịrọ ọlẹpwụ nyaa kem jẹ.

¹⁹Ụma nya angị ịlịịwẹ a ri angịlẹ kị kaa kpa ebwo ọchịchị wẹ ẹpwarịrị nya angịnyị nya Ohe Oluhye lẹ. Jaabwọ kịịwa ayịdang á la Olegu nya Ohe Oluhye ẹ-ẹpwụ nyaa ka lẹ, irya nya ugbinyịrọ ọlẹpwụ nyaa kem, a kaa kpaa họ ang myị́ ang nyaa wuu lẹ.

²⁰Ma, anụ aligu nyam ịlẹ kanụ hám, anụ juwa maga kanụ kpa awụlẹ nwa kịlahị-ịlahị ẹ-ẹpwụ nya ẹrụ ọnyịịla ọlịgọgọ nya Ohe Oluhye ọlẹ kanụ myị la ịnyịnyịịnyị mẹ. Kanụ juwa kpa ọngịrị nya Olegu Ịgọgọ raabwọ ha Ohe Oluhye ịnyịnyị mẹ.

²¹Anụ cheri kanụ godayị rịrị giri-giri ẹ-ẹpwụ nya ọháha ọlala nya Ohe Oluhye pyịyọọ kịlahị-ịlahị jaabwọ kanụ wẹẹ godayị gbe ụka ọlẹ kanụ ka ye ọhịhị ọmyịmyị-ka ọlẹ ká Ọngọlahị iJisọsị ịKịrayịsị Ọngịnyị nya ahyẹẹrwẹrwa myị ọnụ hanụ mẹ.

²²Anụ maga kanụ juwa kpa irya ahyẹẹrwẹrwa da ẹla nya ịlẹhị wụlẹ ya je angịlẹ kị juwa da ịwẹẹ ẹ-ẹpwụ ọkịlẹtụ nyaa yẹẹyẹẹ mẹ.

²³Anụ maga chajị kanụ ka gba angịlẹ kị juwa ba ụgbẹyị nya ila nya ejegu jẹ, kpehe chajị ká angịhyẹ nyaa ka be mẹ. Anụ́-ụ la ọkịlẹtụ ahyẹẹrwẹrwa ẹ-ẹga nya alọhọbịrị mẹ. Ma, anụ́-ụ họ ịnyị ẹ-ẹpwụ nya uhi nya Ohe Oluhye ojuju, chajị kanụ ka jẹ́-ẹ cheji ba ụgbẹyị myị́ ụgbẹyị nya ang inyibyi ịhọhọ nyaa wuu mẹ.

²⁴Ogbo wuu a juwa ha Ohe Oluhye, ọlẹ kọ ri Ọngọ la ọngịrị ka họ kanụ ka godayị rịrị họọ pyịyọọ, gbee pwụ ụka ọlẹ kọ ka kpanụ kaka godayị la ọkẹkẹnị ọtụka-ọtụka i-ijata ẹbyẹbyị nyamwụ la abyị ọkpụkpụ ka mẹ.

²⁵Ogbo wuu bala ihi ọlala ọtụka bala ọngịrị bala ụmụmẹ ọlala wuu a juwa ha Ohe Oluhye Agụgụ ọlẹ kọọwa ụbwọọmwụ a ri Ọngọchịda nyahị bwula Ọngọlahị iJisọsị ịKịrayịsị mẹ. Ogbo ọlẹ kọ juwa họọ ene-ene bala ogbo ọlẹ kọ jam họọ lẹẹlẹẹ lẹ, ogbo ọọwa ka juwa họọ pyịyọọ pwụ ụka myị́ ụka. Amẹn.