Read idege ỌWỤRỤỤ-WỤRỤ 10 Bible Online

ỌWỤRỤỤ-WỤRỤ 10 - idege bible

ỌWỤRỤỤ-WỤRỤ 10

¹Ịnyị, am ịJọn a chẹhị kaka yẹ olegu-ẹrụ ọtụka-ọtụka ọhẹ kọ juwa chabwọ bwu epwoohe hireji lẹlẹ. Ị kpa egbamwụ daba rọọ wuu mẹnẹ-mẹnẹ. Ọwọ ọhẹ chị dọgịlẹ ju egbeju nyamwụ. Ahị nyamwụ lala ẹnụ ọchịchị. Ata nyamwụ lala ipila nya ube ịtụka-ịtụka ịlẹ kị kpa ila-ila me.

²Olegu-ẹrụ ọọwa kpa ụpwụ nya ugba ọlẹ kị wawa lala ọba ochiche-ochiche ọhẹ kọ wụrụ kpa ụ-ụbwọ nyamwụ. Ọ ya ẹta upwuriri nyamwụ rịrị ẹ-ẹpwụ nya ihu ọtụka-ọtụka lẹ, ọ ya ẹta ụpụpịla rịrị ọ-ọpyị ọlam-ọlam lẹlẹ.

³Ọọwa lẹ, ọ ya ẹla lomyi ọtụka gboo lala omyi nya ugẹbẹ ọlẹ kọ juwa warụ lẹlẹ. Ịnyị, ụka kọ ya ẹla ọọwa gboo lẹ, omyi nya ịkata ọkpụkpụ nya ịkpala irwiye ịhyẹ a kpụ gbirong lẹlẹ.

⁴Ụka ká omyi nya ịkata nya ịkpala irwiye ịịwa kpụ gbirong ịnyị lẹ, ịnọ, m juwa tịtọ kam ka da ẹla ọọwa ju ụ-ụpwụ. Ma, ụka ọọwa, m wo ká omyi ọhẹ bwu epwoohe juwa ya ẹla tam yẹkẹẹ, “ỊJọn, a da omyi ẹla ọlẹ ká ịkpala irwiye ịwẹ ya wẹ ju ụ-ụpwụ kpong-kpong ka. Aa kpụ ala ịịwa ịbaa kpịrẹ-kpịrẹ mẹ.”

⁵Ọọwa lẹ, olegu-ẹrụ ọọwa ọlẹ kam yẹ kọ ya ẹta ọhẹ rịrị ẹ-ẹpwụ nya ihu ọtụka-ọtụka, ká ẹta ọkịla nyamwụ rịrị ọ-ọpyị ọlam-ọlam, a nịra upwuriri nyamwụ kpaa kele ka epwoohe lẹlẹ.

⁶Ọọwa lẹ, olegu-ẹrụ ọọwa a juwa kpa ẹnyị nya Ohe Oluhye Ọngọlẹ kọ juwa hịhị pyịyọọ gbe oyi myị́ oyi bala Ọwa Ọngọlẹ kọ họ epwoohe bala ang myị́ ang ịlẹ kị juwa ẹ-ẹpwụ nyaa bala Ọwa Ọngọlẹ kọ họ odehe bala ang myị́ ang ịlẹ kị juwa ẹ-ẹpwụ nyaa bala Ọwa Ọngọ họ ihu ịtụka bala ang myị́ ang ịlẹ kị juwa ẹ-ẹpwụ nyaa wuu, juwa nwa iro kpa ẹla ya dodehe yẹkẹẹ, “Ụka ọbịrịị-bịrị á ka ji kokoo!

⁷Ma, ẹnụtụrụ ịlẹ ká opyike ohihi ka chị kpehe bwu ọnụ nya olegu-ẹrụ ọharwiye lẹ aalẹ, ang ọlẹbyẹbyị ọkpịbaa nya Ohe Oluhye ọlẹ kọọwa ayịdang kpa anchẹ alọmwụ nyamwụ ya dodehe ene-ene wuu, a ka họ jịra lẹlẹ.”

⁸Ịnyị lẹ, omyi ọlẹ kọ ya ẹla tam bwu epwoohe ene, a myịmyị ya ẹla tam yẹkẹẹ, “ỊJọn, kele kaka ye ụpwụ nya ugba ọlẹ kọ wụrụ lalẹ bwu ụbwọ nya olegu-ẹrụ ọlẹ kọ ya ẹta nyamwụ ọhẹ rịrị ẹ-ẹpwụ nya ihu ọtụka bala ọ-ya ọkịla rịrị ị-ịpyị lalẹ mẹ.”

⁹Ọọwa lẹ, m kele ka ẹga nya olegu-ẹrụ ọọwa lẹ, m byọọ yẹkẹẹ, “Ya ụpwụ nya ugba ochiche ọwẹ ham mẹ!” Ọọwa lẹ, ọ wẹ byim yẹkẹẹ, “Ye ká ya ri mẹ. Ụka ká ryọọ, ọ ka lang ujujwo ẹ-ẹpwụ nya igbeene nyang. Ma, ọ tị ka lang ịpyọ ẹ-ẹpwụ ọnụ nyang lala inwa.”

¹⁰Ọọwa lẹ, m ye ụpwụ nya ugba ochiche ọọwa ọlẹ kị waba lala ọba bwu ụbwọ nya olegu-ẹrụ ọọwa lẹ, m ya ri lẹlẹ. Ụpwụ ọọwa la ịpyọ lala inwa ẹ-ẹpwụ ọnụ nyam. Ma, ụka kam tị milọọ kọ pwụ ẹpwụ lẹ, ọ la ujujwo nya ịlẹhị-ịlẹhị ẹ-ẹpwụ nya igbeene nyam lẹlẹ.

¹¹Ọọwa lẹ, ị byim yẹkẹẹ, “Lẹẹlẹẹ lẹ, a ka myịmyị-ị̀ yẹ ọmwụ nya ẹla nya Ohe Oluhye dodehe pyii, chajị nya iru nya angịnyị ehe lụmẹ-lụmẹ bala epwoja lụmẹ-lụmẹ bala alija lụmẹ-lụmẹ bala iru nya ịdịrịhụ lụmẹ-lụmẹ ịnyịnyị lẹ.”