Read idege ỌWỤRỤỤ-WỤRỤ 11 Bible Online

ỌWỤRỤỤ-WỤRỤ 11 - idege bible

ỌWỤRỤỤ-WỤRỤ 11

¹Ịnyị lẹ, ị hu ọgọdọ ọ-kpa me ang ori, ọlẹ kọ lala ọkụta ọ-kpa cheji jum ụ-ụbwọ lẹ, ị byim yẹkẹẹ, “ỊJọn, wuleji ká kele kaka me ube ịgọgọ ọtụka nya Ohe Oluhye ori bala ogidi ọkịla iya ha Ohe Oluhye ọlụwa bala ọ-jẹ́ iru ojuju nya angịlẹ kị juwa gbịgba ha Ohe Oluhye ụ-ụwa ịnyịnyị mẹ.

²Ma, a tị me ori nya ọdọda ogbooloo olodehe nya ube ịgọgọ ọtụka nya Ohe Oluhye ọọwa ka. Aa tụụbwọ hi ọọwa deeji mẹ. Chajị, ị tụụbwọ hi ọọwa dụwa ha ala iJentayịlị, angị jẹ́ Ohe Oluhye-ka. Ọọwa lẹ, ala iJentayịlị ịịwa a ka juwa ju epweji ọlịgọgọ ọwẹ ẹpẹpẹ, juwa gọọ beji pyẹẹpyẹẹ lala ịya iwoine kụrụ imiiye gbẹgbịlẹgbẹ lẹlẹ.

³Ọọwa lẹ, Am Ohe Oluhye a ka ya ọngịrị ha angị imiiye ịlẹ kị ri alibeenu nyam kị kụrụ awụrụ nya owuru ọkpakpa, kị ka kele kaka juwa yẹ ọmwụ dodehe ha angịnyị ehe lala ahị ọpyẹpyẹ ụnọ ịta da ahị ọpyẹpyẹ ohu ịta chiriri lẹpwụ-lẹpwụ lẹlẹ.”

⁴Angị imiiye ịịwa a ku ọmwakpa nya ọmwụ nya ekeji olivu imiiye bala ang ọ-ya otinika rịrị imiiye ịlẹ kị godayị rịrị ụ-ụwa ị-ịlahị nya Ọngọlahị Ọngọ la odehe ọlẹ wuu lẹlẹ.

⁵Ụka myị́ ụka ká angịnyị á juwa maga nyọka họ angị imiiye ịịwa abwaabwọhẹ lẹ, ila a kaa gba kpehe bwu ẹpwụ ọnụ nya angị imiiye ịịwa kaka rụ aluji ịịwa lẹlẹ. Ụka myị́ ụka ká ọngịnyị ehe á juwa maga nyọka họ angịnyị imiiye ịwẹ ịngịngịhyẹ lẹ aalẹ, ayịreji ọtata nya igu ogbugbu á ka dayi la o-ri ịnya angịịwa kaka.

⁶Angị imiiye ịịwa la ọngịrị ka byi egbamwụ oluhye-ọgba yẹkẹẹ, nyị do enyi kpong-kpong kaka, la ẹnụtụrụ nya ọmwụ ọyẹyẹ dodehe nyaa ịịwa wuu gbanggbang. Ị myịmyị la ọngịrị ka byi-enyi ịlẹpwụ nya ịba yẹkẹẹ, nyị yẹ la ịwọ mẹ, ị tị ka họ ịnyị ịnyịlẹhị. Ị la ọngịrị ka byi ẹdụrụ ọnyị myị ọnyị wuu ọlẹ kọ háa yẹkẹẹ, nyị kpehe kaka jụ angịnyị ehe ilodehe ọlẹ mẹ myị́, lụka myị́ ụka ọlẹ kọ baa kị ka họ ịnyị myị́ kaka ba.

⁷Ụka ká angị imiiye ịịwa á ri ibeenu ọọwa dodehe kpá jịra lẹ, iyo ọhẹ a ka gba kpehe bwu ẹpwụ nya ụjẹ ọ-la ọbaba-ka ọọwa kele kaka dẹwụ ta angị imiiye ịịwa lẹ, ọ ka kụrụ angị imiiye ịịwa, nwaa chị ụ-ụwa lẹlẹ.

⁸Ọọwa lẹ, egu nya angị imiiye ịịwa a ka chị ụ-ụwa i-ikpọdọda nya epweji ọtụka ọlẹ ká ẹnyị nya odolowu nya epweji ọọwa ri ịSọdọm bala Ijipiti lẹlẹ. E-epweji ọọwa, ị gu Ọngọlahị ọlẹ kọ ri Ayịbaba nya angịịwa iloo ba okoji lẹ.

⁹Ị tụụbwọ hi egu nya angị imiiye ịịwa chị ụ-ụwa lala ụtụrụ ịta ba ẹhya lẹpwụ-lẹpwụ. Ọọwa lẹ, angịnyị ehe la datị-datị bala alụpwọma la datị-datị bala aloja la datị-datị bala alepwoja la datị-datị, a juwa kele kaka mwụụrụ yẹ egu nya angịịwa lẹlẹ. Chajị, ị́ myị go egu nyaa kpa kaka ju eji kpong-kpong ka.

¹⁰Ọọwa lẹ, angịlẹ kị juwa odehe wuu a ka juwa chị ọkẹkẹnị ọtụka-ọtụka, ka juwa hu ang ga ha awụlẹ. Chajị nya igu ogbugbu nya alọmwụ imiiye ịịwa lẹlẹ. Ang odudu nya ọọwa ri yẹkẹẹ, alọmwụ imiiye ịịwa ri ang ọjụjụ ha alodehe ọlẹ lụmẹ lụka kị juwa la ọhịhị wẹẹ.

¹¹Ma, ụka ká ahị ọpyẹpyẹ ịta ba ẹhya ọọwa chịpwụrụ kam kpá lẹ, Ohe Oluhye a da ịhụ nya ọhịhị ju egu nya angị imiiye ịịwa lẹ, ị chị ahị bwula igu, wuleji godayị kọkọ, juwa hịhị myịmyị lẹlẹ. Ịnyị, uhi ọtụka-ọtụka a juwa ju angịlẹ wuu kị kpẹhị nya ịlaa yaa lẹlẹ.

¹²Ọọwa lẹ, alọmwụ imiiye ịịwa a wo omyi ọhẹ kọ juwa ya ẹla bwu epwoohe gboo byaa yẹkẹẹ, “Anụ kpụ uhye warị wẹ ẹgẹlẹ mẹ.” Ọọwa lẹ, aluji nya angị imiiye ịịwa a juwa mwụụrụ yaa lụka ọlẹ kị juwa rụ kele ka epwoohe bwu ẹpwụ nya egbamwụ lahị-lahị lẹlẹ.

¹³Ịnyị, ọpyị ọ-hụ́ kpákpakpa ọtụka-ọtụka a kpeji ụ-ụwa lụka nya awa ọọwa lẹ, ebwo ọhẹ ẹ-ẹpwụ nya ebwo iwo chiriri nya epweji ọọwa a ta ayịreji gbanggbang lẹlẹ. Chajị, ọpyị ọ-hụ́ kpákpakpa ọọwa nwụ angịnyị lala angị ụnọ iwo kụrụ irwiye da angịnyị angị ohu iwo chiriri. Ọọwa lẹ, uhi ọtụka-ọtụka a ju angị ihihi lẹ, ị juwa gwogbo ha Ohe Oluhye olepwoohe lẹlẹ.

¹⁴Ebwo nya akama ọtụka oheeye chịpwụrụ lẹ. Akama ọtụka ọlịnyịnyị ọhata a hi, kọ ka pwụ eji ahyaahị lẹlẹ.

¹⁵Ịnyị, olegu-ẹrụ ọharwiye a chị opyike nyamwụ lẹ, iru nya omyi lụmẹ-lụmẹ a juwa ya ẹla gboo bwu epwoohe yẹkẹẹ, “Ịpyị adịrahụ ilodehe ọlẹ wuu lẹẹlẹẹ ri ịpyị Adịrahụ nya Ọngọlahị Ohe Oluhye bala ịnya ịKịrayịsị nyamwụ lẹ. Ọwa-à tị ka ri Adịrahụ o-gbe oyi myị́ oyi ọpyịyọọ lẹlẹ.”

¹⁶Ọọwa lẹ, ịgabwọ angị ohu kụrụ ine ịlẹ kị hụhụ u-uhye nya ẹchị adịrahụ nyaa ị-ịlahị nya Ohe Oluhye a hiri kpẹẹ, ya ahị nyaa kụrụ eji lẹ, ị juwa gbịgba ha Ohe Oluhye ụ-ụwa lẹlẹ.

¹⁷I juwa yẹkẹẹ, “Ahụ Ọngọlahị Ohe Oluhye Agụgụ ọtụka ọlẹ ká juwa hịhị lẹẹlẹẹ, jaabwọ ká la ọhịhị nyang ọọwa ene-ene bwu edede, ahị jing obe chajị nyọlẹ ká wẹẹ kpa ọngịrị ọtụka-ọtụka nyang dọmwụ nya eji ogbegbe lala adịrahụ lẹẹlẹẹ lẹ.

¹⁸Ịnọ, ọ ri nya ịlẹhị, alepwoja la datị-datị ilodehe ọlẹ wụ ẹjẹ jahị dang lụmẹ. Ma, ụka nya ọ-chị agbama nyang ehe tị pwụ eji lẹ. Ụka ọlẹ ká tị ka kpa la angị gbugbu wuu eje ịnyịnyị tị pwụ lẹ. Ụka ọlẹ kaahụ Ohe Oluhye tị ka kpa nwụ anchẹ nyang wuu uri, tụ alọmwụ nyang wuu bala angị ịgọgọ nyang wuu, bala angịlẹ wuu kị kaa juhi nyang, Ahụ Ohe Oluhye, tụ angị ichiche bala angị ịtụka wuu, uri nya ụkụrwọ nyaa tị pwụ eji ịnyịnyị lẹ. Angịlẹ wuu kị tị jam ta ụkụrwọ nyang, Ahụ Ohe Oluhye ayịreji odehe ọlẹ wuu lẹ, ụka ọlẹ ká tị ka kpa ta angịịwa ayịreji kwiwa, tị pwụ eji ịnyịnyị lẹ.”

¹⁹Ịnyị lẹ, ị wụrụ ube ịgọgọ ọtụka nya Ohe Oluhye olepwoohe da dodo lẹlẹ. Ọọwa lẹ, angịnyị a jẹ́ juwa yẹ Akpa nya Iro nya Ohe Oluhye ọlẹ kọ juwa ẹ-ẹpwụ nya ube ịgọgọ ọtụka ọọwa myị́ lẹlẹ. Ụka ọọwa, apya juwa chị manya-manya nya ịlẹhị-ịlẹhị. Iru nya omyi lụmẹ-lụmẹ juwa ya ẹla ụ-ụwa ịnyịnyị. Ịkata nya ịkpala juwa kpụ nya ịlẹhị-ịlẹhị ụ-ụwa. Ịpyị juwa hụ́ kpákpakpa ọtụka-ọtụka. Ọọwa lẹ, ekpawẹ idodo a juwa do ọtụka-ọtụka ụ-ụwa ịnyịnyị lẹlẹ.