Read idege ỌWỤRỤỤ-WỤRỤ 12 Bible Online

ỌWỤRỤỤ-WỤRỤ 12 - idege bible

ỌWỤRỤỤ-WỤRỤ 12

¹Ịnyị, ang o-ju ẹjẹẹ ọtụka ọlẹbyẹbyị ọhẹ a hi ehe u-uhye-ọgba nya epwoohe lẹlẹ. Ang ọlẹbyẹbyị ọọwa ri ọnyang. Ọnyang ọọwa da ẹnụ oluhye-ọgba ọwẹ kụrụ nya apwụ oduru-duru nyamwụ. Ọya oluhye-ọgba ọwẹ juwa e-ekpeleji nya apatẹ nyamwụ. Okpo ọkụrụ egbeju nya adịrahụ ọhẹ ọlẹ kọ la ịdịchụ iwo kụrụ imiiye, ọnyang ọọwa, a ya kụrụ egbeju nyamwụ lẹ.

²Ọọwa lẹ, ọ jẹnyị lẹ, ang nya ọnyị ọmama a juwa họọ lụka kọ juwa ka ma ọnyị lẹ, ọ juwa chị eko nya ịlẹhị-ịlẹhị ọọ-la ọọwa lẹlẹ.

³Ọọwa lẹ, m yẹ ang o-ju ẹjẹẹ ọlẹbyẹbyị ọkịla ọhẹ kọ hi ehe u-uhye-ọgba nya epwoohe ịnyịnyị lẹlẹ. Ang ọọwa a ri ụma nya ukpilo nya iyo ọtụka-ọtụka ọnyọmịla ọhẹ ọlẹ kị wụrụ “ịdịragọn” lẹ. Ọ ju egbeju irwiye. Ọ bwu achụ iwo chiriri u-uhye nya egbeju nyamwụ irwiye ịịwa. Ọ kụrụ okpo nya adịrahụ irwiye u-uhye nya egbeju nyamwụ irwiye ịịwa ịnyịnyị.

⁴Ọgbẹ-ọkọọhụ nyamwụ chị ebwo ọhẹ ẹ-ẹpwụ nya ebwo ịta nya ịdịchụ iluhye-ọgba wuu abwọ kaka mileji odehe ọlẹ. Ọọwa lẹ, iyo ịdịragọn ọwẹ a kele kaka godayị rịrị chị ahị ju ọnyang ọwẹ kọọ wẹẹ kpa ọnyị ma, chajị kọ ka hu ọnyị ọọwa ri ahyaahị ká ọnyang ọwẹ, á ma ọnyị ọọwa kpehe kpa bwaaa lẹlẹ.

⁵Ịnyị, ọnyang ọọwa a ma ọnyị ọlẹng kpehe lẹlẹ. Ọnyị ọọwa a ri ọngọlẹ kọ ka ri adịrahụ ọ-ka kpa ọkụta nya oje-oje gbe alụpwọma myị́ ụpwọma ilodehe ọlẹ wuu lẹlẹ. Ma, ị tị hu ọnyị ọọwa bala ẹchị adịrahụ nyamwụ kpa rụ kele ka uhye, kele ka ẹga nya Ohe Oluhye.

⁶Ịnyị, ọnyang ọ-ma ọnyị ọọwa a rụnyẹ rụ kele ka ugbileji ọhẹ ọlẹ ká Ohe Oluhye nwụlanọ gbọọ ene-ene lẹ, ị juwa kpọọ la ang oriri ụ-ụwa lala ahị ọpyẹpyẹ ụnọ ịta da ahị ọpyẹpyẹ ohu ịta chiriri lẹlẹ.

⁷Ọọwa lẹ, ẹwụ ọdada a kpeji ụ-ụwa e-epwoohe lẹ, ịMayịkẹlụ bala alegu-ẹrụ ilekpeleji nyamwụ, a juwa dẹwụ tụ ịdịragọn ọọwa pyịpyị lẹ, ịdịragọn bala alegu-ẹrụ ilekpeleji nyamwụ ọwa, a tịtị juwa dẹwụ taa ịnyịnyị lẹlẹ.

⁸Ma, ị tị kụrụ ịdịragọn bala angịnyị nyamwụ. Ọọwa lẹ, ẹgẹgẹhẹ a hi juwa haa e-epwoohe kị ka kụ kaka lẹlẹ.

⁹Ịnyị lẹ, ị ku iyo onyobyi ọtụka ọọwa ọlẹ kị wụrụ ịdịragọn ọwẹ, chabwọ bwu epwoohe da weji lẹlẹ. Ịdịragọn ọọwa a ri ilo onyogo ọlẹ kị wụrụ olegu onyobyi bala Ohe Onyobyi ọlẹ kọ ri ọngọ pịrị alodehe ọlẹ wuu ju lẹ. Ịnyị, ị chị ịdịragọn ọọwa abwọ bwu uhye da warị wẹ odehe ọlẹ bala alegu-ẹrụ nyamwụ ịnyịnyị lẹlẹ.

¹⁰Ọọwa lẹ, m wo omyi ọhẹ kọ juwa ya ẹla gboo e-epwoohe yẹkẹẹ, “Lẹẹlẹẹ lẹ, ọchịda bala ọngịrị bala ịpyị Adịrahụ nya Ohe Oluhye nyahị bala ọngịrị nya ịKịrayịsị nyamwụ pwụ eji ugbẹnyị lẹ. Chajị, ọngọlẹ kọ kaa chị ala ba anyadahị ẹ-ẹpwụ nya ịKịrayịsị lẹ, ị chọọ abwọ bwu epwoohe da ka odehe lẹ. Ịnọ, ọwa a ri ọngọlẹ kọ kaa kele kaka wụrụ anyadahị ịịwa eje ị-ịlahị nya Ohe Oluhye nyahị, lodu bala alẹnụ ịnyịnyịịnyị ene-ene lẹ.

¹¹Anyadahị ịịwa tị kpa ọngịrị ọlẹpwụ nya ịwọ nya Ọnyị ọkpịlọ nya Ohe Oluhye ọọwa bala ọ-kpa ẹla nya ibeenu ọlọnụ nyaa kụrụ Ohe Onyobyi ọọwa lẹ. Chajị, ọhịhị nya ịlaa ịwa ayịdang á kaa ẹhị o-oluhye nya ẹla nya Ohe Oluhye kpong-kpong ka gbee, pwụ igu.

¹²Chajị nya ọọwa lẹ, epwoohe wuu bala anụ angịlẹ kanụ juwa ụ-ụwa, anụ́-ụ juwa chị ọkẹkẹnị nya ịlẹhị-ịlẹhị mẹ. Ma, ahụ odehe ọlẹ bala ihu ịtụka ilodehe ọlẹ, anụ ri enyi gu obyi lẹ, chajị olegu onyobyi hireji warị la agbama nyamwụ ọtụka-ọtụka lẹ! Chajị, ọwa ayịdang jẹ́ yẹkẹẹ, ụka nya ayịreji ọtata nya ọọwa nyị hi kpii lụmẹ lẹ.”

¹³Ụka ká ịdịragọn ọọwa jẹ́ yẹkẹẹ, nyị chị ọwa abwọ da warị wẹ odehe ịnyị lẹ, ọ juwa ku ọnyang ọọwa ọlẹ kọ ma ọnyị ọlẹng ọwẹ nya ịlẹhị-ịlẹhị lẹlẹ.

¹⁴Ma, ị tị ya achwọ imiiye ị-lala achwọ nya idu ọtụka-ọtụka họọ, chajị kọ ka jẹ́-ẹ kpa hụ rụ ka uhye-ọgba hi ilo ọọwa, rụ kele ka ugbileji, kele ka ẹga ọlẹ kị ka jẹ́-ẹ juwa kpọọ la ang oriri lala ẹka ịta ba ehya gbẹgbịlẹ lẹlẹ.

¹⁵Ọọwa lẹ, ilo ọọwa a juwa mwụ enyi ọtụka-ọtụka bwu ọnụ nyamwụ lala ihu ọlẹ kọ juwa ku ọnyang ọọwa, chajị kọ ka juwa mwọọ, gbee, ká enyi nya Ihu ọọwa ka wu ọnyang ọọwa.

¹⁶Ma, ịpyị tị kele kaka da ọnyang ọọwa ụbwọ bwula ọ-pyẹ ọnụ nyamwụ maa lẹ, ọ wu enyi nya ihu ọtụka ọọwa ọlẹ kọ kpehe bwu ẹpwụ ọnụ nya ilo onyobyi ọọwa mile taa, hi ọnyang ọọwa lẹlẹ.

¹⁷Ịnyị, ịdịragọn ọọwa a juwa wụ ẹjẹ ta ọnyang ọọwa lẹ, ọ kele kaka dẹwụ ta anyị ihihi nya ọnyang ọwẹ wuu tụ angịlẹ wuu kị juwa kpa ehile nya Ohe Oluhye họ ụkụrwọ bala o-juwa ri ibeenu nya iJisọsị lẹlẹ.

¹⁸Ọọwa lẹ, ịdịragọn ọọwa a godayị rịrị ọ-ọnụụka nya ihu ọtụka ọọwa lẹlẹ.