Read idege ỌWỤRỤỤ-WỤRỤ 13 Bible Online

ỌWỤRỤỤ-WỤRỤ 13 - idege bible

ỌWỤRỤỤ-WỤRỤ 13

¹Ịnyị, am ịJọn, a chẹhị kaka yẹ iyo ọtụka ọhẹ kọ gba kpehe bwu ẹpwụ nya ihu ọtụka-ọtụka lẹlẹ. Iyo ọọwa ju achụ iwo chiriri. Ọ ju egbeju irwiye. Ọ kụrụ okpo nya adịrahụ u-uhye nya achụ ọnyọnyọọnyị nyamwụ wuu jịra iwo chiriri. Ị da ẹnyị inyibyi ị-tụ Ohe Oluhye pyịpyị ba egbeju irwiye nya iyo ọọwa.

²Iyo ọọwa ọlẹ kam yẹ kọ kpehe bwu ẹpwụ nya ihu ọọwa lẹ, ọ me ijwo. Ata nyamwụ lala ẹta nya iyo ọtụka-ọtụka ọhẹ ọlẹ kọ me ọnarwọ. Ọnụ nya iyo ọọwa me ọnụ nya ugẹbẹ. Iyo ọọwa kpangga, a ri ọngọlẹ ká ịdịragọn ọọwa tụụbwọ hi ọngịrị nyamwụ bala ịpyị adịrahụ nyamwụ bala ụmụmẹ nya ọngịrị ọtụka ọlala nyamwụ wuu ju ụ-ụbwọ lẹlẹ.

³Ọ lala o-ri yẹkẹẹ, nyị họ iyo ọọwa ang e-egbeju nya ịlẹhị-ịlẹhị lala ịnyaa juwa ka gbugbu lẹ. Ma, igo obebe olegbeju nyamwụ ọọwa tị myị́ gbanggbang hyọọ. Ọọwa lẹ, ọ la alodehe wuu ahịbwuu lụmẹ lẹ, ị juwa ba iyo ọọwa jẹ wururuuru chajị nya ụkụrwọ ẹbyẹbyị nyamwụ ọọwa lẹlẹ.

⁴Ịnyị lẹ, angịnyị ehe a juwa gbịgba ha Ohe Onyobyi ịdịragọn, chajị, nyọlẹ kọ ya ọngịrị nyamwụ ha iyo ọọwa lẹlẹ. Ọọwa lẹ, angịnyị ehe a juwa gbịgba ha iyo ọọwa ịnyịnyị lẹ, ị juwa yẹkẹẹ, “Oowo a tị́ lụmẹ lala iyo ọlẹ tụtụm wẹẹ? Oowo a tị́ ka la ọngịrị ma uya tọọ myị́ ịnyịnyị tụtụm wẹẹ?”

⁵Ịnyị, ị ya ọngịrị ha iyo ọọwa lẹ, ọ juwa ya, achala bala ala ịpyịpyị ịháha-ka bwu ọnụ nyamwụ kpehe lẹlẹ. Ị ya ẹga da họọ kọ ka juwa kpa ọngịrị nyamwụ ọọwa họ ụkụrwọ lala ịya ohu-iye kụrụ imiiye gbẹgbịlẹgbẹ ịnyịnyị.

⁶Ọọwa lẹ, ọ pyẹ ọnụ nyamwụ maa, juwa ya ala inyibyi ba Ohe Oluhye nya ịlẹhị-ịlẹhị, juwa bịrị ẹnyị nya Ohe Oluhye bala ẹga ọlẹ ká Ohe Oluhye kụ ọlẹ kọ ri epwoohe bala angịlẹ wuu kị juwa e-epwoohe ịnyịnyị lẹlẹ.

⁷Ị ya ọngịrị họọ kọ ka juwa dẹwụ ta angị ịgọgọ nya Ohe Oluhye bala ọ-ka juwa kụrwaa kụrụ ịnyịnyị. Ị ya ọngịrị ha iyo ọọwa kọ ka jẹ́-ẹ juwa kụrụ alụpwọma wuu bala angịnyị wuu bala aloja bala alepwoja la datị-datị wuu ịnyịnyị.

⁸Ọọwa lẹ, angịlẹ wuu kị kụ odehe ọlẹ lụka ọọwa, a ka juwa gbịgba ha iyo ọọwa lẹlẹ. Ụka ọọwa, ọng myị́ ọng ọlẹ wuu kị da ẹnyị nyamwụ ene-ene nya ọmwụ ọdada nya odehe ọlẹ, ụ-ụwa ẹ-ẹpwụ nya ụpwụ nya ọhịhị nya Ọnyị ọkpịlọ nya Ohe Oluhye ọlẹ kị nwụnwụ wọnụ nya angịnyị ehe ju kaka wuu lẹ, a juwa gbịgba ha iyo ọọwa lẹlẹ.

⁹Ọng myị́ ọng ọlẹ kọ ju ụrụ nyọka kpa wo ẹla lẹ aalẹ, ọngọọwa a wo ẹla ọlẹ myịmyị mẹ.

¹⁰Ọng myị́ ọng ọlẹ kị da nọ gbe ene-ene yẹkẹẹ, nyị ka woo kpa rụ bwu ẹwụ lẹ aalẹ, ị́ ka dayi la o-wu ọngọ ọlịnyị wu kpa rụ kaka ri ọnyọhị kaka. Ọng myị́ ọng ọlẹ kọ tị kpa ẹma nya ẹwụ nwụ angịkịla ene lẹ aalẹ, ẹma nya ẹwụ, ị tịtị ka kpa nwụ ọngọọwa ịnyịnyị pyii lẹlẹ. Ẹlẹwẹ ri ụbwọ ogbile ụ-ụrụ nya ugbodu ojuju bala ọmyịmyị nya ịlẹhị-ịlẹhị ọlala ha angị ịgọgọ nya Ohe Oluhye wuu.

¹¹Ọọwa lẹ, am ịJọn a myịmyị yẹ ukpilo nya iyo ọtụka ọkịla oheeye ọhẹ kọ gba kpehe bwu ẹpwụ nya ịpyị lẹlẹ. Ọ bwu achụ imiiye ịhyẹ lala achụ nya ọkpịlọ. Ọ juwa ya ẹla lala iyo ịdịragọn.

¹²Ịnyị, iyo oheeye ọọwa a juwa kpa ọngịrị nya iyo nya ọgbanyẹ-ọgbanyẹ ọọwa họ ụkụrwọ i-ijata nya iyo nya ọgbanyẹ ọọwa lẹlẹ. Ịnyị lẹ, iyo oheeye ọọwa a juwa tụ odehe wuu bala angịnyị ịlẹpwụ nyamwụ tutu lagbụrụ kaka gbịgba ha iyo nya ọgbanyẹ-ọgbanyẹ ọlẹ ká ẹbẹ olegbeju nyamwụ myị hịlẹ-hịlẹ lẹlẹ.

¹³Iyo oheeye ọọwa juwa họ ụkụrwọ i-ju ẹjẹẹ ịtụka-ịtụka ịlẹbyẹbyị dọmwụ tụ ila ododo bwu uhye-ọgba nya epwoohe weji wẹ odehe ọlẹ ká ẹhị nya angịnyị ehe wuu juwa yẹ.

¹⁴Ịnyị, bwula ang i-ju ẹjẹẹ ị-la datị-datị ịịwa ịlẹ wuu ká angịnyị ehe yẹ kọ juwa họ ị-ịlahị nya iyo nya ọgbanyẹ-ọgbanyẹ ọọwa lẹ, ọ juwa hụ angịnyị ehe ịịwa ahị, juwa byaa yẹkẹẹ, nyị họ ukpeku lala iyo nya ọgbanyẹ-ọgbanyẹ ọọwa ọlẹ kị ya oge chị e-egbeju ene kọ tị-ị hịhị myị́ wẹ lẹlẹ.

¹⁵Ịnyị lẹ, ị ya ọngịrị ha iyo oheeye ọọwa lẹ, ọ dịhụ ju ukpeku nya iyo nya ọgbanyẹ-ọgbanyẹ ọọwa lẹ, ukpeku ọọwa a jẹ́ juwa ya ẹla myị́ lẹlẹ. Ịnyị, ukpeku ọọwa a họ kị juwa nwụ angịnyị ehe ịlẹ kị myị juwa gbịgba họọ ọwa ukpeku ọọwa kpong-kpong kaka lẹlẹ.

¹⁶Iyo oheeye ọọwa họ, kị juwa da ịna nya iyo nya ọgbanyẹ-ọgbanyẹ ba upwuriri lee itochi nya ọng myị́ ọng wuu, tụ angịlẹ kị ri angị ichiche bala angị ịtụka wẹwẹ lee alụdụ bala ikpehika wẹwẹ lee angịlẹ kị la ịlaa la bala angịlẹ kị ri anyịhị riri wuu ịnyịnyị lẹlẹ.

¹⁷Ọọwa lẹ, ọ da ehile yẹkẹẹ, ọngọngọhẹ nyị́ ka kpa ihi ra ka lee ọ-ra ihi bwu ụbwọ nya ọngọkịla kpong-kpong kaka. Kẹnẹ-kẹnẹ, ó-ri kịị nyị́ chị ọngọọwa ịna nya iyo nya ọgbanyẹ ọọwa ene lẹ mẹ ịnyị! Ịna ọọwa ri ẹnyị nya iyo nya ọgbanyẹ-ọgbanyẹ ọọwa lee ịnaaba nya ịnọmba nya ẹnyị nyamwụ lẹ.

¹⁸Ẹla ọjẹ́jẹ, ị ka jẹ́-ẹ kpa jẹ́ ẹlẹwẹ lẹlẹ. Chajị nya ọọwa lẹ, ọng myị́ ọng ọlẹ kọ la ọ-jẹ́ myịmyị juwa lẹ aalẹ, ọngọọwa a ju ịnọmba nya iyo nya ọgbanyẹ-ọgbanyẹ ọọwa ẹjẹẹ mẹ. Chajị, ịnọmba nya ọngịnyị ehe, ị da bọọ lẹ. Ịnọmba ọọwa ri ịnọmba ohu ịrwọnyẹ da iwo ịrwọnyẹ kụrụ ịrwọnyẹ.