Read idege ỌWỤRỤỤ-WỤRỤ 14 Bible Online

ỌWỤRỤỤ-WỤRỤ 14 - idege bible

ỌWỤRỤỤ-WỤRỤ 14

¹Ịnyị, am ịJọn a hu ẹhị nyam hwaa lẹ, m chẹhị kaka yẹ Ọnyị ọkpịlọ nya Ohe Oluhye kọ godayị rịrị u-uhye nya Ọgbọdọ ịSayọn bala angịnyị angị ụnọ ohu da ụnọ iwo ine kụrụ ine ịlẹ kị da ẹnyị nya Ohe Oluhye Adịda ba u-uhye nya itochi nyaa ụ-ụwa ta Ọnyị ọkpịlọ ọọwa ịnyịnyị lẹlẹ.

²Ọọwa lẹ, m wo omyi ọhẹ kọ juwa ya ẹla bwu epwoohe lala anụ nya iru okuu ọtụka nya enyi ịlẹpwụ nya ịba ịtụka-ịtụka ịlẹ kị juwa mwụ bwu uhye nya ọgbọdọ hireji bala anụ nya ịkata ọkpụkpụ ọtụka nya ịkpala lẹlẹ. Omyi ọọwa ọlẹ kam wo me anụ nya ogumogu ọlẹ ká angị kaa du ogum juwa kpa du.

³Ọọwa lẹ, ị juwa mwu eje onyeewe ọhẹ ụ-ụwa ị-ịlahị nya ẹchị Adịrahụ nya Ohe Oluhye bala ịlahị nya ang ịlahị-ịlahị ine bala ịlahị nya ịgabwọ angị ohu kụrụ ine lẹlẹ. Ọngọngọhẹ ọkịla á jẹ́ mwu eje ọọwa myị́ kpong-kpong taa kaka. Kẹnẹ-kẹnẹ, angịnyị angị ụnọ ohu da ụnọ iwo ine kụrụ ine ịlẹ ká Ohe Oluhye chịda bwu odehe ọlẹ ụbwaa kem a jẹ́ juwa mwu eje ọọwa taa lẹlẹ.

⁴Angịịwa a ri angịlẹ kị chị ịlaa ịrị ẹ-ẹga nya anyang kpong-kpong bwula ụya ọhọhọ kaka lẹlẹ. Chajị, ọngọngọhẹ lẹpwụ nyaa á nọ ta ọnyang ẹnẹnẹhẹ lẹka. Angịịwa a tị ri angịlẹ kị kaa juwa ba Ọnyị ọkpịlọ nya Ohe Oluhye ọọwa jẹ ka ẹga myị́ ẹga ọlẹ kọ juwa ka lẹlẹ. Angịịwa a tị myịmyị ri angịlẹ ká Ohe Oluhye chịda bwu ẹpwụ nya angịnyị ehe ịkịla wuu, chajị kịịwa a ka ri angị ku ọmwakpa nya ugbe nya ọgbanyẹ-ọgbanyẹ ha Ohe Oluhye bala Ọnyị ọkpịlọ nyamwụ ọọwa lẹlẹ.

⁵Ịngịngịhyẹ nya ọnọọkịla omeme á tị juwa ọ-ọnụ nyaa kpong-kpong kaka. Chajị, ịwa ayịdang a ri angịlẹ kị da ukpuru nya ịngịngịhyẹ onyobyi ọhọhọ kpong-kpong ị-ịlahị nya Ohe Oluhye kaka lẹlẹ.

⁶Ịnyị lẹ, am ịJọn, a myịmyị chẹhị kaka yẹ olegu-ẹrụ ọhẹ ọkịla kọ juwa hụ chịpwụrụ bwu ẹpwarịrị nya egbamwụ opyiipyii nya epwoohe lẹlẹ. Ọ kpa ẹrụ ọnyịịla o-gbe oyi myị́ oyi nyọka kpa kaka ya pyẹ je angịlẹ kị kụ odehe ọlẹ ju kele ka epwoja myị́ epwoja wuu bala alụpwọma myị́ ụpwọma wuu bala aloja myị́ oja bala angịnyị myị́ angịnyị wuu.

⁷Ịnyị lẹ, ọ ya ẹla ọọwa gboo dodehe yẹkẹẹ, “Anụ juhi nya Ohe Oluhye kanụ juwa gwogbo họọ ịnyịnyị mẹ. Chajị, ụka nya awa ọlẹ ká Ohe Oluhye ka kpa chị eje ya je angịlẹ ká eje nyamwụ wuu pwụ eji lẹ. Anụ gbịgba ha Ọwa Ohe Oluhye Ọngọ họ epwoohe bala odehe bala ihu ịtụka bala ẹmwụ-enyi ịtụka wuu ịnyịnyị mẹ.”

⁸Ịnyị lẹ, olegu-ẹrụ oheeye a kpehe ịnyịnyị lẹ, ọ juwa yẹkẹẹ, “Ọ tụrụ ju eji lẹ! ỊBabịlọn ọtụka, ọ tụrụ ju eji lẹ! Ọwa ọngọlẹ kọ kaa họ ká alepwoja myị́ epwoja nya odehe ọlẹ wuu kaa juwa bá ọnụ ere nya ụya ọhọhọ lụmẹ nyamwụ bá nwa tọọ lẹ, ọ tụrụ ju eji lẹ!”

⁹Ịnyị lẹ, olegu-ẹrụ ọhata a tịtị gba kpehe ịnyịnyị lẹ, ọ ya ẹla lomyi o-gboo yẹkẹẹ, “Ọng myị́ ọng ọlẹ wuu kọ ri ọngọ juwa gbịgba ha iyo ịdịragọn ọlaanyị bala ukpeku nyamwụ lee ọ-myị ye ịna nya ịnaaba nya ịdịragọn ọọwa i-itochi nya ọngọọwa lee ụbwọ nyamwụ lẹ,

¹⁰aalẹ, ọngọọwa á ka dayi la ọ-ka ye ukoku nya ere nya agbama nya Ohe Oluhye nwa la ẹnụtụrụ ọọwa kpong-kpong kaka. Chajị, ị ka ya agbama nya Ohe Oluhye ọọwa myị ukoku nya ikẹjẹ-awụrụ nya Ohe Oluhye ọlẹ kị ka ya enyi lee ịngịngịhyẹ kpịlọọ abwọ kaka lẹ, ị ka ya ha ọngọọwa nwa pyii lẹlẹ. Angị ịlịnyị wuu ka myịmyị-ị̀ juwa yẹ akama ọtụka-ọtụka ẹ-ẹpwụ nya ila bala ochipwuu nya ila nya ẹjwọ ọlẹ kị wụrụ ‘ibirim-siton’ ụ-ụwa i-ijata nya alegu-ẹrụ ịgọgọ nya Ohe Oluhye wuu bala ijata nya Ọnyị ọkpịlọ nya Ohe Oluhye.

¹¹Ọọwa lẹ, ịmwụ nya akama ọyẹyẹ nya angịịwa a ka juwa rụ kele ka uhye-ọgba pyịyọọ gbe oyi myị́ oyi lẹlẹ. Ị́ tụtụm la ịnyọ ọmwụmwụ kpong-kpong kaka, lodu bala alẹnụ pyịyọọ. Angịịwa a ri angịlẹ wuu kị gbịgba ha iyo nya ọgbanyẹ-ọgbanyẹ ọọwa bala ukpeku nyamwụ bala ọ-myị ye ịna nya ẹnyị nyamwụ ịnyịnyị lẹlẹ.”

¹²Ẹlẹwẹ ri ang o-du aga ọmama ju ugbodu ojuju ọlala ha angị ịgọgọ nya Ohe Oluhye wuu ịlẹ kị ri angị juwa kpa ehile nya Ohe Oluhye họ ụkụrwọ bala ọ-la ọmyịmyị u-uhye nya iJisọsị lẹlẹ.

¹³Ịnyị, am ịJọn a wo omyi ọhẹ kọ juwa ya ẹla bwu epwoohe yẹkẹẹ, “ỊJọn, aa da ala ịlẹ ju ẹ-ẹpwụ nya ụpwụ mẹ. Ahị ọwawa juwa ha angịlẹ wuu kị gbu ẹ-ẹpwụ nya Ọngọlahị la bwu ọlẹẹlẹẹ pyịyọọ kịlahị-ịlahị. Ee, ahị ọwawa ọtụka ka juwa haa ịnyịlẹhị. Chajị, ịwa ayịdang juwa ka rụ kaka la ọmwịịnyọ bwu ẹpwụ nya iru nya ụkụrwọ ịlẹ wuu kị juwa nwụ ịlaa la ọhọhọ lẹ. Chajị, ụkụrwọ ọnyịịla ịlẹ wuu kị họ juwa ka baa kele ịnyịnyị.” Ịnyị, Olegu Ịgọgọ nya Ohe Oluhye a ya lẹ!

¹⁴Ịnyị lẹ, am ịJọn, a hu ẹhị nyam hwaa ka uhye lẹ, m chẹhị kaka yẹ egbamwụ onyoowuru ọhẹ ká ọngọhẹ ọlẹ kọ me Ọnyị nya ọngịnyị ehe hụhụ u-uhye nyamwụ lẹlẹ. Ọngọọwa kụrụ okpo ọkụrụ egbeju nya adịrahụ ọlẹ kị kpa okpoko ịgọm-ịgọm kem họ u-uhye egbeju nyamwụ. Ọ kpa ẹma ọ-kpa chị ang-abwọ nya ẹrụ ịlẹ kị gaga wuu lẹ, ụ-ụbwọ nyamwụ.

¹⁵Ọọwa lẹ, olegu-ẹrụ ọkịla ọhẹ a kpehe bwu ube ịgọgọ ọtụka nya Ohe Oluhye olepwoohe lẹ, ọ juwa be ẹkọ ya ẹla lomyi o-gboo ta ọngọọwa ọlẹ kọ hụhụ u-uhye nya egbamwụ lẹlẹ. Ọ byọọ yẹkẹẹ, “Da ẹma nyang kele ka odehe kaka chị egbe ịlẹrụ ịlẹ kị gaga wuu lẹ bwu ụwa mẹ. Chajị, ụka nya awa nyọka kpa hu ang nya ẹrụ pwụ eji lẹ. Chajị, egbe ilodehe ọlẹ wuu ga yẹẹyẹẹ lẹ.”

¹⁶Ịnyị lẹ, ọngọọwa ọlẹ kọ hụhụ u-uhye nya egbamwụ a chị ẹma ọlẹ kọ kpa ụ-ụbwọ nyamwụ pyii, ju kele ka odehe lẹ, ọ hya egbe ilodehe ịịwa ịnyịlẹhị lẹlẹ.

¹⁷Ịnyị, m myịmyị chẹhị kaka yẹ olegu-ẹrụ ọkịla ọhẹ kọ gba kpehe bwu ube ịgọgọ ọtụka nya Ohe Oluhye olepwoohe, kọọwa kpa ẹma ọlẹ kọ la iri lụmẹ kị kaa kpa chị ang ịgaga ịlẹrụ, ụ-ụbwọ nyamwụ ịnyịnyị lẹlẹ.

¹⁸Ọọwa lẹ, olegu-ẹrụ ọkịla a myịmyị gba kpehe bwu uhye nya ogidi ịgọgọ ọkịla iya nya Ohe Oluhye lẹlẹ. Olegu-ẹrụ ọọwa a ri olegbeju ọkpẹhị rịrị ila ọkịla iya oluhye nya ogidi ọọwa lẹ. Ịnyị, olegu-ẹrụ ọwẹ a ya ẹla lomyi o-gboo ta olegu-ẹrụ ọkịla ọlẹ kọ kpa ẹma oliri ọlẹ kị kaa kpa chị ang nya ẹrụ, ụ-ụbwọ nyamwụ lẹlẹ. Ọ byoo yẹkẹẹ, “Da ẹma nyang kele kaka hya iku ịgaga nya alakọnụ ịlẹpwụ nya odehe wuu mẹ. Chajị, egbe nya alakọnụ iluhye nyaa ga wuu kpụ ọhyahya lẹ.”

¹⁹Ịnyị, olegu-ẹrụ ọọwa a chị ẹma ọọwa pyii kele ka odehe kaka hya abwọ nya alakọnụ ịlẹ kị juwa odehe wuu lẹ, ọ ya da kele ka ẹga nya ang ọ-kpa pyị enyi nya ere nya alakọnụ nya alubekee ọlẹ kọ ku ọmwakpa nya agbama nya Ohe Oluhye lẹlẹ.

²⁰Ịnyị lẹ, ị pyị enyi nya alakọnụ ịịwa kwẹẹ ẹ-ẹpwụ nya ang ọ-pyị ere ọọwa o-ohwodehe nya epweji ọhẹ lẹ, ịwọ nyaa a juwa mwụ gbịlọ-gbịlọ lala ọba nya enyi kpehe bwu ẹpwụ nya ang ọ-kpa pyị enyi nya alakọnụ ọọwa lẹlẹ. Ọ la kpori-kpori lala apatẹ ịrụ myị́. Ọ tị la udiyo gbururu lala ịmalị ụnọ da ohu ịrwọnyẹ chiriri myị́ ịnyịnyị.