Read idege ỌWỤRỤỤ-WỤRỤ 15 Bible Online

ỌWỤRỤỤ-WỤRỤ 15 - idege bible

ỌWỤRỤỤ-WỤRỤ 15

¹Ịnyị, am ịJọn a chẹhị kaka yẹ ang o-ju ẹjẹẹ ọtụka ọlẹbyẹbyị ọkịla ọhẹ ụ-ụwa u-uhye-ọgba nya epwoohe lẹlẹ. Ang ọọwa ri alegu-ẹrụ irwiye ịlẹ kị kpa ang ịjụjụ achẹ irwiye ịlẹ kị ka ri ang i-hi ẹkpẹ-ẹkpẹ ịlẹ kị ka kpa agbama nya Ohe Oluhye kaka chị eju lẹlẹ.

²Ịnyị lẹ, am ịJọn a chẹhị kaka yẹ ịngịhyẹ ọlẹ kọ lala ihu ọtụka nya ịnyọ-ịnyọ ọlẹ ká ila kpịlọọ abwọ lẹlẹ. Ọọwa lẹ, angịlẹ wuu kị kụrụ iyo nya ọgbanyẹ-ọgbanyẹ ọọwa bala ukpeku nyamwụ bala ịnaaba nya ịnọmba nya ẹnyị nyamwụ wuu a godayị rịrị ịkịka nya Ihu nya ịnyọ-ịnyọ ọọwa lẹ, ị kpa ogumogu nya Ohe Oluhye ụ-ụbwọ nyaa wuu lẹlẹ.

³Ịnyị lẹ, ị juwa mwu eje nya iMosisi ọnchẹ nya Ohe Oluhye bala eje ya Ọnyị ọkpịlọ nya Ohe Oluhye lẹlẹ. I juwa mwu eje ọọwa yẹkẹẹ, “Oo! Ahụ Ọngọlahị Ohe Oluhye Agụgụ ọtụka, ụkụrwọ nyang lụmẹ bala ọlẹbyẹbyị lụmẹ kaka kpoye. Ụgbẹyị nyang wuu tị ri ụgbẹyị ọkpẹẹkpẹẹ bala ụgbẹyị nya ẹla nya ịlẹhị lụmẹ, oo, Ahụ Adịrahụ ọtụka o-gbe oyi myị́ oyi wuu pyịyọọ bwu edede.

⁴Oo, Ahụ Ọngọlahị, o-owo a tị́ tụtụm ka juwa juhi nyang ka, bala o-gwogbo ha ẹnyị nyang kpong-kpong kaka myị́ wẹẹ? Chajị, Ahụ ụbwọng kẹnẹ-kẹnẹ a ri Ọngọ ọlịgọgọ ọtụka ọọwa lẹlẹ. Ahụ ụbwọng, alepwoja myị́ epwoja ilodehe ọlẹ wuu a ka wẹ kaka gbịgba ha lẹlẹ. Chajị, a chị eje ọlala nyang ọlẹ ká ya wu alodehe wuu ehe ụgbẹyị lẹ.”

⁵Ịnyị, ụka ká ọwẹ chịpwụrụ kpá lẹ, am ịJọn a hu ẹhị nyam hwaa lẹ, m chẹhị kaka yẹ kị wụrụ ube ịgọgọ nya ibeenu oriri nya Ohe Oluhye o-ya dodehe olepwoohe, kọ wụrụ dụwa gbodoo lẹlẹ.

⁶Ịnyị lẹ, alegu-ẹrụ irwiye ịlẹ kị kpa ang ọjụjụ irwiye ụ-ụbwọ nyaa a gba kpehe bwu ẹpwụ nya ube ịgọgọ ọtụka ọọwa lẹlẹ. Ị kụrụ ịwụrụ inyiiwuru ikeri-keri igbileji ụ-ụwa. Ị ya ugba ọ-chị ọhị ịlẹ kị kpa okpoko ịgọm-ịgọm kem họ, chị ọkịlẹtụ nyaa.

⁷Ịnyị lẹ, ọngọhẹ lẹpwụ nya ang ịlọhịhị ine, a go ịja i-ju ang irwiye ịlẹ kị kpa okpoko ịgọm-ịgọm kem họ, kị ya agbama nya Ohe Oluhye Ọngọlẹ kọ juwa hịhị gbe oyi myị́ oyi pyịyọọ myị ẹpwụ nyaa, ha alegu-ẹrụ irwiye ịịwa lẹlẹ.

⁸Ọọwa lẹ, ịmwụ ọtụka ọhẹ a myị ube ịgọgọ ọọwa bwula ogbo nya Ohe Oluhye bala ọngịrị nyamwụ lẹlẹ. Ọọwa lẹ, ọngọngọhẹ a jụ kele ka ube ịgọgọ ọtụka ọọwa myị́ kaka, gbee pwụ ụka ọlẹ ká ang ịjụjụ achẹ irwiye ịịwa ịlẹ ká alegu-ẹrụ irwiye ịịwa kpa chịpwụrụ kpá wuu ene lẹlẹ.