Read idege ỌWỤRỤỤ-WỤRỤ 16 Bible Online

ỌWỤRỤỤ-WỤRỤ 16 - idege bible

ỌWỤRỤỤ-WỤRỤ 16

¹Ịnyị lẹ, am ịJọn a wo omyi ọhẹ kọ juwa ya ẹla gboo bwu ube ịgọgọ ọtụka nya Ohe Oluhye olepwoohe ta alegu-ẹrụ irwiye ịịwa yẹkẹẹ, “Anụ kele kaka ya agbama nya Ohe Oluhye ịlẹpwụ nya ịja irwiye nyanụ ịwẹ yẹ hụrụ kele ka ẹpwụ nya odehe mẹ.”

²Ịnyị, olegu-ẹrụ nya ọgbanyẹ-ọgbanyẹ a kele kaka ya agbama nya Ohe Oluhye ọlẹpwụ nya ẹja ọlẹ kọ kpa ụ-ụwa yẹ hụrụ chị ka odehe lẹlẹ. Ọọwa lẹ, abẹ inyibyi ịjụjụ ịhyẹ a chị alodehe ịlẹ wuu kị myị ye ịna ọchịchị nya iyo nya ọgbanyẹ-ọgbanyẹ ọọwa bala ọ-gbịgba ha ukpeku nyamwụ wuu lẹlẹ.

³Ịnyị, olegu-ẹrụ oheeye a ya agbama nya Ohe Oluhye ọlẹpwụ nya ẹja ọlẹ kọ kpa ụ-ụwa, yẹ hụrụ ju ka ẹpwụ nya ihu ịtụka lẹ, enyi nya ihu ịịwa wuu a yẹ la ịwọ ọ-lala ịwọ nya ọngọ gbugbu lẹlẹ. Ọọwa lẹ, ang myị́ ang ịlẹ wuu kị la ọhịhị ẹ-ẹpwụ nya enyi nya Ihu ịtụka ịịwa wuu a gbu gbanggbang lẹlẹ.

⁴Ịnyị, olegu-ẹrụ ọhata a ya agbama nya Ohe Oluhye ọlẹpwụ nya ẹja ọlẹ kọ kpa ụ-ụwa, yẹ ju ka ẹpwụ nya ihu nya ịba bala ẹmwụ nya enyi wuu lẹ, ị yẹ la ịwọ-ịwọ lẹlẹ.

⁵Ịnyị lẹ, am ịJọn a wo ká olegu-ẹrụ ọhẹ ọlẹ kọ ri olegbeju ọkpẹhị rịrị enyi, kọ juwa ya ẹla yẹkẹẹ, “Eje ọlala nyang ịlẹ ká la angịnyị ehe wẹ wuu lẹ, ọ la kpakpa lụmẹ, oo, Ahụ Ohe Oluhye Ọngọ ọlịgọgọ ọtụka, Ahụ Ọngọlẹ ká juwa hịhị lẹẹlẹẹ, jaabwọ ká juwa hịhị bwu edede ene-ene.

⁶Chajị, angịnyị ehe ịlẹ kị kpa ụbwọ nya ịlaa chị ịwọ nya angị ịgọgọ nyang bala alọmwụ nyang Ahụ Ohe Oluhye wuu lẹ, tịtị hu ịwọ ha angịịwa kị ka nwa kwiwa jaabwọ kọ pwoku ẹ-ẹga nyaa kaka ba lẹ.”

⁷Ọọwa lẹ, am ịJọn a myịmyị wo omyi ọhẹ kọ juwa ya ẹla bwu uhye nya ogidi ọkịla iya nya Ohe Oluhye yẹkẹẹ, “Ee, ịnyịlẹhị ịnyị! Ahụ Ọngọlahị Ohe Oluhye Agụgụ ọtụka, ẹla nya ịlẹhị nyang bala ọkpaakpaa ọlala nyang, a kaa kpa chị eje nya abwẹla ọnyịịla nyang u-uhye nya ọhọhọ nya angịnyị ehe wuu lẹ.”

⁸Ịnyị lẹ, olegu-ẹrụ ohene a ya agbama nya Ohe Oluhye ọlẹpwụ nya ẹja ọlẹ kọ kpa ụ-ụwa, yẹ hụ ẹnụ oluhye-ọgba lẹ, ị myị ọnụ ha ẹnụ ọọwa kọ ka họ ká ọchịchị nyamwụ ka juwa rụ angịnyị ehe lala ila ọlam-ọlam lẹlẹ.

⁹Ịnyị, ụka ká ọchịchị nya ẹnụ ọọwa juwa chị angịnyị ila lụmẹ-lụmẹ lẹ, ị mwọọgịlẹ juwa gọlọ ju Ohe Oluhye, Ọwa Ọngọlẹ kọ la ọngịrị nyọka kpa ang ọjụjụ ọọwa yẹ angịnyị ehe akama myị́, dachichi lẹlẹ. Ma, angịịwa á tị myị yẹ irya da kpong-kpong bwu ẹpwụ nya ịhọbịrị ịhọhọ nyaa, kpụ, ị ka juwa gwogbo ha Ohe Oluhye kaka.

¹⁰Ịnyị, olegu-ẹrụ ọharụ a ya agbama nya Ohe Oluhye ọlẹpwụ nya ẹja ọlẹ kọ kpa ụ-ụwa, yẹ hụrụ u-uhye nya ẹchị Adịrahụ nya iyo nya ọgbanyẹ-ọgbanyẹ ọọwa lẹlẹ. Ọọwa lẹ, ịpyị adịrahụ nyamwụ a yẹ ri ukpowu okpem-kpem lẹlẹ. Ọọwa lẹ, angịnyị ehe a juwa chị ịlaa angịrị ẹ-ẹlẹlẹ nyaa o-oluhye nya ang ọjụjụ ọtụka-ọtụka ọlẹ kị juwa ẹ-ẹpwụ nyamwụ lẹlẹ.

¹¹Ọọwa lẹ, angịnyị ehe ịịwa a mwọọgịlẹ juwa gọlọ ju Ohe Oluhye olepwoohe, chajị nya ang ọjụjụ ọtụka bala abẹ ịlẹ kị chị lụmẹ-lụmẹ, dachichi lẹlẹ. Ma, ị́ tị myị yẹ irya da bwu ẹpwụ nya ịhọbịrị ịhọhọ nyaa kpong-kpong kaka.

¹²Ịnyị, olegu-ẹrụ ọharwọnyẹ a ya agbama nya Ohe Oluhye ọlẹpwụ nya ẹja ọlẹ kọ kpa ụ-ụwa, yẹ hụrụ ju ka ẹpwụ nya Ihu ọlẹ kị wụrụ iYufuretisi lẹ, enyi ọlẹpwụ nyamwụ a nwụ kịra-kịra wuu, chajị nyọka nwụla ụgbẹyị da gbe ịdịrịhụ ịlẹ kị bwu oye nya ọmwẹnụ-ụtụrụ lẹlẹ.

¹³Ọọwa lẹ, am ịJọn a chẹhị kaka yẹ alegu inyibyi ịhyẹ ịlẹ kị lala arwa, ịta kị juwa gba kpehe bwu ẹpwụ nya ọnụ nya Ohe Onyobyi ịdịragọn bala ẹpwụ ọnụ nya ukpilo nya iyo nya ọgbanyẹ-ọgbanyẹ bala ẹpwụ ọnụ nya ọlọmwụ ọnọọkịla ọhẹ lẹlẹ.

¹⁴Ang ịlịta ịịwa ịlẹ kị me arwa lẹ, ị ri alegu inyibyi nya Ohe Onyobyi ịlẹ kị juwa họ ang i-ju ẹjẹẹ nya ụkụrwọ ẹbyẹbyị la datị-datị. I juwa kele tụ odehe-odehe da kaka be ẹkọ wụrụ ịdịrịhụ ilodehe ọlẹ wuu kaka taa guru, chajị kị ka tụchawụlẹ nyọka kaka dẹwụ la ẹnụtụrụ ọtụka nya Ohe Oluhye Agụgụ ọtụka lẹlẹ.

¹⁵Omyi ọhẹ ya ẹla bwu epwoohe yẹkẹẹ, “Anụ wo mẹ! Am Ọngọlahị juwa ka warị lụka o-bwu angịnyị agaga lala oloyi ọlẹ kọ kaa bwu ayịdẹpwa agaga lẹ! Ahị ọwawa ka juwa ha ọngọlẹ kọ juwa kpahị ju awụrụ ọkụrụ-kụrụ nyamwụ ọlẹ kọ ri abwẹla ọnyịịla nya Ohe Oluhye ọhọhọ, chajị ká ọngọọwa ka jẹ́-ẹ juwa lọhị-lọhị ị-ịlahị nya Ohe Oluhye kaka.”

¹⁶Ịnyị, alegu inyibyi ịịwa a tụ ịdịrịhụ ịịwa wuu kaka guru ẹ-ẹga ọlẹ kị wụrụ Amagẹdọn la oja nya ala iHiburu lẹlẹ.

¹⁷Ịnyị, olegu-ẹrụ ọharwiye a ya agbama nya Ohe Oluhye ọlẹpwụ nya ẹja ọlẹ kọ kpa ụ-ụwa, yẹ hụrụ chị ka uhye ọhụ lẹ, omyi ọhẹ a juwa ya ẹla gboo dodehe bwu ịlahị nya ẹchị Adịrahụ nya Ohe Oluhye olube ịgọgọ ọtụka olepwoohe lẹlẹ. Ọ yẹkẹẹ, “Ẹhẹẹ! Egbahị go ugbẹnyị lẹ!”

¹⁸Ụka ọọwa, apya juwa chị nya ịlẹhị-ịlẹhị ụ-ụwa, iru nya omyi ịhyẹ juwa ya ẹla lụmẹ-lụmẹ ụ-ụwa ịnyịnyị. Ịkata ọtụka nya ịkpala juwa kpụ nya ịlẹhị-ịlẹhị ụ-ụwa. Ịnyị, ịpyị ọ-hụ́ kpákpakpa ọtụka-ọtụka ọlẹ ká ọlịnyị á ji odehe ọlẹ ẹnẹnẹhẹ bwu ụka ọlẹ ká angịnyị ehe kụ ẹpwụ nyamwụ kpong-kpong lẹka a kpụ eji ụ-ụwa lẹlẹ. Chajị, ịpyị ọ-hụ́ kpakpakpa ọọwa lụmẹ kaka kpoye.

¹⁹Ọọwa lẹ, epweji ọtụka ọlụwa a gu ene ịta kpịra ta ayịreji gbanggbang lẹlẹ. Ịnyị, epweji ịtụka nya alepwoja la datị-datị ilodehe ọlẹ a ta ayịreji ịnyịnyị lẹlẹ. Ịnyị, Ohe Oluhye a kpịtịya nya ang inyibyi ịhọhọ lụmẹ nya alepweji ọtụka nya ịBabịlọn lẹ, Ohe Oluhye a tịtị hu ukoku nya agbama ọtụka nya ịlọmwụ ha ala ịBabịlọn ịịwa kị ka nwọọ wuu gbanggbang lala ere nyaa pyii lẹlẹ.

²⁰Ụka ọọwa, ịpyị ịkịlọlọ ịlẹ ká enyi dagaga jwaa wuu odehe ọlẹ wuu, byi yịra-yịra. Ịgbọdọ ịtụka wuu tụ biri gbanggbang la ọngọngọhẹ jẹ́ yaa kpong-kpong kaka ịnyịnyị.

²¹Ịnyị, ekpawẹ ịtụka-ịtụka a juwa do bwu epwoohe kaka mịla angịnyị ehe lẹlẹ. Ilo ọlala nya ekpawẹ idodo ịịwa ka lala ilo nya obwuhu nya ajẹ nya ịgbịrị myị́. Ọọwa lẹ, angịnyị ehe a juwa gọlọ ju Ohe Oluhye chajị nya akama nya ekpawẹ idodo ịịwa ịlẹ kị wẹ chaa ọgụ lẹlẹ. Chajị, ang ọjụjụ ọọwa ri ang oluhi-uhi lụmẹ kaka kpoye.