Read idege ỌWỤRỤỤ-WỤRỤ 17 Bible Online

ỌWỤRỤỤ-WỤRỤ 17 - idege bible

ỌWỤRỤỤ-WỤRỤ 17

¹Ịnyị lẹ, ọngọhẹ lẹpwụ nya alegu-ẹrụ irwiye ịlẹ kị kpa ẹja nya agbama nya Ohe Oluhye ụ-ụbwọ a warị kaka byim am ịJọn yẹkẹẹ, “Kẹwẹ kam mẹ ang ọlẹ kọ ka ri akama nya ọnyang ọlakpara ọtụka ọlaanyị kọ hụhụ lalẹ u-uhye nya iru nya enyi lụmẹ-lụmẹ jẹng mẹ.

²Ọnyang ọwẹ a ri ọlakpara ọlẹ ká ịdịrịhụ ilodehe ịlẹ họ ụya ta wuu lẹlẹ. Ọnyang ọwẹ a tị ri ọngọlẹ kọ ka hu ere nya ụya ọhọhọ nyamwụ ha angịlẹ kị kụ odehe ọlẹ wuu nwa, du kị juwa ya ịnyịnyị lẹ.”

³Ịnyị, olegu-ẹrụ ọọwa a kpam rụ kele ka ugbileji ọhẹ a-arụrụ bwula ọngịrị nya Olegu Ịgọgọ lẹ, m chẹhị kaka yẹ ọnyang ọhẹ kọ hụhụ u-uhye nya iyo ọnyọmịla ọhẹ ọlẹ kị da iru nya ẹnyị inyibyi lụmẹ-lụmẹ ba u-uhye nyamwụ lẹlẹ. Iyo ọọwa ju egbeju irwiye. Ọ bwu achụ iwo chiriri.

⁴Ọnyang ọọwa kụrụ apwụ obwuru-bwuru bala ọnyọmịla u-uhye nya ịnyịrọ nyamwụ. Ọ ju ịlọmwụ olo la ịjang nya okpoko ịgọm bala ịjang nya ajwọ ị-há ụhị ịlịnya lụmẹ bala iru nya ịjang nya ogbe chụ ịlọmwụ lụmẹ ịnyịnyị. Ọ kpa ukoku ọhẹ ọlẹ kị kpa okpoko ịgọm-ịgọm kem họ, ụ-ụbwọ nyamwụ. Ụma nya ang inyibyi ịbịrị ẹhị bịrị bala ang ị-chị ịrị ịháha-ka la datị-datị nya ụya ọhọhọ nya ọnyang ọọwa a myị ẹpwụ nya ukoku ọọwa pwẹẹpwẹẹ lẹ.

⁵Ị da ẹnyị ọhẹ ọlẹ kọ la etu okpori-kpori ba uhye nya itochi nya ọnyang ọọwa yẹkẹẹ, “ỊBabịlọn ọtụka, ịnịna nya alakpara wuu bala ịnịna nya ang inyibyi ịbịrị ẹhị bịrị ilodehe ọlẹ wuu.”

⁶Ọọwa lẹ, am ịJọn a chẹhị kaka yẹ ọnyang ọọwa kọ juwa nwa ịwọ nya angị ịgọgọ nya Ohe Oluhye bala ịwọ nya angịlẹ wuu kị wu kpa kaka nwụ chajị nya ẹnyị nya iJisọsị, gbee kọ juwa ya lẹlẹ. Ụka ọlẹ kam chẹhị kaka yẹ ọnyang ọọwa lẹ, ọ lam ahịbwuu lụmẹ kaka kpoye.

⁷Ma, olegu-ẹrụ ọhẹ ya ẹla tam yẹkẹẹ, “Ịịyẹ a tị́ du kọ juwa lang ahịbwuu lụmẹ ịnyị ịJọn? Ba kam ya jeng etu nya ang okpori-kpori chajị nya ọnyang ọwẹ bala etu nya ukpilo nya iyo ọlẹ kọ la egbeju irwiye bala o-bwu achụ iwo chiriri ọlẹ ká ọnyang ọọwa hụhụ u-uhye nyamwụ wẹ ịnyịnyị mẹ!

⁸Ukpilo nya iyo ọlẹ ká yẹ wẹ ene-ene lahị-lahị, kọ tị juwa la ọhịhị lẹẹlẹẹ kaka wẹẹ, ọ tụbwọọ juwa ka gba kpehe myịmyị bwu ẹpwụ nya ụjẹ ọ-la ọbaba-ka lẹ. Ọọwa lẹ, ọ rụ ka ẹgẹhẹ lẹ, ị ka tọọ ayịreji gbanggbang lẹlẹ. Ụka ọọwa lẹ, angịlẹ kị jam odehe ọlẹ kị da ẹnyị nyaa ẹ-ẹpwụ nya ụpwụ nya ọhịhị nya Ohe Oluhye bwu ọmwụ ọdada nya odehe ọlẹ kpong-kpong ka lẹ, ụka kị chẹhị kaka yẹ iyo ọọwa, ọ ka laa ahịbwuu lụmẹ kaka kpoye. Chajị nyọlẹ ká iyo ọọwa juwa la ọhịhị ene, kọ nọ chẹẹ kọ tị juwa la ọhịhị kaka, ene kọ tị myịmyị-ị̀ gba kpehe lahị-lahị lẹlẹ.”

⁹“Ẹlẹwẹ baba ká ọngịnyị ka kpa ẹla ọjẹ́jẹ bala ọ-jẹ́ myịmyị ọlẹpwụ nyamwụ kụ ẹhị yẹ yẹẹyẹẹ. Egbeju irwiye nya iyo ọọwa ku ọmwakpa nya ịgbọdọ ịtụka irwiye ịhyẹ ịlẹ ká ọnyang ọọwa hụhụ u-uhye nyaa.

¹⁰Egbeju ịịwa myịmyị ku ọmwakpa nya ịdịrịhụ irwiye ịhyẹ ịnyịnyị. Ịdịrịhụ angị ịrụ lẹpwụ nyaa lẹ, ụka nya eji ogbegbe nyaa ịwa chịpwụrụ kam lẹ, ọngọ ookpokpo lẹpwụ nya ịdịrịhụ irwiye ịịwa lẹ, ọ juwa gbeji lẹẹlẹẹ ọlẹ. Adịrahụ ookpokpo ohihi nyaa tị lẹ, ụka nya eji ogbegbe nyamwụ ọwa á pwụ lẹka. Ụka kọ tị ka gbeji lẹ, ọ ka ri adịrahụ lụka o-kpii kem.

¹¹Ukpilo nya iyo ọlẹ kọ juwa la ọhịhị ene kọ myịmyị-ị̀ juwa la ọhịhị kaka wẹẹ, ọwa ku ọmwakpa nya adịrahụ ọhaneku lẹlẹ. Adịrahụ ọọwa, ịnọ, ji ẹpwụ nya ogu nya ịdịrịhụ irwiye ịlaanyị. Ọọwa lẹ, ọ tị rụ kele ka ẹpwụ nya ayịreji ọtata lẹlẹ.”

¹²“Achụ nya iyo iwo chiriri ịlẹ ká yẹ wẹ lẹ, ị ku ọmwakpa nya ịdịrịhụ iwo chiriri ịhyẹ ịlẹ kị gbeji kpong-kpong lẹka. Ma, ị tị juwa ka ya ọngịrị nya adịrahụ oriri haa, kị ka gbeji ta iyo ọtụka ọlaanyị lala ụka nya awa ookpokpo lẹpwụ-lẹpwụ wẹẹ!

¹³Ịdịrịhụ iwo chiriri ịịwa wuu ka la irya bala obyi omeme ookpokpo. Ọọwa lẹ, ị ka tụụbwọ hi ọngịrị bala ụmụmẹ nya ọngịrị ọlala nyaa wuu ju ukpilo nya iyo ọlaanyị ụbwọ lẹlẹ.

¹⁴Ịdịrịhụ ịwẹ wuu tụchawụlẹ, ka dẹwụ ta Ọnyị ọkpịlọ nya Ohe Oluhye. Ma, Ọnyị ọkpịlọ ọọwa tị ka kụrwaa ịwa wuu. Chajị, Ọnyị ọkpịlọ ọọwa kpangga a ri Ayịbaba nya ayịbaba ịkịla wuu lẹlẹ. Ọwa tị ri Adịrahụ nya ịdịrịhụ ịkịla wuu ịnyịnyị lẹlẹ. Angịlẹ kị juwa ta Ọnyị ọkpịlọ ọọwa lẹ, ị ri angịlẹ kọ be ẹkọ be wụrụ bala angịlẹ kọ chụchụ ha ịlọmwụ lala angị chịla o-hu ọkịlẹtụ ha lụmẹ.”

¹⁵Ịnyị lẹ, olegu-ẹrụ ọọwa a byim am ịJọn yẹkẹẹ, “Iru nya enyi lụmẹ-lụmẹ ịlẹ ká yẹ ká ọnyang ọlakpara ọọwa kaka hụhụ u-uhye nyaa wẹẹ, ị ku ọmwakpa nya iru nya angịnyị ehe lụmẹ-lụmẹ bala iru nya angịnyị bala alụpwọma la datị-datị bala aloja la datị-datị.

¹⁶Achụ nya iyo iwo chiriri ịlẹ ká tị yẹ wẹ ịnyịnyị bala ukpilo nya iyo ọọwa wuu, ka juwa wụ ẹjẹ ta ọlakpara ọọwa. Ị ka nu ọnyang ọọwa ang myị́ ang nyamwụ wuu tụ ịpwụ nyamwụ gbee kọ ka ji lọhị-lọhị. Ọọwa lẹ, ị ka be ugbinyịrọ nyamwụ ri wuu lẹ, ị ka jwọọ ila hụrụ lẹlẹ.

¹⁷Chajị, Ohe Oluhye a hu irya ọọwa ju ka ẹpwụ nya ọkịlẹtụ nyaa du kị họ ká obyi omeme nyamwụ Ọwa Ohe Oluhye ka họ jịra ẹ-ẹga nya ọnyang ọọwa bwula ọlẹ kịịwa wuu la irya ookpokpo nyọka tụụbwọ hi ọngịrị nya adịrahụ oriri bala eji ogbegbe nyaa wuu ju ukpilo nya iyo ọọwa ụ-ụbwọ gbee pwụ ụka ọlẹ ká ẹla ọlọnụ nya Ohe Oluhye ka họ jịra lẹlẹ.”

¹⁸Olegu-ẹrụ ọọwa myịmyị byim am ịJọn yẹkẹẹ, “Ọnyang ọlẹ ká tị yẹ wẹ lẹ, ọwa ku ọmwakpa nya epweji ọtụka ọlẹ kọ la ọngịrị juwa kpẹhị rịrị ịdịrịhụ la datị-datị ilodehe ọlẹ wuu lẹlẹ.”