Read idege ỌWỤRỤỤ-WỤRỤ 18 Bible Online

ỌWỤRỤỤ-WỤRỤ 18 - idege bible

ỌWỤRỤỤ-WỤRỤ 18

¹Ịnyị, ụka ká ọlẹ chịpwụrụ kpá lẹ, am ịJọn a chẹhị kaka yẹ olegu-ẹrụ ọkịla ọhẹ kọ juwa hireji bwu epwoohe, ọlẹ kị ya ọngịrị ọtụka-ọtụka họọ lẹlẹ. Owuruu-wuru nya ahịgboo ọlẹbyẹbyị nya olegu-ẹrụ ọọwa chị kụrụ odehe ọlẹ wuu.

²Ịnyị, olegu-ẹrụ ọọwa a juwa ya ẹla dodehe lomyi ọtụka-ọtụka gboo yẹkẹẹ, “Ọ tụrụ lẹ! Ọ tụrụ lẹ! Epweji ọtụka nya ịBabịlọn, ọ tụrụ lẹ! ỊBabịlọn ọwẹ a ri ẹpwa ọkụkụ nya alegu inyibyi wuu lẹlẹ. Iru nya alegu ịtịpyọ ịnyị myị́ ịnyị wuu lẹ, ụ-ụwa, ị tị kụ ẹpwa lẹlẹ! Ụma nya ịchịnụ ịtịpyọ bala ịchịnụ ịháha-ka wuu tị lẹ, ịBabịlọn ọwẹ a tị ri ẹpwa nyaa ịnyịnyị lẹlẹ.

³Chajị, alepwoja myị́ epwoja wuu odehe ọlẹ ye ere nya ụya ọhọhọ onyobyi nyamwụ nwa lẹ. Alịdịrịhụ la datị-datị nya odehe ọlẹ wuu tị họ ụya ta ọnyang ọọwa ịnyịnyị lẹ. Ụma nya angịnyị la datị-datị ịlẹ kị tị juwa teleko nya ụdụ ọkpụkpụ wuu odehe ọlẹ lẹ, ị tị ri alụdụ wuu bwula ọhịhị ohideeji nya ịBabịlọn ọọwa ọlẹ kị juwa kpa dịnya ịnyịnyị tọọ lẹ.”

⁴Ọọwa lẹ, m wo omyi ọkịla ọhẹ kọ juwa ya ẹla bwu epwoohe yẹkẹẹ, “Anụ angịnyị nyam Am Ohe Oluhye, anụ gba kpehe bwu ẹpwụ nya epweji nya ịBabịlọn ọwẹ mẹ. Ó-ri ịnyị ka, tụbwọ aalẹ, anụ juwa ka họ ịhọbịrị nya alụwa taa ịnyịnyị lẹ. Ó-ri ịnyị ka, tụbwọ aalẹ, akama ọlẹ kọ wẹẹ ka wẹ chaa ọgụ tịtị ka wẹ chịnụ ọgụ ịnyịnyị lẹ!

⁵Chajị, ịhọbịrị ịhọhọ nya ala ịBabịlọn ịwẹ la uhye lụmẹ-lụmẹ kaka gu epwoohe lẹ. Ohe Oluhye tị kpịtịya nya ịhọbịrị inyibyi nyaa ịlẹ wuu kị họ ịnyịnyị lẹ.

⁶Lẹ, anụ kele kaka họ ịBabịlọn ịwẹ ang onyobyi kwiwa nya ang ọtịpyọ ọlẹ wuu kọ họ angịkịla mẹ. Kanụ nwụ ịBabịlọn ọwẹ uri mwụ aba ba ang inyibyi ịlẹ wuu kọ họ ịnyịnyị mẹ. Ukoku ọlẹ kọ kpa me ang onyobyi ha angịnyị ehe lẹ, anụ me akama myị ukoku ọọwa mwụ aba ba họọ kwiwa nya ọọwa ịnyịnyị mẹ.

⁷Jaabwọ ká ịBabịlọn ọwẹ juwa kpa ịlọmwụ ka uhye ngana-ngana kaka ba, bala o-juwa la ọhịhị oluhye kaka ba wuu lẹ, anụ kele kanụ me akama bala ang ọjụjụ lụmẹ-lụmẹ họọ ịnyịnyị kwiwa nya ọọwa mẹ. Chajị, ọwa ayịdang juwa chị ogu ẹ-ẹpwụ nya ọkịlẹtụ nyamwụ yẹkẹẹ, ‘Am ri ọngọ la ihi-ihi lụmẹ lala adịrahụ ọnyang lẹ. Ḿ ri ahụ-ogu kpong-kpong ka. Ḿ tị ka yẹ ida ọbaba ẹ-ẹhị kpá ẹnẹnẹhẹ kaka ịnyịnyị.’

⁸Chajị nya ọọwa lẹ, akama ọtụka ka wẹ chọọ ọgụ ẹ-ẹpwụ nya ahị ọpyẹpyẹ ookpokpo pyii lẹ. Ẹdụrụ onyobyi bala ida ọbaba bala imyi nya ẹbyahị ọtụka-ọtụka ka wẹ chọọ ọgụ. Ọọwa lẹ, ị ka du ila kaka rwọọ wuu gbanggbang lẹlẹ. Chajị, Ọngọlahị Ohe Oluhye ọlẹ kọ ri Ọngọ ka lọọ eje lẹ, Ọngọ ọtụka nya ịlẹhị-ịlẹhị, ọ ri lẹ!”

⁹Ọọwa lẹ, ịdịrịhụ la datị-datị nya odehe ọlẹ wuu ịlẹ kị kaa họ ụya ọọwa tọọ bala o-juwa kaa chẹhị nyanya nya okpoko ọlala nyamwụ tọọ ịnyịnyị, a ka juwa jida bala o-juwa chị eko nya ịlẹhị-ịlẹhị o-oluhye nya ịBabịlọn ọọwa lụka ọlẹ kị ka chẹhị kaka yẹ ịmwụ-ila nya ila ọlẹ kọ ka juwa rwọọ nya ịlẹhị-ịlẹhị lẹlẹ.

¹⁰Ị ka kele kaka godayị rịrị hwẹẹẹ lẹ, ị ka juwa juhi ọtụka-ọtụka chajị nya akama ọtụka ọlẹ ká ịBabịlọn ọọwa juwa yẹ lẹ, ị ka juwa yẹkẹẹ, “À ri enyi gu obyi lẹ! À ri enyi gu obyi lẹ! Ahụ epweji ọtụka! Ahụ epweji ọtụka nya ịBabịlọn, ẹ-ẹpwụ nya awa ookpokpo ọlam-ọlam ọlẹ, eje owuwu nya Ohe Oluhye a jẹ́ chabwọ kaka mịlang wẹ lẹlẹ?”

¹¹Ịnyị lẹ, angị da ọhị ịtụka nya odehe ọlẹ wuu a juwa jida bala o-juwa bida nya ịlẹhị-ịlẹhị chajị nya ịBabịlọn ọọwa lẹlẹ. Chajị, ọngọngọhẹ á myị kele kaka ra olo nya ihi nyaa ọlẹ kị kaa kpa da ịnya ene-ene kaka.

¹²Olo nya okpoko ịgọm bala okpoko onyoowuru bala ajwọ ịlịnya bala ogbe bala ịpwụ ịnyịịla-ịnyịịla bala ịpwụ ibwuru-bwuru bala ịpwụ nya ihiriki bala ịpwụ ịnyịmịla bala ụma nya ekeji ịlịnya ịnyịịla-ịnyịịla la datị-datị bala ang-abwọ ịlẹ kị kpa ịka nya inyi họ wuu bala ịlẹ kị kpa ekeji ịlịnya lụmẹ họ wuu bala ịlẹ kị kpa oje ọnyọmịla họ wuu bala ịlẹ kị kpa oje onyobiri họ wuu bala ịlẹ kị kpa ajwọ ịnyịịla-ịnyịịla họ ịnyịnyị.

¹³Ị kpa ụma nya ang ọ-kpa ju ang oriri ọlẹ kọ la ịpyọ ị-lala egbahịịchwọ bala ụma nya ịtẹ nya alebekee la datị-datị bala ida ichoru kwọkwọ ịlẹ kị kaa kpa kịla iya bala ụma nya ida ịwụwụ ịlẹ kị wụrụ “ịmaa” bala “ịfụrangkinsẹnsị,” bala ere ịnwanwa bala ida oriri bala ịrụ nya ambakpa bala ajẹ nya ịrayịsị ịlẹ kị wụrụ “iwiiti,” bala ịna bala ịmwụ bala anyịrẹ bala ang ọrụnyẹ ọlẹ ká ụnyịrẹ kaa gbile bala anyịhị ịlẹ kị juwa kpa ra lala iyo. Ma, angịnyị ehe, ị tị ri lẹ.

¹⁴Alọhị ịtụka ịịwa myịmyị byi epweji nya ịBabịlọn ọọwa yẹkẹẹ, “Ụka nya ọjwọọjwọọ nya ang ọ-ma ugbinyịrọ nyang ma chịpwụrụ kam hing lẹ. Iru nya ang ịnyịịla bala ang nya ọhịhị oluhye ịlẹ wuu ká tị kaa charịnya nyaa wuu lẹ, á tị ka jẹ́-ẹ waa ọyị kpá myị́ ẹnẹnẹhẹ kaka.”

¹⁵Angịlẹ wuu kị tị juwa rụnyẹ nya okpoko gbee kị kpụ ụdụ, bwula o-juwa kpa olo nya ang-abwọ nya ọhịhị ohideeji nyamwụ da ịnya wuu lẹ, angịịwa ka rụ kaka godayị rịrị hwẹẹẹ, juwa juhi ọtụka-ọtụka chajị nya akama ọtụka ọlẹ ká epweji nya ịBabịlọn ọọwa juwa yẹ. Ọọwa lẹ, angịịwa a ka juwa jida bala o-juwa ka bida gbogbogbo lẹlẹ.

¹⁶Ị ka juwa ya dodehe yẹkẹẹ, “Inyiribyi chọọ! À ri enyi gu obyi lẹ, ahụ epweji ọtụka nya ịBabịlọn lẹ. Ahụ ọngọlẹ, ịnọ, ká kaa kụrụ ịwụrụ inyiiwuru ịnyịịla-ịnyịịla bala ịwụrụ ibwuru-bwuru bala ịnyịmịla bala ọ-kaa ju ịlọng olo nya ịjang nya ikpoko ịgọm bala ịnya ajwọ ịlịnya lụmẹ bala ịnya ogbe la datị-datị wuu.

¹⁷Ọọwa lẹ, ẹ-ẹpwụ nya awa ookpokpo ọlam-ọlam ọlẹ lẹ, ụdụ nyang ahụ ịBabịlọn ọwẹ wuu a jẹ́ ri ang nya ayịreji ọtata wẹ lẹ ka?” Ịnyị lẹ, angịlẹ wuu kị ri alegbeju ịgbahị ị-kaa kpa ụgbọ nya enyi rụnyẹ ẹ-ẹpwụ nya ihu ọtụka wuu bala angịlẹ kị juwa ju ụgbọ nya enyi tụ aha wuu bala angịlẹ kị ri alụkụrwọ ilekpeleji nya olegbeju ọgbahị nya ụgbọ nya enyi anyị wuu bala alọhị ịlẹ kị kaa ga ẹ-ẹpwụ nya Ihu ọtụka anyị wuu, a rụ kaka godayị rịrị ẹ-ẹga ọlụrụ hwẹẹẹ, juwa kpẹhị yẹ ịBabịlọn ọtụka ọọwa lẹlẹ.

¹⁸Ọọwa lẹ, angịịwa a juwa ya ẹla la omyi o-gboo rụ́ ịmwụ-ila ọtụka-ọtụka ọlẹ kọ juwa kpehe bwu ẹpwụ nya ila ọlẹ kọ juwa rụ epweji nya ịBabịlọn ọọwa lẹ, ị juwa ya dodehe yẹkẹẹ, “Ahyu! Epweji oyina kpá odehe ọlẹ wuu, a tị́ ri ọtụka lala ahụ epweji nya ịBabịlọn myị́ wẹẹ?”

¹⁹Ọọwa lẹ, ịwa wuu a juwa bida nya ịlẹhị-ịlẹhị, juwa go ekuruwa kụrụ ịlaa e-egbeju lẹ, ị juwa chị eko gboo juwa yẹkẹẹ, “Ahyu! Ahyu! Epweji ọtụka nya ịBabịlọn ẹ-ẹga ọlẹ ká angịlẹ wuu kị la ụgbọ nya enyi kaa kele kaka da ọhị bwu, du kị kaa ri angị kpụ ụdụ lẹ, ọọwa, ahụ epweji ọwẹ a jẹ́ ta ayịreji ẹ-ẹpwụ nya awa ookpokpo lẹlẹ?”

²⁰Anụ alepwoohe wuu, anụ chị ọkẹkẹnị nya ịlẹhị-ịlẹhị o-oluhye nya ọọwa mẹ. Anụ angị ịgọgọ nya Ohe Oluhye bala alẹrụ ọnyịịla nya Ohe Oluhye wuu bala angị yẹ ọmwụ nya Ohe Oluhye wuu, anụ juwa chị ọkẹkẹnị ọtụka ịnyịnyị mẹ. Chajị, Ohe Oluhye wu epweji nya ịBabịlọn ọwẹ uri kwiwa nya ang onyobyi ọlẹ kọ họnụ wuu lẹ.

²¹Ịnyị lẹ, olegu-ẹrụ ọtụka-ọtụka ọhẹ a hu ẹjwọ ọtụka ọhẹ ọlẹ kọ lala igo o-go ang ọtụka-ọtụka kpa kaka da ju ka ẹpwụ nya ihu ọtụka jurum lẹ, ọ ya ẹla dodehe yẹkẹẹ, “Ịịwẹ, ị tịtị ka hu epweji ọtụka nya ịBabịlọn ọwẹ lẹga-lẹga kpa kaka da mileji kpịlagada lẹ, ọ ka ta ayịreji gbanggbang lẹ, ẹgẹgẹhẹ nyamwụ a ka hi juwa ị-jẹ́-ẹ yẹ kpong-kpong kaka lẹlẹ.

²²Ọọwa lẹ, omyi nya ogumogu nya angị du ogum bala angị du ayịlọ bala angị du ohwe bala angị du opyike wuu lẹ, ọngọngọhẹ á ka wo omyi nyaa e-epweji nyang ahụ ịBabịlọn ọwẹ kpong-kpong myịmyị kaka. Angịlẹ kị tị ri angị kaa họ ụna la datị-datị e-epweji nyang ahụ ịBabịlọn ene-ene lẹ, ọngọngọhẹ nyaa á tị ka hi juwa kaka. Anụ nya igo o-go ang ọlẹ ká angịnyị kaa wo iru nyamwụ e-epweji nyang gbalẹ-gbalẹ lẹ, ị́ tị ka juwa wo myịmyị kaka.

²³Ila nya otinika ịlẹ kị tị kaa wuru wuu e-epweji nyang ahụ ịBabịlọn ene-ene lẹ, ị́ tị ka juwa wuru myịmyị kaka. Omyi nya ọrụ-ahụ onyeewe bala ahụ onyeewe ọlẹ kị kaa wo e-epweji nyang ahụ ịBabịlọn ene-ene lẹ, ọ́ tị ka juwa myịmyị kaka ịnyịnyị. Chajị, ịnọ, alọhị ịtụka ilepweji nyang ahụ ịBabịlọn, a ri angị ịtụka ịgụgụ wuu ilodehe ọlẹ ene-ene lẹlẹ. Ahụ epweji nya ịBabịlọn ọwẹ a tị ri ọngọlẹ ká kaa kpa ịnwa ọmwụmwụ nyang wuu hụ alepwoja myị́ epwoja nya odehe ọlẹ wuu ahị ịnyịnyị lẹlẹ.”

²⁴Epweji nya ịBabịlọn ọwẹ kpangga a tị ri ẹga ọlẹ kị nwụ iru nya alọmwụ nya Ohe Oluhye bala iru nya angị ịgọgọ nya Ohe Oluhye bala iru nya angịkịla ịlẹ kị nwụ odehe ọlẹ wuu du ká ịwọ nyaa juwa da ọba ụ-ụwa gbụrụ-gbụrụ lala enyi ịnyịnyị lẹlẹ.