Read idege ỌWỤRỤỤ-WỤRỤ 19 Bible Online

ỌWỤRỤỤ-WỤRỤ 19 - idege bible

ỌWỤRỤỤ-WỤRỤ 19

¹Ụka ká ọwẹ chịpwụrụ kpá lẹ, am ịJọn a wo omyi ẹla nya iru nya angịnyị ịhyẹ kị juwa ya ẹla gboo e-epwoohe yẹkẹẹ, “Aleluya! Ọchịda bala ogbo wuu bala ọngịrị wuu a juwa ha Ohe Oluhye nyahị!

²Chajị eje ọlala nya Ohe Oluhye ri eje nya ịlẹhị bala eje ọkpẹẹkpẹẹ. Ọwa ayịdang ya eje wu ịBabịlọn ọlakpara ọtụka ọlẹ kọ bịrị ọhịhị nya alodehe ọlẹ wuu chịkẹ-chịkẹ bwula ụya ọhọhọ lụmẹ nyamwụ ọlẹ kọ mẹjaa lẹ, Ohe Oluhye tị yẹ ịBabịlọn ọọwa akama kwiwa nya ịwọ nya anchẹ nya Ohe Oluhye ịlẹ ká ịBabịlọn ọwẹ nwụ ịnyịnyị lẹ.”

³Omyi nya angịịwa myịmyị ya dodehe yẹkẹẹ, “Aleluya! Ịmwụ-ila nya ayịreji ọtata nya epweji nya ịBabịlọn ọwẹ, juwa rụ kele ka uhye-ọgba pyịyọọ gbe oyi myị́ oyi lẹ.”

⁴Ịnyị lẹ, ịgabwọ angị ohu kụrụ ine ịlịlahị nya ẹchị Adịrahụ nya Ohe Oluhye bala ang ịlahị-ịlahị ine ịlụwa wuu, a hịda ka ịpyị lẹ, ị juwa gbịgba ha Ohe Oluhye Ọwa ọngọlẹ kọ hụhụ u-uhye nya ẹchị adịrahụ nyamwụ lẹ, ị yẹkẹẹ, “Amẹn. Aleluya!”

⁵Ịnyị lẹ, omyi ọhẹ a juwa ya ẹla bwu uhye nya ẹchị Adịrahụ nya Ohe Oluhye yẹkẹẹ, “Anụ anchẹ nya Ohe Oluhye wuu, anụ gwogbo ha Ohe Oluhye nyahị mẹ. Anụ angịlẹ wuu kanụ ri angị juhi nyamwụ wuu, tụụnụ anụ angị ịtụka wuu lee angị ichiche, anụ gwogbo ha Ohe Oluhye nyahị mẹ.”

⁶Ịnyị lẹ, m chị ụrụ kaka wo omyi ẹla ọlẹ kọ lala omyi nya iru nya angịnyị kị juwa ya ẹla lala anụ nya iru nya enyi ịtụka-ịtụka ịlẹ kị juwa mwụ bala anụ nya ịkata ịtụka nya ịkpala kị juwa ya ẹla lomyi o-gboo yẹkẹẹ, “Aleluya! Chajị, Ọngọlahị Ohe Oluhye nyahị Agụgụ Ọtụka juwa gbe eji lala adịrahụ lẹ.

⁷Anụ kẹwẹ, kahị chị ọkẹkẹnị nya ịlẹhị-ịlẹhị bala o-juwa ya ụya, kahị juwa gwogbo ha Ohe Oluhye mẹ. Chajị, ụka nya ọkẹkẹnị ọchịchị nya ahụ oyeye nya Ọnyị ọkpịlọ nya Ohe Oluhye pwụ eji lẹ. Ahụ onyeewe nyamwụ tị nwụla ịlọmwụ nọ kpá ịnyịnyị lẹ.

⁸Ị kpa apwụ onyoowuru okeri-keri ọlẹ kọ hiigu lụmẹ, juwa hụ́ myịrị-myịrị kpa kịla ahụ onyeewe ọọwa kọ ka kpa ju ịlọmwụ agidi lẹ.” Apwụ onyoowuru ọọwa a ri abwẹla ọnyịịla ọhọhọ nya angị ịgọgọ nya Ohe Oluhye lẹ.

⁹Ịnyị, olegu-ẹrụ ọhẹ a ya ẹla tam am ịJọn yẹkẹẹ, “Da ala ịlẹ ju ụ-ụpwụ mẹ. Ahị ọwawa ka juwa ha angịlẹ wuu kị ka wụrụ ẹpwa kaka ri ang oriri nya ahụ onyeewe oyeye nya Ọnyị ọkpịlọ nya Ohe Oluhye.” Ọọwa lẹ, olegu-ẹrụ ọwẹ a myịmyị byim am ịJọn yẹkẹẹ, “Ala ịwẹ kam ya wẹ lẹ, ẹla nya ịlẹhị-ịlẹhị nya Ohe Oluhye, ị ri lẹ!”

¹⁰Ịnyị lẹ, am ịJọn a hịda keji, juwa tịtọ kam ka gbịgba họọ lẹ, olegu-ẹrụ ọọwa a byim yẹkẹẹ, “Ba! A họ ịnyị kpong-kpong ka. Chajị, am ayịdang lẹ, m tịtị ri ọnchẹ ọ-myị ẹrụ ha Ohe Oluhye lala ahụ-ahụ bala anyadang ịkịla ẹ-ẹpwụ nya ịKịrayịsị ịlẹ kị ri alibeenu nya ịlẹhị-ịlẹhị nya iJisọsị! Lẹ, Ohe Oluhye ayịdang kem, a ka gbịgba ha lẹlẹ.” Chajị, ibeenu nya ẹla nya ịlẹhị nya ịKịrayịsị oriri dodehe kpangga, a tọchị ri ang o-ju ẹjẹẹ nya olegu nya ọmwụ ọyẹyẹ nya Ohe Oluhye lẹ.

¹¹Ịnyị lẹ, am ịJọn a chẹhị kaka yẹ ká epwoohe wụrụ dụwa hwoo lẹ, m yẹ ụnyịrẹ onyoowuru ọhẹ ụ-ụwa lẹlẹ. Ọngọlẹ kọ kụ u-uhye nya ụnyịrẹ ọọwa lẹ, ị wụrụ ẹnyị nyamwụ yẹkẹẹ, Ọngọ chịla o-hu ọkịlẹtụ ha bala Ọngịnyị nya ẹla nya ịlẹhị. Eje ọlala nyamwụ bala ẹwụ ọdada nyamwụ wuu ri ịnya abwẹla ọnyịịla kem.

¹²Egbahị ịlẹpwụ nya ẹhị nyamwụ lala ẹlẹlẹ nya ila ọlẹ kọ juwa wuru. Ọ kụrụ iru nya ikpo nya adịrahụ u-uhye nya egbeju nyamwụ. Ị da ẹnyị ọhẹ bọọ ụ-ụwa, ọlẹ ká ọngọngọhẹ ọkịla á jẹ́ etu nya ẹnyị ọọwa dala ọwa ayịdang la ịlọmwụ kaka.

¹³Awụrụ ogbileji ọlẹ kọ kụrụ lẹ, ị ya kpẹpwụ nya ịwọ. Ẹnyị ọlẹ kị wụrwọọ ri yẹkẹẹ, Ẹla nya Ohe Oluhye.

¹⁴Ọọwa lẹ, iru nya ịsọja ịdẹwụ ilepwoohe wuu ịlẹ kị kụrụ ịwụrụ ịnyịịla-ịnyịịla ịlẹ kị pwo owuru keri-keri, kị la cheri-cheri lụmẹ lẹ, ịsọja ịịwa tịtị juwa kụ anyịrẹ inyiiwuru juwa bọọ jẹ ịnyịnyị.

¹⁵Oge ọhẹ ọlẹ kọ la iri lụmẹ kaka kpoye, juwa gba kpehe bwu ọnụ nyamwụ nyọka kele kaka nwụ alepwoja la datị-datị ilodehe ọlẹ wuu. Ọọwa lẹ, ọ ka kpa ọgọdọ nya oje-oje, juwa gbeji lala Adịrahụ nya alodehe ọlẹ wuu lẹlẹ. Ọwa-à ri ọngọlẹ kọ ka kpa ụbwọ nya ịlọmwụ pyị enyi nya ikẹjẹ-awụrụ ọtụka nya Ohe Oluhye Agụgụ kwẹẹ ju ang ẹ-ẹpwụ nya ang ọ-kpa pyị ere nya egbe nya ekeji la ẹnụtụrụ ọọwa lẹlẹ.

¹⁶Ẹnyị nyamwụ ọlẹ kị da bọọ a-awụrụ ogbileji nyamwụ bala ọlẹ kị da bọọ ugbẹta nyamwụ ri yẹkẹẹ, “Adịrahụ nya ịdịrịhụ ịkịla wuu bala Ayịbaba nya ayịbaba ịkịla wuu.”

¹⁷Ịnyị, am ịJọn a yẹ olegu-ẹrụ ọhẹ ọlẹ kọ godayị rịrị u-uhye nya ẹnụ oluhye-ọgba lẹ, ọ juwa ya ẹla lomyi o-gboo ta ịchịnụ iluhye-ọgba ịhyẹ ịlẹ kị juwa hụhụ bwu ẹpwarịrị nya egbamwụ opyiipyii nya epwoohe yẹkẹẹ, “Anụ kẹwẹ kaka jịra, kanụ ri ang oriri ọtụka ọlẹ ká Ohe Oluhye nwụlanọ hanụ mẹ.

¹⁸Anụ kẹwẹ kanụ kaka ri iyo nya egu nya ịdịrịhụ wuu bala ịnya alegbeju ịgbahị nya ịsọja la datị-datị wuu bala iyo nya egu nya angị ri alẹga ịtụka wuu bala iyo nya anyịrẹ bala iyo nya egu nya angịlẹ kị kụ anyịrẹ ịịwa bala iyo nya egu nya angịnyị ehe wuu, tụ angịlẹ kị la ịlaa la bala angịlẹ kị ri anyịhị riri bala angịlẹ kị ri angịnyị ichiche bala angị ri angịnyị ịtụka wuu ịnyịnyị mẹ.”

¹⁹Ịnyị, am ịJọn a chẹhị kaka yẹ ukpilo nya iyo onyobyi ọọwa bala ịdịrịhụ ilodehe ọlẹ, tụ ịsọja nyaa wuu, kị tụ ịlaa kaka guru nyọka dẹwụ ta ọngọlẹ kọ hụhụ u-uhye nya ụnyịrẹ bala ịsọja nyamwụ anyị ịịwa lẹlẹ.

²⁰Ọọwa lẹ, ị wu ukpilo nya iyo ọọwa bala ọlọmwụ ọnọọkịla ọlẹ kọ họ ang i-ju ẹjẹẹ ịlẹbyẹbyị la datị-datị, juwa kpa hụ alodehe ịlẹ wuu ahị, lẹlẹ. Angịịwa ri angịlẹ kị ye ịna ọchịchị nya iyo onyobyi ọọwa bala angịlẹ kị gbịgba ha ukpeku nya iyo ọọwa ịnyịnyị. Ịnyị lẹ, ị hu iyo ọọwa bala ọlọmwụ ọnọọkịla ọọwa angị imimiiye ju ka ẹpwụ nya ẹmwụ nya ila ọtụka-ọtụka nya ajwọ ọlẹ kị wụrụ “ibirim-siton” ịlẹ kị juwa wuruu-wuru lẹlẹ.

²¹Ọọwa lẹ, ọngọlẹ kọ hụhụ u-uhye nya ụnyịrẹ a kpa oge ọdẹwụ nyamwụ ọlẹ kọ juwa gba kpehe bwu ọnụ nyamwụ nwụ angịnyị ehe ihihi ilodehe ọlẹ wuu lẹlẹ. Ọọwa lẹ, ịchịnụ iluhye-ọgba wuu a kele kaka ri iyo nya egu nya angịnyị ehe ịịwa wuu wu ẹpwụ kpọng kpọng lẹlẹ.