Read idege ỌWỤRỤỤ-WỤRỤ 2 Bible Online

ỌWỤRỤỤ-WỤRỤ 2 - idege bible

ỌWỤRỤỤ-WỤRỤ 2

¹“ỊJọn, aa da ala ịlẹ du kịla olegu-ẹrụ nya ịchọọchị nya ala Ẹfẹsọsị mẹ. Ẹrụ ọlẹ bwu ọnụ nya ọngọlẹ kọ kpa ịdịchụ irwiye u-upwuriri nyamwụ. Ọngọọwa a ri ọngọlẹ kọ juwa jẹdịyẹ ẹ-ẹpwarịrị nya ang ị-ya itinika rịrị irwiye ịlẹ kị kpa okpoko ịgọm-ịgọm kem họ lẹ.”

²“Anụ ala Ẹfẹsọsị ee, am ayịdang jẹ́ ụma nya ụkụrwọ ọlẹ kanụ juwa họ wuu, jaabwọ kanụ wẹẹ nwụ ịlọnụ la ụkụrwọ ọhọhọ bala ugbodu ojuju onyudiyo nyanụ wuu bala jaabwọ kanụ kaa myị-ị ji oye nya angị inyibyi kpong-kpong ka. M jẹ́ ịnyịnyị, jaabwọ kanụ kaa juwa dịrẹ ẹla oluhye nya angịlẹ kị kaa wụrụ ịlaa alẹrụ ọnyịịla nya ịKịrayịsị, ụka ọlẹ kịịwa ayịdang á tị ri alẹrụ ọnyịịla ọhẹ-lọhẹ riri kpong-kpong ka, gbee kanụ jẹ́ yẹ angịịwa ọmwụ dodehe ẹ-ẹpwụ nya ọnọọkịla omeme nyaa ọọwa myị́.

³M jẹ́ kanụ la ugbodu ojuju onyudiyo lụmẹ bala o-juwa yẹ akama nya ịlẹhị-ịlẹhị chajị nya ẹnyị nyam bala jaabwọ kanụ myị ká abwọ a chị́ịnụ pyẹpyẹ ẹ-ẹpwụ nya ọmyịmyị ọlala nyanụ kpong-kpong ka.

⁴Ọ tị lịnyị kpá odu ịnyị! M la ẹla o-hi ọnụ nyanụ ka ya dodehe jenu yẹkẹẹ, ọháha nya ịlẹhị-ịlẹhị ọlẹ kanụ la ẹ-ẹga nyam ene-ene lẹ, anụ tụụbwọ hyoo deeji lẹẹlẹẹ lẹ.

⁵Chajị nya ọọwa lẹ, anụ me irya ọgwọgụ kanụ kpịtịya nya ụbẹẹtụ nya ẹga ọlẹ kanụ bwu pyị mileji, kanụ yẹ irya da kaka họ ụkụrwọ ọnyịịla nya ọgbanyẹ-ọgbanyẹ ịlẹ wuu kanụ kaa họ ene-ene mẹ. Ó-ri kanụ myị yẹ irya da ka, tụbwọ aalẹ, m juwa ka warị ahyaahị kaka hu otinika nya ọhịhị onyeewe nyanụ hi uhye nya ang ọ-ya otinika rịrị lẹ! Kẹnẹ-kẹnẹ, ó-ri kanụ yẹ irya da lẹ, mẹ ịnyị!

⁶Ma, m tị ka ye ang ọnyịịla nyanụ ọlẹ kanụ họ ya dodehe jenu ịnyịnyị yẹkẹẹ, ụkụrwọ onyobyi nya alogu ọlẹ kị wụrụ ala iNikolasị ịwẹ ká ọhọhọ nyaa wụụnụ ẹjẹ lụmẹ, jaabwọ kọ tịtị wụm am ayịdang ẹjẹ ịnyịnyị lẹ, anụ họ hiigu lụmẹ.”

⁷“Ọng myị́ ọng ọlẹ kọ ju ụrụ ọ-ka kpa wo ẹla lẹ aalẹ, ọngọọwa a wo etu nya ẹla ọlẹ ká Olegu Ịgọgọ wẹẹ ya ta ala ịchọọchị wuu yẹẹyẹẹ mẹ. Ọng myị́ ọng ọlẹ kọ la ọkụrụ-kụrụ bwu ẹpwụ nya uya ọmama nya ọhịhị nya ọmyịmyị ọlala nyamwụ lẹ aalẹ, ọngọọwa, m ka ya iwe da ha kọ ka ri ugbe nya okoji nya ọhịhị ọlẹ kọ rịrị ụ-ụwa ị-ịParadayịsị ẹga ọmwịịnyọ nya Ohe Oluhye pyii lẹlẹ.”

⁸“ỊJọn, aa da ala ịlẹ ju ụ-ụpwụ du kịla olegu-ẹrụ nya ịchọọchị nya ala ịSịmaana mẹ. Ẹrụ ọlẹ bwu ọnụ nyam am ọngọlẹ kọọwa ayịdang kpangga a ri ọhọhẹ-ọhọhẹ bala ohyẹẹkpẹ-ẹkpẹ nya ang wuu bala o-ri ọngọlẹ kọ gbugbu kpá, ene kọ myịmyị wuleji bwula igu, juwa la ọhịhị pyịyọọ lẹ.”

⁹“Anụ ala ịSịmaana ee, am ayịdang jẹ́ ụma nya ị-tụ pyịpyị ịtụka ịlẹ kanụ juwa ẹ-ẹpwụ nyaa bala ụma nya ẹbyahị okwookwee nya ang-abwọ nya odehe ịlẹ kanụ juwa ẹ-ẹpwụ nyamwụ ịnyịnyị. Ma, anụ tị ri alụdụ ẹ-ẹpwụ nya ang nya olegu. M myịmyị jẹ́ ang chajị nya ala inyibyi iyaya pyị nya angịhyẹ rụ́ ẹnyị nyanụ ịnyịnyị, bwu ọnụ nya angịlẹ kị juwa wụrụ ịlaa yẹkẹẹ, ịwa nyị ri ala iJuu, kịịwa ayịdang á tị ri ala iJuu ọhẹ-lọhẹ riri ị-ịlahị nya Ọngọlahị kpong-kpong ka. Ma, alọjịra-jịra nya Ohe Onyobyi ayịdang kpangga, angịịwa a ri lẹ.

¹⁰Anụ juhi nya ụma nya akama ọhẹ-lọhẹ ọlẹ kọ wẹẹ ka wẹ chịnụ ọgụ kpong-kpong ka. Anụ yẹ mẹ! Ohe onyobyi tụbwọọ juwa ka họ kị ka wu angịhyẹ nyanụ kpa kaka ju agba lẹ! Ọmayẹ ọtụka-ọtụka juwa ka wẹ chịnụ ọgụ. Anụ juwa ka la ọ-tụ pyịpyị bawụlẹ-bawụlẹ lala ẹnụtụrụ-iwo chiriri. Ma, ánụ tị-ị chị la o-hu ọkịlẹtụ ha gbee pwụ igu mẹ. Aalẹ, m tịtị ka hu okpo ọkụrụ egbeju nya ọhịhị ọmyịmyị-ka hanụ ị-ịlahị ịnyịnyị pyii lẹ.”

¹¹“Ọng myị́ ọng ọlẹ kọ ju ụrụ ọ-ka kpa wo ẹla lẹ aalẹ, ọngọọwa a wo etu nya ẹla ọlẹ ká Olegu Ịgọgọ wẹẹ ya ta ala ịchọọchị wuu mẹ. Ọng myị́ ọng ọlẹ kọ la ọkụrụ-kụrụ bwu ẹpwụ nya uya ọmama nya ọmyịmyị ọlala nyamwụ ọwẹ kọ wẹẹ ma lẹ aalẹ, igu ogbugbu oheeye, á ka ya ọnụ gu ọngọọwa myị́ kpong-kpong kaka.”

¹²“ỊJọn, aa da ala ịlẹ ju ụ-ụpwụ du kịla olegu-ẹrụ nya ịchọọchị nya ala ịPẹẹgamọm mẹ. Ẹrụ ọlẹ bwu ọnụ nya ọngọlẹ kọ kpa oge oliri manya-manya ọlahị imiiye ụ-ụbwọ nyamwụ.”

¹³“Anụ ala ịPẹẹgamọm ee, m jẹ́ ká ẹga ọlẹ kaanụ ayịdang kụ ẹpwa lẹẹlẹẹ kpangga a ri ẹga ọlẹ ká Ohe Onyobyi hu ẹchị adịrahụ nyamwụ kaka da hụhụ wẹ. M jẹ́ jaabwọ kaanụ ayịdang wẹẹ yụbwọ chị ẹnyị nyam kpa ụ-ụwa gogo lụmẹ, du kanụ myị pwam rwarụ bwula ọmyịmyị ọlala ẹ-ẹga nyam ka lẹ ka. Anụ họ ịnyị dọmwụ ju ka ụka nya ẹnụtụrụ-ị-chị ila-ila ọlẹ kị kpa nwụ Antipasị, ọngọlẹ kọ ri olibeenu nyam bala o-ri ọngọ chị la o-hu ọkịlẹtụ ha lụmẹ lụka ọlẹ kị nwọọ ẹ-ẹpwarịrị nyanụ, ẹ-ẹga ọlẹ ká Ohe Onyobyi ayịdang nọ ẹpwa kpangga.

¹⁴Ma, ọ tị lịnyị kpá odu ịnyị! M ye ala ịmanyị-ịmanyị ka ya tụụnụ pyịpyị. Ala ịịwa ri yẹkẹẹ, angịhyẹ lẹpwarịrị nyanụ ri angịlẹ kị juwa yụbwọ chị ọmẹjẹ onyobyi nya ịBẹlam, ọngọlẹ kọ mẹjẹ ịBalakị jaabwọ kọ ka bwu hu ang ọkịlata nọ ụ-ụgbẹyị gbe anjwo nya ala Isirẹlụ ugbeene. Ọlịnyị, a du kọ họ ká anjwo nya ala Isirẹlụ juwa ye iyo ịlẹ kị ya kịla iya ha ijiga ri bala o-juwa họ ụya ịnyịnyị lụka ọọwa lẹ.

¹⁵Anụ myịmyị la angịhyẹ ẹ-ẹpwarịrị nyanụ ịlẹ kị juwa yụbwọ chị ọmẹjẹ onyobyi nya alogu ịlẹ kị wụrụ ala iNikolasị ịnyịnyị.

¹⁶Chajị nya ọọwa lẹ, anụ yẹ irya da lẹẹlẹẹ mẹ. Ó-ri ịnyị ka, tụbwọ aalẹ, m juwa ka warị ahyaahị kaka kpa oge ọlẹ kọ juwa ẹ-ẹpwụ nya ọnụ nyam dẹwụ tụụnụ pyịpyị tị tị lẹ!”

¹⁷“Ọng myị́ ọng ọlẹ kọ ju ụrụ ọ-ka kpa wo ẹla lẹ aalẹ, ọngọọwa a wo etu nya ẹla ọlẹ ká Olegu Ịgọgọ wẹẹ ya ta ala ịchọọchị wuu mẹ. Ọng myị́ ọng ọlẹ kọ la ọkụrụ-kụrụ bwu ẹpwụ nya uya ọmama nya ọmyịmyị ọlala nyamwụ lẹ aalẹ, ọngọọwa, m ka hu ang oriri nya ‘ịmana’ ọkpịbaa nyam haa ri lẹlẹ. Aalẹ, m ka myịmyị hu ẹjwọ onyoowuru ọlẹ kị ka da ẹnyị onyeewe nya ọngọọwa ba họọ lụka ọọwa ịnyịnyị. Ọngọngọhẹ ọkịla á ka jẹ́-ẹ jẹ́ ẹnyị ọọwa kpong-kpong kaka. Kẹnẹ-kẹnẹ, ọngọlẹ kọ ye ẹjwọ ọọwa kpangga ụbwọọmwụ mẹ ịnyị.”

¹⁸“ỊJọn, aa da ala ịlẹ du kịla olegu-ẹrụ nya ịchọọchị nya ala ịTayatịra mẹ. Ẹrụ ọlẹ jam bwu ọnụ nya Ọnyẹwẹ nya Ohe Oluhye ọngọlẹ ká egbahị nyamwụ juwa wuruu-wuru lala ẹlẹlẹ nya ila bala o-ri ọngọlẹ ká apatẹ ị-ba ọpyị nyamwụ juwa yẹ jiro-jiro lala oje ọnyọmịla ọlẹ kị ya ju ila kpá wuu ene kịị mọọ hịlẹ-hịlẹ.”

¹⁹“Anụ ala ịTayatịra ee, am ayịdang jẹ́ ụma nya ụkụrwọ ịlẹ wuu kanụ juwa họ ha Ohe Oluhye bala ọháha nya ịlẹhị-ịlẹhị ọlala nyanụ bala ọmyịmyị ọtụka ọlala nyanụ bala ẹrụ ọmyịmyị yẹẹyẹẹ nyanụ wuu bala ugbodu ojuju onyudiyo ọlẹ kanụ juwa la ịnyịnyị. M myịmyị jẹ́ jaabwọ ká ọlẹẹlẹẹ a ri ụka ọlẹ kanụ dọmwụ juwa họ ụkụrwọ lụmẹ gụ ịlẹ kanụ họ lụka nya ọgbanyẹ-ọgbanyẹ wẹẹ.

²⁰Ma, ẹla ọlẹ kam ka ye ya tụụnụ pyịpyị a lẹẹ lẹlẹ: Anụ juwa hu ọnyang ọlẹ kị wụrụ iJesebẹlụ ujiji nyọlẹ kọ wẹẹ yẹkẹẹ, ọwa nyaa ri ọlọmwụ nya Ohe Oluhye lẹlẹ, du kọ wẹẹ mẹ ang inyibyi jẹ anchẹ nyam bala o-juwa hwaa ahị ju ka ẹpwụ nya ụya ọhọhọ bala o-juwa ri ang ọlẹ kị ya kịla iya ha ihye ijiga ịnyịnyị.

²¹Ịnọ, am ayịdang tụụbwọ hi iwe da ha iJesebẹlụ, chajị kọ ka yẹ irya da hi ụya ọhọhọ nyamwụ lẹ. Ma, ọ tị pwa ọ-yẹ irya da bwu ẹpwụ nya ụya ọhọhọ nyamwụ lẹ.

²²Chajị nya ọọwa lẹ, anụ wo mẹ. M tụbwọọ juwa ka wu iJesebẹlụ ọwẹ ju ka ịbẹẹdị ọnọnọ nya akama ọyẹyẹ lẹ. M ka yẹ alẹng ịlẹ wuu kị kaa họ ụya tọọ akama ọtụka-ọtụka pyii ịnyịnyị. Kẹnẹ-kẹnẹ, ó-ri kị myị yẹ irya da bwu ẹpwụ nya ịhọbịrị ịhọhọ nyaa ịịwa wuu ịlẹ kị họ tọọ lẹ mẹ ịnyị!

²³Am ayịdang ka nwụ angịlẹ wuu kị ri anyị nya iJesebẹlụ ọọwa pyii lẹ. Ọọwa lẹ, ala ịchọọchị nya Ohe Oluhye wuu a ka jẹ́ yẹkẹẹ, am kpakpakpa nyaa ri ọngọlẹ kịị nyị kaa jẹ́ odu lajẹ nya angịnyị ehe wuu myị́ bala ọ-jẹ́ ọkịlẹtụ nyaa wuu jịra lẹ. Am a tị ri ọngọlẹ kam nwụ ọng myị́ ọng lẹpwarịrị nyanụ uri jaabwọ kọ pwoku ụma nya ụkụrwọ ọlẹ wuu kanụ juwa họ ịnyịnyị lẹlẹ.”

²⁴“Ma, anụ angị ihihi ịkịla wuu ịlọpyị nya ịTayatịra ịlẹ kanụ kiji myị wẹẹ juwa ba ọmẹjẹ onyobyi nya angị hi deeji ịwẹ jẹ ka lee o-ri angị jẹ́ ụgbẹyị ohideeji nya Ohe Onyobyi ọlẹ kị kaa wụrụ ang ikpori-kpori ịkpịbaa nya Ohe Onyobyi ayịdang kiji ka, wẹ ịnyịnyị lẹ, anụ, m lẹẹ ya ẹla ọlẹ ta lẹ. Ḿ juwa ka hu olo nya ịngịngịhyẹ ọkịla chụ́ụnụ kpong-kpong kaka.

²⁵Ọkẹnẹ-kẹnẹ ri yẹkẹẹ, anụ cheri kanụ juwa yụbwọ chị ang ọnyịịla ọlẹ kanụ la-a wẹ kpa ụ-ụwa gogo gbee pwụ ụka ọlẹ kaam Ọngọlanụ la ka warị mẹ.

²⁶Ọng myị́ ọng ọlẹ kọ la ọkụrụ-kụrụ bwu ẹpwụ nya uya ọmama chajị nya ọmyịmyị ọlala nyamwụ bala ọ-ka juwa kpa ụkụrwọ ọnyịịla ọhọhọ nyamwụ ụ-ụwa gbee pwụ ọbaba lẹ aalẹ, ọngọọwa, m tịtị ka hu kọ ka ri olegbeju o-juwa kpẹhị rịrị alepwoja la datị-datị lụka ohyẹẹkpẹ lẹlẹ.

²⁷Ọọwa lẹ, ọngọọwa a ka juwa kpa ọgọdọ nya oje-oje gbe alepwoja ịịwa, ka juwa haa elego jaabwọ kị kaa kpa ang be ọta nya ọpyị ene yịgẹ-yịgẹ, jaabwọ kaam ayịdang tịtị ye ọngịrị ọlịnyị bwu ẹga nya Ohe Oluhye Adam lẹẹ lẹlẹ.

²⁸Ọngọọwa, m ka myịmyị hu ọdọchụ nya ewu-ụtụrụ nyam ha ịnyịnyị lẹlẹ.”

²⁹“Ọng myị́ ọng ọlẹ kọ ju ụrụ ọ-ka kpa wo ẹla lẹ aalẹ, ọngọọwa a wo etu nya ẹla ọlẹ ká Olegu Ịgọgọ wẹẹ ya ta ala ịchọọchị wuu mẹ.”