Read idege ỌWỤRỤỤ-WỤRỤ 20 Bible Online

ỌWỤRỤỤ-WỤRỤ 20 - idege bible

ỌWỤRỤỤ-WỤRỤ 20

¹Ịnyị, am ịJọn a chẹhị kaka yẹ olegu-ẹrụ ọhẹ kọ juwa hireji bwu epwoohe, kọ kpa ẹlẹlẹ nya ịgbọgọlọ nya ụjẹ ọ-la ọbaba-ka bala agba ọtụka-ọtụka ọhẹ ụ-ụbwọ nyamwụ lẹlẹ.

²Ịnyị, olegu-ẹrụ ọọwa a kele kaka wu iyo ọlẹ kị wụrụ ịdịragọn ọlẹ kọ ri ilo onyogo ọngọlẹ kị wụrụ Ohe Onyobyi bala iSetan lẹ, ọ chọọ ori nụwa lala ẹka ụnọ lẹpwụ-lẹpwụ lẹlẹ.

³Ọọwa lẹ, olegu-ẹrụ ọọwa a hu Ohe Onyobyi ju ka ẹpwụ nya ụjẹ ọ-la ọbaba-ka ọwẹ lẹ, ọ tọọ ku gbanggbang lẹ, ọ kpa ọja ju ọnụ nya ụjẹ ọọwa ẹjẹẹ, yọọ dada ụ-ụwa chajị ká Ohe Onyobyi ọwẹ á tụtụm ka jẹ́-ẹ juwa pịrị alepwoja la datị-datị ilodehe ọlẹ ju myị́ kaka, gbee pwụ ụka ọlẹ ká ẹka lẹpwụ-lẹpwụ ọọwaa ka chịpwụrụ lẹlẹ. Ụka ká ẹka ịịwa á chịpwụrụ kam kpá lẹ aalẹ, ị ka yi ori hi Ohe Onyobyi ọọwa myịmyị lụka o-kpii lẹlẹ.

⁴Ọọwa lẹ, am ịJọn a myịmyị chẹhị kaka yẹ iru nya ẹchị adịrahụ lụmẹ-lụmẹ bala angịlẹ kị hụhụ u-uhye nyaa lẹlẹ. Angịịwa a ri angịlẹ kị ya ọngịrị nya eje ọ-ka lala ju ụ-ụbwọ lẹlẹ. M myịmyị chẹhị kaka yẹ ká egbudu ikpukpuru nya angịlẹ kị chaa egbeju, chajị nya ibeenu oriri dodehe rụ́ iJisọsị bala ẹla nya Ohe Oluhye ọ-kpa ya pyẹ nya angịịwa. Angịịwa ayịdang á myị gbịgba ha ukpilo nya iyo onyobyi ọọwa bala ukpeku nyamwụ kpong-kpong ka. Ị́ tị myị ye ịna ọchịchị nya iyo ọọwa u-uhye nya itochi nyaa ka lee o-ye ịna ọọwa u-uhye nya ụbwọ nyaa ka ịnyịnyị. Angịịwa wuleji bwula igu juwa hịhị lẹ, ị juwa gbeji ta ịKịrayịsị ẹ-ẹpwụ nya ẹka ụnọ imiiye da ẹka ohu iwo chiriri lẹlẹ.

⁵Ma, angịkịla ihihi ịlẹ kị gbugbu lẹ, ịwa á wuleji bwula igu ka gbee ká ẹka ụnọ imiiye da ẹka ohu iwo ọọwa chịpwụrụ kpá ene. Chajị, owuleji bwula igu nya angị ịlaanyị a ri owuleji bwula igu nya ọgbanyẹ-ọgbanyẹ lẹ.

⁶Ahị ọwawa ọtụka bala ịgọgọ ọlala nya ịlẹhị-ịlẹhị ka juwa ha angịlẹ wuu kị ka juwa ẹ-ẹpwụ nya ebwo nya eji owule bwula igu nya ọgbanyẹ-ọgbanyẹ ọọwa. Chajị, igu oheeye ogbugbu lẹ, ọ́ ka jẹ́-ẹ la ọngịrị yụbwọ gu angị ịlịnyị kpong-kpong myị́ kaka. Ma, angịịwa a ka ri angịkiliya nya Ohe Oluhye bala ịnya ịKịrayịsị lẹlẹ. Ịwa a tị ka juwa gbeji ta ịKịrayịsị ẹ-ẹpwụ nya ẹka ụnọ lẹpwụ-lẹpwụ ọọwa ịnyịnyị lẹlẹ.

⁷Ụka ká ẹka lẹpwụ-lẹpwụ ọọwa á chịpwụrụ kpá lẹ, ị ka gba Ohe Onyobyi kpehe bwu ube nya agba nyamwụ lẹlẹ.

⁸Ọọwa lẹ, Ohe Onyobyi a ka kele kaka hụ alepwoja la datị-datị ịlẹ kị wụrụ ịGọọgụ bala ịMagọọgụ kị jam ịkịka ine nya odehe ọlẹ wuu ahị lẹlẹ. Ịnyị, Ohe Onyobyi a ka tụ angịịwa wuu kaka guru nyọka dẹwụ tụ angịnyị nya Ohe Oluhye pyịpyị lẹlẹ. Iru ojuju nyaa ka lụmẹ lala ugburuja ọlẹpwụ nya ihu ọtụka.

⁹Ọọwa lẹ, ị juwa chị ẹwụ dokoko ju odehe ọlẹ wuu lẹ, ị kele kaka dọgịlẹ ju ụbwẹwụ nya angị ịgọgọ nya Ohe Oluhye bala o-dokoko ju epweji nya angị ịgọgọ ọọwa ọlẹ kọ há Ohe Oluhye lụmẹ lẹlẹ. Ma, ila tị do bwu epwoohe kele kaka rụ aluji nya angị ịgọgọ ịịwa wuu.

¹⁰Ịnyị lẹ, ị wu Ohe Onyobyi ọngọ pịrị alepwoja nya odehe ịlẹ wuu ju lẹ, ị huọọ kpa kaka ju ka ẹpwụ nya ẹmwụ nya ila ọtụka-ọtụka nya obwila ọlẹ ká ajwọ ịlẹ kị wụrụ “ibirim-siton” juwa wuru ụ-ụwa nya ịlẹhị-ịlẹhị lẹlẹ. Ụ-ụwa, ị wu ukpilo nya iyo ọlaanyị bala ọlọmwụ ọnọọkịla kpa kaka ju ene-ene lẹ. Ụ-ụwa, ịwa wuu a ka juwa yẹ akama ọtụka-ọtụka lodu bala alẹnụ pyịyọọ gbe oyi myị́ oyi pwụ ụka myị́ ụka lẹlẹ.

¹¹Ịnyị, am ịJọn a chẹhị kaka yẹ ẹchị adịrahụ onyoowuru ọhẹ bala Ọngọlẹ kọ hụhụ u-uhye nyamwụ lẹlẹ. Ọọwa lẹ, odehe ọlẹ bala uhye-ọgba nya epwoohe a rụnyẹ rụ hi ịlahị nyamwụ lẹ, ị byi yịra-yịra lẹ, ọngọngọhẹ a jẹ́ yaa kpong-kpong kaka lẹlẹ.

¹²Ịnyị, m chẹhị kaka yẹ iru nya angịlẹ kị gbugbu wuu ene-ene tụ angịlẹ kị ri angị ịtụka-ịtụka riri bala angịlẹ kị ri angị ichiche kị kele kaka godayị rịrị ị-ịlahị nya ẹchị adịrahụ ọọwa lẹ, ị wụrụ apwụ ịwawa ịhyẹ dụwa dodo lẹlẹ. Ịnyị lẹ, ị wụrụ ụpwụ ọkịla da dodo ọlẹ kọ ri ụpwụ nya ọhịhị nya Ohe Oluhye lẹlẹ. Ọọwa lẹ, ị juwa la angị gbugbu ịịwa eje bwu ẹpwụ nya apwụ ịịwa u-uhye nya ụma nya ang ọlẹ kị họ lụka nya ọhịhị nyaa odehe ọlẹ lẹlẹ.

¹³Ịnyị lẹ, ihu ịtụka wuu a gba egu nya angịlẹ kị juwa ẹ-ẹpwụ nyamwụ kpehe lẹlẹ. Igu ọ-nwụ angịnyị ayịdang bala ejegu gba angịlẹ wuu kị juwa ẹ-ẹpwụtụbwọ nyaa kpehe ịnyịnyị. Ọọwa lẹ, ị juwa laa ịwa wuu eje u-uhye nya ang myị́ ang ọlẹ ká ọng myị́ ọng lẹpwụ nyaa họ la ọhịhị nyamwụ odehe ọlẹ lẹlẹ.

¹⁴Ịnyị lẹ, ị wu igu ọ-nwụ ọngịnyị nwụ bala ejegu ịịwa kpa kaka da, ju ka ẹpwụ nya ẹmwụ nya ila ọtụka-ọtụka nya obwila ọọwa wurum lẹlẹ. Ẹmwụ ọtụka nya ila nya obwila ọọwa kpangga a ri ang ọlẹ kị wụrụ igu oheeye lẹlẹ.

¹⁵Ịnyị lẹ, ọng myị́ ọng ọlẹ kị yẹ ẹnyị nyamwụ ẹ-ẹpwụ nya ụpwụ nya ọhịhị nya Ohe Oluhye ọọwa kaka lẹ, ị wu ọngọọwa ju ka ẹpwụ nya ẹmwụ nya ila ọtụka-ọtụka nya obwila ọọwa ịnyịnyị lẹlẹ.