Read idege ỌWỤRỤỤ-WỤRỤ 21 Bible Online

ỌWỤRỤỤ-WỤRỤ 21 - idege bible

ỌWỤRỤỤ-WỤRỤ 21

¹Ịnyị, am ịJọn a chẹhị kaka yẹ epwoohe onyeewe bala odehe onyeewe lẹlẹ. Chajị epwoohe nya ọgbanyẹ-ọgbanyẹ bala odehe nya ọgbanyẹ byi yịra-yịra wuu lẹ. Ihu ịtụka wuu tị byi yịra-yịra ịnyịnyị lẹ.

²Ọọwa lẹ, m chẹhị kaka yẹ epweji ọlịgọgọ ọlẹ kọ ri iJerusalẹm onyeewe, kọ juwa hireji bwu epwoohe bwu ẹga nya Ohe Oluhye lẹlẹ. Ị nwụla epweji nya iJerusalẹm onyeewe ọọwa nọ yẹẹyẹẹ, jaabwọ kị kaa ju ahụ onyeewe agidi gbe ọrụ nyamwụ.

³Ịnyị, m wo omyi ọhẹ kọ juwa ya ẹla gboo bwu ẹchị Adịrahụ nya Ohe Oluhye yẹkẹẹ, “Anụ yẹ mẹ! Ẹpwa nya Ohe Oluhye ayịdang juwa ta angịnyị ehe lẹ! Ohe Oluhye ka kụ ẹpwa ta angịnyị ehe lẹ. Angịịwa tị ka ri angịnyị nyamwụ lẹ. Ohe Oluhye ayịdang tị ka juwa taa ịnyịnyị lẹ.

⁴Ohe Oluhye ka yịlẹ egbejida hi egbahị nya angịnyị nyamwụ ịịwa wuu. Igu ogbugbu ọhẹ-lọhẹ á ka ji kaka. Lee, ida ọbaba bala ida ojeje ọhẹ-lọhẹ ọ-ka jiji kaka. Lee, ang ọjụjụ ọhẹ-lọhẹ, ọ ka ji kaka ịnyịnyị. Chajị, ang myị́ ang inyogo wuu chịpwụrụ kam ugbẹnyị lẹ.”

⁵Ịnyị lẹ, Ọwa Ọngọlẹ kọ hụhụ u-uhye nya ẹchị adịrahụ ọọwa a yẹkẹẹ, “Anụ yẹ mẹ! M jam họ ang myị́ ang wuu onyeewe ugbẹnyị lẹ!” Ọ myịmyị yẹkẹẹ, “ỊJọn, da ala ịlẹ ju ụ-ụpwụ mẹ. Chajị, ị ri ala ịchịla o-hu ọkịlẹtụ ha bala o-ri ẹla nya ịlẹhị.”

⁶Ọngọlẹ kọ hụhụ u-uhye nya ẹchị adịrahụ ọọwa myịmyị byim yẹkẹẹ, “Egbahị go ugbẹnyị lẹ! Am a ri ‘Alụfa’ bala ‘Ọmẹga’ lẹ. Am a ri ọmwụ ọdada bala ọ-chị eju nya ang myị́ ang wuu lẹ. Ọng myị́ ọng ọlẹ ká imyi-enyi á juwa nwụ lẹ aalẹ, ọngọọwa, m ka chị́ enyi ha nwa gahị ododu bwu ẹpwụ nya ẹmwụ nya enyi nya ọhịhị lẹlẹ.

⁷Ọng myị́ ọng ọlẹ kọ la ọkụrụ-kụrụ bwu ẹpwụ nya uya ọmama chajị nya ọmyịmyị ọlala nyamwụ lẹ aalẹ, ọngọọwa ka ri ugu nyam tam. Aalẹ, m tị ka ri Ohe Oluhye nya ọngọọwa. Aalẹ, ọngọọwa tị, tị tị ka ri ọnyị nyam Am Ohe Oluhye lẹ.

⁸Ma, angịlẹ kị ka ri angị kaa juhi bala angị la ọmyịmyị-ka bala angịlẹ kị la ọhịhị ọ-chị ịrị ị-ịlahị nyam Am Ohe Oluhye wuu bala angị nwụ angịnyị ehe bala angị kaa họ ụya bala angị kaa ju ụhwa wuu bala angị kaa kpụ́ ijiga wuu bala alịnịịkịla wuu lẹ, ị ka la ebwo nyaa ịwa ẹ-ẹpwụ nya ẹmwụ nya ila ọtụka-ọtụka nya obwila ẹ-ẹga ọlẹ ká ajwọ nya ibirim-siton juwa wuruu-wuru ụ-ụwa ụka wuu, ọlẹ kị wụrụ ẹnyị nyamwụ yẹkẹẹ, igu oheeye ogbugbu.”

⁹Ịnyị, ọngọhẹ lẹpwụ nya alegu-ẹrụ irwiye ịlẹ kị kpa ẹja nya akama i-hi ẹkpẹ-ẹkpẹ irwiye, a warị kaka ya ẹla tam am ịJọn yẹkẹẹ, “Kẹwẹ wẹ ẹgẹlẹ kam mẹ ahụ onyeewe nya Ọnyị ọkpịlọ nya Ohe Oluhye jẹ́ng mẹ.”

¹⁰Ịnyị, ọ kpam rụ a-arụrụ ẹ-ẹpwụ nya olegu kele ka uhye nya ọgbọdọ ọtụka-ọtụka ọhẹ ọlẹ kọ la uhye lụmẹ lẹ, ọ mẹ epweji nya iJerusalẹm ọlẹ kọ la ịgọgọ jẹm, kọ juwa nya bwu epwoohe hireji warị weji bwu ẹga nya Ohe Oluhye lẹlẹ.

¹¹Epweji nya iJerusalẹm ọọwa la ẹbyẹbyị nya ogbo nya Ohe Oluhye lụmẹ. Ọhụ́hụ myịrị-myịrị nyamwụ há ụhị lụmẹ lala ụhị ọháha nya ẹjwọ ọnyịịla-ọnyịịla bala ọ-lala ụhị ọháha nya ẹjwọ ọhẹ ọlẹ kị wụrụ “ịjasịpaa” ọlẹ kọ kaa há ụhị kpeng-kpeng lala enyi ọnyịịla.

¹²Epweji nya iJerusalẹm onyeewe ọọwa la ugulọ ọlẹ kọ la uhye lụmẹ dagaga ju chị ọnụ. Ọ la ọnụ nya ogirigba iwo kụrụ imiiye. Alegu ẹrụ iwo kụrụ imiiye juwa ọ-ọnụ ogirigba iwo kụrụ imiiye ịịwa juwa gbaa. Ị da ẹnyị nya imwawụ iwo kụrụ imiiye nya anyị nya Isirẹlụ ba ọnụ nya ogirigba iwo kụrụ imiiye ịịwa ịnyịnyị.

¹³Á koye nya ọmwẹnụ-ụtụrụ, a ka yẹ ọnụ ogirigba ịta ụ-ụwa. Á koye nya ẹtẹ, a ka yẹ ọnụ ogirigba ịta. Á koye nya edii, a ka yẹ ọnụ ogirigba ịta. Á koye nya ọmwẹnụ-obyi, a ka yẹ ọnụ ogirigba ịta ịnyịnyị.

¹⁴I me ugulọ nya epweji nya iJerusalẹm onyeewe ọọwa hụrụ, itiwe ọlẹ kị kpa ajwọ iwo kụrụ imiiye dọmwụ nyamwụ. Ẹnyị nya alẹrụ ọnyịịla nya Ọnyị ọkpịlọ nya Ohe Oluhye, ị da ba ajwọ ịịwa ịlẹ kị kpa da itiwe nya ugulọ ọọwa lẹ.

¹⁵Olegu-ẹrụ ọlẹ kọ ya ẹla tam am ịJọn hu ọgọdọ o-me ang ori nya okpoko ịgọm kpa kele kaka me epweji ọọwa ori bala o-me ogirigba bala ugulọ nyamwụ ori ịnyịnyị.

¹⁶Udiyo ọlala bala ẹpwụ ojuju nya epweji ọọwa wuu mememe dọgịlẹ ju chị ọnụ. Ịnyị, ụka ká olegu-ẹrụ ọọwa me epweji ọwẹ ori lẹ, ọ la ịmalị lala ịmalị ụnọ ịta da ịmalị ohu iwo da ohu ịrụ chiriri lẹlẹ. Ẹpwụ ojuju nya epweji ọọwa bala udiyo ọlala bala uhye ọlala nyamwụ wuu mememe jịra chị ọnụ.

¹⁷Olegu-ẹrụ ọọwa myịmyị me ugulọ nya epweji ọwẹ ori lala apatẹ ohu iwo da apatẹ iwo kụrụ ịrwọnyẹ ka uhye, chajị, jaabwọ ká angịnyị ehe kaa me ang ori ịnyịnyị, olegu-ẹrụ ọọwa a tịtị me ori ọọwa lẹ.

¹⁸Ụma nya ẹjwọ ọhẹ ọlẹ kọ kaa há ụhị okpeng-kpeng lala enyi, kị wụrụ ẹnyị nyamwụ “ịjasịpaa,” ị kpa me ugulọ ọọwa wuu lẹ. Okpoko ịgọm-ịgọm kem, ị tị kpa nwụ epweji ọọwa lẹ. Ọ la tang-tang wuu lala ịnyọ ọ-kpa yọyị.

¹⁹Ị kpa ajwọ ịnyịịla-ịnyịịla, họ itiwe nya ugulọ nya ẹpwang ọọwa ịnyangga yẹẹyẹẹ. Itiwe nya ọgbanyẹ-ọgbanyẹ lẹ, ị kpa ẹjwọ ọ-hụ́ tang-tang ọlẹ kị wụrụ ịjasịpaa họọ. Ị kpa ẹjwọ ọnyịịla-ọnyịịla ọkịla ọlẹ kị wụrụ “ịsafịya” họ itiwe oheeye. Ị kpa ẹjwọ ọnyịịla-ọnyịịla ọkịla ọlẹ kị wụrụ “ageti” họ itiwe ọhata. Ị kpa ẹjwọ ọnyịịla-ọnyịịla ọkịla ọlẹ kị wụrụ “ẹmaradị” họ itiwe ohene.

²⁰Ị kpa ẹjwọ ọnyịịla-ọnyịịla ọlẹ kị wụrụ “onikisi” họ itiwe ọharụ. Ị kpa ẹjwọ ọnyịịla-ọnyịịla ọkịla ọlẹ kị wụrụ “ịkanẹlịyọn” họ itiwe ọharwọnyẹ. Ị kpa ẹjwọ ọnyịịla-ọnyịịla ọkịla ọlẹ kị wụrụ “ikirisolayịtị” họ itiwe ọharwiye. Ị kpa ẹjwọ ọnyịịla-ọnyịịla ọkịla ọlẹ kị wụrụ “iberil” họ itiwe ọhaneku. Ị kpa ẹjwọ ọnyịịla-ọnyịịla ọkịla ọlẹ kị wụrụ “ịtọpasi” họ itiwe ohikichu. Ị kpa ẹjwọ ọnyịịla-ọnyịịla ọkịla ọlẹ kị wụrụ “ikirisopịrẹsị” họ itiwe okiriwo. Ị kpa ẹjwọ ọnyịịla-ọnyịịla ọkịla ọlẹ kị wụrụ “ịjasẹntị” họ itiwe ọkụrụ ookpokpo. Ị kpa ẹjwọ ọnyịịla-ọnyịịla ọkịla ọlẹ kị wụrụ “amẹtisi” họ itiwe ọkụrụ oheeye.

²¹Ọnụ ogirigba iwo kụrụ imiiye nya epweji ọọwa lẹ, ị kpa ogbe iwo kụrụ imiiye họ ukpileku nyaa ịwa. Ị kpa ogbe ọnyọnyọọnyị họ ukpileku nya ọnụ ogirigba nya ịlọmwụ. Agbayị ịchịpwụrụ bwu ilepweji ọọwa wuu tị lẹ, okpoko ịgọm ọnyịịla-ọnyịịla kem, ị kpa haa lẹ. Agbayị ịịwa juwa hụ́ myịrị-myịrị lala ịnyọ ọ-kpa yọyị.

²²Ḿ yẹ ube ịgọgọ ọtụka nya Ohe Oluhye ọhẹ-lọhẹ e-epweji ọwẹ kpong-kpong ka. Chajị, Ọngọlahị Ohe Oluhye Agụgụ bala Ọnyị ọkpịlọ nya Ohe Oluhye a ri ube ịgọgọ ọlụwa lẹlẹ.

²³Ọ́ tị baba ká ẹnụ oluhye-ọgba ọhẹ-lọhẹ lee ọya oluhye-ọgba ọwẹ ka chị ụ-ụwa kpong-kpong kaka. Chajị, owuruu-wuru nya ogbo nya Ohe Oluhye a ri ahịgboo ọlụwa lẹlẹ. Ọnyị ọkpịlọ nya Ohe Oluhye a tị ri otinika ọlụwa ịnyịnyị lẹlẹ.

²⁴Bwula ila nya ahịgboo nyamwụ ọọwa, alepwoja wuu a ka jẹ́-ẹ yọyị juwa jẹdịyẹ lẹlẹ. Ọọwa lẹ, ịdịrịhụ nya odehe ọlẹ wuu a ka juwa kpa ogbo nyaa wuu kele ka ụwa lẹlẹ.

²⁵Ukpileku nya ọnụ nya ogirigba nya epweji ọọwa wuu ọhẹ-lọhẹ á ka tuku la ẹnụ kpong-kpong kaka. Odu ohihi ọhẹ-lọhẹ á tị ka juwa e-epweji ọọwa kpong-kpong kaka.

²⁶E-epweji ọọwa, ị ka kpa ogbo wuu bala ihi ọlala nya alepwoja wuu kaka jịra lẹlẹ.

²⁷Ma, ịngịngịhyẹ ọlẹ wuu kọ kaa chị ọhịhị nya ọngịnyị ehe ịrị ị-ịlahị nya Ohe Oluhye lẹ aalẹ, ang ọọwa á ka jụ ka ẹpwụ nya epweji ọọwa tụtụm kaka. Lee, ọngọngọhẹ ọlẹ wuu kọ ri ọngọ họ ang ibyi lee ọngọ kaa me ọnọọkịla lẹ, ọ́ tụtụm ka jụ kele ịnyịnyị kaka. Kẹnẹ-kẹnẹ, angịlẹ wuu kị da ẹnyị nyaa juwa ẹ-ẹpwụ nya ụpwụ nya ọhịhị nya Ọnyị ọkpịlọ nya Ohe Oluhye ụbwaa kem, a ka jụ kele ka epweji ọọwa lẹlẹ.