Read idege ỌWỤRỤỤ-WỤRỤ 22 Bible Online

ỌWỤRỤỤ-WỤRỤ 22 - idege bible

ỌWỤRỤỤ-WỤRỤ 22

¹Ịnyị, olegu-ẹrụ ọọwa a mẹ ihu nya enyi nya ọhịhị ọlẹ kọ juwa yẹ jiro-jiro lala ịnyọ-ịnyọ jẹm lẹlẹ. Ihu ọọwa juwa mwụ ị-ịlahị nya ẹchị Adịrahụ nya Ohe Oluhye bala ịlahị nya Ọnyị ọkpịlọ nyamwụ.

²Ihu nya ịnyọ-ịnyọ ọọwa juwa mwụ dịrẹ opeje ọlẹ kọ ji ẹpwarịrị nya epweji ọọwa. Okoji nya ọhịhị bwu rịrị ịkịka oyiye-oyiye nya ihu nya ọhịhị ọọwa. Okoji nya ọhịhị ọọwa nwụ́ ụma nya egbe achẹ iwo kụrụ imiiye ịlẹ kị kaa nwụ́ egbe nyaa la ọya ọnyọnyọọnyị nya ẹka wuu jịra. Apwụ nya okoji nya ọhịhị ọọwa a ri ang ọ-kpa họ alepwoja wuu uda nya ẹdụrụ nyaa la datị-datị lẹ.

³Ụma nya ịngịngịhyẹ ọlẹ ká ọlọ ọgaga nya Ohe Oluhye wuwu wuu lẹ, á ka juwa ụ-ụwa kpong-kpong kaka. Ma, kẹnẹ-kẹnẹ, ẹchị Adịrahụ nya Ohe Oluhye bala ẹchị nya Ọnyị ọkpịlọ nyamwụ kem, a juwa ụ-ụwa bala anchẹ nya Ohe Oluhye ịlẹ kị juwa gbịgba họọ wuu ịnyịnyị lẹlẹ.

⁴Anchẹ nya Ohe Oluhye ịịwa ka juwa yẹ Ohe Oluhye ayịdang ẹ-ẹhị. Ị tị ka da ẹnyị nya Ohe Oluhye ba angịịwa i-itochi nyaa ịnyịnyị.

⁵Odu ohihi á ka juwa ụ-ụwa kpong-kpong kaka. Ọ́ tị ka baba haa nyọka la ahịgboo nya otinika kaka lee ahịgboo nya ẹnụ ụ-ụwa tụtụm kaka ịnyịnyị. Chajị, Ọngọlahị Ohe Oluhye ayịdang a ka ri ahịgboo nyaa ụ-ụwa lẹlẹ. Anchẹ nya Ohe Oluhye ịịwa tị ka ri adịrahụ tọọ ịnyịnyị pyịyọọ gbe oyi myị́ oyi lẹ.

⁶Ịnyị, olegu-ẹrụ ọọwa a ya ẹla tam am ịJọn yẹkẹẹ, “Ala ịlẹ ri ala ị-chịla o-hu ọkịlẹtụ haa bala o-ri ẹla nya ịlẹhị. Ọngọlahị ọlẹ kọ ri Ohe Oluhye Ọngọ kaa hu Olegu Ịgọgọ nyamwụ ha alọmwụ nyamwụ, a du olegu-ẹrụ ọọwa ẹrụ kaka mẹ ang ịlẹ kị juwa ka họ pyii ahyaahị lẹ, jẹ anchẹ nyamwụ lẹ.”

⁷“Anụ wo mẹ! Am ayịdang juwa ka warị ahyaahị lẹ! Ahị ọwawa ka juwa ha ọng myị́ ọng ọlẹ kọ ka juwa kpa ala ịlẹ kị yẹ ọmwụ chajị nyaa ju ẹpwụ nya ụpwụ ọlẹ wuu họ ụkụrwọ ẹ-ẹpwụ nya ọhịhị nyamwụ.” Ịnyị, Ọngọlahị iJisọsị a ya lẹ.

⁸Am ịJọn ọlẹ ayịdang a ri ọngọlẹ kam kpa ụrụ nya ịlọm wo ala ịlẹ bala ọ-yẹ ang ịlẹ wuu la ịlọm lẹ. Ịnyị, ụka ọlẹ kam wo ala ịịwa bala ọ-yẹ ang ịwẹ lẹ, m hịda keji juwa gbịgba i-ijata nya olegu-ẹrụ ọọwa ọlẹ kọ mẹ ang ịịwa wuu jẹm lẹlẹ.

⁹Ma, olegu-ẹrụ ọọwa byim yẹkẹẹ, “A họ ịnyị kpong-kpong ka, ịJọn! Chajị, am ayịdang tịtị ri ọnchẹ nya Ohe Oluhye tang bala anyadang ịkịla ẹ-ẹpwụ nya ịKịrayịsị ịlẹ kị ri alọmwụ nya Ohe Oluhye wuu bala angịkịla ịlẹ wuu kị ka myị-ị juwa kpa ala ịlẹpwụ nya ụpwụ ọlẹ wuu họ ụkụrwọ. Lẹ, Ohe Oluhye ayịdang kem a ka gbịgba ha lẹlẹ, ịJọn.”

¹⁰Ịnyị, Olegu-ẹrụ ọọwa a byim am ịJọn yẹkẹẹ, “A ya ala nya ọmwụ ọyẹyẹ ịlẹpwụ nya ụpwụ ọlẹ kpịbaa kpong-kpong ka. Chajị, ụka ọlẹ ká ang ịịwa wuu juwa ka họ jịra ju chwẹẹ lụmẹ kaka kpoye lẹ!

¹¹Chajị nya ọọwa lẹ, ọng myị́ ọng ọlẹ kọ ri ọngọ họ ang onyobyi, a juwa kịlahị la ang onyobyi nyamwụ ọọwa ọhọhọ odu. Ọngọlẹ kọ tị juwa la ọhịhị ọlẹ kọ chị ịrị ị-ịlahị nya Ohe Oluhye, a juwa kịlahị ẹ-ẹpwụ nya ọọwa ọhọhọ jaabwọ kọ họ́ọ odu. Ọngọlẹ kọ tị ri ọngọ họ abwẹla ọnyịịla ị-ịlahị nya Ohe Oluhye a tịtị juwa kele kịlahị la abwẹla ọnyịịla ọọwa ọhọhọ odu mẹ. Ká ọngọlẹ kọ la ịgọgọ ị-ịlahị nya Ohe Oluhye a tịtị juwa kele kịlahị la ịgọgọ ọlala nyamwụ ọọwa ịnyịnyị odu mẹ.”

¹²Ịnyị, iJisọsị a ya ẹla dodehe yẹkẹẹ, “Yẹ mẹ! M juwa ka warị ahyaahị lẹ! M tị ka kpa uri nya ụkụrwọ nya angịnyị ehe wuu ụ-ụbwọ warị, chajị kam ka nwụ ọng myị́ ọng wuu uri kwiwa nya ang myị́ ang ọlẹ wuu kọ họhọ ẹ-ẹpwụ nya ọhịhị nyamwụ.

¹³Am kpakpakpa a ri Alụfa bala Ọmẹga ọọwa lẹlẹ. Am a ri ọhọhẹ bala ohyẹẹkpẹ lẹ. Am a tị ri ọmwụ ọdada bala ọ-chị eju nya ang myị́ ang wuu ịnyịnyị lẹlẹ.”

¹⁴“Ahị ọwawa ka juwa ha angịlẹ wuu kị hụ́ ịwụrụ igbileji nyaa cheri-cheri chajị kị ka jẹ́-ẹ la iwe-ahụrụ nyọka jẹ́-ẹ ri ugbe nya okoji nya ọhịhị, chajị kị ka jẹ́-ẹ jụ kele ka epweji nya iJerusalẹm onyeewe ọọwa bwu ọnụ ụgbẹyị nya ogirigba myị́ ịnyịnyị.

¹⁵Ma, angịlẹ wuu kịịwa kaa họ ala inyibyi chuuchuuchuu lala ibwu wuu bala angị kaa ju angịnyị ụhwa wuu bala angị kaa họ ụya wuu bala angị kaa nwụ angịnyị ehe bala angị kaa kpụ́ ihye ijiga wuu bala angị kaa me ịnịịkịla lee ọnọọkịla omeme ọ-kaa háa há lụmẹ ịnyịnyị wuu tị lẹ, ọ-ọkpọọka nya epweji nya iJerusalẹm onyeewe ọọwa, ị ka ji pyii lẹlẹ.”

¹⁶“ỊJọn, wo mẹ. Am iJisọsị ayịdang a du olegu-ẹrụ nyam ẹrụ kpa ibeenu nya ala ịlẹ wuu warị kaka ya jeng, chajị ká ka kpa kaka ya je ala ịchọọchị wuu ham lẹlẹ. Am kpakpakpa a ri ụtẹ nya iDevidi ọọwa ọlẹ kị ma ọdọdẹpwa nya iDevidi lala ọnyị ọtụma nyamwụ lẹlẹ. Am kpakpakpa a tị ri ọdọchụ ọ-hụ́ myịrị-myịrị nya ewu-ụtụrụ ọọwa ịnyịnyị lẹlẹ.”

¹⁷Ụka ọọwa, Olegu Ịgọgọ nya Ohe Oluhye bala ahụ nya Ọnyị ọkpịlọ nya Ohe Oluhye ya dodehe yẹkẹẹ, “Ee, kẹwẹ mẹ!” Ọng myị́ ọng ọlẹ wuu kọ wo ẹla ọọwa, a tịtị ya ịnyịnyị yẹkẹẹ, “Ee, kẹwẹ mẹ!” Ọng myị́ ọng ọlẹ wuu ká imyi-enyi á juwa nwọọ bala ọng myị́ ọng ọlẹ wuu kọ họ́ọ lẹ aalẹ, ọngọọwa a kẹwẹ wẹ ẹga nya Ọnyẹwẹ nya Ohe Oluhye nyọka ye enyi nya ọhịhị nwa la ọ-ka nwụ uri nyamwụ nwụ ene kaka mẹ.

¹⁸Am ịJọn a lẹẹ da ọng myị́ ọng ọlẹ wuu kọ ka wo egbe nya ala nya ọmwụ ọyẹyẹ ịlẹ kị da ju ẹ-ẹpwụ nya ụpwụ ọlẹ ọna nya ịlẹhị-ịlẹhị lẹlẹ. Ọna ọdada ọọwa ri yẹkẹẹ, ọng myị́ ọng ọlẹ kọ ka juwa ya ugbe nsya ẹlẹlẹhẹ da ala ịlẹpwụ nya ụpwụ ọlẹ uhye aalẹ, Ohe Oluhye tịtị ka ya ụma nya akama ịlẹ kị chabwọ nyaa ẹ-ẹpwụ nya ụpwụ ọlẹ wuu haju ọngọọwa ịnyịnyị kwiwa pyii lẹ.

¹⁹Ọng myị́ ọng ọlẹ kọ tị ka chụ ugbe nya ẹlẹlẹhẹ hi bwu ẹpwụ nya ala ịlẹ kị yẹ ọmwụ chajị nyaa wuu ẹ-ẹpwụ nya ụpwụ ọlẹ ịnyịnyị aalẹ, Ohe Oluhye tịtị ka gba ebwo ọlẹ, ịnọ, ká ọngọọwa ka la bwu ẹpwụ nya ugbe nya okoji nya ọhịhị, ọlẹ kị chabwọ nyamwụ wuu ẹ-ẹpwụ nya ụpwụ ọlẹ kpehe ịnyịnyị pyii bala ebwo ọlẹ, ịnọ, ká ọngọọwa ka la e-epweji ịgọgọ ọọwa ịnyịnyị lẹ.

²⁰IJisọsị ayịdang ọlẹ kọ ri ibeenu nya ala ịlẹ wuu dodehe, ya dodehe yẹkẹẹ, “Nya ịlẹhị-ịlẹhị ịnyị, m juwa ka warị ahyaahị lẹ!” Amẹn. Ee, kẹwẹ mẹ, Ahụ Ọngọlahị iJisọsị!

²¹Ká ọnahị nya Ọngọlahị iJisọsị ịKịrayịsị, a juwa ta angị ịgọgọ nya Ohe Oluhye wuu mẹ. Amẹn.