Read idege ỌWỤRỤỤ-WỤRỤ 3 Bible Online

ỌWỤRỤỤ-WỤRỤ 3 - idege bible

ỌWỤRỤỤ-WỤRỤ 3

¹“ỊJọn, aa da ala ịlẹ du tọ olegu-ẹrụ nya ịchọọchị nya ala ịSaadisi mẹ. Ẹrụ ọlẹ jam bwu ọnụ nya ọngọlẹ kọ la olegu ọ-họ ụkụrwọ achẹ irwiye nya Ohe Oluhye bala ọngọ kpa ịdịchụ irwiye ụ-ụbwọ nyamwụ ịnyịnyị.” “Anụ ala ịSaadisi ee, anụ wo mẹ! M jẹ́ ụma nya ụkụrwọ ọlẹ kanụ juwa họ wuu bala jaabwọ kanụ ri ala ịchọọchị ẹ-ẹnyị, kem, kanụ tị ri egu kụ lahị kpa ang ri kem ẹ-ẹpwụ nya ẹla nya Ohe Oluhye ọhọhọ.

²Chajị nya ọọwa lẹ, anụ chị ahị-une bwu ẹpwụ nya ịbwọ ọkpụkpụ nyanụ, kanụ kpa ọkpịra-kpịra ye ọngịrị ha ọhịhị onyeewe nyanụ ọlẹ kọọ wẹ ọ-ọbẹ nya igu ogbugbu lẹ mẹ. Chajị, jaabwọ kam yẹ ụkụrwọ nyanụ wuu lẹ, ó ri ang ọ-la kpakpa ị-ịlahị nya Ohe Oluhye kpong-kpong ka.

³Chajị nya ọọwa lẹ, anụ cheri kanụ kpịtịya jaabwọ kaanụ ayịdang bwu ye ẹla nya Ohe Oluhye bala ọ-kaa wo ẹla nya Ohe Oluhye yẹẹyẹẹ ene-ene kaka ba, kanụ juwa yụbwọ chị ẹla nya ịlẹhị ọọwa kpa ụ-ụwa gogo, kanụ yẹ irya da mẹ. Ma, ọ́ tị ri kanụ myị chị ahị-une bwu ẹpwụ nya ịbwọ ọkpụkpụ nyanụ ọọwa kpong-kpong ka aalẹ, m ka warị lụka o-bwunu agaga, jaabwọ ká oloyi kaa bwu ayịdẹpwa agaga. Ịnyị, m ka warị lụka nya awa ọlẹ kanụ ka jẹ́ datị kpong-kpong ka lẹlẹ.

⁴Ọ tị lịnyị kpá odu ịnyị! Angịnyị angị ịmanyị-ịmanyị ịhyẹ juwa kị la ẹnyị ọnyịịla ụ-ụwa ịSaadisi nyanụ wẹẹ. Angịịwa á myị chị ịwụrụ nya abwẹla ọnyịịla nyaa ịwa ịrị kpong-kpong bwula ọhọbịrị ọhọhọ lala angị ịkịla ka. Lẹ, ịwa a ri angịlẹ kị ka juwa jẹdịyẹ tam ẹ-ẹpwụ nya owuru okeri-keri ọlala nya abwẹla ọnyịịla nyam lẹlẹ. Chajị, angịịwa a ri angịlẹ kị chịla-chịla ị-ịlahị nya Ohe Oluhye lẹlẹ.

⁵Ọng myị́ ọng ọlẹ kọ la ọkụrụ-kụrụ bwu ẹpwụ nya uya ọmama nya ọmyịmyị ọlala nyamwụ lẹ aalẹ, ọngọọwa, m ka ya awụrụ onyoowuru okeri-keri nya abwẹla ọnyịịla nyam kụrụ tịtị lẹlẹ. Aalẹ, ḿ ka yịlẹ ẹnyị nya ọngọọwa hi ẹpwụ nya ụpwụ nya ọhịhị nya Ohe Oluhye kpong-kpong kaka. Aalẹ, ẹnyị nya ọngọ ọlịnyị, m ka ya dodehe hiigu-hiigu ị-ịlahị nya Ohe Oluhye Adam bala ị-ịlahị nya alegu-ẹrụ nyamwụ ịnyịnyị lẹlẹ.”

⁶“Ọng myị́ ọng ọlẹ kọ ju ụrụ ọ-ka kpa wo ẹla lẹ aalẹ, ọngọọwa a wo ẹla ọlẹ ká Olegu Ịgọgọ wẹẹ ya ta ala ịchọọchị wuu mẹ.”

⁷“ỊJọn, aa da ala ịlẹ du kịla olegu-ẹrụ nya ịchọọchị nya ala iFiladẹlịfịya mẹ. Ẹrụ ọlẹ jam bwu ọnụ nya ọngọlẹ kọ la ịgọgọ lụmẹ bala o-ri ọngịnyị nya ẹla nya ịlẹhị. Ọwa-à ri ọngọlẹ kọ kpa ẹlẹlẹ nya ịgbọgọlọ nya ụgbẹyị nya iDevidi ụ-ụbwọ nyamwụ lẹ. Ọwa-à myịmyị ri ọngọlẹ kọ wụrụ ụgbẹyị da dodo ene lẹ, ká ọngọkịla ọhẹ-lọhẹ á kaa jụ ụgbẹyị ọọwa tuku myị́ kpong-kpong kaka lẹlẹ. Kọ tị ri kọ tụ ụgbẹyị ku ene lẹ, ká ọngọkịla ọhẹ-lọhẹ á tị kaa jụ ụgbẹyị ọọwa wụrụ myị́ kaka ịnyịnyị lẹlẹ.”

⁸“Anụ ala iFiladẹlịfịya ee, am ayịdang jẹ́ ụma nya ụkụrwọ ịlẹ kanụ juwa họ wuu. Anụ yẹ mẹ! M wụrụ ọnụ ụgbẹyị da dodo hwọọ hanụ lẹ! Ọngọngọhẹ ọkịla á tị juwa ọlẹ kọ ka jẹ́-ẹ jụ ọnụ ụgbẹyị ọọwa tuku yẹẹnụ dada myị́ kpong-kpong kaka. M jẹ́ kanụ la ọngịrị juwa gbuu kpong-kpong ka. Ma, anụ tị yụbwọ chị ẹla nyam kpa ụ-ụwa gogo, du kanụ myị pwa ẹnyị nyam rwarụ kpong-kpong kaka pyịyọọ daalẹ.

⁹Anụ yẹ mẹ! Alẹpwụ nyanụ ịlẹ kịịwa ayịdang ri alọjịra-jịra nya Ohe Onyobyi la ịlọmwụ, kị wẹẹ wa ịlaa lala angị ri ala iJuu, kị tị ri ala iJuu ọhẹ-lọhẹ riri ị-ịlahị nya Ohe Oluhye kpong-kpong ka, la ọnọọkịla omeme nyaa ọwẹ wẹẹ, anụ yẹ mẹ! M juwa ka họ ká angị ịlịnyị wuu ka juwa hiri ịlaa kpẹẹ, kaka ji ekpeleji nyanụ, kị ka juwa gbịgba hanụ lẹ. Chajị kọ ka jẹ́-ẹ la gbadaa yẹkẹẹ, anụ ayịdang tọchị ri angị hám há lụmẹ ịnyịlẹhị lẹ.

¹⁰Chajị nyọlẹ kaanụ ayịdang myị kpa ẹla nya ugbodu ojuju onyudiyo nyam ụ-ụwa pyịyọọ lẹlẹ, am ayịdang tịtị ka juwa keenu lụka nya awa nya ọmayẹ ọtụka ọlẹ kọ juwa ka warị chị odehe ọlẹ wuu ọgụ, nyọka ma ọng myị́ ọng ọlẹ kọ kụ odehe ọlẹ lẹ yẹ. Chajị ká ọmayẹ ọlịnyị á ka kụrụụnụ kpong-kpong kaka.

¹¹Anụ wo mẹ! M juwa ka warị ahyaahị lẹ! Chajị nya ọọwa lẹ, anụ́-ụ juwa yụbwọ chị ang ọnyịịla nyanụ ọlẹ kanụ la wẹ kpa ụ-ụwa gogo mẹ. Chajị ká ọngọngọhẹ á ka nunu iwe-ahụrụ nya ọkụrụ-kụrụ nyọka ye okpo ọkụrụ egbeju nya ọhịhị nyanụ ọwẹ kpong-kpong kaka mẹ.

¹²Ọng myị́ ọng ọlẹ kọ ka la ọkụrụ-kụrụ bwu ẹpwụ nya uya ọmama chajị nya ọmyịmyị ọlala nyamwụ lẹ aalẹ, ọngọọwa, m ka họ kọ ka ri ojẹkpa o-wu ube ịgọgọ ọtụka nya Ohe Oluhye nyam kpa lẹlẹ. Chajị ká ọngọọwa á tụtụm ka jẹ́-ẹ gba kpehe hi ube ịgọgọ ọtụka ọọwa kpong-kpong kaka. U-uhye nya ọngọọwa, m tị ka da ẹnyị nya Ohe Oluhye nyam ba bala ọ-da ẹnyị nya epweji nya Ohe Oluhye nyam ọlẹ kọ ri iJerusalẹm onyeewe, ọlẹ kọ juwa ka hireji bwu ẹga nya Ohe Oluhye nyam bwu epwoohe ba lẹlẹ. M ka da ẹnyị onyeewe nya ịlọm ba ọngọọwa ịnyịnyị!”

¹³“Ọng myị́ ọng ọlẹ kọ ju ụrụ nyọka kpa wo ẹla lẹ aalẹ, ọngọọwa a wo etu nya ẹla ọlẹ ká Olegu Ịgọgọ wẹẹ ya ta ala ịchọọchị wuu mẹ.”

¹⁴“ỊJọn, aa da ala ịlẹ du tọ olegu-ẹrụ nya ịchọọchị nya ala ịLawodisiya mẹ. Ẹrụ ọlẹ jam bwu ọnụ nya ọngọlẹ kọ ri Amẹn bala ọngọ chịla o-hu ọkịlẹtụ ha bala ọngọ ri ibeenu nya ẹla nya ịlẹhị oyaya dodehe chajị nya Ohe Oluhye bala o-ri ọngọlẹ kọ kpa ụbwọ nya ịlọmwụ diji nya ang myị́ ang wuu ịlẹ ká Ohe Oluhye họhọ lẹẹ odehe ọlẹ wuu.”

¹⁵“Anụ ala ịLawodisiya ee, am ayịdang jẹ́ ụma nya ụkụrwọ ịlẹ wuu kanụ juwa họ. Ánụ́ ri angị nyirii-nyiri, riri ka. Ánụ́ tị ri angị chị ila chịchị kpong-kpong ka ịnyịnyị. Lẹ, m tịtọ kanụ ka chị ịlọnụ ehe gede-gede lala angị nyirii-nyiri lee angị chị ila chị ẹ-ẹpwụ nya ọmyịmyị ọlala nyanụ datị pyii lẹẹlẹẹ lẹ!

¹⁶Chajị nya ọọwa lẹ, jaabwọ kaanụ ayịdang ri angị la bịla-bịla ẹ-ẹpwụ nya ọmyịmyị ọlala nyanụ, du kanụ ri angị nyirii-nyiri datị lee o-ri angị chị ila chịchị kpong-kpong kaka, wẹ lẹlẹ, m tụbwọọ juwa ka họ pwuu lanụ hụrụ bwu ẹpwụ ọnụ nyam, chajị nya ọ-jẹ́ họhọ-ka nyanụ ọọwa lẹ!

¹⁷Chajị, anụ ayịdang wẹẹ ya dodehe yẹkẹẹ, ‘Am tị ri ọngọ kpụ ụdụ lụmẹ lẹ. Ang myị́ ang wuu tị jam kịlahị ham yẹẹyẹẹ ịnyịnyị lẹlẹ, ịngịngịhyẹ á gam amwụ kpong-kpong kaka.’ Ma, anụ ayịdang á tị jẹ́ iwe-ahụrụ nya ịlọnụ kpong-kpong ka, ịnyị a du lẹ. Chajị, anụ ri ikpehika ikwookwee, ịlẹ kanụ lam ahyẹẹrwẹrwa lụmẹ. Anụ tị ri angị kpụ idu chwiichwii ẹ-ẹpwụ nya olegu nyanụ bala o-ri angị ji lọhị-lọhị ị-ịlahị nya Ohe Oluhye bwula ọ-jẹ́ họhọ-ka nyanụ ịịwa wuu.

¹⁸Chajị nya ọọwa lẹ, ụbwọ ogbileenu gbile ụrụ nyam ri yẹkẹẹ, anụ kẹwẹ wẹ ẹga nyam kaka ra okpoko ịgọm ọlẹ kị hyahya ụ-ụdụwa yẹẹyẹẹ, chajị kanụ ka jẹ́-ẹ ri angị kpụ ụdụ nya ang nya olegu myị́ mẹ. Kanụ kẹwẹ kaka ra ịwụrụ i-pwo owuru keri-keri nya abwẹla ọnyịịla nyam, kanụ ya kụrụ hi oyoyi nya o-ji lọhị-lọhị ị-ịlahị nya Ohe Oluhye bwula ang inyibyi ịhọhọ nyanụ ịịwa wuu mẹ. Kanụ kẹwẹ kaka ye utoji ogu ju ẹhị o-bwu ẹga nyam, chajị kanụ ka jẹ́-ẹ kpẹhị nya olegu nyanụ yọyị cheri-cheri ịnyịnyị mẹ.

¹⁹Anụ wo mẹ! Angịlẹ wuu kị ri angị hám há nya ịlẹhị-ịlẹhị, angịịwa a ri angịlẹ kam kaa yalibyi la bala ọ-kaa chaa ugboji nya ẹla ọmẹjẹ nyam lẹ. Chajị nya ọọwa lẹ, anụ cheri kanụ juwa la ila ọchịchị mẹ, kanụ yẹ irya da wẹ mẹ!

²⁰Anụ yẹ mẹ! M godayị rịrị lẹẹ ọ-ọnụ nya ụgbẹyị o-bwu wẹ ẹpwụ ọkịlẹtụ nya ọng myị́ ọng wuu lẹ! Ọng myị́ ọng ọlẹ wuu kọ wo omyi nyam, kọ ri ká ọngọọwa á myị wụrụ ụgbẹyị nya ọkịlẹtụ nyamwụ da dodo ham aalẹ, m ka jụ kele ka ẹpwụ nyamwụ kaka ri ang oriri ta ọngọọwa. Aalẹ, ọngọọwa tị tịtị ka ju epwedii nya ang oriri tam ịnyịnyị lẹ.

²¹Ọng myị́ ọng ọlẹ kọ la ọkụrụ-kụrụ bwu ẹpwụ nya uya ọmama nya ọmyịmyị ọlala nyamwụ lẹ aalẹ, ọngọọwa, m ka ya ọngịrị ha kọ ka bá hụhụ u-uhye nya ẹchị adịrahụ nyam tam, jaabwọ kaam ayịdang la ọkụrụ-kụrụ kpá wuu lẹẹ, du kam rụ kaka hụhụ ta Ohe Oluhye Adam ụ-ụwa u-uhye nya ẹchị adịrahụ nyamwụ tọọ lẹẹ ịnyịnyị.”

²²“Ọng myị́ ọng ọlẹ kọ ju ụrụ nyọka kpa wo ẹla lẹ aalẹ, ọngọọwa a wo ẹla ọlẹ ká Olegu Ịgọgọ wẹẹ ya ta ala ịchọọchị wuu mẹ!”