Read idege ỌWỤRỤỤ-WỤRỤ 4 Bible Online

ỌWỤRỤỤ-WỤRỤ 4 - idege bible

ỌWỤRỤỤ-WỤRỤ 4

¹Ụka ká ala ịwẹ chịpwụrụ kam kpá wuu lẹ, m chẹhị kaka yẹ ụgbẹyị ọhẹ kọ wụrụ dụwa hwoo e-epwoohe a-arụrụ lẹlẹ. Ịnyị lẹ, omyi ọọwa ọlẹ kọ ya ẹla tam lụka nya ọgbanyẹ-ọgbanyẹ lala omyi nya opyike a myịmyị byim yẹkẹẹ, “ỊJọn ee, kpụ uhye warị wẹ ẹgẹlẹ kam mẹ ang ịlẹ kị juwa ka họ ị-ịlahị pyii jẹng mẹ.”

²Ịnyị, ahyaahị lẹ, Olegu Ịgọgọ a kpam rụ kele a-arụrụ lẹ, m chẹhị kaka yẹ ẹchị Adịrahụ nya Ohe Oluhye ụ-ụwa e-epwoohe ká ọngọhẹ hụhụ u-uhye nya ẹchị adịrahụ ọọwa lẹlẹ.

³Ọngọlẹ kọ hụhụ u-uhye nya ẹchị adịrahụ ọọwa me ẹjwọ ọhịlẹ-hịlẹ onyoowuru ọhẹ ọlẹ kọ hụ́ tang-tang kị wụrụ “ịjasịpaa” bala ẹjwọ ọnyọmịla ọhịlẹ-hịlẹ ọlẹ kị wụrụ “ịsaadiin.” M chẹhị kaka yẹ ọwọ ọlẹ kọ chị dagaga ju ẹchị adịrahụ ọọwa. Ịna ọchịchị nyamwụ lala ịna nya ẹjwọ ọnyịịla-ọnyịịla ọhẹ ọlẹ kị wụrụ “ẹmaradị.”

⁴Ẹchị adịrahụ ohu kụrụ ine ịhyẹ juwa ịlẹ kị dagaga ju ẹchị Adịrahụ nya Ohe Oluhye, ká ịgabwọ angịnyị angị ohu kụrụ ine ịhyẹ hụhụ u-uhye nya ẹchị adịrahụ ịịwa. Ị kụrụ ịwụrụ inyiiwuru keri-keri ụ-ụwa. Ị kụrụ okpo nya adịrahụ ọlẹ kị kpa okpoko ịgọm-ịgọm kem họ ẹ-egbeju nyaa ịnyịnyị.

⁵Ụma nya ila ị-lala apya ịhyẹ juwa da myịrị-myịrị kpehe bwu uhye nya ẹchị Adịrahụ nya Ohe Oluhye ọọwa. Iru nya omyi o-ya ẹla lụmẹ-lụmẹ juwa kpehe bwu ụwa bala ịkata nya ịnyịnyị. Ila nya itinika irwiye ịhyẹ juwa wuru ị-ịlahị nya ẹchị Adịrahụ nya Ohe Oluhye ọọwa, ọlẹ kọ ku ọmwakpa nya olegu ọ-họ ụkụrwọ achẹ irwiye nya Ohe Oluhye juwa ụ-ụwa ịnyịnyị.

⁶Ihu ọtụka nya ịnyọ ịnyọ ọlẹ kọ juwa hụ́ myịrị-myịrị lala ahịgboo nya ila onyoowuru juwa mwụ ị-ịlahị nya ẹchị Adịrahụ nya Ohe Oluhye ịnyịnyị. Ụma nya ang ịlọhịhị ine ịhyẹ juwa dagaga ju ẹchị Adịrahụ nya Ohe Oluhye ọọwa bwu ịkịka wuu, ọlẹ ká ẹga myị́ ẹga nyaa wuu ri egbahị-egbahị tụ ịlahị bala ẹkpẹ nyaa wuu.

⁷Ang ọlọhịhị ọhọhẹ-ọhọhẹ lẹpwụ nyaa lala ugẹbẹ. Ang ọlọhịhị oheeye nyaa lala ẹna. Ang ọlọhịhị ọhata nyaa ju ahị lala ahị nya ọngịnyị ehe. Ang ọlọhịhị ohene nyaa lala idu ọchịnụ ọlẹ kọ juwa hụhụ.

⁸Ọnyọnyọọnyị lẹpwụ nya ang ịlọhịhị ịịwa ju achwọ ịrwọnyẹ ụ-ụwa. Ẹga myị́ ẹga nyaa wuu ri egbahị-egbahị myị́ ịnyịrọ-ịnyịrọ ju ka ẹpwụ-ẹpwụ. Ụkụrwọ nyaa ọlẹ kị kaa họ lodu bala alẹnụ la ịnyọ ọmwụmwụ kpong-kpong kaka kem ri eje ọlẹ kị juwa kaa mwu ịnyịnyịịnyị yẹkẹẹ, “Ịgọgọ, Ịgọgọ, Ịgọgọ, kaahụ Ọngọlahị Ohe Oluhye Agụgụ ka la pyịyọọ, Ahụ Ọngọlẹ ká juwa hịhị ene-ene, ká tị jam hịhị lẹẹlẹẹ, ká tị ka juwa hịhị gbe oyi myị́ oyi pyịyọọ.”

⁹Ohe Oluhye Ọngọlẹ kọ hụhụ u-uhye nya ẹchị adịrahụ nyamwụ, Ọwa Ọngọlẹ kọ juwa hịhị pyịyọọ gbe oyi myị́ oyi lẹ, ụka myị́ ụka ká ang ịlọhịhị ịwẹ á juwa gwogbo ha Ohe Oluhye ọọwa bala o-juwa ya ihi ọlala nyamwụ dodehe bala o-juwa ji Ohe Oluhye ọọwa obe ịnyịnyịịnyị lẹ,

¹⁰ịgabwọ angị ohu kụrụ ine ịịwa, a kaa hịda keji ị-ịlahị nya Ohe Oluhye ọọwa Ọngọlẹ kọ hụhụ u-uhye nya ẹchị adịrahụ nyamwụ, juwa gbịgba họọ, Ọwa Ọngọlẹ kọ juwa hịhị gbe oyi myị́ oyi, juwa nwụla ikpo ịkụrụ egbeju nya adịrahụ nyaa ịịwa wuu gu e-eji ị-ịlahị nya ẹchị adịrahụ nyamwụ, juwa mwu eje ịnyịnyịịnyị yẹkẹẹ,

¹¹“Ahụ Ọngọlahị Ohe Oluhye, Ahụ a ri Ọngọ ọchịla-chịla nya ịlẹhị-ịlẹhị nyọka ye ogbo bala ihi bala ọngịrị wuu lẹlẹ. Chajị, Ahụ a ri Ọngọlẹ ká họ ang myị́ ang wuu ilodehe ọlẹ lẹ. Bwula irya nyang, Ahụ Ohe Oluhye a tị lẹẹ kpa waa ịwa wuu kpa jaabwọ ká kpa irya nyang haa ene-ene bwu ọmwụ ọdada lẹ.”