Read idege ỌWỤRỤỤ-WỤRỤ 5 Bible Online

ỌWỤRỤỤ-WỤRỤ 5 - idege bible

ỌWỤRỤỤ-WỤRỤ 5

¹Am ịJọn chẹhị kaka yẹ ugba ọtụka ọhẹ ọlẹ kị da ụpwụ ba ẹ-ẹkpẹ oyiye-oyiye ene kịị wọọ aba lala ọba, ká ọngọlẹ kọ hụhụ u-uhye nya ẹchị adịrahụ olepwoohe ọọwa kpọọ ụ-ụbwọ nyamwụ. Ị chọọ ori mẹnẹ-mẹnẹ lẹ, ị kpa ọja jwọọ ẹjẹẹ ẹ-ẹga irwiye lẹlẹ.

²Ọọwa lẹ, m chẹhị kaka yẹ olegu-ẹrụ ọhẹ ọlẹ kọ la gogo lụmẹ kaka kpoye, kọ juwa ya ẹla dodehe gboo yẹkẹẹ, “Oowo a tị́ ka ri ọngọ ọchịla-chịla, ọlẹ kọ ka hị ịja ịlẹ kị kpa tụ ụpwụ ọlẹ ku myị́ kpá lẹẹ mẹ?”

³Ọngọngọhẹ á tị juwa e-epwoohe lee odehe ọlẹ lee e-ekpeleji nya odehe ọlẹ wuu lẹpwụ-lẹpwụ ka la ọngịrị nyọka wụrụ ụpwụ nya ugba ọọwa myị́ kpong-kpong kaka.

⁴Ụka kam yẹ ịnyị lẹ, m juwa jida ọtụka-ọtụka chajị nyọlẹ ká ọngọngọhẹ á ri ọngọ ọchịla-chịla nyọka wụrụ ụpwụ ọọwa myị́ kaka lee ọdọmwụ ka yọọ yẹ ẹ-ẹhị myị́ kaka lẹlẹ.

⁵Ọọwa lẹ, ọngọhẹ bwu ẹpwarịrị nya ịgabwọ ịlụwa a byim yẹkẹẹ, “ỊJọn, ba mẹ ẹnwa, a jida kaka. Chajị, Ugẹbẹ ọlẹ kọ bwu imwawụ nya iJuda ọlẹ kọ ri Ụtẹ nya iDevidi lẹ, ọ jam. Jaabwọ kọọwa ayịdang ri ọngọ kụrụ-kụrụ lẹlẹ, ọ ka la ọngịrị wụrụ ụpwụ nya ugba ọlẹ myị́ bala ọ-ka hị ịja irwiye ịlẹ kị ya tụ ụpwụ ọọwa ku myị́ ịnyịnyị.”

⁶M chẹhị kaka yẹ Ọnyị ọkpịlọ nya Ohe Oluhye ọlẹ kọ godayị rịrị ụ-ụwa ẹ-ẹpwarịrị nya ẹchị Adịrahụ nya Ohe Oluhye ọọwa bala iyo ịlọhịhị ine bala ịgabwọ ohu kụrụ ine ịịwa. Ọnyị ọkpịlọ ọọwa lala ị-nyaa nwọọ nwụ lẹ. Ọnyị ọkpịlọ ọọwa ju achụ irwiye. Ọ la egbahị irwiye ịlẹ kịịwa a ku ọmwakpa nya olegu ọ-họ ụkụrwọ achẹ irwiye nya Ohe Oluhye ọlẹ ká Ohe Oluhye ya du ẹrụ ka ẹga myị́ ẹga nya odehe ọlẹ wuu.

⁷Ịnyị, Ọnyị ọkpịlọ ọọwa a kele kaka ye ụpwụ nya ugba ọọwa bwu upwuriri nya Ọngọlẹ kọ hụhụ u-uhye nya ẹchị adịrahụ olepwoohe lẹlẹ.

⁸Ịnyị, ụka ká Ọnyị ọkpịlọ nya Ohe Oluhye ọọwa ye ụpwụ nya ugba ọọwa kpa ụ-ụbwọ lẹ, iyo ịlọhịhị ine ịlụwa bala ịgabwọ angị iwo imiiye kụrụ ine ịlụwa a hịda ka ịpyị ị-ịlahị nya Ọnyị ọkpịlọ ọọwa lẹlẹ. Ọng myị́ ọng lẹpwụ nyaa kpa ogum ụ-ụbwọ nyamwụ bala ịja i-ju ang ịkịlọlọ nya okpoko ịgọm-ịgọm ịlẹ kị ya ang ị-kpa kịla iya ochoru kwọkwọ ha Ohe Oluhye myị ẹpwụ nyaa, kị ku ọmwakpa nya abwọ ọrịrị nya angị ịgọgọ nya Ohe Oluhye.

⁹Angịịwa juwa mwu eje onyeewe ọhẹ ụ-ụwa yẹkẹẹ, “Ahụ Ọnyị ọkpịlọ nya Ohe Oluhye, ahụ a ri ọngọlẹ ká chịla-chịla, ká ka hu ụpwụ nya ugba ọọwa bala ọ-ka hị ịja ịlẹ kị ya bọọ ịnyịlẹhị lẹ. Chajị ahụ a ri ọngọlẹ kị nwụnwụ ká ya ịwọ nyang yẹ hụrụ nyọka ra ihi nya ọchịda nya angịnyị ehe wuu bwu ẹpwụ nya ịhọbịrị ha Ohe Oluhye lẹ, du ká chị angịnyị ehe da bwu ẹpwụ nya ụpwọma ọnyị myị ọnyị wuu bala oja ọnyị myị ọnyị wuu bala ebwo nya angịnyị ọnyị myị ọnyị wuu bala alepwoja ọnyị myị ọnyị wuu ilodehe ọlẹ lẹlẹ.

¹⁰Ọọwa lẹ, a họ ká angịịwa ayịdang ri ịdịrịhụ bala angịkiliya ha Ohe Oluhye nyahị lẹẹ lẹlẹ. Chajị kịịwa wuu a ka jẹ́-ẹ ri ịdịrịhụ igbeji tang ẹ-ẹpwụ nya odehe ọlẹ ịnyịnyị lẹlẹ.”

¹¹Ịnyị lẹ, am ịJọn a hu ẹhị hwaa lẹ, m chị ụrụ kaka wo omyi ẹla nya ang ịlọhịhị ine ịlụwa bala omyi nya ịgabwọ iwo imiiye kụrụ ine bala iru nya alegu-ẹrụ ụnọ ugbabwọ ụnọ chịba-chịba ụ-ụwa bala iru nya ụnọ imiiye da oụnọ bala ụnọ da ohu kụrụ iwo ugbabwọ ụka ọlẹ kị ka jẹ́-ẹ wawa myị́ kpá kaka lẹ. I juwa dọgịlẹ ju ẹchị adịrahụ olepwoohe ọọwa ịnyịnyịịnyị.

¹²Omyi nyaa ọọwa juwa yẹkẹẹ, “Ahụ Ọnyị ọkpịlọ nya Ohe Oluhye ọngọlẹ kị nwụnwụ chajị nya ịhọbịrị nya alodehe, ahụ a chịla ká ka ye ọngịrị wuu, bala ụdụ ọkpụkpụ wuu bala ẹla ọjẹ́jẹ wuu, bala ogogo ọlala wuu bala ihi ọlala wuu, bala ogbo nya ẹbyẹbyị wuu bala ahị ọwawa wuu lẹlẹ.”

¹³Ọọwa lẹ, m wo omyi nya ang myị́ ang ọlẹ wuu ká Ohe Oluhye họhọ ụ-ụwa e-epwoohe bala ịlẹ kị jam ẹ-ẹpwụ nya odehe bala ịlẹ kị juwa e-ekpeleji nya odehe ọlẹ bala ịlẹ kị juwa ẹ-ẹpwụ nya Ihu ịtụka wuu bala ang ịlẹ kị ji ẹpwụ nyaa wuu kị juwa yẹkẹẹ, “Ká ahị ọwawa wuu bala ihi ọlala wuu, bala ẹbyẹbyị wuu bala ọngịrị wuu, a juwa hang Ahụ Ọngọlẹ ká hụhụ u-uhye nya ẹchị adịrahụ, bala ahụ Ọnyị ọkpịlọ nya Ohe Oluhye, gbe oyi myị́ oyi pyịyọọ mẹ!”

¹⁴Ọọwa lẹ, iyo ịlọhịhị ine ịịwa a juwa yẹkẹẹ, “Amẹn”. Ọọwa lẹ, ịgabwọ angị iwo imiiye kụrụ ine ịlụwa a hịda ka ịpyị, juwa gbịgba ha Ohe Oluhye ụ-ụwa lẹlẹ.